1 Yohanes 5 - Eipomek

Allah el Mi Koprop Yesus ati, diba tenena yupu

¹ ‘Ninye mutuku-mutuku nirya lyeplirye, taliplibuk, dobolbanamaknye, Yesus eluk ulule’ tenen, diba tenenyak ninye nirya ara, sik kanye tenen ning ap, sik talima ap, dipna atouk ulamuk bukni, Allah arye akunum kam bukeibuk. Tonda nun Na ni Allah ati, sik kanye deibice ninye nirya ara, el Mi Koprop babye, sik kanye deilinyake.

² Allah el mapu ati, ‘Dipkoprop bico tenenyap do, kum do?’ tenen, teniltonauk unyaba ati, aning kel kinyabe ning nyapnusine. ‘Allah el mapu ati dipkoprop bico tenebuka melinyabe’ tenen, kel kinyap deiyok ning ara, ani. Ara, Allah ati nun kanye deibuka, eluk talibibirye, el nyasilye yupu nirya kekebuka dobolbalamibya deice aryuk, kel kinyabe.

³ Dipkoprop Allah ati kanye delinyaba ara ani. Ara elce, “Wininamlulume,” nyasilye yupu nirya ara, ‘Diba’ tenen, kekebuka dobolbanyabe atia. Yuk ning ton kume. El yupu kekebuka dobolbalamtibya deice aryuk, “Allah ati kanye delinyabe,” nyaptibye.

⁴ Yata ninye do, nirya, sikce diba tenebikbuk, Allah arye sik talima kam bukeibuk ninye nirya ara wininyake. Ara, talye diba tenena kum ninye, sik wininyak ning ap, tenen ning ap, patalamle ning ap, diba tenena ninye arye, aning nirya yaniptabik. Allah diba tenenyak nang arye, tukwak malye ning ara, akunum yaniptabik ati, ‘Allah el yupu nirya dobolbana ara, ikine usulule,’ kum tenenyake. Allah el yupu uk dobolbanyake. Allah arye sik kanye tenen ning ap, talima ap, akunum kam bukeibuka ati, Allah el yupu kanam aryuk dobolbanyake. Ikine kume. Amalye winina nirya yaniltana deiyok ning ara, nun diba tenebibya deice aryuk, aning nirya bisibuka yaniltanyabe.

⁵ Talya tukwak malye ning nirya bisibuka yaniltakalinye bira, yatanye do? Ara, ‘Yesus elda Allah el Mi Koprop ulule’ tenen, diba tenebuka ululnye uka. Yuk nang ton kume.

⁶ ‘Yesus Kristus elda, dipkoprop Allah el Mi Koprop ulule’ tenen, kel kinyaba deiyok ning ara ani. Ara, Yohanes arye, Yesus mek dongobukba winibuk ning ap, sikce Yesus obikbuk, el ining biyuk ning ap, abitinye ning deice arye kel kinyabe. ‘Yesus ara, Allah el Mi Koprop ulule,’ tenenyaba ara, tonok ning deice aryuk kume. Yohanes arye Yesus mek dongobukba winibuk ning ap, sik obikbuk ining biyuk ning ap, abitinye ning deice arye, diba tenebuka kel kinyabe.

⁷ ‘Yesus Kristus, elda Allah el Mi Koprop ulule’ tenen, lakak kel kina ning ara, winilye ulule. Tonok ning ara, Allah El Dib Kanye arye ayupu nyasulule. Tonda, Yohanes arye Yesus mek dongobuk talak anyapce, Yesus ara, pil dobuka balamuka ani, obikbuk, im deice welebuk ning nirya deice arye ton kel kinyabe.

⁸ Awinilye ning kel kinyap deiyok ning ara, Allah el kanye ap, Yohanes mek dongobuk ning ap, Yesus ining biyuk ning ap, awinilye ning arye neika atonun nyasulule. Ansinibuka neikto ning nyalula ati, ‘Allah el Mi Koprop ara, Yesus el uka’ tenen, kel kinyabe.

⁹ Ninye talye tukwak ninye arye yupu nyapsikceba, sik yupu kekebuka diba tenenyabe. Wininyap bukni, Allah arye Allah yupu deice arye nyasilye yupu ara, mambul weik. Talya nang nyanyak yupu ara mitikuka. Allah arye el Mi Koprop ati, laka nyabuk yupu ara, Allah el bidamnang nyabuka arepsuka ati, el yupu ara mambul weik.

¹⁰ Allah el Mi Koprop ati, diba tenebuka talinyak ninye ara, Allah arye el Mi ati nyasilye yupu, sik talima ak ulule. Allah arye nyasilye yupu, diba kum tenenyak ninye ara, “Allah elda tililanye ulule,” nyalamak touk unyake. Ara, anggunda Allah arye, el Mi Koprop ati laka nyabuka arepsuk yupu, diba kum tenenyaka ati nyapne.

¹¹ Allah arye el Mi Koprop ati, laka nyabuka arepsuk yupu ara ani. Allah arye pia kam una deiyok ning akunum arepsuke. Akam una deiyok ning ara, el Mi Koprop Yesus deice aryuk arisulule.

¹² Allah el Mi Koprop Yesus diba tenebuka talilinye bira, kam pia unamle. Allah el Mi Koprop Yesus diba tenena kumce, Yesus kum talilinye bira, kam pia kum unamle. Atonye bira, nong yok dem ulula ati, Yesus el ap neika kam kum unamdake.

Allah morona ati, nyabuk yupu

¹³ Ara, anggunda, ‘Allah el Mi Koprop diba’ tenen, talibuka ululum ninye ara, ‘E, nunda dipkoprop kam pia unamap’ tenen, ‘Kanye bokoltona kumce, dipkoprop kel kipmunce, talima tunim abuka unamlum’ tenen, na Yohanes arye anggun ati, ayupu seksene.

¹⁴ Nun Allah morobye talak nirya ara, kanye bokoltona kumce, dipkoprop akunum tenenyap ning nyapnusine. Ara, Allah arye, ‘Aning telebe. Narye wininamne. Sikda, winipnamake,’ tenesilye touk, Allah morobibyopura, Allah kekepsilirye, melisulule.

¹⁵ Aning atouk, nun kele. Yata ning do, nirya, nunce Allah ati, morobibyopura, Allah dipkoprop amul arye kekesilya ati, kekesilya deice arye, nun morobibye ning nirya, dipkoprop aribnamsilca.

¹⁶ Ara Allah arye wenebuka oltakasulul atonun, malye una ning kum bukni, yatanye do nirya, el mening dam ululnye birye malye ulamlye bukni, eiplyopura, amalye ulamlenye ati, Allah moronamlule. Allah moroplyopura, Allah arye amalye ulamlenye ati, lyebuka deiplibuk, kam unamle. Na nyapmasi ning ara, sik malye wininyakba, Allah arye wenelul bukni, amalye winilamikibuk kum olye ning ati, nyapne. Ton yala malye winilamice ning ara, aminyan ara Allah arye oblyeba, dibinyake. Amalye winilamice ati ning ara, Allah moronamlume kum nyapsine.

¹⁷ Malye winina ning ara, ani. Ara, Allah yupu yaniplobuka, malye winilamice ning nirya ati, nyapne. Tonda, ninye arye, malye winina ning, malye winipmaceopura, Allah arye anang ati, wenelul bukni, pia kum dibinyake.

Allah arye kam bukeipsuke ninye, nun unyap ning ati, nyabuk yupu

¹⁸ Nun kele, Allah arye sik talima kam bukeibuk ninye nirya ara, tuba-tuba malye kum wininyake. Allah el Mi Koprop wibuka deibuknye bira, Yesus, elce aninye ati, ‘Malye winibicak’ tenen, pia melibuka kalikilule. Yesus arye sikti, winiplyopura, pia Malye Deiyoknye, Isa Mutuku Dongonye, malye kum kipdeipsutue. Ton, dalubuka kum dopropsutue.

¹⁹ Ara, ‘Allah el mapu unyabe’ tenen, akunum kel kibupu bukni, talye tukwak ning nirya ap, Allah diba kum tenenyake ninye nirya ap, Malye Deiyoknye, Isa Mutuku Dongonye, elce moubuka talilya deice arye, anang nirya el yupu uk kekebuka unyake.

²⁰ Ton kel kibupu ning, ton nyapnusine. Ara, ‘Sikda Pia Dib Koprop Allah, diba tenebuka talipnamake’ tenen, Allah el Mi Koprop Yesus yayukce, kel kina deiyok ning akunum arepsuke. Pia Dib Koprop Allah ap, nun ap, talima dukdongopsukba neika unyabe. Aninguk kume. Allah el Mi Yesus Kristus el bidamnye ap, nun ap, talima dukdongopsukba, neika unyabe. Yesus Kristus elda, Dib Koprop Allah el nong tonok ulule. Tonda, elda, Pia Kam Una Deiyoknye ulule.

²¹ Na mapu atouk ninyeo, narye anggunti bico tenesunune. ‘Aning ara, Allah atonun ulule, tenebikirye melipnamsil’ tenen, talye si si nyabuka erenyak ning nirya ara, anggunce pia batakanamlulume. Aning kum talinamlulume. Leibuka yuk akuk unamlulume. Telebe na Yohanes arye akunum nyapne.