1 Yohanes 4 - Eipomek

‘Tilila yupu peteresinyak’ tenen, “Sik nyanyak yupu nirya, ‘Dip do, tilila do?’ tenen, maka meilenamlulume,” nyabuk yupu

¹ Na kayapu, Allah el dipkoprop yupu kum bukni, yuk tilila yupu dobuka peterelbanyak nang weik unyake. Atilila yupu peterena nang arye, mutuku-mutuku nirya akunum yangasinyake. Aning ati ara, na kayapu, anang arye, “Allah el Kanye arye nyapnuk yupu nyasinyabe,” nyabuka talye nyaltakanyak yupu ara, ayupu kekebuka, diba kum tenenamlulume. Talya luba kibuka diba tenena kume. ‘Allah El Dib Kanye arye nyapdeibukura, peterenyak do, kum do?’ tenen, ninye arye nyanyak yupu nirya ara, winipnamlulume.

² ‘Dip do tilila do?’ tenen, maka melenamlum ning ara, laka nyapnusine. Ara, dipkoprop Allah el kanye mikip deice nyasinyaka ara, lakak kel kina ning ani. ‘Yesus Kristus ninye nong atonun ubuka akunum yayuke’ tenen, diba tenebuka lakak nyanyak ninye ara, Allah el kanye mikip deice nyanyaka ati, Allah el mapu unyake.

³ Aning atonun kum bukni, sikce, “Yesus tukwak yayuk bukni, ninye nong atouk nonge kume. Aning ara, dipkoprop kume,” tenebikirye, nyanyak ninye ara, Allah el kanye mikip deice arye kum nyanyake. Pia kume, sik yuke. Ayupu nyanyak nang ara, Yesus Kristus Yanipnamle Deiyoknye, el mikip deice arye sik taliplibuka nyanyake. Ara, “Yesus Kristus Yanipnamle Deiyoknye, aminyan ara yanamlarya,” nyalamikbuk, kekelamlumnye bira, anye uka. El akunum yayukce tukwak tam balule.

⁴ Na mapu atonun nango, anggunda Allah ati, diba tenebuka taliplum nang ara, anggun talima ak usilinye, Allah, el mikip pia weik ulule. Bukni, tilila yupu peterenyak nang nirya, sik talima ak ulirye, talilinye bira, Isa Mutuku Dongonye, el mikip mitika. Ati ara, Allah el mikip deice talisilibuk, ululuma anya arye, Isa Mutuku Dongonye, el talilye nang nirya, akunum yanibuka bataklulume.

⁵ Tilila yupu peterenyak nang ara, sik ni Isa Mutuku Dongonye talilya deice arye, el tenelul ninguk tenebuka yupu nyanyake. Isa Mutuku Dongonye el tenelye ninguk tenebuka nyanyaka ati, yuk talye kanye bonyak nang arye, ayupu kekenyake.

⁶ Bukni, nunda, Allah el mapu unyabe. El mikip deice ubirye, yupu nyalamibibuk, Allah diba tenebuka pia talinyak ninye arye, nun yupu kekesinyake. Allah el mapu kekesinyak bukni, diba tenena kumce, Allah kum talinyakce unyak ninye ara, nun nyanyap yupu pia kum kekesinyake.

Allah weika arye bicoe tenesilye touk, nun bicoe tenebuka, melilanauk unamaba ati, nyabuk yupu

⁷ Na kayapu, nun nirya arye, bico tenebuka melilanauk unamabe. Ara, bico tenena ap, melina ap, deiyok ning ara, Allah arye arisulula ati, nyapne. Anggunce yuk ninye ati, bico tenebuka makulamak ninye ara, Allah arye sik kanye tenen ning, akunum kam bukeibukura, sikce ‘Allah diba’ tenen, talibuka unyake.

⁸ Allah ara, pia bico tenelulnye ulule. Allah ara winilula ati, yata nang do, nirya, sikce yuk ninye ati, bico tenena kumce, kum melinyak ninye ara, Allah diba tenebuka kum talinyake.

⁹ Allah arye utenebuk. ‘Yesus pil dopnamle deice arye, sik pia kam bukuka, Yesus mikip deice unamak’ tenen, Allah el Mi Koprop tonokuk ulamuk bukni, nun tukwak mutuku noutamak, nun tukwak nang nirya ati, Yesus akunum arepsuke. Yesus arepsuka deice arye, ‘Allah arye nunti, pia bico tenesulule’ tenen, kel kinyabe.

¹⁰ Dipkoprop bico tenena ning ara ani. Ara, nunce mankau ulamuburye, Allah ati kanye kum diamube. Winilamubu bukni, nun malye unyap ning nirya awamukbuk, ‘Sik pununa ati, Na Mi Koprop Yesus obikce deice arye, sik malye ning punupnamle’ tenen, Allah elce bico tenepsukce, el Mi Koprop arepsuke. Winipsuka ara, dipkoprop bico tenena ning ara ati, nyapne.

¹¹ Ara na kayapu, Allah arye nunti, weika arye pia bico tenepsuka ati, nun babye bico tenebuka melilanauk unamabe.

¹² Yata nang do nirya, ninye arye Allah el nong babye kum elilamubu bukni, nunce bico tenebuka melilanauk winibibyopura, Allah nun talima noutamak usulule. Tonda winibibyopura, elce bico tenena deiyok ning arisilibuk, nun talima ak usilirye, wisisulule.

¹³ Allah arye el Dib Kanye akunum arepsuka deice arye, ‘Allah ara, nun talima ak usilirye, nun ap, Allah ap, dukdongobuka neika unyabe,’ akunum tenenyabe.

¹⁴ Tonda, nun ni Allah arye, ‘Na Mi Koprop ninye mutuku-mutuku nirya lyepnamle,’ tenebuk ning ap, utenebukce Yesus dokwetepsuke deice arye batakukbuk, eibupe ning ap, ayupu bitinye tuba laka nyanyabe.

¹⁵ Yata nang do, nirya, ‘Yesus ara Allah el Mi Koprop ulule’ tenen, diba tenebuka, talibikirye lak akarye nyanyak nang ara, sik talima ak Allah uplibuk, sik ap, Allah ap, talima dukdongobuka neika unyake.

¹⁶ Ati ara, Allah arye nunti, bico tenesilye ati, nun ninye tukwak nang arye, ‘Allah el deice dibuk melinamsil’ tenen, Allah el nong deiceuk kanye delinamabe. Allah ara ninye ati, pia bico tenenauk ulule. Allah bico tenelul touk, sikce yuk nang ati, pia bico tenebuka unyak ninye ara, Allah sik talima ak uplibuk, Allah ap dukdongobuka neika unyake.

¹⁷ Ninye mutuku-mutuku nirya ati, Allah arye wenebuka yupu bokeipnamsil talak ara, ‘Sik ilil kumce, talye kanyeuk bopnamak’ tenen, bico tenena deiyok ning arisilibuk, ulirye, nun talima ak wisisulule. Ara, nun tukwak unyap talak nirya ara, Kristus el ulye touk, nun babye unyaba ati, nyapsine.

¹⁸ Nunce yuk nang ati, bico tenebuka, talima dukdongobibyeopura, ‘Olyanamsiak do?’ tenen, ilil kum unamsile. Tonda, nunce Allah el deice kanye deibibyopura, Allah ti, ‘Wenebuka opnamsil do?’ tenen, ilil kum unamsile. Ilil una ara, ‘Wenebuka opnamsiake do?’ tenen ning ati, dipkoprop bicoe tenena deice arye, ilil tenena ning nirya ara, sekelongolule. ‘Allah arye opsilyak do?’ tenen, ilil tuba ululnye bira, el bico tenena deiyok ning ara, min kum wisibuke.

¹⁹ Allah arye nunti, minpola bico tenebukce melipsuke ati, nun babye aminyan uk, Allah el deice kanye deibibirye, yuk nang ati, bico tenebuka melilanyabe.

²⁰ Yatanye do, nirya, “Nara, Allah ati kanye delinune,” nyalul bukni, elda mening dam ninye ati, bico tenena kumce, like tenebuka, kum melilinye bira, anye bira, winilye ning ap, el nyalye ning ap, anirya tililanyeuk ulule. ‘Aning ara yata ati do?’ tenena kume. Ara mening dam unyakba dilye ninye bukni, bico kum tenelule. El mening dam dilye ninye bicoe kum tenelula ati, el asing arye kum dilye ning ara, bico kum teneptue. Ati ara, Allah el dam aulyeba, elce kum dilulnye anya arye, Allah ati, kanye kum deiptue.

²¹ Tonda, Allah arye, “Wininamlulume,” nyapsuk yupu ara ani. “Ara, Allah ati kanye deilinamlum ninye nirya ara, adiparyuk anggun mening dam ninye babye, bico tenebuka melinamlulume,” nyabuka nyapsuke, nyapne.