1 Yohanes 3 - Eipomek

Nun ni Allah arye nunti, weik arye bico tenesilya ati, nyabuk yupu

¹ Na kayapu, na mambul yupu nyapnuna ara, kekepnululume. Nun ni Allah arye bico pia weike tenesulule deice arye, el mapu kilisulule. Winisilye ara, talye kume. Dipkoprop Allah arye el mapu kilisulula ati, dipkoprop el mapu unyabe. Talya unyak ninye ara, Yesus diba kum tenebika ati, sikce nunti ning ara, ‘Sikda Allah el mapu unyake’ tenen, diba kum tenesinyake. Sik babye Allah mapu dipkoprop diba tenebuka kum unyake.

² Na kayapu na kanye deipsine. Wini talak ara, Allah el mapu unyabe. Aminyan nun nonge unamaba ara, min kum laka nyapsike. Bukni, nun kele. Yesus el yanamle talak ara, el nong babye, el ulul ning babye, dipkoprop ulye touk eipnamaba ati, nun babye el ulye touk unamabe.

³ Yesus ulye touk unamabe, diba tenebuka pia dinyak ninye nirya ara, wininyake. Ara, ‘Kanye talima malye upnilyak’ tenen, kanye bokoltona kumce, malye winina ning nirya pia batakanauk unyake. Ara, ‘Yesus teleb-teleb ulye touk unamap’ tenen, unyake.

⁴ Malye unyak ninye ara, sik malye tenena ap, malye winina ap deice arye, Allah arye, “Winina meme,” nyabuk yupu yaniltanyake. Dipkoprop malye winina ara, Allah yupu yaniltana.

⁵ Bukni, anggun kele. Nun malye tenenyap ning nirya ap, malye wininyap ning nirya ap, Yesus arye, ‘Kum daneipnamne’ tenen, yayuke. Tonda, Yesus el talima noutamak malye un ning tonok babye kum ulule. Telebuk ulule.

⁶ Yesus diba tenebuka, el ap neika unyak ninye ara, tuba-tuba malye kum unyake. Sik tuba malye upra banyak ninye ara, Yesus kum elilamik. Tonda, Yesus diba tenebuka el bidamnye kum kel kiyamik.

⁷ Na mapu kekeplulume. Yuk nang arye, ‘Nun peterenyap deice arye, nun tamuk dobolyasitinge,’ tenesinyak ninye nirya ati, siktilila yupu kum kekenamlulume. Yata ninye do, nirya, sik unyak ning diksukumuk ubuka unyak ninye ara, teleb nanguk unyake. Ara, Yesus el bidamnye diksukum ulye touk, unyake.

⁸ Aning atonun, yata ninye do nirya, sik malye-malye wininyak ninye ara, Isa Mutuku Dongonye, el mapu uk, pia tuba unyake. Yata ati do, kume. Ara, Allah arye, aning-aning nirya kweipdeibuk talak bukni, anoutam talak nirya ara, Isa Mutuku Dongonye arye, Allah yupu yanibukce, malye ulamuk touk, tuba ulula ati, el mapu ababye, atonun wininyake. Allah el Mi Koprop arye, ‘Winipnamne,’ tenyamukce, yanamuka deiyok ning ara, ani. Ara, ‘Isa Mutuku Dongonye el malye winina nirya ap, malye pil dolamle ning nirya ap, kum ubuka deipnirye, dobuka donoknamne’ tenen, Yesus yayuk.

⁹ Allah el lyeplirye, winiryuk kanye tenen ning ap, winiryuk talima ap, dongolul ninye ara, Allah el kanye sik talima ak tuba ulula ati, aninye arye tuba-tuba el yupu yanibuka, malye kum uptinge. Sik kanye tenen ning ap, talima tenen ning nirya ap, Allah lyebukce winibuk ninguk akunum arepsuka ati, sikce tuba malye kum uptinge.

¹⁰ Ura ton ninye ara, Allah el mapu unyake. Bukni, ‘Yuk ninye ara, Isa Mutuku Dongonye el mapu unyake,’ tenebuka, kel kinyap deiyok ning ara ani. Ara, Allah el yupu nyalye touk, kekebuka kum dobolbanyak ninye ara, Allah el mapu kum unyake. Tonda, aning atouk, yata nang do, nirya, sikce yuk ning ati, bico tenena kumce, kum melinyak ninye ababye, Allah el mapu kum unyake. Na Yohanes arye nyapne.

Kanye deipdanuka, melilanamaba ati, nyabuk yupu

¹¹ Anggun diba teneplum talak anyapce, atalak nirya kekelamlum yupu ara, tonap nyapnusine. Ayupu ara ani. Nunce bico tenebuka melilanauk unamabe, nyapsine.

¹² Ura Kain ara, Isa Mutuku Dongonye el yupu kekenanye ulamukce, el weit koprop Habel oplobukce, winilamuk touk kum wininamlulume. Kain arye el weit koprop oplobuk ning ara, yata ati do? Deiyok ani. Kain el winilamuk ning nirya, malyeuk winilamuk bukni, el weit koprop Habel ara, diksukumuk winilamuka ati, Kain arye yu ubukura, Kain arye Habel oplobuk.

¹³ Ati ning ara, na weit yapu atonun nango, sik Yesus diba kum tenenyak nang arye, “Nun like,” nyabuka yu arye uplibuk, malye upsikcopura, lukdanuka kum teniltonamlulume.

¹⁴ Yata ninye do, nirya, sikce yuk nang ati, bico tenena kumce, kum melinyak ninye ara, kam una deiyok ning kum doprobikura, sik talima ak kum ulule. Sik pia talye dipnamak ninye, talye nonguk tuba unyake. Bukni, nunda anang atouk kum unyabe. Minop arye nun kanye tenen ning ap, talima ap, dipna atouk ulamubu bukni, wini talak ara, Yesus arye akunum kam bukeipsuke. Pia kam unamaba ati, ila tamubuka tonap, kum dipnamabe. Aning kel kinyaba deiyok ning ara ani. Ara, nunce yuk nang ati, kanye deipdanuka, bico tenebuka melilanyabe. ‘Bico tenebuka melinyaba deice arye, ila tamubuka tonap kum dipnamape’ tenen, kel kinyabe.

¹⁵ Ninye nirya, sikce yuk nang ati, like tenebikirye, yu ubuka wilibuka unyak ninye ara, ninye on ninye atonun unyake. Tonda, anggun kele, ninye onyak nang ara, pia kam una deiyok ning sik talima ak kum ulule.

¹⁶ Ara talye ning ati kume. ‘Bico tenebuka melina ara, pia dib dipkoprop ning dan ning do?’ tenena ati, Yesus arye el winilamuk ning tenepnululume. Bico tenepsukce, ‘Sik kum dipnamake’ tenen, nunti dibukce, lyepsuk. Aning ati ara, nun babye utenenamabe. ‘Nun winipsilye ning nirya ap, nun wininyap ning nirya ap deice arye, nunce yuk nang ati, bico tenebuka melilanauk unamabe. Aning-aning nirya babye, nun na tenen tenena kumce, yuk nang ati melilanauk unamabe. Nunce yuk nang ati, melilamibya deice arye, nun dibibya babye, opsica babye, telebe uka,’ tenepnamabe.

¹⁷ Yata ninye do? Yuk talye kankan ninye, sikce aning-aning pataplyeba, aubuk ning nirya talibuka unyak nang arye, asing arye eibikce bukni, pia bico tenena kum ati, kum melinyake. Winilamak ninye ara, Allah arye ninye ati bico tenesilye touk, anang ara yuk ninye ati, yata ubuka bico tenepting do? Kume. Allah arye ninye bico tenena arisilye ning ara, sik talima ak kum ulule.

¹⁸ Na mapu, nun nirya arye yuk nang ati, “Nun bico tenebuka melinamsiabe,” nyabuka, talye yupu deice aryuk kum nyaltanamnyabe. Aning ara kume. Allah yupu deice nyasilye touk, dipkopropuk yuk nang ati, bico tenebuka melinamabe.

¹⁹ Allah ara, aning-aning nirya kel kiyamukce, el weik kele arye tenelul ning ara, pia weik ulule. Nun kanye tenen ning noutamak arye, malye ning usilye bukni, Allah arye, “Kume, nati akunum diba tenebuka na nong deice sik kanye akunum deipnike. Ati, sik talima malye ulul ning ara, tuba-tuba kum tenenamne,” teneplirye, talye kanye dosulule.

²⁰ Tonda, ninye melilamibya deice arye, Allah moron talak do, nunce, ‘Se, nun unyap ning nirya ara, Allah elisulule,’ tenenyap talak do nirya, alye kumce, talye kanye deibuka Allah ati moronamabe.

²¹ Na kayapu, nun bidamnye kanye arye, ‘Na malye unune’ tenen, alye asa arye kum tenepdabyopura, Allah moron talak do, el damto unyap talak do nirya ara, alye kumce, teleb kanyeuk bobuka, talye mangkau Allah moronamnyabe.

²² Tonda, Allah arye, “Wininamlulume,” nyasilye yupu nirya moubuka kekebuka dobolbabirye, el kanye deililul piluk donyabe. Winibibyeopura, yata ning do nirya, nun patapsil ning, ‘Elce melipnusil’ tenen, Allah ati morobibyopura, kekepsilirye, aning nirya arisilibuk, dolonamabe.

²³ Ara Allah arye, “Wininamlulume,” nyalul yupu ara ani. Tonok ning ara, Allah arye, “Na Mi Koprop Yesus Kristus diba tenenamlulume,” nyasulule. Ton ning ara, Allah arye nyapsuk touk, “Anggunce bico tenebuka melilanauk unamlulume,” nyasulule.

²⁴ Yata ninye do, nirya, Allah arye, “Wininamlulume,” nyasulul yupu kekebuka dobolbanyak ninye ara, Allah ap dukdongobuka, neika unyake. Tonda Allah sik talima noutamak ulule. ‘Allah dipkoprop nun talima noutam usulule’ tenen, kel kinyaba deiyok ning ara ani. Ara, Allah El Dib Kanye arepsuka deice arye kel kinyabe.