1 Yohanes 1 - Eipomek

Pia Kam Una Yupu ap, nun ap neika unamaba ati, nyabuk yupu

¹ Na Yohanes arye ayupu seksene. Ara aning-aning nirya kum uamuk talak, Allah el Kam una Yupu dobuka yanamuknye, Yesus ulamuk. Im deice ei ulamuka ani, tukwak mutuku yayuk talak ara, aulamukce, yupu nyalamukbuk, kekelamubu ning ap, nun asing arye elilamubu ning ap eibuka, nun taruk arye talilamubu ning ap ara, aning-aning nirya ara, anggunti laka nyabuka peterenyabe. Apeterenyaba ara, Kam Una Deiyoknye, Yesus, elti, nyasinyabe.

² Kam Una Deiyoknye, Yesus tukwak mutuku yayukba, eibupopura, Yesus arye nun 12 nang wipdeiamsuke. Winyamsuk talak arye, el ulamuk ning nirya ati, laka nyabuka peterenyabe. Pia Kam Una Deiyoknye bira, el Li Allah ap neika deiulamrik bukni, nun dam yayukura, elilamupe. Elilamuburye, tonda, Pia Kam Una Deiyoknye, Yesus ati, laka nyabuka peteresinyabe.

³ Nun ap, anggun asurat eiplum nang ap, ‘Nun nirya arye kanye tonok tenebuka, ansinibuka unamap’ tenen, nun elilamubu ning ap, yupu kekelamubu ning ap ara, anggunti laka nyabuka peteresinyabe. Ura nun kanye tonok tenebuka, ansinibuka unyap nang ara, nun ni Allah ap, el Mi Yesus Kristus ap, dukdongobuka neika unyabe. Nun ap, nun ni Allah ap, el Mi Yesus ap, kanye tonok tenebuka, kanye talima dukdongobuka unyabe.

⁴ Wini talak sekmap yupu ara, ‘Nun nirya arye kanye pia deibuka telebuk unamap’ tenen, sekmabe.

‘Pia malye winina kumce, dirinak atouk unamnyap’ tenen ati, nyabuk yupu

⁵ Yesus arye peterepsukbuk, kekelamubu yupu ara nyapnusiabe. Ara ani. Allah ara pia dirina weiknye ulule. El ulul ning ap, tenelul ning ap noutamak ara, malye winin ning pia kume, diksukumuk ulule. Kunukna atouk ning ara, pia kum ulule. Allah ara winilula ati, Yesus arye, “Allah ara pia dirina weiknye ulule,” nyabuka peterelamsuke.

⁶ Ati ara, nunce, “E, Allah ap dukdongobuka ansinibuka unyabe,” nyabuka, talye nyaltaklamtibye bukni, tuba-tuba malye winilamibyeura, ara tililauk nyanyaba anya arye, kunuknak atonun tuba unyabe. Tonda, winibibyopura, Allah el dipkoprop yupu kekebuka kum dobolbanyabe.

⁷ Aning atonun kum bukni, Allah malye winina pia kumce, dirinak ulamle touk, nun babye, malye winina kumce, telebuk ubirye, dirinak atouk ulamibyeura, nun nirya ap, tonok kanye tenebuka, ansinibuka unyabe. Allah el yupu uk kekebuka, dobolbabyeura, Allah el Mi Yesus, el ining arye, nun malye tenenyap ning ap, malye wininyap ning nirya ap, kum ubuka deipsilirye, lyepnamsile.

⁸ Nun nirya arye, malye winin ning tuba aupmasilibuk, “E, na pia malye kum wininune,” nyabuka, talye nyaltakanyap bukni, nyabibyopura, ara nunce nun bidamnye atibuk, talye duknubuka nyalanyabe. Tilil yupu uk, nyalanyabe. Tonda, winibuka nyabibyopura, Allah el dipkoprop yupu, nun kanye talima noutamak kum usulule.

⁹ Bukni, nun malye tenenyap ning ap, nun malye unyap ning ap ati, “Kume, aning ara na dipkoprop malye winipse,” lak akarye laka nyabuka, amalye winina ning dipkoprop batakipyopura, Allah arye kum batakasulule. Nun winilamibye touk wibuka, yupu yuk-yuk bokuka delisulule. Allah arye nunti, ‘Sik malye winilamice bukni, aning tonok, adiparyuk kum opnusine’ tenen, bataksilirye, talye kanye dolule. Winilirye, Allah arye nun malye winilamibye ning nirya ati, kum daneipsilirye, amalye ning ati, ila tamubuka tonap kum tenesulule. Nun malye ning namin kipsilirye, telebuk ulisulule.

¹⁰ Allah arye ninye mutuk sirya im sirya nirya ati, “Sik nirya malye unyake,” nyabuke. Nyabuka ati, nunce, “Kume, nunda malye kum unyabe,” nyabibyopura, talye kanye bon nang arye, “Allah tililanye ulule,” nyalamak touk, nun babye atonun nyanyabe. Nyalamibyopura, Allah el yupu kekebuka, pia kum talinyap anya arye, el yupu nun talima ak kum usulule.