1 Timotius 5 - Eipomek

Wisi nang ap, wisi kilapu ap, youwak kilapu ap ati, nyabuk yupu

¹ Ara, yuk yupu ton nyapnukine. Wisi nang ati ara, mikip arye wenena ap, derelana ap, meme. Aning kum bukni, ‘Anang ara, na ni yapu atonun unyak,’ tenebuka, nimalye arye, “Naio, winina telebe,” nyabuka, peterenalyame.

² Yuk kam nang atonun unyak ninye ara, ‘Na weit yapu atonun,’ tenebuka unamlyame. ‘Wisi kilapu ara, na nin yapu atonun,’ tenebuka, namin arye unamlyame. Yuk kam kilapu ati ara, malye tenena ap, malye winina ap, pia kum arye, ‘Na weit kilapu atonun unyake,’ tenepmince, telebuk wininamlyame.

³ Sik dipkoprop youwak kilapu unyakbuk, yuk nang nirya akunum batakamikibuk, sik yuk unyak youwak kilapu ara, kibuka melinalyame. Timotius, ance yuk ninye nirya ati, ayupu peterenalyame.

⁴ Wininalam bukni, dan youwak kilapu do nirya, sik mapu ap, sik mapu arye deiamikce mapu ap, tuba ulamicopura, talye parabuka melina kume. Ayouwak kilapu, sik mapu nebikcopura, sik adiparyuk sik babye, sik nin yapu koprop ati, melinamake. Ara, minop kel bikting ning ara, ‘Allah dib tenenyaba ati ara, talye kum nyaplopnuyabe’ tenen, kel biknamake. Allah diba tenen ninye arye, sik tam ninye nirya ati, melilamak atonun, ‘Nun babye wininamap’ tenen, kel biknamake. Winipnamaka deice arye, anggun ni yapu ap, anggun nin yapu ap arye, sik mitik talak, bico tenebuka melilamsik atonun, anang pununa ati, kam nang arye sik nin yapu ap, sik ni yapu ati adiparyuk melinamake. Tonda, winipnamake nyabuka, Allah arye pia kanye deilinamsile.

⁵ Yata youwak kilapu do nirya, el melin nang ap, el mapu ap, dipkoprop kum unyakbuk, aning-aning pataplyopura, utenelule. ‘Kume, Allah eluk melinamsil’ tenen, dib tenebikirye, keting noutam babye, lukunyan babye, “Na ni Allah melipnilyame,” nyabuka, Allah pia moronyake. Kum batakanyake.

⁶ Bukni, yata youwak kilapu do nirya, ‘Kume, na kanye deibuka unye ning ap, aning-aning weik dopropnune,’ teneplirye, dilana ap, ulul kil ara, kam tuba ulul bukni, akunum dibinyak ninye atonun ulule.

⁷ Aning ati ara, yata nang do nirya, ‘Mankau kanye bobuka malye winibikcak’ tenen, anyapnukin yupu bobuka ninye nirya ati peterenalyame. Ara, ani.

⁸ Yatanye do nirya, weik ilil ning ara, el li koprop ap, el lin koprop ap, el kil ap, el mapu koprop ap, sikuk kum bukni, el yala nang ap, el aik neika ulamak nang ap, aninye nirya, sik pataplye ning ati, bico tenebuka kum meliplyeura, pia malye. Winiluluma ara, Allah yupu yaniltana ap, Yesus batakna ap, atonun ulule. Yesus dib kum tenenyak ninye ara, mitik malye wininyak bukni, atonye bira, pia weik malye ulule.

“Youwak kilapu melina ati, sik si ara, Allah yupu aik ninye si sekna buku noutam sekuka, deipnamlulume,” nyabuk yupu

⁹ Ara, Allah yupu asik buku noutamak youwak kilapu melinamluma ati, si sekna ati ara, anyapnukin ning wininyak kilapu, sikuk si sekna telebe. Sik wisi danana ara, keting tamun yupa weik 60 tahun atonun akunum uplye kilapu. Tonda, sik akanye yapu tuba kam ulamik talak, batakuka yuk nang kum dolamak kilapu sik siuk sekna telebe.

¹⁰ Tonda, yuk ninye nirya arye, ayouwak kilapu sik winilamik ning akunum eibuka kel bikamik akarye, “Akilapu ara, pia telebuk wininyake,” nyabuka nyalamak kilapu ara, sik siuk sekna telebe. Ayupu ara, ani. “Kume, ayouwak kilapu, sik teleb winin ning weik aulule. Sik damang mapu ara, teleb kibuka kwaknalamikbuk, weik arye nelamik. Ninye asik nang ati, ‘Nun aik una telebe,’ nyabuka, buplan kukulilamik akarye, melilamik.” Ayupu atonun yupu nyapting kilapu ara, sik si sekuka milina telebe. Tonda, yuk ninye melina ati, ‘Apil ara, malye pil ati ara, nun teleb kilapu arye kum pil dopnuyabe’ tenena kumce, yuk dib tenen ninye ati melilamik. Tonda, kanye imun ulamuk ninye melilamik. Ara, yata teleb winin ning do nirya, yuk ning tenena kum, apiluk dobuka teleb ulamik. Yuk ninye arye, ayouwak kilapu ati ayupu atonun nyaptingopura, ‘Ato youwak kilapu ara, melinamabe’ tenen, si sekna telebe.

¹¹ Bukni, youwak kilapubuk, pia wisi kum danamikce kilapu ara, sik si buku noutamak sekna meme. Deiyok ara, ani. Si sekne talak ara, sikce, “Kume, nunce Allah el pil dobuka unamap,” nyabuka, talye nyabuka duknubikirye, daulamica ani, aminyan talak, sik nong pataplye ning ati, ‘Se, apil batakuka, ninye tuba tamubuka tonap, doptibye’ tenen, pataplyeura, batakikirye, ninye ton tamubuka donyake. Ati, sik si sekna kume.

¹² Winilamak deice arye, sik minop, “Wininamabe,” nyabuka, Allah ati nyalilamik ning batakikirye, Allah ati malye wininyak bukni, Allah arye akilapu wenepnamsile. Ati, youwak kilapu melina buku noutamak ara, kam kilapu sik si sekna meme.

¹³ Aninguk kum bukni, ton malye wininyaka ara, nyapnukine. Ayouwak kilapu kam ulamice kilapu ara, dipkoprop pil dona kum, talye-talye unyakce, yuk ninye aik talye wekelbanyake. Sikda, talye nong ati kwalibikirye, yuk ninye wininyak ning pia eibikirye, yuk aik ninye ati, talye laka nyalbanyake. Ayupu nyanyak talak noutamak arye sik teleb ninye kum nyapmanto yupu, akilapu arye kanye lulubuka malye-malye yupu nyanyake.

¹⁴ Anyapmakin touk wininyaka anya arye, anirya ati ara, na kanye ara, youwak kilapubuk, wise kum deiamikirye kam kilapu atonun ninye ati, nyabuka peterenune. Sik adiparyuk ninye dobikirye, mapu deibuka, sik wininyak ning nirya ati, bita dilakirye teleb ubuka unamake. Winibikcopura, yuk ninye, Allah dib kum tenenyak ninye arye sikti, “Akilapu sik malye winin ning ara, ani,” nyabuka, lulupsitinge. Deiyok ton kum atia. Malye kum winipmabibuk deiyok ton kum upnamla ati ayupu kum nyaptinge.

¹⁵ Anyapmakina ara, talye ati kume. Yuk youwak kilapu arye, Yesus Kristus bisik akunum batakuka, Isa Mutuku Dongonye el bisikuk akunum banyaka ati nyapkine.

¹⁶ Ara, yata dib tenen kilapu do nirya, anggun yala kilapu youwak akunum ubikcopura, sik adiparyuk ayouwak kilapu ati melinamake. Ara, yata mutuku do nirya, Allah dib tenen ninye arye, ayouwak kilapu nirya ati, ‘Se, yata wiribuka melipnamap do?’ tenen, ‘Ikin kanye bobicak’ tenen, nyapne. Ati youwak kilapu kum bukni, Allah dib tenenyak ninye, mutuku-mutuku nirya arye, dipkoprop ikin kanye bobuka unyak youwak kilapu, sik yala nang kum unyakbuk, ‘Aning-aning pia kum uplyopura, pataplye kilapu melinamak’ tenen, nyapkine. Na Paulus arye nyabuka sekeibkine.

¹⁷ Winira, yuk yupu ton nyapnukine. Allah yupu peteren nang, sik deiyok nang nirye arye, anang ati kibuka si erenamake. Allah yupu aik deiyok nang nirya ati, si erenamak bukni, weik mambul ning ara, Allah yupu pia bita lilibuka peterena ap, ‘Yuk ninye dib tenepnamak’ tenen, tilila nyana ap wininyakce, pil donyak nang ati ara, weik arye si erenamlulume nyapkine.

¹⁸ Weik arye si erebuka anang erelinamlyame nyapmakina deiyok ara, ani. Allah yupu deice sekeiyamsik yupu ani. ‘Beras atonun ning lana ati, sapi basam arye beras deice yanibuka balamle talak ara, ‘El ton bulubuka diplyak’ tenen, el si bam bol tapu koulongona kume. El babye, ton bulubuka dina telebe.’ (Ulangan 25:4) Tonda aning atonun. ‘Yata pil don nang do nirya, pil dobicopura, sik pil domikca deice arye dekna ning, adiparyuk arenamlulume.’ (Lukas 10:7) Ayupu nirya ara, aubuka ati ara, anggunce anggun ning bokuka, sik peterena deiyok nang ap, sik Allah yupu aik deiyok nang ati, melibuka arenamlulume.

¹⁹ Ara, yuk nang arye, “Kume, Allah yupu aik deiyoknye, el malye winilul ning ara, ani,” nyabuka, el nong deice ikin ning deibikcopura, talye kanye bobuka kekena kume. Kekena kum bukni, el malye winilye ning, yuk nang ton bitinye do, winilye do? Sik babye, ton eibikirye, neiktoto atonun nyaptingtoura, adeice aryuk kekenamlulume.

²⁰ Allah dib tenen ninye, sik deiyok nang kan-kan arye, dipkoprop tuba malye winibikcopura, anang ati yuk ninye nirya lak kekenmacak arye, malinye nyanamlulume. Wininamluma deiyok ara, sik yuk deiyok nang kekebikirye, ‘Se, nun babye, talye arye malye winibibyak’ tenen, ‘Moubuka dilanamabe, tenepnamak’ tenen, wininamlulume.

²¹ Ura, Timotiuso, na winiryuk nyapmakin ning nirya ara, pia moubuka talipminyak arye, peterenalyame. Allah ap, Yesus Kristus ap, Allah arye el im deice pil melin nang, wipdeibuk nang malaikat ap, sik nirya arye pia kekebuka disinyaka ati ara, na nyapkin yupu moubuka talinalyame. Tonda, ‘Anang ara, na kwityapu nang ati ara, kum wenepnune, dauplye,’ tenepminyak arye, yuk onang ati, ‘Mikip arye nyanamne,’ tenena kum aniryuk, yata ninye do nirya ati, atonun tenebuka, kanye wililana kum arye, teleb kibuka peterepra unamlame. Na Paulus arye nyapkine.

²² Tonda, ‘Aninye ara, Allah el piluk donamak’ tenen, ‘Sik nong deice na taruk deibuka, Allah moropnirye dopkwetepnamne’ tenen, minopce kum winipnalyame. Ara, talye ati kume. Deiyok ara, anang arye malye winibikce babye, moubuka tenena kum arye, minopce an taruk sik nong deice deibuka, Allah moropminyak arye, minopce dopkwetepminya deice arye, an babye, malye upminyak tenen ati, nyapkine. Yuk nang malye winin ning ara, an ap, neiktoto malye winina kume. Anda malye winina pia kum diparyuk, diksukumuk unamlyame.

²³ Timotiuso, atalak ton, atalak ton, an munuk weik arye dikulula ati, tonda, an munuk dilamkilya kum danana ati ara, talye mekuk dilyama ara, kume. Anuk ap, mun ap, teleb kipdeipnamkil ning ati, kanye wangalamak mek, anggur mek mitik anun dina telebe nyapkine.

²⁴ Ara, Allah arye do, ninye deiyok nang arye do, yupu bokuka wenena talak ati, ton ning ara, ninye wenena deiyok nang dam min kum bobinabikce talak ara, lak arye pia malye winibikceura, yuk ninye eibikirye talye lak nyabikibuk, nirya kekebuka kel kibikirye, sik malye winin nang aminyan yanganyake. Ton ning ara, teleb winin nang atonun ubuka, talye kanye bobuka ninye wenen ak yaki bukni, yupu talibikce talak aryuk, sik malye ulamice ning laka kililule.

²⁵ Aning atonun, ninye arye teleb winilamak ning babye, atonun lak upnamle. Ton nang ara, sik teleb winin ning lak ubikceura, yuk ninye nirya eibikirye kel bikinyake. Ton nang ara, teleb wininyak bukni, yuk ninye arye atalak aryuk kum elikirye, kel kum bikinyake. Bukni, aning babye, aminyan talak kum duknupmanto ning ati ara, lak kipnamlarya.