1 Timotius 3 - Eipomek

Allah yupu peterena deiyok nang ap, Allah dib tenen nang, sik melibuka pil don nang ap ati, nyabuk yupu

¹ Anyapnukin yupu ara, pia dipkoprop yupu anya arye, ninye mutuku-mutuku nirya, adiparyuk ayupu dib teneptinge. Ara, yatanye do nirya, ‘Se, Allah yupu peteren nang, sik kanye melibuka dina ati deiyoknye uptinye’ tenen, kanye patalibuk ulinye bira, anye bira pia teleb mambul pil patalule.

² Ara, Allah yupu peteren nang. Sik deiyok talibuka pil dopmanto ninye adiparyuk wininyak ning lak nyapnukine. Sikda, malye winina pia kum winilamikibuk, yuk nang arye, “Anang wininyak ning ara, ani-ani,” kum nyapmanto nanguk, wibuka delina telebe. Sikda, kilapu tonokuk dobuka unyakce, ‘Talye kanye bobuka unune,’ tenena kum aryuk, sik bidamnye ati bita dilakirye, teleb winina ap, ninye minop wana ap, yu pola una kumce, nimalye arye una ap, anirya wininamak nang ara, apil dopnamtinge. Ato nang ati ara, yuk ninye arye, “Anang ara, dipkoprop teleb wininyake,” nyabuka, tenelamak nanguk apil dopnamtinge. Tonda, yuk ninye do, ninye asik nang do, sik aik buplan kukulinyak nang wibuka delina telebe. Tonda, yuk nang bikna ati, teleb kibuka peterepting nang wilina telebe. Winilamice ninye uka. Yuk unyak ninye ara, wilina kume.

³ Awipdeipnamlum nang, kum winipnamak ning ara, ani. Ara, kanye wangalamak mek, yu mek weik arye dina ap, yu ubuka ninye oldana ap, yupu deice arye waldana ap, ‘Yo bok weik arye doproptinye’ tenen, kanye engena ap, kum winiptinge. Nimalye arye teleb ubuka unanguk wibuka deipminbuk, apil doptinge.

⁴ Allah yupu peteren nang, sik moubuka melina ati deiyok nang, adiparyuk wininamak ning ara, ani. Ara, sik mapu ap, sik kilapu ap, sik wininyak ning nirya ap, bita dilakirye, telebuk wininamake. Tonda, sik teleb ubuka winibikibuk, sik mapu koprop arye, sik ni yapu yupu moubuka kekenamak nang ara, sik ni yapu, apil moubuka doptinge. Sik mapu koprop arye, sik yupu min kum kekenamakopura, ato nang wibuka deipminbuk, apil kum doptinge.

⁵ Ara, talye ati kume. Yata nang do nirya, sik bidamnang mapu ap, sik bidamnang kilapu ap, sik bidamnang pil ap ati, dilakirye, teleb ubuka sirya dakna pil kum dobikce nang ara, yata wiribuka arye, Allah yupu peteren nang ap, Allah ati dib tenen ninye ap, sik deiyok nang kiptingce pil teleb ubuka dopting do? Aning kum winiptinge.

⁶ Ara, Allah yupu peteren nang ap, Allah ati dib tenen ninye ap ati, deiyok kipmanto nang ara, winiryuk dib tenenyak nang ara, wibuka delina meme. Winiryuk dib tenepmak nang wibuka deipminyopura, aminyan sikce, ‘E, nunda weik nang akunum unyabe’ tenen, dilakcopura, Isa Mutuku Dongonye arye, ‘Na weik deiyoknye unamne’ tenen, malye ubukura, ‘Allah arye wenebuk touk, winibicak’ tenen, nyapne.

⁷ Tonda, Allah dib tenena kum ninye arye, anang ati, “Sik malye winin ning ara, ani,” nyabuka, ‘Lulupdakcak’ tenen, yuk talye nang arye, “Anang ara, pia telebuk unyake,” nyanyak nanguk apil doptinge. Yuk-yuk unyak ninye wibuka deipminyopura, aminyan Isa Mutuku Dongonye arye, el wena pum bisik wekikibuk, yupnamle. Ara, sik malye ubikibuk, ‘Dauplye’ tenen, Allah yupu aik deiyok nang pil dopnin bakcebuk, aminyan yuk nang arye, sik anang babye, Allah dib tenen nang nirya babye ati, “Anang ara, malyeuka,” ‘Nyapsikcak’ tenen, na Paulus arye sekeibkine.

Allah dib tenen ninye melin nang ati, nyabuk yupu

⁸ Ara, Allah dib tenen ninye ati, sik melibuka pil dopmanto nang yupu nyapnukine. Arup nyapmakin atonun, anang, yuk nang arye, ‘Anang ara, teleb un nang uka,’ tenebice nanguk, wibuka delina telebe. Tonda, aning ara, na tenen arye nyana kum, dipkoprop yupu nyana ap, yu mek kanye wangalamak mek weik arye kum dinyak nang ap, tonda, ‘Yo bok weik doproptibye’ tenen, malye winina ap, na tenena kum arye pil dona ap, kum wininyak nanguk, apil doptinge.

⁹ Tonda, sik kanye tenen ning noutamak arye, ‘Na malye unye ning dauplye’ tenena kum arye, duknuna kum, diksukumukirye, Allah ati dib tenebuka, pia moubuka donanguk apil doptinge. Dib tenebuka pia moubuka talinamak ning ara, minop talak Allah arye lak kibuka kum nyapdeiyamuk bukni, wini talak akunum lak arye peterelamsiake, pia noutamak ninguk talinamake. Na Paulus arye nyapne.

¹⁰ Allah el mapu melina deiyok nang kina ati, anang wipdeipnamunye talak ara, minop yuk nang arye sik unyak ning ati, pia moubuka dipdekibuk, malye winin ning kum wininyak nang ara, pia diksukum wininyak nang ara, anang dobuka erepdeiptume. Kumopura, Allah mapu melina deiyok nang pil kum doptinge.

¹¹ Aning atonun, anang sik kilapu wininyak ning ati yupu ton nyapnune. Anang sik kilapu ati, yuk nang arye, “Akilapu ara, teleb winin kilapu uka,” nyalamak nanguk, apil dona ati erelina telebe. Sik kilapu arye, yuk ninye ati, yu uplibuk lulubuka minildana kum bukni, yata pil do, yata winin ning do nirya, talye kanye bobuka una kum arye, kanye moubuka tenebikirye, diksukumuk winin kilapu, sik akanye yapu erelina telebe.

¹² Allah el mapu melina deiyoknye bira, el kil tonokuk dobuka, unanye erelina telebe. Tonda anye birye el mapu ap, el kil ap, el winin ning nirya ap, el bidamnang bita dilirye, teleb ulamlinyebuk erelina telebe.

¹³ Apil akunum sirya dakdongobuka dolamikce nang ara, yuk ninye arye sikti, “Anang ara, pia telebe,” nyabuka, erebikirye wilinyake. Tonda, akunum lipsisikuka apil dobikce deice arye, kanye teniltona kum aryuk, Yesus Kristus ati, dib tenenyak ning ilil una kum aryuk, kanye lamabuka dib tenenyake.

¹⁴ Ara, na mi Timotiuso, ‘An dam minop yatinye’ tenen, patanili bukni, ‘Minpola yanamne do, siki yanamne do?’ tenen, wini talak asurat sekeibkine.

¹⁵ Aminyan arye yatinya babye, asurat deice arye, Allah elti, dib tenen ninye adiparyuk wininamak ning, ‘Teleb ning ara, ani,’ tenepnamlum tenena ati, ayupu sekeibkine. Allah dib tenebupu ura, kanye dukdongopsuk ninye nirya ara, Allah el mapu silip atonun unyabe. Ninye aik ayukumna yo ikuka dobiceura, adeice arye gat ding abuka tiklamle atonun, Allah Pia Kwemdinanye, el mapu arye el si erebuka, el dipkoprop yupu moubuka talibibirye kalikinyabe.

¹⁶ Anyapnukin yupu ara, ‘Tilila do, dib do?’ tenen, kum tenepmanto ning. Ara, Allah arye duknyamukbuk, ninye kum kel bikamik bukni, wini talak Allah arye anoutamak weik mambul yupu akunum laka kipdeipsuke. Ara, Allah diksukum ulye touk, nun babye, diksukum una ati, winipnamap deiyok ning ara, ani. Allah ninye nong atonun dayukce ninye eipnamik ati, laka yayuke. Allah El Dib Kanye pil dobuka deice arye, ‘Yesus ara, el dipkoprop Allah El Mi Koprop’ tenen, dib tenebuka, ‘Kel biknamak’ tenen, laka kibuk. Lak kibukura, Allah el im deice pil don nang, malaikat arye eibik. Ninye arye, Yesus el yupu dobuka, ninye mutuku-mutuku nirya ati, amutuku-amutuku nirya binuka peterelamik. Peterelamikbuk, ninye mutuku-mutuku nirya unyak ninye weik arye kekebuka dib tenelamik. Aminyan sirya talak ara, Allah arye Yesus ati, pia teleb kipdeibukce, erebuka im deice bobiyukura, im deice tam ulule.