1 Timotius 2 - Eipomek

Allah morona ap, el si erena ap ati, nyabuk yupu

¹ Ura, Timotiuso, anggun nirya adiparyuk wininamlulum ning mikip arye nyapnukine. Weik mambul ning ara, ani. Ara, anggun dib tenen nang arye, yuk yala nang nirya ati, Allah moronamlulume. Ninye patan ning ap, ikin usilye ning ap ati, ‘Allah arye yuk ninye melinamle’ tenen, moronamlume. Tonda, yuk nang nirya ati, “Telebe,” nyabuka, Allah moronamlulume.

² Mambul ning ara, weik ninye deiyok nang, Sisin nang ap, ninye deice tam unyak nang yala-yala nirya ap ati, Allah moronamlulume. Ara, talye ati kume. Ara, nun nirya arye ninye deiyok nang ati, Allah morobibyopura, anang Allah arye anang ati meliplye deice arye, teleb wininamsiyake. Ara, ‘Talye kanye deibuka, nimalye arye teleb ubuka neiktoto una ap, Allah diksukum ulye touk, nun babye, diksukum una ap, kanye malye una kum aryuk, etekdop utibye’ tenen, Allah moronamlume.

³ Winibuka una ati ara, Allah nun Lyena Deiyoknye kanye delisulule. Ara, teleb una atia.

⁴ Nun ni Allah ara, ‘Ninye mutuku-mutuku nirya nati dib tenepniting deice arye, lyepnyopura, na dipkoprop yupu nirya kel kipnamak’ tenen, pataplibuk tenesulule.

⁵ Allah ara, el tonok. Yuk ton kum ulule. Atouk, Allah danatam, ninye nirya danatam, noutamak ulirye, kanye dukdongobuka melisilya deiyoknye bira, el tonok ulule. Yuk ton kume. Anye el si ara, Yesus Kristus. El aryuk nun ap, Allah ap neika kilisilirye, kanye dukdongobuka derisulrye.

⁶ Yesus elce, ‘Ninye mutuku-mutuku nirya sik malye unyak ning kum daneipnirye, dekuka lyepnamne’ tenen, elce el nonguk arepsukbuk obik. Ara, nun malye winin ning ati, talye oplopsutu bukni, Yesus arye nun pununa ati dipsuke. Allah arye, ‘Teleb talak ara, atalakuk,’ tenyamuk touk winibuk. Allah arye, ‘Ninye nirya lyeptinye’ tenen, patalamuka ara, awinibuka deice arye akunum lak kipdeipsuke.

⁷ Allah arye, ‘Ninye mutuku-mutuku nirya noutamak, kili sal weik arye lyeptinye’ tenen, patalula anya arye, ‘Paulus arye ninye lyena ati lak teleb yupu deiyok kounanye, Rasulnye kiplirye, peterepra binamle’ tenen ati, wipdeipnuke. Tonda, ‘Yahudi yala kum ninye babye, Allah el dipkoprop yupu kekebuka, dib tenepnamak’ tenen, peterena deiyoknye kipdeipnukura, unune. Ayupu ara, tilila kum nyapne. Dipkoprop nyapsine.

⁸ Ara, na kanye ara, ‘Ninye mutuku-mutuku nirya, adiparyuk malye kanye bona ap, yu una ap, yupu deice arye waldana ap, kum anirye, Allah ati kanye deibuka, pia diksukumukirye, sik kurun taruk erebikirye, Allah moronamak’ tenen, Allah moronune. Na Paulus arye sekeibkine.

Kilapu sik unamaka ati, nyabuk yupu

⁹ Ara, na kanye ara, kilapu nirya adiparyuk, talye kanye bobuka una kum, kanye moubuka tenebikirye, ‘Ninye yuk nang eipsikirye, yobsiting,’ tenebuka, ‘Pitin-pitin unamsiak’ tenen, bumang baju ongona meme. Tonda, anggunda, yuk ninye arye nun ongon ning eipsikirye, ‘Se akilapu ara, urasin pia teleb anya arye, dobuka yoptibye, tenepnamsiyak’ tenen, potong kouna ap, emas teleb ning ap, dekna weik karakna ning ap ara, dekna weik baju ap, yuk kweirya ap, dona meme. Winina ara, pia malye ati nyapne.

¹⁰ Aning kum bukni, Allah arye, ‘Na si erebuka, nati kanye deibikirye, na melin kilapu ara, wininamake,’ tenesilye touk, ninye melina ati, teleb pil dona ap, ninye bico tenebuka melina ap, diksukumuk unamake. Yuk ninye, aunyak ning eibice, deice arye, ‘Akilapu ara, telebuk,’ tenepnamake. Kwerya weik ning donyak deice arye kume. Allah si erebikirye, diksukumuk unyak kilapu ara, amalye winin ning kum wininyake.

¹¹ Kilapu nirya ara, sik adiparyuk peteren talak kel bikna ati, sal amutamuk ukirye, namin kanye arye lamabuka, sal yupu moubuka kekepnamake. Sal arye peterenamak talak ara, kilapu arye yupu kum nyanamake.

¹² Na kanye ara, kilapu nirya, arye sal amu tam kibikirye, “Winiplyame, winipsilyame,” nyabuka, Allah yupu kum petereptinge. Aning atonun winina ati ara, yupu sekeldongosunune. Na Paulus arye sekeipsene. Sal ap, kilapu ap, neiktoto, Allah yupu asik bulubikce talak ara, kilapu erebikirye, sal deice tam atonun kibuka, Allah yupu peterena meme. Allah yupu peteren talak ara, sal aryuk peterebikibuk, kilapu ara, adiparyuk yupu nyana kum, tunim abuka kekebikirye kel biknamake.

¹³ Ara, talye ati kume. Wininamak deiyok ara, nyapnukine. Ara, Allah arye Adam minop kwepdeibuk akarye, aminyan ara, Hawa kweipdeibuk.

¹⁴ Tonda, Isa Mutuku Dongonye arye, tilila yupu nyabukura, Adam arye minop kum kekebuk. Hawa arye, atilila yupu minop kekebuka, malye winibukura, sik bitinye malye winina deiyok ning doproprikce, ulamrik.

¹⁵ Diba, Hawa malye winibukura, Allah arye wenebuk bukni, Allah arye kilapu ati, lyelule. Kilapu sikda, Allah dib tenebikirye, yuk ninye ati bico tenebuka melina ap, talye ubuka una kum, kanye moubuka tenena ap, Allah diksukum ulye touk, pia diksukum winina ap, ubikceura, sik mapu delinamak talak nirya, ara, Allah arye kalekuka meliplirye, lyelule. ‘Ati, sik kilapu aning bikikirye, moubuka unamak’ tenen, na Paulus arye sekeibkine.