1 Tesalonika 5 - Eipomek

Dirinak unyak ninye ap, kunuknak unyak ninye ap ati, nyabuk yupu

^1-2 Telebe nun kayapu, Yesus ati diba tenelulum nang ati, nun du weit atonun ululum ninye ara, anggun akunum kele, nun Deiyoknye birye tamubuka tukwak yanamle sum ara, sik ubula don nang arye, yuk nang kum bikmace talak, lukunyan noutam akuk, duknubuka yangalamak touk, winipnamle. Aning ati ara, ‘Asum ani, atanggal ani, aketing ani’ tenen, laka nyabuka kum sekeipnusiabe.

³ Ninye nirya arye, “Kume, wini talak ara, ikin una ap, oldana ap kum aryuk, kanye deibuka, pia teleb kanye lamabuka unyabe,” nyanyak talak aniryuk, kilapu mi deiyok, ‘Atalak dipnusile,’ kum tenepmace talakuk, talye karin arye mi deiyok dilamle touk, Allah arye sikti, weik arye wenebuka opnamle. Winiplye talak ara, sik adiparyuk kum lyepdatinge.

⁴ Sikda, wininamak bukni, na kayapu anggunda kuna kan-kan atonun, kum ululuma anya arye, Yesus tamubuka tukwak yanamle talak ara, ubula don nang arye, lukunyan noutamak, talye karin arye yakibuk, ninye lukulalamak atonun kum wininamlulume.

⁵ Anggun Tesalonika mutuku ninye nirya ara, diksukumuk winin nang ululuma anya arye, anggunda dirina ninyeuk ululume. Anggunda keting noutam ninye ululume. Nun nirya ara, lukunyan talak ap, kunuknak ap unyak nang kum unyabe. Aning ara, kume.

⁶ Kunukna ning arye, nunti, “Na ninge,” nyabuka kum dopropsutu ati, nunda yuk nang mabuka widuklamak touk kum unamabe. Aning kum bukni, ‘Talya parapkabuka winipnuyap’ tenena kumce, nunce nun bidamnye ati, kalekuka dilabirye, ‘Mankau arye malye winibibyak’ tenen, telebuk unamabe.

⁷ Sik malamak ninye ara, lukunyan talakuk malamake. Tonda, yu weik mek, kanye wangalamak mek dibikceura, kanye wangaplibuk malye wininyak ninye ara, lukunyan talak noutamak aryuk wininyake.

⁸ Sikda, winilamak bukni, nunda, keting noutam un nang unyaba anya arye, ‘Talya parapkabuka winipnuyap’ tenena kum aniryuk, nunce nun bidamnye ati, moubuka dilabirye, telebuk wininamabe. Winibibye talak nirya ara, Allah dib tenena ap, yuk nang ati bico tenebuka melina ap ara, ninye arye ting ongolamaka atonun, nunce kalikilabirye moubuka unamabe. Tonda, yin talin nang arye, kat topi ongopbuka, kisok kalulamak atonun, wininamabe. Ara, ‘Sirya talak Allah arye malye winin nang ati, wenebuka yupu bokeiplirye, oplopnamle talak ara, nunda, dipkoprop lyepnamsile’ tenen, el deiceuk nun kanye deibuka, dinauk unamabe.

⁹ Aning ara, talye ati kum nyapsiabe. Kume, Allah arye nunti wibuka deiamsuk ning ara, ‘Narye wenebuka opnamne’ tenen, kum wibuka deipsuke. Aning kum bukni, nun Deiyoknye Yesus Kristus arye, pil dopsuka deice arye, ‘Lyen ning, pia kam un ning dopropnamak’ tenen, Allah arye wipsuke.

¹⁰ Yesus arye nunti dipsuka deiyok ara, nun dipnamap talak babye, tuba kam unyap talak babye, ‘Na ap sik ap neika dukdongobuka unamabe’ tenen, nunti dipsuke.

¹¹ Aning ati ara, anggun akunum winimunya atonun, ayupu nirya teneplumce, talima mulina ap, anggun diba teneplum ning ara, mikip kelilana ap wininamlulume.

Sirya dakna ati, nyabuk yupu

¹² Ara, nun du weit atonun nango, Yesus dukdongobuka umunya noutamak arye, sik talisikirye, anggun melina ati, pil mikip arye dosice nang, tonda, anang arye anggunti wenebuka, “Winipnululum, winipnulum,” nyabuka nyasinyak nang ati, “Telebe,” nyabuka, kipmunce, sik si erenamlulume.

¹³ Anang ara, weik mambul pil dosinyaka anya arye, anang ap neika umunye talak nirya ara, sikti, “Telebe,” nyabuka, weik arye kipmunce, sik si erenamlulume. Anggunce, sik deiyok nang nirya ati, bico tenebuka, melinamlume. Anggun nirya arye, yuk nang nirya ati, nimalye arye teleb ubuka neika unamlulume.

¹⁴ Tonda nun du weit atonun nango, mambul yupu nyalinamsiabe. Ara, sik dipkoprop pil talibuka dona kum arye, talye-talye yupu nyabuka unyak nang ati, “Kanye moupnamlulume,” nyabuka wenenalulume. Ilil-ilil asauk, ulamice nang ati, talima melibuka unamlulume. Tonda, sik mitika aryuk Allah diba tenenyak ning ara, wisina kum ninye ati, melibuka mikip kilinamlulume. Yuk nang nirya ati ning ara, pola wenena kum arye, namin kibuka nimalye arye melinamlulume.

¹⁵ ‘Sik malye nang arye malye upsikiba, adiparyuk tamubuka malye winibibyak’ tenen, pia kalekuka dildanamlulume. Malye upsikiba, tamubuka malye una kum bukni, anggunce yuk nang nirya ati, ‘Nimalye arye teleb ulilanamap’ tenen, pia pi dobuka melinamlulume.

¹⁶ Atalak-atalak nirya ara, kanye deibuka unamlulume.

¹⁷ Tonda, batakna kum aniryuk, atalak nirya ara, Allah pia moronamlulume.

¹⁸ Allah arye anggunti, ‘Wininamake,’ tenyamsuka ara, ani. Ara, Yesus Kristus ap, kanye dukdongobuka neika unamak talak nirya ara, yata wirin talak do nirya, ikin uplye talak babye, kanam uplye talak babye, Allah ati, “Telebe,” nyabuka kanye delinamake, tenyamsuke. Ati, wininamlulume.

¹⁹ Tonda, ninye arye uku dilibuk, uku tangalamak touk, Allah El Dib Kanye arye anggun talima ak pil dosilye ning ara, yupu sekelongona kume. Elce nyasilye yupu kekebuka, mikip arye pil donamlulume.

²⁰ Aning atonun, Allah El Dib Kanye arye ninye talima noutam yupu nyapdeiplibuk, sik anang arye tamubuka yuk ninye ati, aminyan winipnamle ning ati laka nyanyakopura, ayupu ati, “Aning ara, talya, nong kum upnamle,” nyabuka, lik tenebuka yupu sekelongona meme.

²¹ Yata winin ning do, yata yupu do, aning-aning nirya ati, ‘Teleb ulul do, malye do?’ tenen, pia moubuka dilenamlulume. Didemunyopura, teleb ning ara, pia moubuka talinamlulume.

²² Malye winin ning yala-yala nirya ara, pia leibuka yukak unamlulume. Tonok ning babye, winina meme.

²³ Ninye oldana ap, walana ap kum aniryuk, kanye deibuka nimalye arye teleb ubuka neika una ati ara, nun ni Allah, el pil dosilya deice aryuk unyabe. Allah, elce anggunti, ‘Nauk talinamniak’ tenen, anggun nong ap, anggun kanye talima ap, anggun winin ning nirya ap, ‘Pia teleb ulinamsile’ tenen, Allah morosunune. Aning pia winibuka daulamsilye bukni, nun Deiyoknye Yesus Kristus tukwak tamubuka yanamle talak ara, anggun sambala ap, anggun kanye talima ap, anggun nong nirya ap ara, ‘Malye ning tonok ning babye, kum upsiliba, pia diksukumuk wininamak’ tenen, Allah morosunune.

²⁴ Anggun nirya ati, yukupsuka Deiyoknye birye, pia teleb piluk dolinye binya arye, elcuk winibuka melisilyebuk wininamlulume.

²⁵ Ara, nun weit yapu atonun nango, anggunce nunti Allah moronamsululume.

²⁶ Anggunce yuk dib tenen ninye nirya ati ara, eibuka eibramunye talak nirya ara, kanye deibuka, si erebuka iribuka mutunamlulume.

²⁷ Nun Deiyoknye Yesus disilya deice arye, ayupu nyapnusine. Asurat ara, dopropmunce, ‘Sik dib tenebikirye, nun weit yapu atonun nang nirya kekenamak’ tenen, sik dam binuka nyanamlulume.

²⁸ Telebe na kayapu, na Paulus arye asurat ara, akunum sekeipsene. ‘Nun Deiyoknye Yesus Kristus arye, anggunti bico tenepsilirye, el kanye aryuk talye melinamsil’ tenen, Allah morosunune. Na Paulus arye akunum nyapsine. Telebe, asukumuk deipsine.