1 Tesalonika 2 - Eipomek

Paulus arye, Tesalonika mutuku noutamak, pil dolamuk yupu

¹ Ara, Yesus elti, diba tenepluma ati, nun du weit atonun nango, anggun kele. Nunce anggun dam yanuka pil dolamubu talak ara, tilila ati kum yapu. Kume, nong akunum kibuk.

² Anggun kele, minop talak ara, Pilipi mutuku beipu ura, malye nang arye nunti ngaluklamsikce, nun nong deice ikin ning weika arye deililamsike. Tonda, yuk nang arye, nun peteren yupu ap, nun ap ati, ‘Lyeklopnamap’ tenen, yanipdesik bukni, nun ni Allah melyamsuka deice arye, balye tam kipsuk deice, arye ilil kum, upsuk akarye el laka teleb yupu, ninye lyena yupu peterelamsupu.

³ ‘Tesalonika ninye, dib tenepnamak’ tenen, peterelamsupu yupu ara, yum yupu nyaplobuka duknuna ap, nunce tilila yupu kekebuka, diba tenebupe deice arye, kum peterelamsupu. Tonda, ‘Tenepce nyabibibuk, tilila yupu uk diba tenepnamak,’ tenena deice arye, kum peterelamsupu.

⁴ Aning ara, kumde. Allah arye nunti, ‘Anang ara, pia diksukum unyak ninye anya arye, na yupu dobuka, peterepra binamake,’ tenelamsukce, wibuka deipsuke. Elce wibuka deipsukbuk unyaba deice arye, el yupu peterenyabe. Nunce, yuk ninye ati, ‘E anang arye nunti, teleb nang tenepsiting’ tenen, pil kum donyabe. Aning tenena kum bukni, ‘Allah arye nun kanye talima noutam winisilye ning ati winildesululnye, elcuk kanye deipsutue’ tenen, elti, tenebibirye, pil donyabe.

⁵ Tonda, Allah arye nun winilamap ning nirya kekebuka disulula anya arye, nun talye kum nyapnyabe. Anggun kele, nunce anggunti, ‘Teleb yupu nyaplopmabibuk, anang arye kanye deipnamsiak’ tenen, kum winilamubu. Tonda, ‘Bon ning weika arye doproptibye’ tenen, tenepce arye, tilila yupu kum nyalamubu. Tonda, ‘Anggun ning ubula doproptibye,’ tenenyaba ara, ‘Biksicak’ tenen, duknuna yupu pia kum nyalamsupu. Aning nirya ara, pia kum winilamubu.

⁶ Kume, anggunce do, yuk nang nirya arye do, ‘E, anang arye nunti, kanye deibuka kipdopsikirye, si erepnamsiake’ tenen, pil kum dolamubu. Aning ara, anggun kel biklamsulume. Nunda, talye nang kum unyabe. Kristus arye nunti, ‘Na yupu dobuka peterepnin banamak’ tenen, wibuka deiamsukbuk unyaba anya arye, wininyaba deice arye, ‘E aning-aning nirya ton arepsiting’ tenen, ikin ning anggun nong deice deiamsitibye bukni,

⁷ Ikin kum kipdeiamsube. Aning kum bukni, sik nin yapu arye, siki mapu ati, pia bico tenebikirye, nimalye arye melilamaka atonun, nunce anggunti atonun winilamubu.

⁸ Nunce anggunti, pia bico tenebuka, kanye akunum areamsupe ati ara, nunce, anggunti utenelamsubu. ‘Allah el laka teleb yupu, ninye lyena yupu peterenauk kum wininamabe. Nun winilamap ning nirya deice arye, aninye ati weika arye melinamabe,’ tenelamuburye, kanye deibuka winilamsupu. Winilamubu deiyok ara, nunce anggunti, pia kanye delilamsupa ati nyababe.

⁹ Nun kayapu, anggun dipkoprop tuba tenelulume. Anggun ap neika ulamubu talak noutamak ara, nunce weik pil dolamubu ning ap, ikin ulamsuk ning ap ara, kum lupakeipsulume. Winilamupa deiyok ara, nunce, Tesalonika mutuku ninye ati, Allah el laka teleb yupu, ninye lyena yupu peterenamap talak nirya ara, ‘Nun patan ning ati, arepsikibuk, sik ikin upnul’ tenen, keting noutam ap, lukunyan ap, pia pil dolamubu.

¹⁰ Anggun Allah ati dib tenelulum ninye ap, nun ap, neika ulamubu talak nirya ara, Allah arye dilamsuke. Tonda, anggun babye, elilamluma anya arye, anggun kele. Allah funguk ulye touk, malye winin ning tonok ning babye, una kum arye, pia diksukumuk winilamsupu, yuk nang arye nunti, “Anang malye wininyak ning ara, ani-ani,” nyabuka, kum nyapmanto nang ulamubu.

¹¹ Winilamubu deice arye, kel biksuluma deiyok ara, anggun kele. Sik ni yapu arye, sik mapu koprop ati, nimalye arye teleb ubuka melibuka peterelamak touk, nunce anggun tonok-tonok bukni, anggun nirya ati, atonun winilamubu.

¹² Ara, Allah arye anggunti, ‘Aninye ara, narye aning-aning ap, tukwak ninye nirya ap, talibuka unye talak, pia teleb weik dirinak unmana ara, sik ap unamabe’ tenen, yukupsuke. Allah arye anggunti, nyapsuk anya arye, ‘Aminyan talak Allah arye anggunti, kanye deipnamsil’ tenen, nunce anggunti, “Wininamlulum, wininamlulum,” nyabuka peterena ap, anggun ikin ulamsuk ning ati, kwa daklamsupu ning ap, anggun kanye imun kanye bona ati, talima mulina ap ulamsubu.

¹³ Ara, nunce Allah el yupu peterelamsupubuk, anggunce kekelamlum talak ara, anggunce ayupu ati, utenelamlume. ‘Kume ayupu ara, talye tukwak ninye arye nyanyak yupu kumde. Ayupu ara, dipkoprop Allah el yupu uka’ tenen, dololamlume. Nunce peterelamsupu yupu ara, dipkoprop Allah el yupu anya arye, teleb winilamlume. Anggunce Allah ati, diba tenelulum ninye anggun talima noutamak arye, Allah el yupu arye pil dosulule. Anirya ati ara, nunce Allah ati, moronyap talak nirya ara, anggunti tenebibirye, Allah ati, “Telebe,” nyabuka morosenyabe.

¹⁴ Allah ati, diba tenelulum ninye, anggun kanye noutamak arye, Allah el yupu ara, pil dosilyopura, yuk mutuku ninye bukni, Allah diba tenenyak ninye, Yudea tam unyak ninye arye, Yesus Kristus ap, kanye dukdongobuka unyakce, pia diksukumuk ulamikibuk, anggun dimunce, sik unyaka atonun, akunum ululume. Yudea tam diba tenenyak ninye, dib tenebuka, teleb ubuka ulamikbuk, sik Yahudi ninye ara, Yesus ati diba tenena kum ninye anya arye, sik nong deice ikin ning weika arye delilamik. Sik Yahudi ninye arye, Yudea tam diba tenebik ninye ati, malye winilamikbuk, kanye imun kanye bolamik touk, anggun Tesalonika mutuku ninye babye, atonun winilulume. Ara, anggun mutuku unyak ninye bukni, diba tenena kum ninye arye anggunti, ikin ning, anggun nong deice delilamsikak, kanye imun kanye bolulume.

¹⁵ Sik Yahudi ninye ara, wininyake. Sikda nun Weik Deiyoknye Yesus ap, Allah el yupu laka nyana nang, nabi nang ap olamik. Tonda, nunti, sik mutuku noutamak arye wenebuka dopkwetepsike. Anang ara, malye winilamikibuk, Allah arye sikti, lik ulule. Tonda, yuk mutuku nang nirya ati ara, yakanyakce, oldan nang atonun unyake.

¹⁶ Unyaka deiyok ara, sikce Yahudi yala kum ninye ati, ‘Allah yupu peterebikibuk, kekebikirye diba tenebikcebuk, Allah arye lyeplyak’ tenen, sikce, nunti, yupu sekelongona ap, yanina ap wininyakce, pia pirildesinyake. Wininyaka deice arye, sik malye winin ning pia weika arye tabakuka winibiceura, weik upnin balule. Mek makau dobuka, mek dinikikibuk, mek deiplirye, dikilsaklamle atonun, sik malye winin ning ara, pia weik akunum ubuk. Allah arye sikti, dipkoprop weik arye wenebuka oplopnamle. Na Paulus arye, nyabuka sekeipsene.

Paulus arye, Tesalonika ninye uruna ati, nyabuk yupu

¹⁷ Nun kayapu, anggunda Yesus ati diba tenepluma ati, nun du weit atonun ninye ululume. Sik malye nang arye, nunti, yu ubukura, anggun kan-kan arye, nun dobuka wenena aik dongol bisik talak ara, nun ap, anggun ap neika kum upmanto ulamubu bukni, nun kanye tenen ning noutam arye, anggunti tenelamubu. Tonda tuba tenenyabe. Nunce anggunti, ‘Se, nun kayapu nang eibuka ansiniptibye’ tenen, pia patalamsuk ati, ‘Dilbitibye’ tenen, pirilelamubu.

¹⁸ Aning ara, talye ati kume. ‘Sik dam bitibye’ tenen, winilamubu. Dipkoprop, na Paulus arye, aning ara, pia patalamnukbuk, ton talak tonap, ila tamubuka yuk talak tonap, pia piripdemse bukni, Isa Mutuku Dongonye arye, bisik sekdongopsuk ati, kum yanmanto ulamubu.

¹⁹ ‘Tesalonika ninye ap, neika dilbinamap’ tenena ati, anggun dam yangalelamubu ning ara, talye ati kume. Ara, yata mutuku ninye pin-pin kilisinyak do kume. Anggun uka. Ani, nunce peterelamsupuba, diba teneluluma ati ara, Yesus dolyanamsil talak, nunti kanye deipnamsile. Kanye deipsilyopura, anggun diba teneluluma ati, dekna ning arepnamsile. Aning ati ara, anggunti kanye pin-pin usulule.

²⁰ Ayupu nyapmasin touk, nunce anggunti kanye delisinyabe. Anggun diba teneplumce, diksukumuk winimunya deice arye, Yesus arye nunti, kanye deipnamsile. Ati, nunce anggunti, pia kanye delisinyabe.