1 Tesalonika 1 - Eipomek

Paulus arye, “Telebe” nyana ati, nyabuk yupu

¹ Telebe nun kayapu. Na Paulus ap, Silas ap, Timotius ap, nun nirya arye anggun Tesalonika mutuku ninye, diba akunum tenelulum ninye ati, asurat sekeipsiabe. Anggunda, nun ni Allah ap, nun Weik Deiyoknye Yesus Kristus ap, kanye dukdongobuka ululume. Nun Ni Kopropa Allah arye, anggun Tesalonika mutuku dib tenelulum ninye ati, bico tenesilirye, el kanye aryuk melisilye ning ap, ‘Yu ulana kumce, kanye deibuka telebuk neika unamak’ tenen, arisilya deiyok ning ap, arisulule. ‘Aning nirya ara, tuba-tuba arenamsil’ tenen, anggun Tesalonika mutuku ululum kili sal ati, Allah morosunune.

Tesalonika ninye diba tenelamik ning ati, Paulus arye Allah ati, “Telebe,” nyabuk yupu

² Allah moronyap talak nirya ara, anggunti tenepsibirye, Allah ati, “Telebe,” nyabuka, anggunti Allah morosenyabe.

³ Nun ni Allah moronyap talak nirya ara, anggun ulamlum ning nirya tuba tenenyabe. Tenenyap ning ara, ani. Ara, anggun diba tenelulum deice arye pil dolulum ning ap, yuk nang ati bico tenelulumak arye melilamlum ning ap, anggun pi dobuka, pil dolulum ning ap, tuba tenenyabe. Anggunda, ‘Nun Weik Deiyoknye Yesus Kristus, elce dipkoprop melinamsil’ tenen, kanye lamabuka elti, dinauk umunya deice arye, pil batakna kum aniryuk, pia pi dobuka pil dolulume.

⁴ Nun weit yapu atonun nango, nun kele. Allah arye pia bico tenesulule. Elce, anggunti wiamsuke.

⁵ Elce anggunti wiamsuk nang laka ubukura, kel kibupu deiyok ara, nunce anggunti peterelamsupu ura, Allah el laka teleb yupu, ninye lyena yupu anggun dam yayuk talak ara, talye yupu deice aryuk kum yayuke. Aning kumde. Nunce anggunti, Allah el laka teleb yupu peterelamsupu talak nirya ara, Allah El Dib Kanye arye, el mikip weika arye areamsuk ning ap, nunti melilamsukbuk, kanye bokoltona kum aryuk, ‘Ayupu ara, pia dipkoprop upnamle,’ tenelamubu ning ap deice arye peterelamsupu. Ati, nun kele, Allah arye anggunti, ‘Na mapu unamake’ tenen, wiamsuke. Tonda, anggun ap neika ulamubu talak noutamak arye, anggun melina ap, kel kina ap ati, winilamubu ning nirya ara, anggun akunum elilamsulumce kel bikamsulume.

⁶ Nun ap, Yesus Kristus ap, winilamubu ning nirya elilamlumce kel bikamlume. Wini talak akunuma, nun winilamubu ning ap, Yesus winilamuk ning ap, anggun babye, atonun winilulume. Anggun diba tenelamlumba, yuk nang arye, ikin ning weika arye anggun nong deice delilamik. Winilamik bukni, anggun kanye imun kanye bona ap, ikin ning ap, ulamsuk bukni, anggun batakna kum, Allah el laka teleb yupu ati, kanye deibuka dololamlume. Allah El Dib Kanye arye, pin-pin kililamsukbuk, kanye deibuka Allah yupu dololamlume.

⁷ Winilamluma ati ara, yuk mutuku nang sik kel bikna ati, winipmanto nang ululume. Ara, sik Provinsi Makedonia tam diba tenebuka unyak nang ap, Provinsi Akaya tam diba tenebuka unyak nang ap arye, anggun Tesalonika mutuku ninye ulalum ning elilamikce, kel bikamike.

⁸ Tonda, Provinsi Makedonia tam ap, Provinsi Akaya tam anyuk kume. Anggunce Allah ati diba tenebuka, diksukumuk umunya deice arye, yuk nang eibikirye, laka nyalbakibuk, mutuku-mutuku nirya unyak ninye arye, anggun diba tenelamlum ning ap, Allah el yupu ap ati, kel bikinyake. Nunce, ‘Aninye kekebikirye kel biknamak’ tenen, peterelbitibye bukni, anggun winimunya deice arye, akunum kel bikinyaka anya arye, ayupu nirya peterelbana ati, ‘Dauplye’ tenen, kum laka nyalbanyabe.

⁹ Anyapmap mutuku-amutuku nang nirya arye, akunum kel bikamika anya arye, sikce laka nyanyake. Ara, nunce anggun dam yapubuk, kanye deibuka yukulamsulum ning ap, Allah yupu kekebuka dololamlum ning ap laka nyanyake. Sikce laka nyasinyak yupu ara, ani. Ara, “Sik Tesalonika ninye arye, ‘Allah el ara, pia dipkoprop Kam Unanye, el tonoka’ tenen, diba tenebikirye, ‘Eluk talibuka, el piluk donamape’ tenen, sik mem ning isa si erebuka, talyamik ning nirya ara, akunum batakik.” Yuk nang arye nyabuka laka nyaninyake.

¹⁰ Tonda, ‘Allah arye el Mi Koprop Yesus dibukce, kam bukeibuknye birye, im deice arye dolyanamsil’ tenen, pia kanye deiplumce, kintinibuka dinauk ululum ning ara, aning ton laka nyaninyake. Ara, Allah arye, malye winilamice nang ap, malye winin ning nirya ap ati, weik arye weneplirye, oplopnamle talak noutamak ara, Yesus arye lyebuka loplopnamsile.