1 Tawarikh 9 - Eipomek

Yehuda tam ulamik nang ara, sik wenena ati, yu nang arye obuka malye kibikce, yuk mutuku delilbiyikba, daulamika ani, tamubuka sik mutuku yayik nang ati, sekeibik yupu

¹ Israel nang, sik yala nang nirya, yuk-yuk deipdanin yangalamika ani nirya ati, nukuka si sekik. Anukik nang sik si sekik buku ara, Israel nang talilamik nang sik si sekekuka delilamik buku noutamakuk sekekuka deibik. Abuku si ara, ‘Buku Raja-Raja Israelʼ nyabuka sekik. Yehuda tam ulamik nang ara, sik bidamang malye ulamika menenga dekna ati, wenena ara yuk pera mutuku, Babel mutuku yu nang arye, Israel nang obuka malye kibikce, anang nirya tomobuka, tapu koubukabikce, sik mutuku, Babel mutuku uk tamubuka delilbinamik.

² Israel yala nang, sik wenena ati, Babel mutuku donokamukak, dabinuka keting tamun weika arye daulamika ani, tamubuka, sik min arye ulamik mutuku yangana ati, bulubuka yayik nang ara ani. Ara, Allah el si eren aik pum tam pil don nang, sik imam nang ap, imam nang pil melilamik nang, Lewi yala nang ap, ayal nang bukni, yuk daton deiamik mapu silip ap, anang sik melina ati, talye pil dolamik nang ap, sikda minopce tamubuka yayik. Anang nirya ara, Israel yala nang ulamik.

³ Tamubuka yayikura, ton Yehuda yala nang ap, Benyamin yala nang ap, Efraim yala nang ap, Manasye yala nang noutam arye ton bokdobik nang ap ara, mitiktoa arye, minop yayikce, Yerusalem mutuku uk, yanuka ulamik.

⁴ Yerusalem mutuku tamubuka yayik nang ara, Yehuda birye deiamukba, el mapu sikce deibikura, dadeipdanin yangalamik nang ara, yupa mitiktoa arye, ila tamubuka, Yerusalem mutuku yayikce ulamik. Yehuda elce deiamuk nang tamubuka, Yerusalem mutuku yayik nang, sik si ara, ani. Utai el li koproba ara, Amihud ulamuk. Amihud el li koproba ara, Omri ulamuk. Omri el li koproba ara, Imri ulamuk. Imri el li koproba ara, Bani ulamuk. Bani el li koproba ara, Peres ulamuk. Peres el li koproba ara, Yehuda ulamuk. Sik winibuka nang tamubuka yayik.

⁵ Tonye bira, Syela birye deibukba, dadeipdanin yangalamik nang, sik duweit nirya ati bulubuka, deiyok kiamuknye bira, Asaya ulamuk. Asaya bira, Syela el minyuma deiamuk mi ulamuk. Ati, Asaya birye deibukba, deipdanin yayik nang babye, sik apu koproba ara, Syela ulamuk.

⁶ Tonda, ninye si, Zerah birye deibukba, dadeipdanin yangalamik nang, sik mapu nirya ati, buluna deiyok kiamuknye bira, Yeuel ulamuk. Ati Yeuel birye deibukba, dadeipdanin yayik nang babye, sik apu koproba ara, Zerah ulamuk. Ayala nang sik yupa, enam ratus sembilan puluh (690) nang yanuka, Yerusalem mutuku ulamik.

⁷ Benyamin birye deiamukba, el yala nang arye deibikura, dadeipdanin yangalamikce, ulamik nang ara, tonye el si Salu. Salu el li koproba ara, Mesulam ulamuk. Mesulam el li koproba ara, Hodawya ulamuk. Hodawya el li koproba ara, Hasenua ulamuk.

⁸ Tonda, Yeroham el mi Yibnia ap, Uzi el mi Ela ap, tonda Ela el apu koproba ara, Mikri ap, Yibnia el mi Ruel ap, Ruel el mi Sefaca ap, Sefaca el mi Mesulam ap, sik nirya babye tamubuka, Yerusalem mutuku noutamak yayikce, daulamik.

⁹ Yerusalem mutuku tamubuka yayik nang, sik yupa, sembilan ratus lima puluh enam (956) nang yanuka ulamik. Sik anang nirya arye deiyok kibuka, sik yala nang talibuka yupu nyalamik.

Imam-imam nang, Babel mutuku arye tamubuka yayikce, Yerusalem mutuku yanuka ulamik nang ati, nyabuk yupu

^10-11 Allah el si eren aik pum tam pil don nang, sik imam-imam tamubuka Yerusalem mutuku yayik arye ulamik nang, sik si ara ani. Yedaya ap, Yoyarib ap, Yakhin ap, tonda Hilkia el mi Asarya ap ulamik. Anang sik apu yapu si ara, ani. Ara, Hilkia el li koproba ara, Mesulam ulamuk. Mesulam el li koproba ara, Zadok ulamuk. Zadok el li koproba ara, Merayot ulamuk. Merayot el li koproba ara, Ahitub ulamuk. (Ahitub bira Allah el si eren aik kalikna pil ati talibuka dolamik nang, nirya sik deiyoknye ulamuk). Anang nirya ara, Babel mutuku arye batakuka, Yehuda tam tamubuka yayikce, Yerusalem asik yanuka daulamik.

¹² Tonda, yuk imam-iman nang, sik si ara, ani. Ara, Yoreham birye deibuk mi ara, Adaya ap, Yoreham el li koproba Pashur ap, Pashur el li koproba Malkia ap, Adiel el li koproba Yazera ap, Yazera el li koproba Mesulam ap, Mesulam el li koproba Mesilemit ap, Mesilemit el li koproba Imer ap, sik anang nirya babye, Babel mutuku arye batakuka, Yehuda tam tamubuka yayikce, Yerusalem mutuku, yayikura, asik dobuka ulamik.

¹³ Sik anang, sik imam-imam pil don nang ara, sikce deiamikba, dadeipdanin yayikce ulamik nang, sik duweit ap, sik yala nang nirya ap ati, ninye deiyok kibuka, buluna nang ulamik. Sik yupa pia weik, seribu tujuh ratus enam puluh (1.760.000) nang ulamik. Sik anang nirya ara, Allah el si eren aik noutam, pil dona deiyok nang ulamika ati, sik babye Yerusalem mutuku tamubuka yayikce, sik daulamik.

Lewi yala nang Babel mutuku arye tamubuka yayikce, Yerusalem mutuku yanuka ulamik nang ati, nyabuk yupu

¹⁴ Lewi yala nang arye deibikura, dadeipdanin yangalamik nang, sikce tamubuka Yehuda mutuku bukni, Yerusalem asik yanuka ulamik nang, sik si ara, ani. Ara, Hasub birye deibukba, dadeipdanin yayik nang, el si Semaya ap, Asrikam birye deiamuknye Hasub ap, Hasabya birye deiamuknye, el si Asrikam ap, tonda, Lewi el sirik taruk deibuk mi, el si Merari ap, tonda elce deiamuknye, Hasabya ap, tamubuka anang nirya ara, sik apu koproba, Lewi ulamukak yayik.

¹⁵ Tonda, Lewi yala nang arye deibikura, dadeipdanin yangalamik nang ton, sik si ara, ani. Ara, Bakmakar ap, Heres ap, Galal ap, tonda Matanya ap, tamubuka yayik. Matanya bira, Mikha el mi ulamuk. Tonda, Zikri elce deiamuknye, Mikha ap, tonda, Asaf birye deiamuknye, el si Zikri, elda Asaf el li koproba ulamuk.

¹⁶ Tonda, Semaya birye deiamuknye, Obaja ap, Galal birye deiamuknye, Semaya ap, Yedutun birye deiamuknye, Galal ap, Asa birye deiamuknye, Berekya ap, Elkana birye deiamuknye Asa ap, tamubuka Yehuda mutuku yayik. Asa el yala nang ara, Netofa mutuku nang ulamik mutuku uk, ulamik.

¹⁷ Ura, Allah Yahweh el si eren aik bublan bisik, wekelban dam kalikna nang ara, sik nirya tamubuka, Yehuda tam kum yayik bukni, sik noutam arye bokuka, ton nang ara, Babel mutuku arye tamubuka yanamikce, Yehuda tam bukni, Yerusalem asik noutamakuk yanuka ulamik. Anang sik si ara, ani. Ara, Akub ap, Talmon ap, Ahiman ap, Salum ap, tamubuka yayik.

¹⁸ Tonda, anang ara, minop talak Allah el si eren aik, wekena ati ban bisik bukni, keting yangan tam botopdeiamika ara, ninye deiyoknye Raja wekelamuk bisik bublan dam kalikna nang ulamik. Anang nirya ara, Israel nang weik pata mutuku ulamik talak ara, sik Lewi yala nang nirya arye, tenda arye domik aik ulamikak, kalekna deiyok nang ulamik.

¹⁹ Salum, el li koproba ara, Kore ulamuk. Kore el li koproba ara, Ebyasaf. Ebyasaf el li koproba ara, Korah ulamuk. Korah el ap, el li koproba arye deiamukba, dadeipdanin yangalamik tam nang ap, sik duweit nirya ati pil areamik nang ara, Allah Yahweh ap, ninye ap elana ati, doltakna tenda aik ara, Allah el si erena ati, bublan bisik dam kalikna pil areamikba, anang adiparyuk talibuka ulamik. Minop talak, sik ni yapu babye, sik mutuku noutam ulamik talak ara, ‘Allah Yahweh el si eren aik wekelban bisik bublan dam kalikna piluk donamakʼ tenen, areamikba, apiluk talibuka dolamik.

²⁰ Tonda, minop talak noutama ara, Eleazer el mi Pineas bira, Allah si erena ati dolina aik bublan dam kalikna nang, sik deiyoknye bira, Pineas ulamuk. Winilamukak, Allah Yahweh arye tuba elti, melilamuk.

²¹ Meselemya el mi Zakaria babye, Allah ap, ninye ap elana ati, doltakna tenda aik, Allah el si eren aik bublan damuk kalikinanye ulamuk.

²² Allah el si eren asik wekelban bisik bublan dam kalikna ati, wipdeiamik nang nirya ara, dua ratus dua belas nang (212) ulamikce kaliklamik. Sik anang ara, sik mutuku ulamik talak ara, sik duweit ap, sik yala nang ap, yuk-yuk daulamik touk, nabi Samuel ap, Raja Daud ap arye, ‘Dipkoprob ayala nang arye, teleb kibuka aik bisik bublan kaliknamake. Sik ti, dip tenepnuneʼ tenen, sikce si sekekuka deiprikce, apil arebikba, dolamik.

²³ Aning ati ara, sik anang ap, sikce deibikura, dadeipdanin yangalamik nang nirya ap ara, Allah Yahweh ap, ninye ap elana ati ara, el si eren ati doltakna tenda aik kintinip deiamik ning ara, aik wekelban bisik bublan dam kalikna piluk, pia talibuka dolamik. (Atalak ara, Allah el si eren aik ara, keil arye dolamik ning ara, min kum domik talak ara, tenda arye dolamik ati nyapne).

²⁴ Ara, aik el bisik bublan ara dumbarye botopdeiamik. Tonok ning ara, keting yangan tam Botopdeiamik. Ton ning ara, keting wekelban tam botopdeiamik. Ton ning arah, utara dabu tam botopdeiamik. Ton ning ara, selatan iknapye tam botopdeiamik.

²⁵ Winyamika ati, ton talak ara, ayala nang sik duweit noutam danyapce, yuk nang ton punubukce, yanuka kalikmana ani tamubuka, sik ulamikakuk yanuka, mitik-mitik asik dobuka ulamikak yanmana kilamik. Sik anang bindopneura, sik yala nang bukni, ton nang arye yanuka punubuka kaliklamik. Ara, anang yayikopura, tonok minggu noutam ara asum-asum nirya kaliklamik. Utouk, tonok minggu ton akunum upneura, anang sik kayapu arye, yan punubuka kaliklamikce, winibuka ulamik.

²⁶ Bukni, abublan wekelban bisik kalikna nang nirya ati, sik deiyok kiamik dumbarye nang ara, ton tamubuka binmana ani, yanmana ani, kum kilamik. Apiluk talebuka ulamik. Sik adumbarye deiyok nang ara, pia ati anyaikuk ulamikce, Allah Yahweh ap, ninye ap elana ati aik, Allah el si eren aik pum tam, pia teleb uamuk ning nirya ap, tonda anyasik noutam delilamik teleb bon ning nirya ap, anyasik wilibuka domik mitika nirya ara, kalikuka melina nang ulamik.

²⁷ Sik anang ara, Allah el si eren asik damuk ulamik. Ara, sik anang adiparyuk, Allah el si eren aik ara, kalikna ati ulamik. Tonda, Allah si eren ati, beren tam talak nirya, imam nang kum yanapne talak ara, sikce anyaik bublan kukulina ati, asukumuk ulamik.

Lewi yala nanguk ton tam nang bokuka, yuk pil talibuka dolamik ning ati, nyabuk yupu

²⁸ Lewi yala nanguk bokuka ton tam nang ara, Allah si eren aik pum tam uamuk ning, aik delin ning yala-yala nirya ati, kintinibuka delin ap, teleb kibuka mek likna ap, apil don nang ulamik. Sik anang adiparyuk, aik noutam un ning deiamik ning ara, nukuka dopropman ani, Allah el si eren pil donmana, akunum sirya daknarye, binuka deipnun talak babye, sik adiparyuk aning nirya nukuka delilbalamik.

²⁹ Lewi yala nanguk bukni, wilibuka ton tam nang ara, Allah el si eren aik noutam deiamik bun ning, meja ap, siltong ning uku dongonak ati, uku sekna ning ap, aning-aning nirya, Allah si eren pil don ning yala-yala nirya ap, tonda Allah arena ap, gandum tepung ap, anggur du mek ap, minyak zaitun mek ap, nintong teleb ning kemenyan ap, tonda uku dongona ati nintong teleb-teleb nyan ning nirya ap ati, kintinibuka deilin ap, teleb kibuka delina ap pil don nang ulamik.

³⁰ Bukni, nintong teleb-teleb nyan ning yala-yala nirya tabakuka dolina ap, tabakuka kintinibuka delina ap pil don nang ara, sik imam-imam nang arye delilamik mapu, sikcuk apil talibuka dolamik.

³¹ Lewi yala nang arye deimikak, dadeipdanin yangalamik nang arye deiamuknye, el si Syalum, elce minyuma deiamuknye bira Matica, anye birye Allah el arena ati delilamik roti kwaning ara, elcuk roti kwaning dalamukce arelamuk. Ara, ‘Allah arye, nun malye un ning kilipnamsil tenen, mesba deice delilamik. Syalum, el apu yapu ara, Korah yala nang ulamik.

³² Allah el si eren aik noutam bukni, Allah ati dabuka kintinipnarye, delilbalamik roti kwaning weik tam ning ara, talye pil dona kum Allah si eren sum, Sabat sum ara, roti kwaning min arye dabuka, deipman ning ara, asum winiryuk ning arye punubuka, dabuka delilamik. Ara, Allah si eren aik pum tam deiamik meja deice delilamik. Apil ara, Kehat birye deiamukba, dadeipdanin yangalamik nang arye deiamik nang adiparyuk aroti kwaningg dabuka delilamik.

³³ Tonda, Lewi yala nanguk wilipdopnarye, ton tam nang ara, Allah el si eren aik noutam arye, mitik-mitik aik wilibuka domik ning ara, anang arye aik malamik. Deiyok ara ani. Ara, anang ara, Allah si eren ati, Allah yupu mot nyana deiyok nang wipdeiamikba, ayala nang arye mot nyalamik. Ara keting noutam ap, lukunyan ap, atalak-atalak nirya ara, sik anang adiparyuk bulubuka, mot nyalamik. Sik anang nirya ara, Allah el si eren aik noutam, weik cang aik domika pum tamuk ulamik. Anang ati ara, yuk pil ton kum areamik. Sik nirya ara, anyasik koproba noutamuk ulamikce, mot nyalamik.

³⁴ Adeice tam si sekamuk nang nirya ara, Lewi yalanye arye deiamukba, sikce deibikura, dadeipdanin yangalamik nang, sik yala ap, sik duweit ap nirya ati, deiyok kibuka, buluna nang ulamik. Sik nirya ara, Lewi yala nanguk ulamik. Sik nirya ara, Babel mutuku arye batakuka, tamubuka Yehuda tam bukni, Yerusalem mutuku weik asik noutama uk yanuka, ulamik.

Raja Saul el apu yapu nang ap, Saul birye deibukba, dadeipdanin yangalamikce, ulamik nang ati, nyabuk yupu

³⁵ Benyamin yala nang arye deibikura, dadeipdanin yangalamik nang arye, tonoknye ton, el si Yeiel deiamik. Anye Yeiel birye bulubuka, Gibeon mutuku asik dobukce, deiyok kibukabukce, amutuku talibuka ulamuk. Yeiel el kil si ara, Maaka ulamuk.

^36-37 Winyamdika arye, sik mapu takubarye, (10) sepuluh deiamdik. Amapu sik si ara ani. Ara, Abdon, elda minyuma anye deiamdik. Abdon el amu tamnye bira, Zur deiamdik. Aminyan ara, Kish ap, Bahal ap, Ner ap, Nadab ap, Gedor ap, Ahyo ap, Zakaria ap, Miklot ap deiamdikba, daulamik.

³⁸ Tonye bira, el si Miklot, elce tonok mi el si ara, Simea deibuk. Yeiel ap, elce deibukba, dadeipdanin yangalamik nang, el yala nang ap, sik duweit ap ara, Yerusalem mutuku dam ulamik. Ara, sik tam nang ap neika amutuku damuk ulamik.

³⁹ Raja Saul, el li koproba ara, Kish ulamuk. Kish el li koproba ara, Nar ulamuka ati, Saul el apu koproba ara, Nar ulamuk. Saul bira, mapu dumbarye deiamuk. Anang sik si ara, ani. Ara, Yonatan ap, Malkisua ap, Aminadab ap, tonda Esybaal ap deiamuk.

⁴⁰ Saul el minop talak deibuknye Yonatan bira, elce mi tonok ton deiamuk. El si ara, Meri-Bahal nyamuk. Meri-Bahal birye, Mikha deiamuk.

⁴¹ Mikha bira, mapu dumbarye deiamuk. Anang sik si ara ani. Ara, Piton ap, Melek ap, Tahrea ap, tonda Ahas ap deiamuk.

^42-43 Ahas birye mi tonok deiamuk. Anye el si ara, Yoada nyamuk. Yoada birye, mapu ara winilye deiamuk. Anang sik si ara, Alemet ap, Asmawet ap, tonda Zimri ap deiamuk. Zimri elce deiamuknye bira, Mosa ulamuk. Mosa deibuknye bira, Bina ulamuk. Bina birye deibuknye bira, Rafa ulamuk. Rafa birye deibuknye bira, Elasa ulamuk. Elasa birye deibuknye bira, Asel ulamuk.

⁴⁴ Asel birye, mapu nakub barye deiamuk. Anang sik si ara ani. Ara, Asrikam ap, Bokhru ap, Ismael ap, Searya ap, Obaja ap, tonda Hanan ap deiamuk.