1 Tawarikh 7 - Eipomek

Isakar birye deiamukba, dadeipdanin yayik nang ati, nyabuk yupu

¹ Isakar bira, mapu dem dumbarye deiamuk. Anang sik si ara ani. Tola ap, Pua ap, Yasub ap, tonda Simron ap, winibuka deiamuk.

² Isakar elce deiamuknye, Tola birye, mapu nakub barye (6) deiamuk. Sik si ara ani. Uzi ap, Refaya ap, Yeriel ap, Yamai ap, Yibsam ap, tonda Shemuel ap deiamuk. Sikda, Tola el yala nang, sik duweit nirya ati, bulubuka kin nang, deiyok talibuka ulamik. Tonda, sik anang ati, yuk nang arye, ‘Kume, sik ayin talin nang ara, mikip ap, yu una ap ara, weik nang unyakʼ tenen, bikamik. Atalak ara, Raja Daud birye ninye deiyok kibuka taleamuk. Tola el yala nang, sik mapu silip nirya arye deimikak, dadeipdanin yangalamik nang arye deimikak, yin talin pil dolamik nang sik yupa, pia weik, dua puluh dua ribu, enam ratus (22.600) nang ulamik.

³ Tola elce deiamuknye, Uzi bira, sal mi tonok deiamuk. El si ara Yizraya. Yizraya elce sal mapu ara, dumbarye deiamuk. Sik si ara ani. Mikhanyel ap, Obaja ap, Yoel ap, tonda Yisia ap deiamuk. Uzi birye Yizraya deibukba, elce deiamuk nang nirya ara, ayala nang sik mapu silip nirya arye deibikura, dadeipdanin yangalamik nang, bulubuka kina deiyok nang ulamik.

⁴ Yizraya elce mapu winilye deiamukba, sikce kilapu weik dobikce mapu weik delilamik ati, sikce deibikura, dadeipdanin yangalamikce ulamik nang noutam ara, Aminyan yin talin nang weik wektingeʼ tenen, nukdebuka, sik si sekeibik nang yupa, pia weik, tiga puluh enam ribu (36.000) nang ulamik.

⁵ Isakar birye deiamukba, dadeipdanin yangalamik nang, sik duweit yuk-yuk arye delilamik nang arye, yin talin pil don nang nirya ati, nukdeyikce bikik nang yupa nirya ara, delapan puluh tujuh ribu (87.000) nang ulamik. Anang nirya ara, sik yala-yala yuk-yuk daulamik touk, sik si sekekuka deiamik. Anang nirya ara, yin talina mikip weik nang ulamik.

Benyamin ap, Dan ap, sikce deiamdikba, dadeipdanin yayik nang ati, nyabuk yupu

⁶ Benyamin bira, mapu winilye deiamuk. Sik si ara ani. Bela ap, Bekher ap, tonda, Yediael ap deiamuk.

⁷ Bela birye mapu pamubarye deimuk. Sik si ara ani. Ezbon ap, Uzi ap, Uziel ap, Yerimot ap, tonda Iri ap deiamuk. Sikda, Bela el yala nang, sik mapu nirya ati, ninye deiyok talibuka bululin nang ulamik. Tonda, sik anang ati, yuk nang arye, ‘Sik yin talin nang ara mikip kina ap, yu kina ap weik nang unyakʼ tenen, bikamik. Bela el yala nang, sik mapu silip nirya arye deibikura, dadeipdanin yangalamik nang ati, sik si sekelina ati buku, noutamakuk sekekuka deiamik. Tonda, yin talin pil dolamik nang, sik yupa, dua puluh dua ribu, tiga puluh empat (22.034) nang ulamik.

⁸ Bekherda, mapu toupne barye (9) nang deiamuk. Sik si ara ani. Zemira ap, Yoas ap, Elieser ap, Elyoenai ap, Omri ap, Yeremot ap, Abia ap, Anatot ap, tonda Alemet ap, sik winibuka nang deiamukak ulamik. Anang nirya ara, Bekher elce deiamuk mapu ulamik.

⁹ Sik anang nirya ara, Bekher el yala nang nirya ati, bulubuka ulamik. Bekher el yala nang, sik mapu nirya arye deibikura, dadeipdanin yangalamik nang arye deibikura, yin talin pil dolamik nang yupa, dua puluh ribu, dua ratus (20.200) nang ulamik. Tonda, sik anang ati, yuk nang arye, ‘Sik yin talin nang ara, mikip kina ap, ilil una kumce, mikip weik nangʼ tenen, bikik.

¹⁰ Yediael birye, mi tonok deiamuk. El si ara, Bilhan ulamuk. Bilhan birye mapu tekbarye (7) deiamuk. Sik si ara ani. Yeus ap, Benyamin ap, Ehud ap, Kenana ap, Zetan ap, Tarsis ap, tonda Ahisahar ap deiamuk.

¹¹ Sik anang ara, Yediael el yala nang, sik mapu silip nirya ati, ninye deiyok talibuka, bululin nang ulamik. Tonda, ‘Sik anang ati, yuk nang arye sik yin talin nang ara, mikip weik kina ap, yu kina ap ara, pia weik nang unyakʼ tenen, bikamik. Yediael el yala nang, sik mapu silip nirya arye deibikura, dadeipdanin yangalamik nang arye deimikak, yin talibuka pil dolamik nang, sik yupa, tujuh belas ribu dua ratus (17.200) nang ulamik.

¹² Tonda, Shupim ap, Hupim ap ara, ninye si Ir, elce deiamuk nang arye deibik nang ulamrik. Aher elce deiamuk mi ara, Husim ulamuk.

Naftali birye deiamukba, dadeipdanin yayik nang ati, nyabuk yupu

¹³ Naftali bira, mapu dumbarye deiamuk. Adeiamuk nang sik si ara ani. Yasiel ap, Guni ap, Yezer ap, tonda Salum ap deiamuk. Anang, sik apu koproba ara, Yakub ulamukce, el pil don kil Bilha doprobukce, amapu deiprika ati, anang sik nin el si ara, Bilha ulamuk.

Manasye birye deiamukba, dadeipdanin yayik nang ati, nyabuk yupu

¹⁴ Manasye birye el pil don kil, Aram mutuku kil ulamuka ati, el ap, akil ap ulamdikakarye, mapu bitinye deiamdik. Anang sik si ara, Asriel ap, Makhir ap nyabuka si domuk. Winibukopura, aminyan talak ara, Makhir birye mi tonok deiamuk. Anye el si ara, Gilead nyamuk.

¹⁵ Makhir birye Hupim ap, Shupim ap, sikce dopnamrik kilapu ati, elamuka ani eibukce arebuk. Makhir birye domuk kil el si ara, Maakha ulamuk. Makhir el mi bitinye nang, el si ara Zelafehad ulamuk. Zelafehad bira, mapu ton pia kum deiamuk. Elce kilmapu uk deiamuk.

¹⁶ Maakha birye, Makhir el kil arye, mapu ton bitinye deiamuk. Sik si ara,Peres ap, tonye bira Seres ap nyamuk. Winibukura, Peres birye atouk, mapu bitinye deiamuk. Sik si ara, Ulam ap, tonye bira, Rakem nyamuk.

¹⁷ Ulam birye mi tonok ton deiamuk. Ami el si ara, Bedan nyamuk. Sik anang si sekmap nang nirya ara, Manasye birye Makhir deibuk, Makhir birye Gilead deibukba, dadeipdanin yangalamikce, deibik nang ulamik. Anang nirya, sik apu koproba ara Manasye ulamuk.

¹⁸ Makhir el makal kil el si ara, Molekhet ulamuk. Molekhet elce mapu winilye deiamuk. Sik si ara ani. Isyhod ap, Abieser ap tonda Mahla ap deiamuk.

¹⁹ Gilead birye deiamuknye, Semi babye atouk, mapu dumbarye deiamuk. Sik si ara ani. Ahyan ap, Sekhem ap, Likhi ap, tonda Aniam ap deiamuk.

Efraim birye deiamukba, dadeipdanin yangalamik nang ati, nyabuk yupu

²⁰ Efraim birye, mapu winilye deiamuk. Tonoknye el si ara, Sutelah ulamuk. Efraim birye Sutelah deibukba, Suteleh birye deibuknye bira, Bered ulamuk. Bered birye Tahat deiamuk. Tahat birye Elada deiamuk. Elada birye el mi deibukce, asi Tahat nyabuka si domuk.

²¹ Anye Tahat birye, el mi Zabad deibuk. Zabad birye el mi Sutelah deibuk. Efraim birye deibuk mapu bitinye ara, Ezer ap, tonda Elad ap, sikda Gad mutuku ulamik nang, sik weilamik ning domba basam ap, sapi basam ap, dam binuka upula donmarikak, Gad mutuku koproba ulamik nang arye, amapu bitinye obik.

²² Obikba, sik ni koproba Efraim birye, asum-asum nirya, el mapu akunum diamdika ati, tenilamukce, engana uk ulamuk. Winilamuk ning ara, el kayapu nang arye, sik kwet el melina ati, el kanye pin-pin kipdeibikba, el kanye teleb ubuk.

²³ Aminyan talak ara, Efraim el kil ap neika malamrikce, daulamrika ani, el kil akunum mi bomuka ani, mi ton deibuk. Mi deibukopura, ami el li Efraim birye, ami el si ara, Beria nyabuk. Ara, Efraim el mapu bitinye obikura, diamdikak, imun kanye bomrika ati, asi domuk. Sik Ibrani yupu deice arye, asi el deiyok ara, ‘Imun kanye bon ning,’ tenena ati nyalamik. Ati el mi deibukce, asi Beria nyamuk.

²⁴ Efraim birye, kilmu ton deibuk. Akilmu el si ara, Sheera nyabuk. Sheera birye, mutuku si Bet-Horon itam mutuku nang ap, Bet-Horon arah utara mutuku nang ap, tonda Uzen-Sheera mutuku ap domuk. Ara, akil arye bulubuka, anyasik winilye domuk.

^25-27 Tonda, Efraim birye mi ton deibuk. Anye, el si ara, Refah nyamuk. Aminyan talak ara, Refah birye Resef deibuk. Anye Resef birye, el mi Telah deibuk. Telah birye el mi Tahan deibuk. Tahan birye el mi Ladan deibuk. Ladan birye el mi Amihud deibuk. Amihud birye, el mi Elisama deibuk. Elisama birye el mi Nun deibuk. Nun birye el mi Yosua deibuk. (Yosua bira, Musa dibukopura, elce Israel nang, sik deiyoknye ulamuk). Sik anang arye deibikura, dadeipdanin yanamik nang ara, amutuku talibuka daulamik.

²⁸ Efraim birye deibukba, dadeipdanin yangalamik nang ara, sik ulamik mutuku ara ani. Ara, Betel mutuku ap, amutuku dana-dana tam uamuk mitik-mitik asik dolamikak nirya ap, tonda keting yangan tam Naaran mutuku ap, tonda keting koumulban tam Gezer mutuku ap, amutuku dana-dana tam bukamuk mitik-mitik asik dobuka, ulamik mutuku nirya ap, tonda Sikhem mutuku ap, amutuku dana-dana tam uamuk mitik-mitik asik dobuka ulamik mutuku nirya ap, amutuku dipdongobuka arah utara bukamuk mutuku nirya bukni, siryai bira, Aya mutuku ap, amutuku dam mitik-mitik asik dobuka ulamik mutuku ap, amutuku-amutuku nirya ara, Efraim yala nang, sik mutuku uk uamuk.

²⁹ Sikda aulamikura, sik dam bukni, amutuku wililonak ara, yuk yala nang ulamik. Ara, Manasye birye deiamukba, dadeipdanin yangalamik nang ulamik mutuku nirya ara, anyasik ton uamuk. Ara, Bet-Sean asik ap, Taanak asik ap, Megido asik ap, Dor asik ap ulamik. Tonda, amutuku-amutuku dam uamuk mitik-mitik asik dobuka ulamikak nirya ap ara, yuk yala nang ulamik. Amutuku ap, anyasik nirya ap ara, Yakub, el si bitinye nang ara, Israel arye deiamuk mi Yusuf, elce deiamukba, dadeipdanin yangalamik nang ara, sikce amutuku-amutuku noutam nirya, doprobikce daulamik.

Asyer birye deiamukba, dadeipdanin yayik nang ati, nyabuk yupu

³⁰ Asyer birye mapu ara, dumbarye deiamuk. Sik anang si ara ani. Yimna ap, Yiswa ap, Yiswi ap, Beria ap ulamik. Anang sik makal kil el si ara, Serah nyamuk.

³¹ Winibukura, Beria birye deiamuk mapu ara, bitinye deiamuk. Sik si ara, Heber ap, tonda Malkiel ap, nyabuka si domuk. Malkiel elce Birzait deibuk.

³² Beria elce deiamuknye, Heber bira, mapu winilye deiamuk. Sik si ara, Yaflet ap, Somer ap, Hotam ap, tonda kilmu ton deiamukce, el si ara Shua nyamuk.

³³ Heber elce deiamuknye, Yaflet babye, mapu winilye deiamuk. Sik si ara, Pasak ap, Bimhab ap, tonda Asywat ap nyamuk.

³⁴ Yaflet el weit koproba Somer bira, elce mapu uk, dumbarye deiamuk. Sik si ara, Ahi ap, Rohga ap, Yehuba ap, tonda Aram ap, winibuka deiamuk.

³⁵ Helem el weit koproba Yaflet birye atouk, mapu dumbarye deiamuk. Sik si ara, Zofah ap, Yimna ap, Seles ap, tonda Amal ap deiamuk.

^36-37 Zofah birye deiamuk nang sik si ara, ani. Suah ap, Harnefer ap, Syual ap, Beri ap, Yimra ap, amapu ara koklombarye (11) ulamik. Anang sik si ara, Suah ap, Harnefer ap, Syual ap, Beri ap, Yimra ap, Bezer ap, Hod ap, Sama ap, Silsa ap, Yitran ap, Beera ap deiamuk. Yitrada, el siuk bukni bitinye ning ara, Yeter nyamuk.

³⁸ Anye Yeter birye deiamuk nang, sik si ara ani. Yufene ap, Pispa ap, tonda Ara ap deiamuk.

³⁹ Ura, Asher birye deibukba, dadeipdanin yayik nang arye deibik nye, el si Ula nyamik. Anye Ula birye deiamuk nang, sik si ara ani. Arah ap, Aniel ap, tonda Rizya ap deiamuk.

⁴⁰ Anang nirya ara, Asyer birye deibukba, dadeipdanin yangalamik nang ulamik. Tonda, sik anang nirya ara, sik yala ap, sik mapu silip nirya ati, ninye deiyok talibuka, bululin nang ulamik. Tonda, anang nirya ara, mikip weik arye yin talipnarye, ilil tenena kumce, pia teleb nang ulamik. Tonda, weik ninye deiyok nang ulamikce, aning-aning nirya ulamikba, ninye nirya arye, sik si bikilamik. Sikda, pia teleb kibuka ulamik. Asyer birye deibukba, dadeipdanin yangalamikce, ulamik nang kan-kan arye, yin talin pil dona ati, sik si seklamik nang yupa, dua puluh enam ribu (26.000) nang ulamik.