1 Tawarikh 6 - Eipomek

Lewi yala nang arye deibikura, dadeipdanin yangalamik nang arye, ‘Allah el si eren aik pum tam pil donamakʼ tenen, imam nang kiamik yupu

¹ Lewi birye deiamuk mapu ara, winilye nang deiamuk. Sik si ara ani. Gerson ap, Kehat ap, Merari ap, sik winibuka nang ulamik.

² Lewi birye deiamuknye Kehat bira, mapu uk dumbarye deiamuk. Ara, Amran ap, Yizhar ap, Hebron ap, tonda Uziel ap ulamik.

³ Kohat birye deiamuknye Amran, el mapu ara, mapu bitinye deiamuk. Ara Harun ap, Musa ap deiamuk. Tonda elce deiamuk kilmu ara, Miryam deiamuk. Harun bira mapu dumbarye deiamuk. Ara, Nadab ap, Abihu ap, Eliazer ap, tonda Itamar ap deiamuk.

⁴ Harun birye deibukba, Eliazar birye deibuknye bira, el si Pineas ulamuk. Pineas birye deibuknye bira, Abisua ulamuk.

⁵ Abisua birye deibuknye bira, el si Buki ulamuk. Buki birye deibuknye bira, el si Usi ulamuk.

⁶ Zeraya birye deibuknye bira, el si Merayot ulamuk.

⁷ Amarya birye deibuknye bira, el si Ahitub ulamuk.

⁸ Sadok birye deibuknye bira, el si Ahimas ulamuk.

⁹ Asarya birye deibuknye bira, el si Yohanan ulamuk.

¹⁰ Yohanan birye deibuknye bira, el si Asarya ulamuk. Ura, Asarya bira, Allah el yupu si erena ati domik aik pum tam, mambul pil donanye ulamuk. Anyaik ara, Raja Salomo birye, Yerusalem mutuku noutamuk domuk.

¹¹ Asarya birye deibuknye bira, el si Amarya ulamuk. Amarya birye, deibuknye bira, el si Ahitub ulamuk.

¹² Ahitub birye deibuknye bira, el si Sadok ulamuk. Sadok birye deibuknye bira, el si Salum ulamuk.

¹³ Salum birye deibuknye bira, el si Hilkia ulamuk. Hilkia birye deibuknye bira, el si Asarya ulamuk.

¹⁴ Asarya birye deibuknye bira, el si Seraya ulamuk. Seraya birye deibuknye bira, el si Yosadak ulamuk.

¹⁵ Yosadak elda, Allah arye Yehuda mutuku ulamik nang ap, tonda weik asik Yerusalem mutuku nang ap, yuk karin mutuku ninye deiyoknye, Raja Nebukadnesar birye, atam nang nirya obuka, malye kibukce, ton batakikura, tuba ulamik nang ara, tapu koubukabikce, sik mutuku koproba pera, Babel mutuku bobinamik. Ara, Allah arye, Babel mutuku taleamuknye, Raja Nebukadnesar deice arye mikip arebukba, Yehuda tam ulamik nang nirya malye kibukce, yuk mutuku bobuka delilbinamuk.

Lewi yala nang bukni, ton yuk tam arye deibik nang ati, sekik yupu

¹⁶ Lewi el mapu ara, mapu uk winilye deiamuk nang ara ani. Gerson ap, Kehat ap, tonda Merari ap deiamuk.

¹⁷ Lewi birye deiamuknye Gerson, el mapu ara ani. Libni ap, Simei ap, winibuka deiamuk.

¹⁸ Kehat birye mapu ton deiamuk nang, sik si ara ani. Amran ap, Yisar ap, Hebron ap, tonda Uziel ap, sikda Kehat birye deiamuk nang ulamik.

¹⁹ Lewi birye deiamuknye Merari ulamuk. Merari birye deibuk mapu ara, Mahli ap, Musi ap, sikda Merari birye deiamuk. Sik Lewi yala nang arye deibikura, dadeipdanin yangalamika ara, sik weik deiyok nang si aseklamik touk, nun babye asekupu. Weik nang, sik si ara, ani.

²⁰ Gerson birye deibuk mi ara, Libni ulamuk. Libni birye deibuk mi ara, Yahat ulamuk. Yahat birye, deibuk mi ara, Zima ulamuk.

²¹ Zima birye deibuk mi ara, Yoah ulamuk. Yoah birye deibuk mi ara, Ido ulamuk. Ido birye deibuk mi ara, Sera ulamuk. Sera birye deibuk mi ara, Yeatrai ulamuk.

²² Kehat birye deiamuknye ton, Aminadab ulamuk. Aminadab birye deibuk mi ara, Korah ulamuk. Korah birye deibuk mi ara, Asir ulamuk.

²³ Kehat birye deiamuknye, Asir birye deibuk mi ara, Elkana ulamuk. Elkana birye deibuk mi ara, Ebyasaf ulamuk. Ebyasaf birye deibuk mi ara, Asir ulamuk.

²⁴ Ebyasaf birye deibukba, Asir birye deibuk mi ara, Tahat ulamuk. Tahat birye deibuk mi ara, Uriel ulamuk. Uriel birye deibuk mi ara, Usia ulamuk. Usia birye deibuk mi ara, Shaul ulamuk.

²⁵ Elkana el mapu ara, bitinye ton deiamuk. Sik si ara, ani. Amasai ap, tonda Ahimot ap ulamrik.

²⁶ Ahimot birye deibuk mi ara, Elkana ulamuk. Elkana birye deibuk mi ara, Sopai ulamuk. Sopai birye deibuk mi ara, Nahat ulamuk.

²⁷ Nahat birye deibuk mi ara, Eliyab ulamuk. Eliyab birye deibuk mi ara, Yeroham ulamuk. Yeroham birye deibuk mi ara, Elkana ulamuk. Elkana birye deibuk mi ara, Samuel ulamuk.

²⁸ Samuel el mapu ara, mapu uk bitinye deiamuk. Tonye bira, Yoel ulamuk. Ton bitinye anye bira, Abija deiamuk.

²⁹ Ura, yuknye el si Merari birye deiamuknye, el si ara Mahli ulamuk. Mahli birye deiamuknye el si ara, Libni ulamuk. Libni birye deiamuknye el si ara, Mahli ulamuk. Mahli birye deiamuknye el si ara, Simei ulamuk. Simei birye deiamuknye, el si ara, Uza ulamuk.

³⁰ Uza birye deiamuknye, el si ara, Simea ulamuk. Simea birye deiamuknye, el si ara, Hagaia ulamuk. Hagaia birye deiamuknye, el si ara, Asaya ulamuk.

Allah si eren talak ara, kecapi ap, suling ap, mot nyan ning bung-bung ana bopnarye, mot nyalamik ati, nyabuk yupu

³¹ Allah arye, “Wininamlume, aning ara, pia kum wininamlume,” nyabuka, nyalin yupu deice arye nyapdeibukba, Musa birye asekamuk yupu deiamik yo pum tam memebuka Peti Perjanjian yo ara, aning dobuka, Allah Yahweh, el si erena ap, el arena ap ati asik, Yerusalem mutuku noutam arye, ayo peti pum tam deililbiyik. Aning deililbiyik talak ara, Raja Daud birye, ‘Aning ara, Allah Yahweh el si erena ati, mot yupu nyanamsiake,’ tenen, ninye yuk nang wipdeibuk. Tonda, ‘Nun pil ara, aningʼ tenen, lipsisikuka, Allah el si eren aik, tia talak ati, tenda arye doltakna aik pum tam, ‘Amot pil donamsiakʼ tenen, wipdeibuk.

³² Raja Daud birye anang wipdeibukba, atalak arye dipdongobuka, dotalak Raja Salomo birye, Allah el si eren aik domuk talak ara, weik asik el si ara, Yerusalem noutam domuk. Atalak noutam nirya ara, ananguk mot nyalamik. Anang nirya ara, tia ati, Raja Daud birye tenda arye dolina aik kintinibuka deimuk ning arye, Allah si eren mot nyana ati ara, tonok-tonok nang ati lo arepman touk, nyalamik. Aning nirya ara, Raja Daud birye, ‘Winibuka unamlume,’ nyapdeibuk touk, sikce ananguk talibuka ulamik.

³³ Allah el si eren aik, mot nyana ati lo areamik nang, sikce deibikura, dadeipdanin binamik nang, sik si ara ani. Sik anang nirya ara, Kehat yala nang ulamik. Ayala nang arye deiamik nye, el si Yoel bira, elce deibuknye Heman birye mot nyalamuk. Heman el li koproba ara, Yoel ulamuk. Yoel el li koproba ara, Samuel ulamuk.

³⁴ Samuel el li koproba ara, Elkana ulamuk. Elkana el li koproba ara, Yeroham ulamuk. Yeroham el li koproba ara, Eliel ulamuk. Eliel el li koproba ara, Toah ulamuk.

³⁵ Toah el li koproba ara, Zup ulamuk. Zup el li koproba ara, Elkana ulamuk. Elkana el li koproba ara, Mahat ulamuk. Mahat el li koproba ara, Amazai ulamuk.

³⁶ Amazai el li koproba ara, Elkana ulamuk (Anye Elkana bira, Zup el weit kume. Anye bira, el si ato touk bukni, elda yuk Elkana ulamuk.) Amazai el li koproba Elkana bira, el li koproba ara, Yoel ulamuk. Yoel el li koproba ara, Asarya ulamuk. Asarya el li koproba ara, Zepanya ulamuk.

³⁷ Zepanya el li koproba ara, Tahat ulamuk. Tahat el li koproba ara, Asir ulamuk. Asir el li koproba ara, Ebyasaf ulamuk. Ebyasaf el li koproba ara, Korah ulamuk.

³⁸ Korah el li koproba ara, Yizhar ulamuk. Yizhar el li koproba ara, Kehat ulamuk. Kehat el li koproba ara, Lewi ulamuk. Lewi el li koproba ara, Yakub, el si ton Israel nyalamik.

³⁹ Asaf bira, Allah el si eren aik noutam mot nyan nang, sik deiyoknye ara, bulinanye bukni, deiyok bitinye anye ulamuk. Mot nyana bulubuka kina nye, Yoel el mi Heman, el melinanye bira Asaf ulamuk. El ap, el melibuka mot nyalamik nang ap ara, Heman el sirik tam tiklamikce, mot nyalamik. Asaf el li koproba ara, Berekya ulamuk. Berekya el li koproba ara, Simea ulamuk.

⁴⁰ Simea el li koproba ara, Mikhael ulamuk. Mikhael el li koproba ara, Baseya ulamuk. Baseya el li koproba ara, Malkia ulamuk.

⁴¹ Malkia el li koproba ara, Etai ulamuk. Etai el li koproba ara, Zera ulamuk. Zerah el li koproba ara, Adaya ulamuk.

⁴² Adaya el li koproba ara, Etan ulamuk. Etan el li koproba ara, Zima ulamuk. Zima el li koproba ara, Simei ulamuk.

⁴³ Simei el li koproba ara, Yahat ulamuk. Yahat el li koproba ara, Gerson ulamuk. Gerson el li koproba ara, Lewi ulamuk.

⁴⁴ Ura, mot nyana deiyoknye Heman, el kwanim tam tiklamukce, mot nyalamuknye bira, Etan ulamuk. Etan bira, Allah el si eren aik pum tam mot nyana ati yupa ara, deiyok winilyenye ulamuk. Elda, Merari birye deibukba, deipdanin yangalamik nang arye deiamiknye ulamuk. Asukum mot nyan nang ati, sik deiyoknye Etan, el li koproba ara, Kisi ulamuk. Kisi el li koproba ara, Abdi ulamuk. Abdi el li koproba ara, Maluk ulamuk.

⁴⁵ Maluk el li koproba ara, Hasabya ulamuk. Hasabya el li koproba ara, Amazia ulamuk. Amazia el li koproba ara, Hilkia ulamuk.

⁴⁶ Hilkia el li koproba ara, Amsi ulamuk. Amsi el li koproba ara, Bani ulamuk. Bani el li koproba ara, Semer ulamuk.

⁴⁷ Semer el li koproba ara, Mahli ulamuk. Mahli el li koproba ara, Musi ulamuk. Musi el li koproba ara, Merari ulamuk. Merari el li koproba ara, Lewi ulamuk.

⁴⁸ Ura, sik deipkirikrop nye, Lewi birye deibukba, dadeipdanin yangalamik nang, sik Lewi yala nang, yuk nang nirya ara, wipdeiamikba, Allah el si eren aik pum tam pil, yuk pil ton bokuka arebikura, apiluk talibuka ulamik. Atalak ara, Allah el si eren ap, elti, arena ati ara, tenda arye doltakna aik, dobuka kintinip deiamik. Anyaik noutam ara, sik Israel yala nang nirya arye, Allah ati, teleb ning arelamikce, el siuk erelamik.

Harun birye deiamukba, dadeipdanin yangalamik nang ati, nyabuk yupu

⁴⁹ Ura, Harun ap, elce deibukba, dadeipdanin yangalamik nang ap, sik pil ara ani. Ara, Allah si eren ati, domik aik pum ara, siltong teleb ning bobuka uku seknarye, aning uku dongolamikba, uku dilamuk. Ayala nang uk bukni, ton nang bokuka, wipdeiamikba, Allah el arena ati, kam ning opnapnarye, aning deice delilyanganak, el si mesba kintinibuka deilin pil ap, tonda Allah arena ati kam ning bobuka yakceba, mesba deice dilamuk uku dongona pil ap, ‘Ayala nang arye, apiluk talibuka donamakʼ tenen, wipdeibik. Allah el si eren aik pum tam bukni, malye ning tonok ning babye, pia kum uamukak, pia teleb lek aik noutam ara, apil-apil nirya talibuka dolamik. Apil dolamik ning deiyok ara ani. Ara, ‘Nun Israel nang malye unyap ning ati, oplosuturye, sirya daksutu bukni, amalye ning nirya ara, kilipsilirye, kum kipdeipnamsilʼ tenen, akam ning obuka arelyangalamikce, mesba deice uku dongolamik. Harun ap, elce deiamuk mapu ap, sikce aning talibuka pil olamik. Awinilamik ning nirya ara, Allah el pil donanye Musa birye, “Aning ara wininamlume, aning ara pia kum wininamlume,’ nyapdeiamuk ning atibuk tenebuka, anyasik pil talibuka ulamik.

⁵⁰ Ura, Harun birye deibukba, dadeipdanin yangalamik nang ara, sik si ani. Harun birye deiamuknye el si ara, Eliaser ulamuk. Eliaser birye deiamuknye el si ara, Pineas ulamuk. Pineas birye deiamuknye el si ara, Abisua ulamuk.

⁵¹ Abisua birye deiamuknye el si ara, Buki ulamuk. Buki birye deiamuknye el si ara, Usi ulamuk. Usi birye deiamuknye el si ara, Zeraya ulamuk.

⁵² Zeraya birye deiamuknye el si ara, Merayot ulamuk. Merayot birye deibuknye el si ara, Amarya ulamuk. Amarya birye deiamuknye el si ara, Ahitub ulamuk.

⁵³ Ahitub birye deiamuknye el si ara, Zadok ulamuk. Zadok birye deiamuknye el si ara, Ahimas ulamuk.

Lewi yala nang ulamik mutuku ati, nyabuk yupu

⁵⁴ Harun birye deiamukba, dadeipdanin yangalamik nang, sikce sik tuku talibuka ulamik amutuku-amutuku nirya ara ani. Harun birye deiamuknye Kehat, elce deibukba, dadeipdanin yangalamik yala nang ara, sik una ati areamik mutuku ara ani. Ara, ‘Lewi yala nang ati, amutuku noutama ara, anyasik ton dobuka, omutuku noutama ara, anyasik binidobuka, talibikirye daunamakʼ tenen, wibuka areamik mutuku ara, ani. Ara, minyuma tam ara, sik Kehat yala nang arye dorobik.

⁵⁵ Ati, sik Kehat yala nang arye taleamik mutuku ara ani. Yehuda tam noutam bukni, anyasik si ara, Hebron mutuku arebik. Tonda, amutuku dam bukni, dipdongobuka, binamuk ani, amutuku dana-dana tam, amutuku dam tukwak maning teleb pamuk mutuku nirya ara, wibuka arebikura, sik Kehat yala nanguk atuku taleamik.

⁵⁶ Bukni, Hebron mutuku dam bukni, mitik asik dobuka ulamik ning ap, amutuku arye otam, mitik karin sukum mutuku wa winak ap ara, Yefune el mi Kalep biti wibuka arebikura, atuku talibuka daulamik.

^57-59 Ati ara, Harun birye deiamuknye Kehat, elce deiamukba, dadeipdanin yangalamik nang ara, Hebron mutuku wibuka arebik. Tonda, Hebron mutuku ara, mambul mutuku uamuk. Ara, Israel nang noutam arye, tonoknye ton, el mangkau arye unmanbuk, yuknye oplyeba, yuk nang arye anye biti, ‘Nun ka opmuknye bira, nunce kwang dakuka opnuyapʼ tenen, dobonmakce nang, sik teleb kibuka wekelban mutuku uamuk. Mangkau arye ninye opmoka deiyoknye bira, amutuku binuka weknopura, yuk nang arye elti, tomoptingce, kum wenebuka optinge. Amutuku ara, Hebron mutuku arebik. Amutuku si ara ani. Libna sen asik ap, Estemoa asik ap, Hilen asik ap, Debir asik ap, Asan asik ap, Bet-semes asik ap ara, amutuku-amutuku wibuka Kehat yala nang ati arebik. Tonda, amitik asik nirya, dana-dana tam bukamukce, weik maning palamuk mutuku, alu nirya ap ara, Kehat yala nang ati arebik.

⁶⁰ Tonda, Benyamin yala nang, sik mutuku dopromik noutama ara, Kehat yala nang ati arebik. Amitik-mitik asik si ara ani. Geba asik ap, Alemet asik ap, tonda Antot asik ap arebik. Tonda, amitik asik dana-dana tam uamukce, weik maning palamuk mutuku luak ap, arebikura, doprobik. Ara, mitik asik domik yupa, mikbarye (13) asik dobuka ulamikak ara, Kehat yala nang, sik duweituk una ati doprobik.

⁶¹ Manasye yala nang bukni, noutam arye bokuka ulamik nang, sikce taleamik mutuku ara, takubarye (10), asik dobuka ulamikak ara, Yordan mek duman bukni, keting kumulban tam ulamik tuku dolona ati ara, ‘Anang arye dopropnuyak do, yuk yala nang arye do?’ tenena ati, laka kilina deiyok ning, el si undi dobikce, Kehat birye deiamukba, deipdanin yangalamik nang bukni,tuku ton kum dopromik nang yala ati, anyasik dobuka arebik.

⁶² Gerson birye deibukba, dadeipdanin yangalamik yala nang, sik tam nang ara mitik asik ara mikbarye (13) arebik. Amutuku-amutuku nirya ara, Isakar yala nang ap, Asyer yala nang ap, Naftali yala nang ap, tonda Manasye yala nang bukni, noutam bokuka dantam nang ap nirya ara, sikce talibuka ulamik mutuku noutam arye bobuka Kehat yala nang arebik. Amutuku-amutuku ara, Yordan mek duman bukni, amek koubuka, otam keting yangan tam, Basan mutuku noutam, sik ayala nang talibuka, ulamik mutuku noutam uamuk asik, 13 bokuka Kehat birye deiamukba, dadeipdanin yangalamik nang arebik.

⁶³ Aning atouk, undi dobik ning ara, Merari birye deibukba, dadeipdanin yangalamik nang babye, sik unamik mutuku ati, arebikura, doprobik. Adoprobik mutuku ara, obarye, 12 desa doprobik. Ara, Ruben yala nang ap, Gad yala nang ap, Zebulon yala nang ap, ayala nang talibuka ulamik mutuku wibuka arebikura, doprobik.

⁶⁴ Aning nirya awinilamik deice arye, sik Israel yala nang arye, sik tuku kum dopromik yala nang, Lewi yala nang ara, sik talibuka unamik mutuku ara, mitik asik dobuka, un tuku ap, tonda domba basam din ati, maning teleb kibuka palamuk tuku ap ara, sikti, bokuka arebikura, doprobik.

⁶⁵ Tonda, undi dobik deice arye, Yehuda yala nang arye taleamik mutuku tam ap, Simeon yala nang arye taleamik mutuku tam ap, tonda Benyamin yala nang arye taleamik mutuku tam ap nirya ara, mitik-mitik asik dobuka, sik ulamik mutuku babye, bokuka sik Lewi yala nang ati arebikura, doprobik.

⁶⁶ Aning atouk, sik Efraim yala nang sik mutuku tam ara, ton tam wilibulika Kehat yala nang ati arebikura, doprobik. Ara, mitik-mitik asik dolamikak ap, domba basam weinak ara, maning teleb kibuka palamuk tuku ati, aning nirya bokuka arebikura, Kehat yala nang arye doprobik.

⁶⁷ Amutuku-amutuku noutama ara, sik Israel nang kan-kan arye, tonoknye ton el mangkau arye unmanbuk, yuknye oplyeba, anye biti yuk nang arye, ‘Nun ka opmalye kwang dakuka opnuyapʼ tenen, dobonman nang wekelban ati, teleb mutuku ton arebik. Amutuku si ara, Gezer mutuku ap, Sikhem mutuku ap, tonda, amutuku tam uamuk maning palamuk luak, domba basam weinak ati, arebikura, doprobik.

⁶⁸ Aning atouk, Yokmeam asik ap, Bet-Horon asik ap, amutuku tam bukamuk mutuku maning palamuk luak, domba basam weinak ati, arebikura, doprobik.

⁶⁹ Aning atouk, Ayalon asik ap, Gat-Rimon asik ap ara, amutuku tam uamukba, maning palamuk luak, domba basam weinak ati, Kehat yala nang arebikura, doprobik.

⁷⁰ Tonda, Manasye yala nang bukni, noutam arye bokuka, Yordan mek duman bukni, amek koubuka, keting koumulban tam ulamik nang arye, sik taleamik mutuku ton wibuka arebik. Amutuku arebik. Ara, mutuku si Akil mutuku asik dobuka ulamik mutuku ap, Bileam mutuku asik dobuka ulamikak ap arebik. Tonda, amutuku tuku dam ara, maning teleb kibuka palamuk mutuku ton arebikura, sik Kehat yala nang arye doprobik.

⁷¹ Gerson birye deiamukba, dadeipdanin yangalamik yala nang, sikti, ara, mitik-mitik asik dolamik mutuku tuku ap, maning teleb kibuka palamuk mutuku ap, bokuka arebikura, doprobik. Amutuku arebik nang ara, Manasye yala nang bukni, noutam arye bokuka, Yordan mek duman bukni, amek koubuka keting yangan tam ulamik nang arye arebik. Basan tam noutam bukni, Golon mutuku ap, tonda Asytarot mutuku dam mutuku ap, aning nirya ara, bokuka arebikura, sik Gerson yala nang doprobikce, amutuku daulamik.

^72-73 Tonda, Isakar birye deiamukba, dadeipdanin yangalamik yala nang, sikti, ara, mitik-mitik asik dolamik mutuku tuku ap, maning teleb kibuka palamuk mutuku ap, yuk ning ton bokuka arebikura, doprobik. Amutuku si ara ani. Ara Kedes mutuku dam ning ap, Daberat mutuku dam ning ap, Ramot mutuku dam ning ap, Anem mutuku dam ning ap arebikura, talibuka daulamik.

^74-75 Tonda, Asher birye deiamukba, dadeipdanin yangalamik yala nang, sikti, ara, mitik-mitik asik dolamik mutuku ap, maning teleb kibuka palamuk mutuku ap, yuk ning ton bokuka arebikura, doprobik. Amutuku si ara ani. Ara, Masal mutuku dam ning ap, Abdon mutuku dam ning ap, Hukok mutuku dam ning ap, Rehob mutuku dam ning ap arebikura, talibuka daulamik.

⁷⁶ Tonda, Naftali yala nang arye taleamik mutuku ton wibuka arebik. Amutuku arebik. Ara, mutuku si ara, Kedes mutuku asik dam bukni, Galilea tam ning ton bokuka arebik. Tonda, Hamon mutuku asik dam ning ap, tonda Kiryataim mutuku dam ning ap, arebikura, doprobik. Tonda amutuku dam ara, maning teleb kibuka palamuk mutuku ton arebikura, sik Kehat yala nang arye doprobikce daulamik.

⁷⁷ Ura Lewi birye deiamukba, dadeipdanin yangalamik nang arye, Merari deibik. Anye Merari birye deibukba, dadeipdanin yangalamik nang, sik unamik mutuku ara, min kum doprobik nang ara, mitik-mitik asik dolamik mutuku ap, teleb maning palamuk mutuku ap, bokuka arebikura, Merari yala nang doprobikce, sikda amutuku noutam ulamik. Anang ati tuku arebik yala nang ara, sik Zebulon yala nang arye arebik. Amutuku si ara ani. Rimono asik dam ning ap, Tabor asik dam ning ap arebikura, sik Merari yala nang arye doprobik.

^78-79 Aning atouk, Merari birye deibukba, dadeipdanin yangalamik nang, sik unamik mutuku ati ara, Ruben birye deiamuk yala nang arye sik mutuku ton bokuka arebik. Ruben yala nang, sik mutuku ara Yordan mek duman koubuka, oketeng yangan tam ulamik. Atam ara, weik asik Yeriko mutuku dolamik. Sik Ruben yala nang arye, Merari yala nang ati arebik mutuku ara ani. Weik mek kum mutuku dam bukni, amutuku si ara Besser mutuku asik dam ning ap, Yahas mutuku asik dam ning ap, Kedemot mutuku asik dam ning ap, Mefaat mutuku asik dam ning ap, arebik. Tonda anyasik-anyasik dam bukni, teleb maning palamuk mutuku ap, bokuka arebikura, sik Merari yala nang arye doprobikce, amutuku talibuka daulamik.

^80-81 Aning atouk, Merari birye deibukba, dadeipdanin yangalamik nang, sik unamik mutuku ati ara, Gad birye deiamuk yala nang arye, sik mutuku ton bokuka arebik. Sik Gad yala nang arye Merari yala nang ati arebik mutuku ara ani. Ara, Gilead tam noutam bukni, mutuku si ara Ramot mutuku asik dam ning ap, Mahanaim mutuku asik dam ning ap, Hesyebon mutuku asik dam ning ap, Yaezer mutuku asik dam ning ap, arebik. Tonda, anyasik-anyasik dam bukni, teleb maning palamuk mutuku ap, bokuka arebikura, sik Merari yala nang arye doprobikce, amutuku talibuka daulamik.