1 Tawarikh 5 - Eipomek

Ruben birye deiamukba, dadeipdanin yayik nang ati, nyabuk yupu

^1-2 Ruben bira, Yakub el mi dunye ulamuk. Ulamuka ati, el li koproba kunum dibukopura, elce el li koproba taleamuk ning, weik tam dopropmatue. Bukni, el li koproba Yakub min kum diamuk talak ara, el pil talye dolamuk kil, akil babye dobuka domuk. El mi Ruben birye, akil ap, neika mapdika deice arye, malye kipdeipdanamuk. Winyamuk deice arye, Yakub el mi dunye dopropmanto ning ara, Ruben biti kum arebuk. Aning kum bukni, el weit koproba Yusuf birye deiamuk mapu ati, arebuk. Yakub birye, el mapu deiamuk noutam arye, weik mambulnye bira, minop deiamuknye, Ruben ulamtu bukni, malye weik kipdeipdanamuk. Ati ara, ninye si sekamik buku nirya ara, min yuma deibice nang, el si sekenyak bukni, Ruben el si ara, min kum sekenyake. Yehuda bira, el duyapu kan-kan ara, weik mambulnye ulamuk. Tonda, elce deibukba, dadeipdanin yangalamik nang arye deiamiknye bira, ninye deiyoknye talibuka, Raja ulamuk. Winilamuk bukni, sik apu koproba Yakub birye, el minop deibuk mi dopropmanto ning ara, Ruben biti kum arebuk. Aning ara, Yusuf birye deiamuk mapu ati, arebuk.

³ Ura, Israel, el si ton Yakub bira, el mi dunye bira, Ruben ulamuk. Ruben elce, deiamuk mapu ara, dumbarye nang deiamuk. Sik si ara, ani. Henok ap, Palu ap, Hesron ap, Karmi ap ulamik.

^4-6 Tonda, Ruben birye tonoknye ton deibukce, anye el si ara, Yoel nyabuka si domuk. Yoel birye deiamukba, dadeipdanin yangalamik nang, sik si sekekuka deiamik. Yoel birye deiamuknye, el si ara, Semaya ulamuk. Semaya elce deiamuknye bira, Gog ulamuk. Gog el mi ara, Simei ulamuk. Simei el mi ara, Mikha ulamuk. Mikha el mi ara, Reaya ulamuk. Reaya el mi ara, Bahal ulamuk. Bahal el mi ara, Beera ulamuk. Aminyan talak ara, Beera bira, Ruben yala nang, sik deiyoknye kibuka ulamuk. Winilamuk bukni, Asyur mutuku pia karin mutuku, weik ninye deiyok kibuka taleamuknye, el si Tiglat-Pileser, elce Beera taleamuk mutuku ati, malye kibukce, Beera tomobuka, Israel mutuku noutam arye batakuka, el mutuku tamubuka, Asyur mutuku bobinamuk.

⁷ Ruben yala nang, sik deipkirikrop nang ap, tonda Ruben birye deibukba, dadeipdanin yangalamik yala nang, sik deiyok kibuka talilamik nang nirya ap, sik si sekekuka deiamik touk, aning babye sekupu. Anang sik si ara, ani. Yeiel ap, Zakaria ap, Bela ap ulamik.

⁸ Bel el li koproba el si ara, Asas ulamuk. Asas el li koproba el si ara, Sema ulamuk. Sema el li koproba el si ara, Yoel ulamuk. Ruben birye deiamukba, dadeipdanin yangalamik yala nang ara, yupa weik ulamik. Ruben birye deiamukba, dadeipdanin yangalamik nang, ton tam nang ara, Aroer mutuku weik asik dam ulamik. Amutuku arye bulubuka binamika ani, utam ara, Nebo mutuku asik ap, Bahal-Meon mutuku asik binuka, dobuka daulamik.

⁹ Ruben yala nang bukni, ton tam nang ara, otam keting yangan tam bukni, itam karin mutuku ton binuka ulamik. Amutuku ara, weik arye balul mek, el si Efrata mek balulak bukni, itam mutuku, Efrata mek duman mutuku binuka ulamik. Sik ulamik mutuku ara, atam bukni, otam ara, weik mutuku tuku, mek pia kum uamuk mutuku uamuk. Minop talak ara, Gilead mutuku noutam ulamik bukni, sik weilamik kam ning ara, domba basam ap, kambing basam ap, sapi basam ap, pia weik weilamika ati, aweilamik ning sik din ati ara, pia weik kum uamuk. Sik anang arye talibuka, sik weilamik ning ara, pia weik ulamuka ati, sik anang ara, keting yangan tam bukni, itam mutuku Efrat mek duman mitik karenak, eitam binuka ulamik.

¹⁰ Raja Saul birye, ninye deiyok kibuka, Israel nang taleamuk talak ara, Ruben yala nang arye deiamik nye, el si Bela, el yala nang arye, Gilead mutuku keting yangan tam ulamik nang, obuka malye kibikce, sirya dakik. Ayala nang, sik Hagri nang ara, Hagari birye deibukba, dadeipdanin yangalamik nang ulamik. Aulamik nang nirya ara, Bela yala nang arye, Hagri nang obuka batakikura, tonok babye ton kum ulamik. Winibikce, amutuku tuku nirya ara, Bela el yala nang arye, atuku nirya alubuka dopromikce, ulamik.

Gad birye deibukba, dadeipnin yangalamik nang ati, nyabuk yupu

¹¹ Ruben yala nang, sik tam mutuku ara, arah utara, dabu tam Basan mutuku ulamik. Basan mutuku noutama ara, sik Gad yala nang ap, mening damuk ulamik. Gad yala nang arye amutuku binuka, anang arye dipdongobuka, binamuk ani pia karin sukum keting yangan tam, Salkha mutuku biyikce, asik dobikce dabinuka ulamik.

¹² Gad yala nang ara, Yoel birye sik ayala nang ati, min deiyoknye kibuka ulamuk. Yoel bira, weiknye ulamuk bukni, el pil melina ati, bitinye anye bira, Safan birye talibuka ulamuk. Tonda, Yaena ap, Safat ap ara, Basan mutuku ulamik yala nang ati, ‘Winiplulume,’ nyabuka, yupu bokolina ati, sik deiyok nang kibuka ulamdik.

¹³ Tonda, Gad yala nanguk bukni, yuk nang arye deimikak, dadeipdanin yangalamik yala nang ton ulamik. Ara, tekbarye yala nang, sik deiyok nang ara, sik si ani. Ara, Mikhael ap, Mesulam ap, Syeba ap, Yorai ap, Yakan ap, Ziya ap, tonda Eber ap ulamik.

¹⁴ Sik anang nirya ara, Huri el mi Abihail birye deiamukba, dadeipdanin yangalamik nang, sik yupa weik ulamik. Huri birye Abihail deibuk. Huri el li koproba ara, Yaroah ulamuk. Yaroah el li koproba ara, Gilead ulamuk. Gilead el li koproba ara, Mikhael ulamuk. Mikhael el li koproba ara, Yesisai ulamuk. Yesisai el li koproba ara, Yado ulamuk. Yado el li koproba ara, Bus ulamuk. Ati, sik yupa nirya dadeipkirikdanin, yangalamik nang ara, winibuka sik yupa pia weik ulamik.

¹⁵ Tonda, sik adeipkirikdanin, yangalamik nang, sik yala ati, deiyok kilamik nang ara, ani. Abdiel el mi Ahi deiamuk. Tonda Abdiel bira, el li koproba ara, Guni ulamuk. Sik ayala nang ara, sik weik deiyoknye bira, Ahi ulamuk.

¹⁶ Ura, Gad yala nang ara, Gilead mutuku ap, tonda Basan mutuku ap, noutam binuka ulamik. Tonda, amutuku tam noutam ara, asik dolamikce, sikuk dabinuka ulamik. Tonda, weik pala lu mutuku, el si ara Saron tam ton, dabinuka ulamik. Tonda, Saron tam noutam ara, mutmuta pia weik ulamuk mutuku, sik ayala nang ton, atam binuka daulamik.

¹⁷ Anyakarye deice tam, ninye si sekmap nang ara, Yehuda tam ulamik nang nirya taleamuknye, el si Yotam birye Raja kibuka, amutuku taleamuk talak ap, tonda, Israel yala nang ulamik mutuku, Yerobeam birye, Israel yala nang deiyok kibuka taleamuk talak ap, sik adeipkirikdanin, yangalamik nang, yala yuk-yuk ulamikba, sik si sekekuka deiamik.

Yordan mekin, keting yangan tam ulamik yala nang arye, mal olan nang webuka, deiamik yupu

¹⁸ Keting yangan tam ulamik nang ara, Ruben birye deiamukba, dadeipdanin yangalamik yala nang ap, tonda Gad birye deiamukba, dadeipdanin yangalamik yala nang ap, tonda Manasye birye deiamukba, dadeipdanin yangalamik yala nang ap bukni, sik Manasye yala nang ara, noutam arye bokukabikce, daulamik. Ayala-ayala nang nirya noutam arye, yin talin nang wibuka, deibik nang, sik yupa, empat puluh empat ribu, tujuh ratus enam puluh (44.760) nanguk, webuka deibik. Sik anang ara, mal olan talak lelin ning ara, ting atouk bukni, taruk arye talilamak ning, el si ara, perisai bona ap, tonda, ninye on ya bona ap, tonda mal bona ap ning nirya ara, weik arye kel kiamik nang webuka deiamik. Sik anang ara, yin talin ati, kel weik bikamik nang ulamik. Tonda, ‘Winitibye-winiptibyeʼ tenena ara, pia piribuka weika arye kelkin nang ulamik. Sikda, ilil kum tenelamik.

¹⁹ Sik ayin talin nang arye, yala dana-dana tam nang ati, ‘Mal olbinamabe,ʼ tenen, kintinibuka deiamik ara, asi nyapnuyap yala nang ati olbinamik. Mal olbinamik nang ara, sik si ani. Yetus yala nang ap, Nafis yala nang ap, tonda, Nodab yala nang ap, tonda Hagri yala nang arye deimikak, dadeipdanin yangalamik yala nang, sikti olbinamik.

²⁰ Sik ayin talin nang nirya ara, Allah ati, dip tenelamik nang ulamika ati, sikce, ‘Allah ati morobiba, dipkoprob Allah arye melipnamsilʼ tenen, morobikura, Allah arye, sik anang morolamik ning ara, kekebukce sik tenebuka, morolamik touk kibuka melibuk. Winibuk deice arye, sik awinilye yala nang arye, Hagri yala nang ap, sik tam kiamik yala nang ap, sik nirya ara, obuka sirya dakik.

²¹ Ruben yala nang ap, Gad yala nang ap, tonda Manasye yala nang noutam arye, bokdeibik nang ap arye, sik Hagri yala nang bukni, Yetur yala nang ap, Nafis yala nang ap, tonda Nodab yala nang ap arye, obikce malye kibik. Winibikopura, sik ayala-ayala nang arye, weilamik ning dalubuka doprobik. Ara, unta basam ara, lima puluh ribu (50.000) ap, domba basam dua ratus lima puluh ribu (250.000) ap, keledai basam dua ribu (2.000) ap, aning nirya alubuka doprobik. Ara, amutuku nang ati, mal olbinamika ani, akunum oplobikce, amutuku nang, sik weilamik ning alubuka doprobik. Tonda, amutuku ulamik nang ara, yupa weik, seratus ribu (100.000) nang ton, tomukabikce, tapu koubuka bobiyikce, wenen aik dongolamik. Aninguk kum bukni, tomobuka adelilyayik nang yupa weik, seratus ribu nang (100.000) tomobuka delilyayik. Ura, awinibik nang ara, Allah arye, ‘Winipnamake,’ tenyamuk touk, winibik.

²² Ara, Ruben yala nang ap, Gad yala nang ap, tonda Manasye yala nang noutam arye bokdeibik yala nang ap, sikce amutuku ulamik nang ara, pia weik obik. Winibikopura, sik yala nang nirya ara, alubuka doprobik mutuku binuka ulamik. Winilamika ani, Allah arye, Israel nang sik wenen ati, lo arebukba, yuk karin mutuku, Babel mutuku nang arye, amutuku noutam ulamik nang nirya, obuka malye kibikce, amutuku ulamik nang, pia weika arye dobuka, sik mutuku koproba, Babel mutuku noutam bobiyikce, delilbiyikura, daulamik.

Yordan mek duman bukni, keting yangan tam ulamik nang ara, Manasye yala nang noutam ati, sekeibik yupu

²³ Manasye yala nang arye deibikura, dadeipdanin yangalamik nang ara, noutam arye bokuka, yuk-yuk binuka ulamik. Ton tam nang ara, Manasye yala noutam arye bokukabikce, ayala nang ara, Basan mutuku arah utara, dabu tam mutuku arye, dipdongobuka, binamika ani, pia pera Bahal-Hermon mutuku ap, Senir mutuku ap, tonda Hermon mutuku damuk binuka, asik dobuka daulamik. Winilamikce, sik ayala nang ara, pia weik ulamik.

²⁴ Sik ayala nang ati, deiyok kibuka talilamik nang ara, sik si ani. Hefer ap, Yisei ap, Eliel ap, Asriel ap, Yeremia ap, Hodaya ap, tonda Yahdiel ap, ulamik. Sik anang nirya ara, mikip weik arye, yin talibuka on nang ulamikba, atam nang nirya arye, sik si bikamik.

²⁵ Anang ara, weik mambul nang, mikip weik nang ulamik bukni, Israel nang, sik deipkirikrop nang arye, si erelamik Allah, elce, ‘Winipnamlume, aning ara, pia kum winipnamlume,’ nyapdeiamuk yupu, moubuka talina kumce, Allah ati, balye tam kibuka batakamik. Winyamika ara, Kanaan tam nang, min talak arye amutuku ulamik nang, sikce talibuka si erelamik isa si ati, Israel nang babye, aning ati, ‘Nun ni,’ tenen, atalye ning si erelamik. Ara, Allah elce yakuka donokamuk nang, sikce si erelamik isa si atibuk, Israel nang babye, si erelamikce, malye weik winilamik.

Yordan mek duman koubuka, keting yangan tam ulamik Israel yala nang nirya ara, malye kibuka tomobuka, yuk pera mutuku bobiyik ati, nyabuk yupu

²⁶ Israel yala nang bukni, Kanaan tam isa si erebuka ulamika ati ara, Allah arye, pia karin mutuku, Asyur mutuku taleamuk ninye deiyoknye, el si ara Raja Pul, tonda el si Tilgat-Pilneser, el kanye noutam pil dobukba, aninye deiyoknye birye, Yordan mek koubuka, amek duman keting yangan tam ulamik yala nang ara, Ruben yala nang ap, Gad yala nang ap, tonda Manasye yala nang bukni, noutam arye bokdeibik nang ap, sik nirya ara bobuka, Asyur tam noutam, wenen asik deililbiyik. Ara, Raja Pul birye, sik ayala nang ati, bobuka deibiyuk mutuku si ara, ani. Hala mutuku ap, Habor mutuku ap, Hara mutuku ap, tonda Gason mek dam mutuku ap, dobuka delilbiyuk. Binuka deiamuk ani, atalak arye dipdongobuka, daulamika ani, abuku sekekuka deibupu talak babye, sikda amutuku tuba daunyake.