1 Tawarikh 4 - Eipomek

Yehuda birye deiamukba, dadeipdanin yangalamik nang ati, sekik yupu

¹ Yehuda birye deiamuk nang ara, ton tam nang, sik si ara, ani. Peres ap, Hesron ap, Karmi ap, Hur ap, tonda Syobal ap, ulamik.

² Syobal birye deiamuknye, Reaya bira, elce sal mi deibuk. Anye el si ara, Yahat nyamuk. Anye Yahat bira, sal mapu bitinye deiamuk. Sik si ara, Ahumai ap, Lahat ap, deiamuk. Sik anang ara, Zora mutuku asik dobuka ulamik nang, sik deipkirikrop nang ulamdik.

³ Kalep el kil Efrat birye deiamuk mi, el si ara, Hur ulamuk. Hur bira, Kalep birye minop dunye deiamukak ulamuk. Anye Hur birye, Betlehem mutuku ara, bulubuka, asik dolamuk. Hur birye deiamuk nang, sik si ara, ani. Etam ap, Penuel ap, tonda Ezer ap deiamuk. Winibukura, Etam birye mapu winilye deiamuk. Sik si ara, Yisreel ap, Isma ap, Idebas ap, tonda, kilmu tonok deiamuk. Akil el si ara, Hazelelponi nyamuk.

⁴ Hur birye deiamuknye, Penuel bira, Gedor deibuk. Hur birye deiamuknye, Ezer birye, el mi ton Husa deibuk.

⁵ Yehuda birye deiamuknye, Hesron bira, elce mi ton Ashur deibuk. Aminyan talak ara, anye Ashur birye, el mi ton Tekoa deibuk. Tonda, Asyur bira, kil bitinye domuk. Sik si ara, ani. Hela ap, Naara ap, dobuka ulamuk.

⁶ Asyur birye, el domuk kil Naara ap, ulamdik ani, mapu dumbarye deiamdik. Amapu sik si ara, Ahusam ap, Hefer ap, Temeni ap, tonda Ahastari ap, winibuka deiamukak daulamik.

⁷ Aning kibuka, Asyur birye domuk kil, Hela ap, neika ulamdikce, mapu winilye deiamdik. Sik si ara, ani. Zeret ap, Yezohar ap, tonda Etnan ap, Kos ap, sik winibuka nang deiamdik.

⁸ Asyur birye deiamuknye Kos bira, elce, mapu winilye deiamuk. Sik si ara, ani. Anub ap, Hazobeba ap, sik ni koproba ara, Kos ulamuk. Tonda, sik ni koproba Kos bira, Aharhel yala nang, sik deipkirikropnye ulamuk. Tonye, el si Harun, elce anye Aharhel, el li koproba ulamuk bukni, Aharhel yala nang, sik deipkirikropnye bira, Kos ulamuk.

⁹ Ura, Yehuda birye deibukba, dadeipdanin yangalamika ani, tonoknye ton deibik. Anye el si ara, Yabesh ulamuk. Teleb kibuka ulamukba, yuk nang nirya arye, el tibuk si erelamik bukni, el aik ninye koproba ati, yuk nang arye, ton sik si kum erelamik. El lin birye, ami Yabesh ati, “Ami deipnuse talak ara, mi deiyok donmase ara, uk weik dilamnuk bukni, sirya ara, ami deiamsa ati, ami ara, el si Yabesh nyanamabe,” nyabuka, si domuk. Yabesh nyabuka, si domuka deiyok ara, sik yupu deice arye, ‘Pia weik uk dilule’ tenen, nyalamik ati, ami el si ara, asi Yabesh nyabuka si domuk.

¹⁰ Ura, Yabesh birye, Israel nang kalikuka melilamuk Allah ati, morobukce nyabuk, “Se, na ni Allah, ance, teleb kipdeinilyame. Tonda, na talipnamne mutuku ara, lo weik areneminyeba, amutuku tuku weika arye talipnamne. Tonda, an weika arye melineminyeba, nara an amu tam unamne. Wininamne talak ara, na dam ikin ning yalyeba, imun kanye bopnyak ati, ance kalikniminyeura, weik ikin ning dobuka, karenak donoknamnilyame,” nyabuka, Allah morobuk. Winibuka morobukba, Allah arye, amoropmuk ning kekebukce, amoropmok touk kibuka melilamuk.

Ton tam mapu silip arye deibikura, dadeipdanin yangalamik nang ati, si sekeibik yupu

¹¹ Ura, Yehuda birye deibukba, dadeipdanin yangalamika ani, tonoknye ton deibik. Anye el si ara, Suha ulamuk. Anye Suha, el kwet koproba Kelub, elce mi ton deibuk. Kelub birye, ami el si ara, Mehir nyabuk. Nyabukura, anye Mehir babye, mi tonok ton deibuk. Ami el si ara, Eston nyabuk.

¹² Eston bira, el mapu winilye ton deiamuk. Sik anang si ara, ani. Betrafa ap, Paseah ap, tonda Tehina ap, nyamuk. Anye Tehina, elce Nahas mutuku bulubuka, asik domik. Bukni, sik anang ap, sikce deiamik nang nirya ap ara, Reka mutuku ulamik.

¹³ Ura, Yehuda birye deibukba, dadeipdanin yangalamika ani, tonoknye ton deibik. Anye el si ara, Yufene. Yufene bira, mi ton el si Kalep deibuk. Aminyan talak ara, Kalep birye deiamuk mapu ara, sik si ani. Ara, Iru ap, Ela ap, Naam ap ulamik. Kalep elce deiamuknye Ela bira, el mi ton Kenas deibukba, ulamuk. Kenas bira, mapu bitinye deiamuk. Sik si ara, Otniel ap, Seraya ap, deiamuk. Otniel babye, mapu bitinye deiamuk. Sik si ara, Hatat ap, Meonotai ap, deiamuk.

¹⁴ Otniel birye deiamuknye, Meonotai bira, el mi ton deibukce, el si ara, Ofra nyamuk. Utouk, Kenas birye deiamuknye, Seraya birye tonok deibuk. Adeiamuk mi el si ara, Yoab nyamuk. Yoab birye deibukba, dadeipdanin yangalamik nang ara, tonok teleb lu mutuku ulamik. Atam nang nirya arye, aban mutuku ati, “Aning-aning memebuka don ning ap, ninye taruk arye donyak ning ap ara, amutuku nang kel weik kiamikce, pia teleb kibuka donyake,” nyalamik. Yoab birye, anang ulamik asik bulubuka dolamuk. Winyamukak, amutuku luak ulamik nang ara, aning-aning kintinibuka pil dona ara, kel weik nang ulamik.

¹⁵ Tonye el si Yufene, el mi Kalep birye, mapu winilye deiamuk. Sik si ara, ani. Eru ap, Ela ap, tonda Naam ap deiamuk. Tonda, Ela birye deibuknye bira, Kenas ulamuk.

¹⁶ Ura, Yehuda birye deibukba, dadeipdanin yangalamika ani, tonoknye ton deibik. Anye el si ara, Yehaleleel ulamuk. Yehaleleel bira, mapu dumbarye deiamuk. Sik si ara, Zif ap, Zifa ap, Tireya ap, tonda Asareel ap, deiamuk.

¹⁷ Ura, Yehuda birye deibukba, dadeipdanin yangalamika ani, tonoknye ton deibik. Anye el si ara, Esra ulamuk. Esra birye, mapu dumbarye deiamuk. Anang sik si ara, Yeter ap, Mered ap, Efer ap, tonda Yalon ap deiamuk. Mered bira, Mesir mutuku Raja kiamuk nye, el kilmu el si ara, Bica domuk. Dobukopura, sik kilmu tonok deiamdik. El si ara, Miryam nyamdik. Tonda, sal mapu bitinye deiamdik. Sik si ara, Samai ap, Yisba ap, ulamdik. Anye Yisba bira, mi ton deibuk. Anye el si ara, Estemoa ulamuk.

¹⁸ Esra bira, Yehuda yala kil ton dobuka domuk. Akil dobukce deiamdik sal mapu ara, winilye ulamik. Anang sik si ara, ani. Yered ap, Heber ap, Yekutiel ap ulamik. Yered birye, el mi Gedor deibukce, bulubuka tonok asik Gedor mutuku dolamuk. Heber birye, el mi Sokho deibuk. Tonda, bulubuka tonok asik dolamukce, amutuku si ati, Sokho mutuku nyamuk. Aning atouk, Yekutiel birye, el mi Zanoa deibukce, bulubuka tonok asik dolamukce, amutuku si ati, Zanoa mutuku nyamuk.

¹⁹ Tonye bira el si ara, Hodia ulamuk. Anye Hodia birye, tonye bira, el si Naham ulamuk. Anye Naham, el makal kil bira, Hodia birye akiluk domuk. Anang bitinye ara, sik mapu bitinye deipdik. Tonye bira, el mi Abu-Kheila deibuk. Abu-Kheila bira, sik Garmi mutuku ulamik nang, sik deipkirikropnye ulamuk. Tonye bira, el mi Estemoa deibuk. Estemoa bira, sik Maakha mutuku ulamik nang, sik deipkirikropnye ulamuk.

²⁰ Ura, Yehuda birye deibukba, dadeipdanin yangalamika ani, tonoknye ton deibik. Anye el si ara, Shimon ulamuk. Shimon bira, el mapu dumbarye deiamuk. Sik si ara, ani. Amnon ap, Rina ap, Benhanan ap, tonda Tilon ap, deiamuk. Tonda, Yehuda birye deibukba, dadeipdanin yangalamika ani, tonoknye ton deibik. Anye el si ara, Yisei ulamuk. Yisei birye mapu bitinye nang deiamuk. Sik si ara, Zohet ap, tonye bira Ben-Zohet ap deibukce, asi nyamuk.

Sela birye deiamukba, dadeipdanin yangalamik nang ati, sekeibik yupu

²¹ Yehuda birye deiamuknye tonok, el si ton Sela ulamuk. Sela elce deiamuk nang, sik si ara, ani. El ap, Lada ap, deibuk. Anye Elda, elce Lekha asik ara, bulubuka domuk. El weit koproba Lada birye, Meresa mutuku asik bulubuka domuk. Sik anang arye deiamdik nang ara, Bet-Asybea mutuku ulamikce, urasin pia teleb baju, dekna weik baju el si kain lenan, abaju wina ati, sikda kel weik nang ulamik.

²² Tonda, Yehuda birye deiamuk nang winilye ulamik. Tonye el si ara, Yokim, tonye el si ara, Yoas, tonye el si ara, Saraf ulamik. Tonda, Koseba mutuku ulamik nang, sik deipkirikropnye bira, Yehuda ulamuk. Anang Yoas ap, Saraf ap ara, sikda Moab mutuku bikdikce, amutuku kilapu binuka doprobrik. Winiprikopura, tamubuka Betlehem mutuku yana ulamrik. Ura, anang sik si ap, sikce ulamik ning ap ara, anukna nirya ara, min talak arye sekekuka deiamik ninguk, ‘Naʼ tenen, deiamukak awamuka ani, wini talak babye, tuba aulule.

²³ Sik anang nirya arye, Raja el mek din makau ap, el yun ning panci-panci ap, dona ati ara, pia kat kira tuku arye dobuka telebnarye, dolina nang ulamik. Winilamikce, anang sikda Noutam mutuku ap, Gedera mutuku ap, ulamik. Sik mutuku weik deiyok talibuka, Raja ulamuknye biti, pil dolamikce daulamik.

Simeon birye deibukba, dadeipdanin yangalamik nang ati, sekeibik yupu

²⁴ Yakub birye deiamuknye, Simeon birye, mapu pamubarye deiamuk. Sik si ara, ani. Nemuel ap, Yamin ap, Yarib ap, Zerah ap, tonda Saul ap, deiamuk.

^25-26 Saul birye, el mi Salum deibuk. Atouk, Salum birye deiamuk mi ara, Mibsam. Mibsam birye deiamuk mi ara, Misma ulamuk. Misma birye deiamuk mi ara, Hamuel. Hamuel birye deiamuk mi ara, Zakur. Zakur birye deiamuk mi ara, Simei ulamuk. Sik winibuka nanguk deiamik.

²⁷ Simei el mapu ara, dua puluh dua (22) dumu dikin deiamuk. Elce deiamuk mapu ara, enambelas (16) taku deikin deiamuk. Elce deiamuk kilmapu ara, nakub barye deiamuk. Bukni, Simei el kayapu nang ara, mapu weik kum deiamik, sikda mitik tonunuk deiamik. Simeon birye deiamukba, dadeipdanin yangalamik nang ara, el weit koproba Yehuda birye, deiamukba, dadeipdanin yangalamik nang weik ulamik touk, sik Simeon yala nang ara, atouk kum ulamik.

^28-31 Simeon birye deiamukba, dadeipdanin yangalamik nang ara, amutuku-amutuku asik dobuka ulamik. Ara, Bersyeba mutuku ap, Mola bira mutuku ap, Hasar-Saul mutuku ap, Bilha mutuku ap, Toldad mutuku ap, Betuel mutuku ap, Horma mutuku ap, Ziklak mutuku ap, Bet-Markabo mutuku ap, Hazar-Susim mutuku ap, Bet-Biri mutuku ap, tonda, Sabaraim mutuku ap ulamik. Anyansik-anyansik si ara, Simeon birye deiamukba, dadeipdanin yangalamik nang ara, aweik asik noutam nirya daulamika ani, Daud bira ninye deiyoknye kibukabukce, Raja ulamuk.

³² Sik ananguk, aweik asik domikce dam ara, mitik asik ton pamubarye dobuka ulamik. Amutuku si ara, ani. Etam mutuku ap, Ain mutuku ap, Rimon mutuku ap, Token mutuku ap, Asan mutuku ap, anirya ara, mitik asik dobuka ulamik.

³³ Aweik asik dolamikak nirya ara, mitik-mitik asik babye, amutuku-amutuku noutamakuk dolamikce aulamik. Anyak dobuka binamika ani, Bahal mutuku weik asik dolamik damuk binuka, asik dolamikce ulamik. Amutuku nirya ara, Simeon birye deiamukba, dadeipdanin yangalamik nanguk, talibuka ulamik. Ati Simeon birye deiamukba, adeipdanin yangalamik nang nirya ara, sikce si sekekuka delilamik.

^34-38 Simeon birye deiamukba, dadeipdanin yangalamik nang, sik yala nang ati, deiyok kibuka talilamik nang, sik si ara, ani. Mesobab ap, Yamlekh ap, Amzia el mi Yosa ap, Yoel ap, Yosibya elce deiamuknye, Yehu ap deiamuk. Tonda, Seruya el mi ara, Yosibya, Yosibya el apu koproba ara, Asiel ulamuk. Tonda, yuk yala deiyok nang ara, Elyoenai ap, Yaakoba ap, Yesohaya ap, Asaya ap, Adiel ap, Yesimiel ap, Benaya ap, Ziza ap deiamik. Tonda, Ziza elda Zifei el mi ulamuk. Sifei bira, Alon el mi ulamuk. Alon el mi ara, Yedaya ulamuk. Yedaya el mi ara, Simri ulamuk. Simri el mi ara, Samaya ulamuk. Sik anang arye deimikak, dadeipdanin yangalamik nang, sik yala ara, weik ulamik.

^39-40 Ati ara, Simeon birye deiamukba, dadeipdanin yangalamik nang ara, lobuka keting koumulban tam, lu mutuku ara, Gedor mutuku dabinuka ulamik. Ara, ‘Nun wenyap ning, domba basam ap, sapi basam ap, sik din patana ati, teleb mutuku elbinamepʼ tenen, amutuku noutam binuka dipdeyikce, eibik. Amutuku noutamak ara, mutmuta weik ulamukce, teleb kibuka bongolamuk mutuku binuka eibikce ulamik. Tonda, amutuku noutamak ara, sik domba basam yupa ap, kambing basam yupa ap ara, teleb kibuka weipmanto mutuku binuka eibik. Amutuku ara, pala weik mutuku ulamuk. Tonda, ninye arye, ona kum adiparyuk, teleb kibuka neika ulamikce, lelim weik kum nyalamuk mutuku uamuk talak ara, Nuh birye deiamuknye, el si Ham, elce deiamukba, dadeipdanin yangalamik nang ara, amutuku nirya talibuka ulamik.

⁴¹ Bukni, Simeon birye deiamukba, deipdanin yangalamikce, sik yala-yala deiyok nang ara, Gedor mutuku biyikce, Ham birye deiamukba, dadeipdanin yangalamik nang, olanauk ulamik. Winilamik ara, Ham el tam nang arye, amutuku asik nirya dobuka ulamik nirya ap, tonda Raja Hizkia birye taleamuk talak ulamik nang, sikda, Meunim yala nang ap, sikce dolamik asik ap, sik nong ap nirya ara, obuka memepdobikce, amutuku ara, Simeon birye deiamukba, dadeipdanin yangalamik nang arye, amutuku binuka alubuka doprobikce ulamik. Ara, amutuku noutamak ara, mutmuta ara, pia weik mutuku ati, sik domba basam weina ap, kambing basam weina ap ara, amutuku uk, binuka weilamik.

⁴² Tonda, amutuku dam yangalamik nang, sik noutama ara, Simeon birye deibukba, dadeipdanin yangalamik nang ton ani. Ara, el mi Yisei birye deiamuk dumbarye nang, sikce bulubuka kiamikce, Edom tam ulamik nang ati olbiyik. Yisei elce deiamuk mapu dumbarye, sikce Edom mutuku nang olbiyik. Adumabarye nang, sik si ara, ani. Pelaca ap, Nearya ap, Refanya ap, tonda Uziel ap, Edom tam ulamik nang olbiyik. Anang sik miliamik nang ara, Simeon birye deibukba, dadeipdanin yangalamik nanguk, ton bokuka yuk nang ara, lima ratus (500) nang ton ap kibuka, sikce miliamik. Winibulubikak arye, keting yangan tam Edom tam, tonda atam si bitinye ara, Seir mutuku nyalamik. Amutuku noutam ulamik nang ati binuka, obuka sirya dakikak arye, amutuku talibuka daulamik. Atalak arye dipdongobuka, wini talak babye, Simeon birye deibukba, dadeipdanin yangalamik nang ara, Edom tam noutam daulamik touk, wini tuba aunyake.

⁴³ Sik anang ara, Simeon birye deibukba, dadeipdanin yangalamik nang ara, Edom tam noutam, Amalek yala nang ton, mitik tonun sirya tuba aulamik nang dam, binuka obuka sirya dakamik mutuku ulamik nang obuka, sirya dakikce, malye kibik talak ara, adiparyuk, amutuku tuku babye, alubuka doprobikce, talibuka ulamik.