1 Tawarikh 28 - Eipomek

Ninye deiyoknye Raja Daud birye, Allah Yahweh el si eren aik dona ati, “Wininamlume, wininamlume,” nyapdeibuk yupu

¹ Raja Daud birye yupu nyabukba, Israel mutuku noutam talibuka ulamik ninye deiyok nang nirya, Yerusalem mutuku uk bulubuka yayik. Yayikopura, sik ninye yala yuk-yuk ulamik touk bukni, sik ninye deiyok talibuka ulamik yala nang ap, Raja Daud biti, mambul pil melibuka deice tam pil dona deiyok nang ap, yupu talen nang nirya ap bulubuka yayik. Tonda, sik yin talen nang yupa weik seribu (1.000) nang talilamik yin deiyok nang ap, tonda yupa weik seratus (100) yin talen nang talilamik deiyok nang ap, Raja Daud birye talilamuk bona nirya ‘Naʼ tenen delina ap, kalikna deiyok nang ap bulubuka yayik. Tonda, Raja ap, elce deiamuk mapu ap, sik kam ulul ning weina ati, yupu nyana deiyok nang ap, tonda Raja Daud el ulamuk mambul weik aik yupu talina deiyok anyaik pum tam pil dolamika deiyok nang ap, sik mikip pia weik ulamika anya arye, ninye weik olamik. Aninye on yin talen nang ap, tonda, sik yin talen nang bukni, talye yin nang ap nirya ara, bulubuka Yerusalem mutuku noutamuk yayik.

² Bulubuka yayikopura, ninye deiyoknye Raja Daud tikukabukce, aninye nirya ati nyabuk. “Na kwitcapu ap, amutuku-amutuku noutam ulamlumba, narye talisunun nang nirya ap ati, na nyapnun yupu ara, moubuka kekepnamlume. Minop talak ara, na Daud birye, ‘Allah Yahweh nyapdeiamuk yupu sekuka deibik ning ara, pia teleb marikna pum tam dongolamik ning, el si Peti Perjanjian, aning dobuka delina ati, pia teleb aik dopnamne,’ tenelamse. Tonda, ‘Nun ni koproba Allah Yahweh, el si erena ap, elda aning-aning nirya deice tam ulirye, el ap, el mambul ning ap, pia aunamle aik dopnamane,’ tenelamse. Winibuka tenelamse ati ara, akunuma Allah Yahweh el aik dona ati, pia teleb ning yuk-yuk ning nirya ara, akunum kintinibuka delinune.

³ Winibuka ulamsirye, tenelamse bukni, Allah Yahweh arye nati akunum nyamnuk. “Kume, na Allah ati si erebuka kina ap, si erena ap ati ara, an Daud birye pia kum dopnamnilame. Deiyok ara, ance ninye olan talak ara, yuk mutuku yin talin nang ara, pia weik tonun akunum opminyeba, sik ining weik tonun akunum sakuka ati, na si eren aik kum dopnamnilame,” nyamnuke.

⁴ Bukni, Allah Yahweh ara, nun Israel nang arye si erenyapnye Allah Yahweh arye, Yehuda yala nang ati, ‘Na pia teleb ‘Naʼ tenen nang unamake. Tonda, sik kan-kan noutam arye, weik deiyok talibuka Raja ubikirye, Israel nang talinamak,’ tenen, Israel yala nang weik aulamik bukni, ‘Yehuda yala nang ara, Raja nang unamakʼ tenen, Yehuda wibuka erebuk. Anerye, Yehuda birye deiamukba, dadeipdanin yangalamik yala nang, sikce deiamik nang kan-kan arye, na ni koproba wibuka erepdibuk. Abukni sirya ara, na babye wibuka erepdeipnukce, ‘Israel nang nirya ati, pia taliplirye, sik ninye deiyoknye Raja unamleʼ tenen, erepdeipnukce, atinyamuk touk, wini talak ara Israel nang ati talenune.

⁵ Wipdeipnukopura, elcuk narye deiamse mapu nirya ara, weik tonun arepnuke. Tonda, arepnuk mapu nirya noutam bukni, na mi Salomo tonok ati, ‘Israel mutuku noutam unyak nang talibuka, Raja unamleʼ tenen, wipdeibuk. Ara, Allah Yahweh, elce aning-aning deice tam ulirye, Israel nang nirya talilul bukni, el tukwak tam melina ati, na mi Salomo biti, deiyok weik ning arepliba, elce sik Israel nang nirya talipnamle.

⁶ Ati ara, Allah Yahweh arye nati nyapdeiamnuk yupu ara ani. “An mi Salomo bira, na si eren aik ap, anyaik dana-dana tam upnamlak ap ara, elcuk dopnamnile. Deiyok ara, na Allah arye, an mi Salomo biti, ‘Na mi koproba unamnile. Wipnirye atouk, narye el li koproba atouk unamneʼ tenen, anye akunum wipdeipse.

⁷ Raja una ati, erepdeipniba, el Salomo bira, atalak ulamle touk, aminyan talak babye, pia dipkoprob tenepnirye, na Allah arye, “Aning ara wininamlame, aning ara pia kum wininamlame,” nyapdeiamse yupu nirya ara, pia moubuka teneplirye, talibuka dobolbana uk ulyopura, na mikip el deice deipniba, elcuk sik Israel nang pia ati talibuka, weik deiyoknye Raja unamle. Na mikip deice ara, elce Israel nang talipnamsil nang ara, min kum kum danamle.” Allah arye nyabuk yupu ara, Daud birye sik Israel nang ati laka nyabukba kekebik.

⁸ Nyabukopura, ninye deiyoknye Raja Daud birye, ayupu ton dukdongobuka nyabuk. “Se, wini talak ara, na talibuka unun mutuku nang nirya ara, nun ni koproba Allah, el siuk erenyab nang, el mapu koproba ululum nang nirya ara, asukumuk Allah Yahweh arye dinmasilyak uk, bulupmunce el yupu kekebuka dinamlume. Ati, narye anggunti, pia dipkoprob moropsine. Ara, anggun ni koproba Allah Yahweh arye, “Aning ara wininamlume, aning ara pia kum wininamlume,” nyapdeiamsuk yupu ati, ‘Deiyok ani,’ tenen, pia moubuka tenimunce, kel bikinamlume. Tonda, ayupu moubuka talipmunce, dopbolbana uk unamlume. Ura, winipmunyopura, anggun ap, anggunce deilinamlum mapu nirya ap ara, pia ati, teleb mutuku noutamuk unamlume. Anggun dipmunyopura, anggun mapu koproba arye, amutuku tuba talinamake. Asukumuk ukirye anggunce deipmunyeba, dadeipdanin banamak mapu nirya babye, amutuku deiyok nang kibuka upnin bakirye pia, aunamake.

⁹ Tonda, na mi Salomo, narye el si erelamse Allah, na ni koproba Allah ati, an babye kel bikinamlame. Allah el siuk pia erenamlame. Ara, an kanye talima nirya moubuka tenepmince, ‘Winipnun do, kum do?’ tenen, teniltona pia kum unamlame. Pia pi dobuka, el tibuk, talipmince el siuk erenamlame. Ara talye ati kume. Deiyok ara, Allah Yahweh elda, ninye talima noutamuk ulul ning nirya weklirye dilule. Tonda, ninye kanye pum tam teninamak ning ap, ‘Winipnamabe tenen,’ teninamak ning ap nirya ara, kel bikilule. Ura, ance elti, ‘El kanye delilul ning eipnirye, kel biknamne. Aninguk talibuka unamne,’ tenepminyopura, dipkoprob adiparyuk el ulul ning ati eipmince, elti, bikinamlame. Bukni, aning winina kumce, el batakmince, kum dobolbiminyopura, elce, ‘Kume, anye na like,’ tenepkilirye, pia ati bataknamkile, kum melinamkile.

¹⁰ Aning nirya ara, ance pia moubuka tenepnalyame. Ara, an ni koproba Allah Yahweh arye akunum wenyamkukce, ‘Na aik ara, elce pia yuk wibuka dopnamnile. Na unamnak, pia teleb lek sukum babye dobuka kintinip deipnamnile,’ akunum tenyamkuke. Ati, wini talak ara, an adiparyuk moubuka tenepmince, mikip arye pia pi dobuka, apil donamlame.” Daud birye el mi Salomo biti nyabuk.

¹¹ Ayupu nirya akunum nyabukopura, Raja Daud birye el mi Salomo biti, Allah arye, ‘Winibuka dopnamnilame,’ nyapdeibukba, Daud birye ayupu sekuka kintinip deiamuk ning dobuka, Salomo biti arebuk. Ara, Allah Yahweh, el aik dam bai tam bukni, aik abilinga cang dam ninye bunamakak ap, anyaik dekna weik ning ‘Naʼ tenen delinamak aik ap, imam nang unamak aik ap, anyaik noutam wilibuka dopnamak teleb aik ap, alip tam dopnamak ning ap, tuku tam dopnamak aik ap, tonda, ‘Allah arye nun malye un ning kilipsilirye, kum kipdeipnamsilak, Peti Perjanjian marikna deipnamakak ap, pia Teleb Lek Aik nirya ap ati, Allah arye min talak, “Winibuka-winibuka dopnamnilame,” nyapdeibukba, Daud birye sekeiamuk yupu nirya ara, Daud birye aning dobuka, el mi Salomo biti arebuk.

¹² Aning atouk, ninye deiyoknye Raja Daud birye, Allah Yahweh el si eren aik dona ati, el tenyamuk ning nirya ati dobuka, Salomo biti arebuk. Ara, talye nang arye wekelbikirye Allah el si erebuka kina ati moronamakak ap, teleb ning arenamakak ap, Allah arena ati arenamak dekna weik ning emas ap, perak ap, ‘Naʼ tenen delinamakak ap, Allah ati ‘Telebeʼ nyabuka, teleb ning arenamak aik ap, Daud birye tenyamukce sekeiamuk ning ara, Allah Yahweh el bona delina aik ap, tonda aning nirya pia teleb lek ning, Allah ati yanuka arebikceba, delin aik ap nirya ati, Daud birye, ‘Winipnamne,’ tenilamuk ning nirya ara, Salomo biti arebuk.

¹³ Aning atouk, imam-imam nang, sik ninye yupa nirya babye, ‘Winipnamake,’ tenelamuk ning ap, ‘Sik Lewi yala nang arye, apil talibuka donamakʼ tenen, ning nirya ap, ‘Sik pil Allah Yahweh el si eren aik noutam pil donamluma ara, ani,’ tenen ning nirya ap, tonda Allah Yahweh el si erena ap, arena ap ati, weken aik ‘Naʼ tenen, kat ning moubuka kalikinamak ning nirya ap ati, ‘Winipnamlume-winipnamlume,’ nyabuka, Daud birye Salomo biti, laka nyabuk.

¹⁴ Tonda, Daud birye, ‘Aning ara winibuka dopnamlume,’ nyabuka, dekna weik kat ning, el si emas ap, perak ap deice arye, Allah el si eren aik pum tam deipnamak pil don ning kintinina ati, laka nyabuk.

¹⁵ Ara, anyaik pum tam weisa lana ati, ikne ning deibuka donamak ning ati, ‘Emas ara el ikin winibuka-winibuka dopropmomce, aweisa delinak cang ning el yan ap, adeice tam weisa koprop lilin dongopnamlumak ap, puturubuka deipnamlume. Aning atouk dekna weik ning, perak deice arye kintinibuka deipnamak weisa delinak babye, ayupu atouk laka nyabuk.

¹⁶ Atonun deilin ning, yo arye memebuka delilamak ning, el si meja-meja ara, dekna weik kat ning, el si perak deice arye taplakuka dopnamak ning ati, ‘Emas ara, el ikin winibuka dobuka, adeice taplakalinamlume,’ nyabuka, laka nyabuk. Aning atouk, dekna weik ning perak deice arye kintinibuka taplak deipnamak ning babye, ayupu atouk laka nyabuk. Ameja ara, Allah arena ati, nena kum roti kwaning dabuka, ameja deice deipnamniyaka ati, ‘Wininamlume,’ nyabuka, laka nyabuk.

¹⁷ Atonun ton, emas pia teleb ning arye, Allah arena ati, tup ning yunamak ning arekna ap, lukuka delina ap ati, el si garpu, aning dobuka delina ati, tonda anggur mek dina ati mitik makau, el si mangkok ap, cangkir ap, aning memena ati, “Emas el ikin ara winibuka dopropminyak arye, memenamlyame,’ nyabuka, laka nyapdeibuk. Aning atouk, dekna weik ning perak deice arye, kintinibuka deipnamak ning babye, ayupu atouk laka nyapdeibuk.

¹⁸ Tonda, emas pia teleb ning deice arye, nintong teleb ning boyanuka, uku dongonak ati ara, “Emas el ikin ara winibuka dopropminyak arye, memenamlyame,’ nyabuka, laka nyapdeibuk. Tonda, Allah Yahweh arye, ‘Winipnamsine, anggunce winipnamlume. Winipmunyopura, narye teleb kipdeipnamsine,’ nyabuka nyalin yupu, nyapdeiamuk yupu dongobik marikna, el si Peti Perjanjian, adeice tam kintinipnamak bublan ara, “Emas el ikin ara, winibuka dopropminyak arye, memenamlyame,’ nyabuka, laka nyapdeibuk. Tonda, abublan deice arye, otam-atam ara, malaikat urasin atouk ning, el si Kerub bitinye, sik pol atouk ning ara, anoutam arye dukdongopmanto upnamle ning babye, emas el ikin ara, winibuka dopropminyak arye, memenamlyame,” nyabuka, laka nyapdeibuk. Ura, sik Israel nang arye, ‘Aning ara, ninye arye tuku deice ban ning, el si kereta kuda deice bukuka banyak ning mitik tonun ulamle touk, nun ni koproba Allah ara, aning deice arye bukuka ‘banamle,’ tenelamik.

¹⁹ Nyabukopura, ninye deiyoknye Raja Daud birye nyabuk, “Aning nirya, na laka nyapmasin yupu nirya ara, Allah Yahweh elcuk tenyamukce, laka nyapdeiamuk ninguk, nati lak sukum arye nyapdeipnukba, narye kekepse. Ara, anyabuk ning ara, na dam, “Aning winibuka pil dopnamlume,” nyapdeipnuke.

²⁰ Ura, Raja Daud birye el mi Salomo biti ayupu ton nyabuk. “An talima noutam arye tenepmince, mikip kipnulyame. Tonda, ilil tenena kumce, aning ara pil dona ap, una ap uk unamlame. Ati ara, an ilil una ap, ilil arye, ‘Se,’ tenena ap, pia kum unamkile. Deiyok ara, na ani birye, el si eremnun Allah, Yahweh, elce an ap pil melibuka dopnamkile. Ati, an ni koproba Allah Yahweh arye pia kum bataknamkile, melinamkile. Atonun, ance Allah el si eren aik ap, anyaik pil donamak ning ap, anyaik dongopnamak ning ap nirya ara, tuba kintinibuka deilinamlam talak nirya ara, Allah elcuk, melinamkile. Winipnamkila deice arye, anyaik dona ati, pil donmaminya ani, aning nirya ara, sirya daknamlyame.

²¹ Pia dipkoprob ning ara, sik imam-imam nang yupa ap, tonda sik Lewi yala nang, yuk nang nirya ap ara, Allah Yahweh el si eren aik dona ap, anyaik noutam dongopnamap ning kintinin pil ap nirya ara, ‘Nun kanye arye, adiparyuk dopnamapʼ tenen, akunum kitinibik. Tonda, sik apil nirya dona ati, pia kel weik bikamik nang arye, apil nirya ara sikti, weik arye kanye deibuka melinamake. Aning atouk, ninye deiyok nang nirya ap, amutuku noutam unyak nang nirya ap arye, ance nyapnalam yupu nirya ati, moubuka kekebikirye, aninguk tenebuka, pil donamake.” Raja Daud birye, el mi Salomo biti, ayupu ton nyabuk.