1 Tawarikh 26 - Eipomek

Allah Yahweh el si eren aik kalikin nang ati, sekik yupu

¹ Ara, sik Lewi yala nang arye Allah Yahweh el si eren aik wekelban bisik bublan dam kalikna ati, ‘Apil donamakʼ tenen, anang ati bokdeibik. Ara sik Korah yala nang kan-kan noutam arye, Korah birye deiamukba, dadeipdanin yangalamika ani, anang arye deibiknye, el si Meselemya wipdeibik. Anye el li koproba, el si ara Kore ulamuk. Kore, el li koproba ara, Asaf ulamuk.

^2-3 Meselemya elce deiamuk mapu ara, tekbarye (7) deiamuk. Ara, min yuma deiamuk mi ara, Zakaria deiamuk. Adamnye bira, Yediael ap, Zebaja ap, Yatniel ap, Elam ap, Yohanan ap, tonda sirya mi ara, Elyoenai ap deiamuk.

^4-5 Obet-Edom elce deiamuk mapu ara (8) delapan deiamuk. Ara, el li koproba Allah arye, elti, weik tonun melibukba, winibuka delapan mapu deiamuk. Ara, sik amapu deilin keting tamun anerye dipdongobuka nukikce sekik ning ara, min yuma deiamuknye bira, Semaya ulamuk. Winibukopura, Yozabad ap, Yoah ap, Sakhar ap, Netanel ap, Amiel ap, Isakar ap, tonda sirya koprop kelenye deibuka ara, Peuletai deiamuk.

^6-7 Obet-Edom elce min yuma deibuknye bira Semaya, elce deiamuk mapu ara ani. Ara, min yuma ara Otni deiamuk. Anerye, Refael ap, Obed ap, Elsabad ap, Elihu ap, tonda Semakya ap deiamuk. Aning nirya ara, aning-aning yuk-yuk ning nirya kel weik bikamikce, teleb ubuka pil dolamikce, deiyok kin nang ulamik.

⁸ Obet-Edom birye deiamukba, dadeipdanin yangalamika ani, deiamikba ulamik nang ara, ara elce deiamuk nang ap, anang arye deiamik mapu ap, anang sik mapu silip nirya ara, kel weik bikamik nang ulamik. Ara, Allah el si eren aik pil dona deiyok ning winipmanto nang ulamik. Obet-Edom birye deiamuk nang ap, sik tam nang ap, sik mapu ap nirya ara, yupa weik enam puluh dua (62) nang ulamik. Sik ayala nang nirya ara, pil pia teleb ubuka don nanguk ulamik.

⁹ Aning atouk tonda, tonoknye el si Meselemya, elce deiamuk mapu ap, el kwitcapu koproba ap, sik nirya ara pil pia teleb ubuka don nanguk ulamik. ‘Anang nirya arye, Allah el si eren aik wekelban bisik bublan dam kalinamakʼ tenen, anang nirya nukuka delapan belas (18) nang wipdeibik.

^10-11 Tonda, ‘Allah el si eren aik bublan dam kalinamakʼ tenen, Merari yala nang arye deiamikba, dadeipdanin yangalamika ani, deibiknye el si ara Hosa ulamuk. Hosa elce deiamuknye, el si Simri wipdeibik. Hosa el mapu ara, sal dumbarye deiamuk. Hosa birye min yuma deiamuk mi ara, Simri kum ulamuk bukni, Hosa birye anye wipdeibukce, deiyok ning arebukba, deiyok kounanye ulamuk. Hosa birye deiamuk nang, yuk nang ara, sik si ara, Hikia ap, Tebalya ap, tonda Zakaria ap deiamuk. Hosa birye deiamuk nang ap, sik tam nang ap, sik mapu ap nirya ara, tiga belas (13) nang ulamik.

¹² Aning eitam sekupu nang nirya ara, Allah el si eren aik bisik bublan dam kalikna ati, wipdeibikba, anang arye apil talibuka dolamikce, deiyok kibuka deiyok koun nang ulamik. Sik anang ap, sik yala nang ap, sik mapu silip ap babye, Allah el si eren aik bublan dam kalikin pil ap, anyaik dam bukni, yuk pil ap talibuka dolamik. Ara, sik kwitcapu koproba, sik Lewi yala nang arye melilamik touk, sik babye apil talibuka dolamik.

¹³ Sik ayala deiyok nang nirya ara, yala yupa weik nang ap, tonda yupa mitik yala nang ap, sik nirya arye, ‘Ayala nang arye, Allah el aik dam wekelban bisik bublan dam kalikinamak do? Aning do, otam ning do?’ tenen, kel bikilin ning, el si undi donmeka deice arye bikikce, abublan nirya bokuka, ayala-yala nang nirya ati, yuk-yuk arebikura, anang arye kaliklamik.

¹⁴ ‘Aning do, aning do?’ tenen, wina deiyok ning, tonda bikilin ning, el si undi dolamik deice arye, undi donmeka ani, Allah el si eren aik, keting palanyangan tam bisik bublan dam kalikna ati ara, Selemya el deice poulbiyukce, el si lak ubuka anya arye, abublan ara el yala nang arye kaliklamik. Winibukopura, Selemya elce deiamuknye Zakaria, tuba tamubuka undi ning dopmekba, anye el si lak ubukopura, utam dapu tam bisik bublan dam kaliklamuk. Anye Zakaria bira, weik tonun kel bikna ap, tonda weik tonun tenina ap, ‘Winipnamlume winipnamlume,’ nyabuka teleb un ning ara ani,’ nyabuka, teleb yupu nyananye ulamuk.

¹⁵ Allah el si eren aik wekelban bisik bublan iknapye tam ara, undi donmeka ani dobikba, Obet-Edom el si lak ubuka anya arye, el ap, el mapu silip ap arye, abublan kaliklamik. Aning atouk, undi ton donmeka ani dobikopura, Obet-Edom elce deiamuk mapu ara, Allah el si eren aik bona deilin aik ati, kalikin nang wipdeibikba, apil talibuka dolamik.

¹⁶ Aning atouk, undi ton ap dobuka donmeka ani, akunum winibukopura, Supim ap, el mapu silip ap, sik si lak ubuka anya arye, sikda keting wekelban tam bublan ati kaliklamik. Atonun ton, undi ton ap dobikopura, Hosa ap, el mapu silip ap ara, ton bublan el si Syalekhet bisik bublan dam kalikin pil arebikba, apil talibuka dolamik. Abublan ara, Allah el si eren aik, eitam weleban bisik banak ati awamuk. Abublan nirya kalikin keting ara, atonunuk bokuka arebikura, ton yala nang weik, ton yala nang mitik kume. Aning-aning nirya bukni, yuk-yuk dobuka, sik pil don keting ara atouk bukni, yuk keting ton, yuk keting ton punubuka pil dolamik.

¹⁷ Asum-asum nirya atouk ulamik. Ara, Lewi yala nang arye, otam keting palanyangan tam bublan ara, sik nakub barye nang arye, atam bublan kaliklamik. Atonun dapu tam babye, sik dumbarye nang arye atam bublan kaliklamik. Atonun ton, iknapye tam babye, sik dumbarye nanguk atam bublan kaliklamik. Bukni, Allah el si eren aik pum tam bona deilinak nirya kalikna ati ara, dumbarye nanguk kaliklamik bukni, bitinye-bitinye kibuka neika kaliklamik. Ara, aketing ton, aketing ton, tonok aik bukni, ninye bitinye-bitinye kibuka kaliklamdik.

¹⁸ Keting kumulban tam ara, ninye bunak ap, tonda Allah arin ning kintinilinak ap, el si Pafilyun, atam ara nakub barye nang kaliklamik. Dumbarye nang ara, sikce anyaik weleban bisik ati kaliklamik. Tonda sik yuk nang bitinye ara, aninye bunak Pafilyun tam, sikce kaliklamdik. Akalikin nang ton wipdeibikba, apil talibuka dolamik.

¹⁹ Asukum arye eitam sekupu nang ara, sik yupa nirya ara, Korah yala nang arye deiamik nang ap, tonda Merari yala nang arye deiamik nang ap, ulamikce, Allah el si eren aik wekelban bisik bublan dam, yuk-yuk bisik kalikna ati bokdeibikba, apil talibuka dolamik.

Allah Yahweh el si eren aik pum tam, yuk-yuk pil dona ati, bokuka arebik yupu

²⁰ Sik Israel yala nang nirya arye, atalak ton, atalak ton, sik ni koproba Allah Yahweh ati, El si erebuka, el kina ati, yo bok bulubuka deibupu ning ara, el tibuk arenamabeʼ tenen, Allah el si eren aik dam arelyangalamik. Ayo bok ap, keil uang logam ap arelyangalamikba, sik Lewi yala nang aryuk aning dobuka, teleb marikna pum tam dongolamikce, pia kaliklamik.

²¹ Tonoknye el si Ladan, ayo bok areamikba, boyanuka amarikna dongolamik ning ara, elce ton kaliklamuk. Ladan elda, el li koproba Gerson birye deiamukba, ulamuk. Ladan, elda yata barye yala nang yupa ara, sik apu koproba ulamuk. Tonye bira, el si Yehiel, elce deiyok kibuka, deiyok kounanye kibukce, amarikna kaliklamik nang, tonok yupa ati ara, sik deiyoknye ulamuk.

²² Tonda, ayo bok dongolamik marikna kalikna deiyok nang ton ani. Ara, Yehiel elce deiamuk nang bitinye ara, Zetam ap, tonda Yoel ap, sikce Allah el si eren aik bukni, bona yuk-yuk ning delina ati wilibuka dobik aik ap, tonda Allah Yahweh el arelamik yo bok dongon marikna ap ara, ‘Sikce kalekinamrakʼ tenen, wipdeibik.

²³ Ninye si ton Amram ap, Yizhar ap, Hebron ap, tonda Uziel ap, sikce deiamikba, dadeipdanin yangalamika ani, yanuka deibik nang ara, sikce apil dona deiyok nang una ati, wipdeibikba apiluk talibuka dolamik.

²⁴ Tonda, Amram yala nang, sikce deiamik nang arye deibiknye, el si Subuel bira, deiyoknye kipdeiamikba, ulamukce, ayo bok dongolamik marikna ara, elce kaliklamuk. Subuel bira, Musa birye deiamuknye Gerson deiamuk. Subuel birye Allah Yahweh el si eren aik aning-aning yuk-yuk ning nirya boyangalamikba, anyaik delilamukce, kalikna deiyoknye ulamuk.

²⁵ El anye Gerson bira, el weit Eliazar, elce deiamukba, dadeipdanin yangalamika ani, yanuka deiamikba, sikce deiamik nang ton, apiluk talibuka neika dolamik. Eliazar birye deiamuknye Rhabya ap, Rehabya birye deiamuknye Yesaya ap, Yesaya birye deiamuknye Yoram ap, Yoram birye deiamuknye Zikri ap, tonda Zikri birye deiamuknye Selomit. Sik anang nirya ara, apiluk talibuka dolamikce, anyaik pum tam ning kaliklamik.

²⁶ Ura, Zikri elce deiamuknye Selomit ap, el kwitcapu koproba ap, sik mapu silip ap, sik nirya ara, ninye deiyok nang nirya arye Allah ati dekna weik ning ap, teleb lek ning ap, boyanuka arelyangalamik ning nirya ara, dolamikce Allah el si eren aik pum tam dongolamikba, moubuka kaliklamik. Ara, Israel nang sik ninye deiyoknye Raja Daud ap, Israel nang yuk-yuk nang nirya sik deiyok nang ap, yin talen nang, sik deiyok-deiyok nang arye, sik amu tam yupa ara, seribu (1.000) nang ati yupu nyalamik nang ap, tonda seratus (100) yin talen nang ati, yupu nyalamika deiyok nang ap, tonda yuk talye yin talen nang, mitik eitam ulamik yin talen nang ap nirya babye, sik anang nirya arye Allah Yahweh ati, ‘Aning ara el ninguk unamleʼ tenen, pia teleb dekna weik ning boyanuka areamikba, Selomit el deipdanin yangan nang arye boyanuka, moubuka delilamikce, kaliklamik.

²⁷ Sik ayin talina deiyok nang arye, boyanuka Allah ati arelyangalamik ning nirya ara, dana-dana tam ulamik nang ati, ninye olalbalamik mutuku noutam arye, anang malye kibikce, sik pera mutuku nang arye taleamik ning alubuka dopromikce, teleb ning ton Allah ati arelyangalamikba, Selomit ap, el kwitcapu koproba ap, el mapu silip ap, aning nirya boyanuka, ‘Allah Yahweh el si eren aik, mitik malye uamuk ning lipsisikuka donamakʼ tenen, anyaik noutamuk sikce delilyangalamik ning kaliklamik.

²⁸ Aning atouk ton, aminyan upnamuk ning eililamukce laka nyana ap, Allah arye nyalilamuk yupu kekebuka, laka nyana ap ulamuknye, nabi Samuel birye, ‘Aning ara Allah el ninguk unamleʼ tenen, Allah ati teleb ning arelamuk. Tonda, minop talak Israel nang sik weik deiyoknye Raja Saul ap, aminyan talak el pununanye Raja Daud ap, tonda el amu tam ulamdik yin talina ati, deiyok kibuka ulamdik nang, ara Nar birye deiamuknye Abnar ap, tonda Zeruya birye deiamuknye Yoab ap, sik anang nirya arye, ‘Allah el ninguk unamleʼ tenen, arelamik ning dobuka, Allah el si eren aik pum tam dongolamik. Winipnopura, Selomit ap, el mapu silip ap arye, aning moubuka deipnarye neika kaliklamik.

Lewi yala nang bukni, sik deipdanin yangalamik nang arye, yuk pil bokuka arebik ning ati, sekik yupu

²⁹ Ninye si Yizhar birye deiamukba, dadeipdanin yangalamik nang arye deibiknye, el si Kenanya, el ap, elce deiamuk nang nirya ap ara, Allah el si eren aik pum tam kum bukni, anyaik bai tamuk, yuk pil dona deiyok ning bokuka arebikba, dolamik. Tonda, anang arye Israel nang ulamik tam noutam bukni, yuk-yuk mutuku noutam arye, apil talibuka dolamik. Ara, yuk deiyok kin pil, yupu lipsisikuka dona deiyok pil ton taleamik. Tonda, sikce, ‘Teleb un ning ara, ani, malye un ning ara ani,’ nyabuka, wipdeipnarye, ninye yupu bokolina deiyok nang ulamikce, apil ton talibuka dolamik.

³⁰ Tonda, Israel mutuku noutam bukni, Yordan mek koubuka, otam keting kumulban tam noutam ara, ‘Allah Yahweh ati, apil donamabe,’ tenelamik ning nirya ap, tonda Raja Daud el melina ati, ‘Pil donamabe,’ nyapdeiamik ning ap ara, ninye si Hebron, elce deiamukba, dadeipdanin yangalamik nang arye deibiknye, el si Hasabya, el wipdeibikba, apil talibuka, yupu nyana deiyoknye ulamuk. Tonda, Hebron el kwitcapu koproba, sik yala nang ap, sik mapu silip ap nirya, Hasabya biti melilamik. Anang sik yupa ara, seribu tujuh ratus (1.700) nang wibukabikce, bokdeibikba, apiluk talibuka dolamik.

³¹ Hebron elce deiamukba, dadeipdanin yangalamika ani, deibiknye Yerari, el dobukabikce, ‘Nun yala nang ati, ninye deiyoknye kibuka, unamleʼ tenen, wipdeibikba, apil talibuka dolamukce, yupu nyalamuk. Raja Daud birye, Israel nang nirya talina ati, deiyok kibuka yupu nyalamukba, keting tamun empat puluh (40) akunum uplyopura, atalak ara, Raja Daud birye, “Teleb deiyok nang ton wipdeipnamne anya arye, dilbilnamlume, winipnamlume,” nyapdeibuk touk, kel weik nang arye, Gilead mutuku noutam arye, ‘Yata yala nang kan-kan arye do? Tonda, dipkoprob kel weik bikamik nang arye, aning-aning nirya teleb kibuka pil donyak nang ara, dan sukum do?’ tenen, Gilead mutuku noutam nirya dipdebuka balamikce, Yasar mutuku noutam arye ulamikba, teleb nang weik eibik.

³² Anang kan-kan noutam arye, anye Yerari eibikce, dobuka Daud dam boyayikopura, Raja Daud birye, ‘Anye bira ninye deiyoknye unamleʼ tenen, wipdeibuk. Winibukopura, Yerari el kwitcapu koproba ap, sik yala deiyok nang ap, wipdeibuk. Winibikopura, ‘Anang nirya arye, sik Ruben yala nang unyak mutuku ap, Gad yala nang unyak mutuku ap, tonda Manasye yala bukni, noutam arye bokuka, keting palanyangan tam binuka ulamik nang, sik mutuku ap, winiryuk wipdeipman deiyok nang arye, yupu nyana deiyok nang unamake. Awipdeibuka deiyok nang nirya, sik yupa ara weike, dua ribu tujuh ratus (2.700) nang ulamik. Ati, atam noutam nirya ara, anye Yerari ap, el tam nang ap arye, amutuku nang Allah Yahweh elti, pil dolamik ning ap, Raja Daud biti pil dolamik ning ap ara, sik Yerari yala nang aryuk, ‘Winipnamabe,’ nyabuka, deiyok nang ulamik.