1 Tawarikh 25 - Eipomek

Allah Yahweh el si eren aik noutam mot nyana ati, sekik yupu

¹ Ura, ninye deiyoknye Raja Daud ap, sik Lewi yala nang ninye deiyok nang nirya ap, ‘Aning ara Allah si eren talak mot nyana ap, alat-alat musik kintinina ati aning, apil talibuka unamakʼ tenen, ninye ton wipdeibik. Ara, Asaf elce deiamuk nang kan-kan ap, Heman elce deiamuk nang kan-kan ap, tonda Yedutun elce deiamuk nang kan-kan ap, wipdeibikba, anang ara Allah arye nyapdeiamuk yupu weken talak pil deiyok kouna ap, tonda mot nyan talak alat-alat musik el si ara, kecapi ap, gambus ap, simbal ap, nyanmeka deice arye, Allah el si erelamik. Awipdeibik nang arye, apil talibuka dolamik. Allah yupu weken talak deiyok kouna ati ara, yupa yuk-yuk wipdeibuk nang ara, sik si ani.

² Asaf elce deiamuk nang dumbarye ara Zakur ap, Yusuf ap, Netanya ap, tonda Asarela ap deiamuk nang wipdeibik. Anang sik deiyok kina deiyoknye bira, Asaf ulamuk. Tonda, Raja Daud bira, “Allah elce, ‘Winamlulume,’ nyapdeiamuk yupu yanuka nyanamlanye bira, Asaf birye nyanamle,” nyabuka ati, apil ton dobuka, Asaf arebikura, elce aning talibuka pil dolamuk.

³ Aning atonun, el kwit Yedutun, elce deiamuk nang kan-kan ara, nakub barye, deiamuk nang wipdeibik nang ara, sik si ani. Ara, Gedalya ap, Zeri ap, Yesaya ap, Simei ap, Hasabia ap, tonda Matica ap, ‘Sik nirya apil talibuka donamakʼ tenen, wipdeibik. Anang sik deiyoknye bira, sik ni koproba Yedutun ulamuk. Tonda, elcuk, Allah arye nyapdeiamuk yupu ara laka nyalamukce, el mot nyan ning kecapi deice arye, Allah mot nyalamukce Allah el si erelamuk. Awinlamuk talak aryuk, Allah Yahweh ati, “Na nio, anda pia telebuk ulyame. Ance melipnamsilam ning nirya ara, pia teleb nyapkiyabe,” nyabuka, Allah el si erelamuk. El mapu ara, el amu tam ulamik bukni, sik anang babye, yupu deice arye nyalamik mot ap, mot nyan ning, el si ara alat musik kecapi ap, gambus ap, simbal ap nyaman deice arye, Allah el si erelamik.

⁴ Aning atonun, el kwit Heman, elce deiamuk nang kan-kan, empat belas deiamuk nang wipdeibik nang, sik si ara ani. Ara, Heman elce deiamuk nang ara, Bukia ap, Matanya ap, Uziel ap, Sebuel ap, Yerimot ap, Hananya ap, Hanani ap, Eliata ap, Gidalti ap, Romamti-Ezer ap, Yoasbekasa ap, Maloti ap, Hotir ap, tonda Mahaziot ap, winibuka nang wipdeibik. Ara, ‘Allah si eren talak ara, sik anang arye mot nyanamakʼ tenen, wipdeiamik.

⁵ Heman bira, ninye deiyoknye Raja Daud, el ning koproba melina ati, “Allah arye nyapkile, nyapkile,” nyabuka laka nyalamukce, nabinye kibuka ulamuk. Minop talak ara, Allah Yahweh arye Heman biti, “Anda telebnye ulyama anya arye, mikip kipdeipkiniba, telebuk unamlame,” nyabuka nyalin yupu deice arye nyabuka anya arye, Heman el mapu ara, empat belas areamuk. Atonun tonda, el kilmapu ara winilye areamuk. Ara, Allah arye Heman biti, “Aning nirya ara winipkiniba, yuk nang eibicopura, anti, ‘Elda mambulnye,’ nyabuka, si erebuka wininamkiyake,” nyapdeiamuk.

⁶ Ura, Heman elce deiamuk mapu, sik empat belas (14) nang nirya ara, sik ni koproba deiyok kibuka deiyok koubukba, sik nirya arye Allah si eren talak mot nyalamik. El ap, sik nirya ap arye, mot nyan ning el si simbal ap, kecapi ap, gambus ap, sik ni birye deiyok kipniba, Allah si erena ap, el yupu kekena ap ati, weken talak ara, Allah el aik noutam aning bopnirye, mot nyana ap, aning pong-pong nyana ap, tonda taruk arye bokom-bokom ana ap ulamik. Asaf ap, Yedutun ap, Heman ap ara, ninye deiyoknye Raja Daud birye, ‘Wininamlume,’ nyapdeiamuk touk, apil dona deiyok ning taleamikce, mot nyalamik.

⁷ ‘Mot sen pil donamakʼ tenen, wipdeibik nang nirya ap, sik kayapu nang koproba ap, sik mapu silip ap nirya ara, Allah si eren mot sena ap, bengkong lena ap ara, kel weik nang ulamik. Sik yupa nirya ara, yupa dua ratus delapan puluh delapan (288) nang ulamikce, Allah si erena ati mot selamik.

⁸ Sik anang nirya ara, ‘Anye yata pil talibuka donamle do, el kwit bira dan pil ton talibuka donamle do?’ tenebuka, kel bikna ati ara, sik deiyok-deiyok nang arye moubuka undi bikilin ning donoknopura, adeice arye biknarye apil bokdeibik. Sik wisi nang babye, mitik wel nang babye, undi kel bikilin ning donokona deice aryuk, sik moubuka kel weik kiamne nang babye, winiryuk deiyok kipnarye, ‘Kel biknamanʼ tenen, nang babye, undi kel bikilin ning donokonmeka deice arye, anang wibukabikce, sik pil bokuka arebikura, apiluk talibuka dolamik.

⁹ Undi dopmeka deice arye, sik anang yupa weik 288 nang nirya ara, yupa yuk-yuk wipdeibikba, sik 24 nanguk sik yuk-yuk aulamik touk, yuk-yuk bokdeibik. Ayupa wipdeibik nang nirya ara, tonoknye birye deiyok kipdeibikce, el yala nang ara dua belas (12) nang obarye kipdeibik. Aning ara yuk-yuk nukuka kintinip deibikce, yupa yuk ninye deiyok kibik nang ara, abuku outam aupmale. Ara ani. Min yuma ara, Asaf el yala kan-kan arye, undi dobika deice arye, ‘Mot nyan pil donamak nangʼ tenen, wipdeibik. Min yuma wibiknye bira, Yusuf ulamuk. Elce deiyok kouamuka ani, el amu tam ara, el kayapu koproba arye, dua belas (12) nang ton wipdeibik. Anerye, undi kedua dopmeka deice, sikce wipdeibiknye bira, Gedalya ulamuk. Elce deiyok kouamuk bukni, el amu tam ara, el kayapu koproba arye, dua belas (12) nang ton wipdeibik.

¹⁰ Winibikopura, undi winilye dobika deice arye, wipdeibiknye bira, Zakur ulamuk. Elce deiyok kouamuk bukni, el amu tam ara, el kayapu koproba arye, dua belas (12) nang ton wipdeibik.

¹¹ Awinibikopura, undi dumunye dobika deice sikce, wipdeibiknye bira, Yizri ulamuk. Elce deiyok kiamuk bukni, el amu tam ara, el kayapu koproba arye, dua belas (12) nang ton wipdeibik.

¹² Anerye, undi pamunye dobika deice, sikce wipdeibiknye bira, Netanya ulamuk. Elce deiyok kiamuk bukni, el amu tam ara, el kayapu koproba arye, dua belas (12) nang ton wipdeibik.

¹³ Anerye, undi nakub barye ning dobika deice, sikce wipdeibiknye bira, Bukia ulamuk. Elce deiyok kiamuk bukni, el amu tam ara, el kwitcapu koproba, sik noutam arye, dua belas (12) nang ton wipdeibik.

¹⁴ Winibikopura, undi tek ning dobika deice, sikce wipdeibiknye bira, Yesarela ulamuk. Elce deiyok kiamuk bukni, el amu tam ara, el kwitcapu koproba, sik anang noutam arye, dua belas (12) nang ton wipdeibik.

¹⁵ Aning winibika ati, undi pin nye dobika deice sikce wipdeibiknye bira, Yesaya ulamuk. Elce deiyok kiamuk bukni, el amu tam ara, el kwitcapu koproba, danoutam arye dua belas (12) nang ton wipdeibik.

¹⁶ Ati ara, undi toupne ning dobika deice arye, wipdeibiknye bira, Matanya ulamuk. Elce deiyok kiamuk bukni, el amu tam ara, el kwitcapu koproba, sik noutam arye, dua belas (12) nang ton wipdeibik.

¹⁷ Awinibikopura, undi takunye dopmekak arye, sikce wipdeibiknye bira, Simei ulamuk. Elce deiyok kiamuk bukni, el amu tam ara, el kwitcapu koproba, sik noutam arye, dua belas (12) nang ton wipdeibik.

¹⁸ Aning winibikopura, undi koklom ning sebelas (11) dopmek noutam, sikce wipdeibiknye bira, Asareel ulamuk. Elce deiyok kiamuk bukni, el amu tam ara, el kwitcapu koproba, sik noutam ara, dua belas (12) nang ton wipdeibik.

¹⁹ Tonda undi obarye ning, dua belas (12) dopmeka deice, sikce wipdeibiknye bira, Hasabya ulamuk. Elce deiyok kiamuk bukni, el amu tam ara, el kwitcapu koproba, sik noutam arye, dua belas (12) nang ton wipdeibik.

²⁰ Anerye, undi mikbarye ton, tiga belas (13) dobika deice arye, wipdeibiknye bira, Subael ulamuk. Elce deiyoknye kiamuk bukni, el amu tam ara, el kwit capu koproba, sik noutam arye, dua belas (12) nang ton wipdeibik.

²¹ Winibikopura, undi dan tam odikin empat belas dopmek deice, sikce wipdeibiknye bira, Matika ulamuk. Elce deiyok kiamuk bukni, el amu tam ara, el kwitcapu koproba, sik noutam arye, dua belas (12) nang ton wipdeibik.

²² Atonun winibikopura, undi dana tam koklom dikin ton dopmek deice arye, wipdeipmeknye bira, Yeremot ulamuk. Elce deiyok kiamuk bukni, el amu tam ara, el kwitcapu koproba, sik noutam arye, dua belas (12) nang ton wipdeibik.

²³ Awinibikce, undi dana tam taku dikin ton undi dopmeka arye, sikce wipdeibiknye bira, Hananya ulamuk. Elce deiyok kiamuk bukni, el amu tam ara, el kwitcapu koproba, sik noutam arye, dua belas (12) nang ton wipdeibik.

²⁴ Aning ara, undi dan tam tupne dikin dopmeka deice, sikce wipdeibiknye bira, Yosbekasa ulamuk. Elce deiyok kiamuk bukni, el amu tam ara, el kwitcapu koproba, sik noutam arye, dua belas (12) nang ton wipdeibik.

²⁵ Awinibuk ning ara, undi dana tam pin dikin dopmek deice arye, wipdeibiknye bira, Hanani ulamuk. Elce deiyok kiamuk bukni, el amu tam ara, el kwitcapu koproba, sik diamuk, dua belas (12) nang ton wipdeibik.

²⁶ Awinibikopura, undi dana tam tekdikin dobikce, wipdeibiknye bira, Maloti ulamuk. Elce deiyok kiamuk bukni, el amu tam ara, el kwitcapu koproba, sik diamuk, dua belas (12) nang ton wipdeibik.

²⁷ Abukni, undi dana tam nakub dikin dobikce, sikce wipdeibiknye bira, Eliati ulamuk. Elce deiyok kiamuk bukni, el amu tam ara, el kwitcapu koproba, sik diamuk, dua belas (12) nang ton wipdeibik.

²⁸ Anerye, undi dana tam pamu dikin, dobika deice, sikce wipdeibiknye bira, Hotir ulamuk. Elce deiyok kiamuk bukni, el amu tam ara, el kwitcapu koproba, sik diamuk, dua belas (12) nang ton wipdeibik.

²⁹ Awinibikce, undi dana tam dumu dikin dobikce, sikce wipdeibiknye bira, Gidalti ulamuk. Elce deiyok kiamuk bukni, el amu tam ara, el kwitcapu koproba, sik diamuk, dua belas (12) nang ton wipdeibik.

³⁰ Awinibika ati, undi dana tam dumudikin dobika deice arye, sikce wipdeibiknye bira, Mahaziot ulamuk. Elce deiyok kiamuk bukni, el amu tam ara, el kwitcapu koproba, sik diamuk, dua belas (12) nang ton wipdeibik.

³¹ Awinibikce, undi dana tam winilya dikin dobika deice, sikce wipdeibiknye bira, Romamti-Ezer ulamuk. Elce deiyok kiamuk bukni, el amu tam ara, el kwitcapu koproba, sik diamuk, dua belas (12) nang ton wipdeibik.