1 Tawarikh 23 - Eipomek

Lewi yala nang pil dona ati, nyabuk yupu

¹ Raja Daud akunum wisi dayuk talak ara, elce deiamuknye Salomo boyanuka, ‘Sik Israel yala ninye deiyoknye una ati punupnirye, Raja unamleʼ tenen, erepdeibuk.

² Aning akunum winibikopura, ninye deiyoknye Raja Daud birye, sik Israel mutuku noutam taleamik ninye deiyok nang nirya ap, sik Allah si eren aik pum tam pil dolamik nang, imam-imam nang ap, sik yuk Lewi yala nang ap, anang nirya bulupdeibuk.

³ Lewi yala nang nirya bulupdeibukopura, Raja Daud birye sik nemik nang ati, keting tamun tiga puluh (30) tahun arye, eitam kiamne nang ati, yuk-yuk wibuka nukuk. Lewi yala nang nirya nukukce sik yupa ara, pia weik tiga puluh delapan ribu (38.000) nang kibuk.

⁴ Sik Lewi yala nang nukukopura, sik anang arye bokuka dua puluh empat ribu (24.000) nang ton wibuka, Allah Yahweh el si eren aik noutam talibuka, pil dona ati deiyok nang kipdeibuk. Tonda, aLewi yala nang kan-kan arye, yuk yupa ton wipdeibukba, sikda enam ribu nang (6.000) kibuk. Anang ara, anyaik deiyok nang unamake. Ton nang ara, ninye yupu lipsisikuka bokolina deiyok nang unamake. ‘Apil talibuka Allah si eren aik pil don nang unamakʼ tenen, wipdeibuk.

⁵ Tonda, aLewi yala nang kan-kan aryuk, ton yupa wipdeibuk ning ara, empat ribu nang (4000) kibuk. ‘Anang ara, Allah el si eren aik wekelbana ati bisik bublan dam kalikna deiyok nang unamakʼ tenen, wipdeibuk. Ton yupa ara atonun, empat ribu nang (4.000) wipdeibukce, Raja Daud birye nyabuk. “Anang ara narye akunum dobuka deiamse musik nyan ning boyanuka, sikda, Allah Yahweh el si eren aik dam, mot nyabikirye, mot nyan talak lelim nyan ning, aning si ara alat musik yuk-yuk ning nirya, na Raja Daud birye, ‘Wininamlume,’ nyapdeipsiba, kel nang arye aning akunum kintinibuka deiamika anya arye, aning boyanuka, mot nyabikirye, Allah ati, el si erenamake,” nyapdeibukce, anang ton wipdeibuk.

⁶ Sik Lewi yala nang nirya ara, ninye deiyoknye Raja Daud birye, sik Lewi yala nang yupa yuk-yuk bokdeibuk. Ara, sik Lewi yala nang arye deibikba, dadeipdanin yangalamik Lewi yala nang arye deibik nang ulamik touk, sik awipdeibuk nang ara, yupa winilye yuk-yuk deibuk. Anang sik apu yapu nang ara, sik si ara ani. Ara, Gerson yala nang ap, Kehat yala nang ap, tonda Merari yala nang ap wipdeibuk.

⁷ Ura Gerson el mapu ara, sal bitinye sik si ara ani. Ladan ap, Simei ap deiamuk.

⁸ Ladan elce deiamuk mapu ara, sal winilye deiamuk. Ara, min yuma deiamuknye Yihel deiamukce, bitinanye bira, Zetam deibuk. Winilinye bira, Yoel deiamuk.

⁹ Gerson birye deiamuknye Simei, elce deiamuk mapu sik si ara ani. Ara, Selomit ap, Haziel ap, Haran ap, deiamuk. Ara winilye nang dem deiamuk. Sik anang nirya ara, Ladan elce deibukba, dadeipdanin yangalamik nang ati, deiyok kibuka aninye ap, sik mapu silip ap talibuka yupu nyalamik.

^10-11 Gerson birye deiamuknye Simei, elce deiamuk mapu, yuk dumbarye nang ara, sik si ara ani. Ara, Yahat min yuma deibukce, el weit capu ara Ziza ap, Yeus ap, Beria ap deiamuk. Anang kan-kan arye, Yeus ap, Beria ap arye deipdikura, dadeipdanin yayik nang ara, ninye weik kume. Anang arye mitik tonun uka. Ati ara, sik anang bitinye ap, sik mapu silip ap ara, yala tonok nang atonun nukuka, sik si sekuka deibik.

¹² Kehat elce deiamuk nang ara, dumbarye deiamuk. Ara, Amram ap, Yizhar ap, Hebron ap, Uziel ap, winibuka nang dem deiamuk.

¹³ Kehat birye deiamuknye Amram birye deiamuk nang ara, bitinye ulamdik. Ara, Harun ap, Musa ap, deibukba daulamdik. Ati, Allah arye Harun biti ara, ‘Na aik pum tam pia teleb mambul pil donamleʼ tenen, wipdeibuk. Winibuka anya arye, Harun birye deibukba, dadeipdanin balamik nang nirya ara, ‘Pia mambul pil, teleb lek piluk talibuka donamakʼ tenen, Allah si eren aik pum tam pil dona deiyok ning ara, ayala nang sik deice deibuk. Harun el yala nang aryuk, ‘Israel nang sik malye un ning ati, Allah arye namin kiplirye, kum kipdeipnamsilʼ tenen, kam ning obuka, Allah Yahweh dam bukni, mesba deice uku dongolamik. Tonda, ‘Allah arye, sik Israel nang teleb kipdeipnamleʼ tenen, sik ayala nang aryuk, Allah el si deice arye, teleb yupu nyabukabikce, Israel yala nang deice delilamik.

¹⁴ Bukni Musa bira, Allah arye wipdeiamukba, Allah el yupu moubuka taleamukce, pia telebuk ulamukce, Allah el amu tamuk ulamuk. Ulamukce, Musa elce deiamuk mapu nirya ara, Allah arye nyabuk. Ara, “Musa ap, el mapu silip ap nirya ara, Lewi yala nang atonun unamaka anya arye, Lewi yala nang sekenamak talak ara, Musa el mapu silip babye, sik si ansinibuka sekuka delinamlume,” nyapdeibuk touk ulamik. Winilamika anya arye, Musa ap, el mapu silip ap ara, sik Lewi yala nang yupa ara, tonok kipdobik.

¹⁵ Musa birye deiamuk nang ara, Gerson ap, Elieser ap deiamuk.

¹⁶ Gerson birye min yuma deiamuknye bira Sebuel ulamuk.

¹⁷ Musa birye deiamuknye Elieser, elce deibuknye bira, tonoknye el si ara, Rehabya ulamuk. Bukni, Rehabya elce deiamuk mapu ara, pia weik tonun deiamuk.

¹⁸ Kehat elce deiamuk mi Yizhar bira, ninye si bitinye deiamuk. Elce deiamuknye el si ara Lomit. Anye elce deibukba, dadeipdanin yangalamika ani deiamuknye ulamuk.

¹⁹ Kehat bira, elce deiamuknye winilinye bira, Hebron ulamuk. Hebron elce deiamuk mapu ara, dumbarye ulamik. Ara, min yuma deibuknye bira Yeria, anyapce ubuka Amarya ap, tonda, Yehasiel ap, tonda Yekameam ap, winibuka nang deiamuk.

²⁰ Kehat birye deiamuknye Uziel bira, dumunye ulamuk. Uziel birye deiamuk mapu bitinye ara ani. Ara, min yuma dunye deibukura, Mikha ulamuk. Tonda el weit koprop ara Yisia deiamukba, ulamuk.

Tonye bira Merari, elce deiamuk nang ati, sekik yupu

²¹ Merari elce deiamuk mapu babye bitinye. Anang sik si ara, Mahli ap, Musi ap deiamuk. Mahli el mapu ara, bitinye deiamuk. Ara, Eliazar ap, Kish ap deiamuk.

²² Bukni, Mahli birye deiamuknye Eliazar bira, mapu ton delina kumce dibuk. Bukni, kilmapu dem deiamuk. Adeiamuk kilapu ara, Kish birye deiamuk nang, sik kayapu nang ulamik bukni, Kish el mapu aryuk, Eliazar birye deiamuk kilapu domik.

²³ Merari elce deiamuknye Musi, elce winilye nang deiamukba ulamik. Sik si ara, Mahli ap, Eder ap, tonda Yeremot ap deiamuk.

²⁴ Anyapce eitam sekupu ninye si, anang ara Lewi yala nang arye deiamikba, dadeipdanin yangalamika ani, deiamik nang ulamik. Sik si nukuka sekna ap, sik apu yapu nang si sekna ap, sik deipdanin yangalamik yala nang si sekna ap, sik mapu silip talibuka una deiyok nang yuk-yuk si sekna ap, winilamik touk kintinibuka sekdeibupu. Sik asukum sekupu nang ara, sik deilin keting tamun ara, dua puluh (20) tahun bukni, akunum eitam kiamne nang dem sekeiamik touk, nun babye asukum sekupu. Anang nirya ara, ‘Allah Yahweh el si eren aik mambul pil talibuka dona ati, pil deiyok nang unamakʼ tenen, wibukabikce, apil areamikba, dolamik.

²⁵ Atalak ara, sik Lewi yala nang wipdeiamika deiyok ara, talye ati kume. Ninye deiyoknye Raja Daud birye nyabuk. “Nun Israel nang arye, el si erenyab Allah Yahweh arye, nun Israel nang ati, ‘Na tenen nang pia unamakʼ tenen, wipdeipsukce, pia melilamsuk. Allah elce, ‘Teleb kipdeipnamsine,’ nyabuk. Tonda Allah arye, ‘Yerusalem mutuku noutam ara, pia ati unamne,’ nyapdeiamsuk. Tonda, nun ni koproba Allah arye, nun dana-dana tam ulamupu nang nirya ati, akunum obuka malye kibukopura, wini talak ara nun Israel nang amutuku noutam arye, ninye olana kumce, pia namin arye, tunim abuka telebuk unyabe.

²⁶ Wini talak ara, yuk mutuku nang olana uk kum unyaba ati ara, sik Lewi yala nang arye, Allah Yahweh el si eren aik, sapi bol arye doltakne tenda aik domupu ning ara, tuba dakuka kum bobanamake. Atonun, anyaik noutam deiamik ning nirya ap, anyaik pum tam mambul pil don ning ap, sik Lewi yala imam-imam nang arye, tuba-tuba bobikirye, yuk pera mutuku ton kum bobanamake. Asukumuk unamabe.

²⁷ Ura atalak ara, ninye deiyoknye Raja Daud elce, ‘Winipnamlume,’ nyapdeibukce, sirya yupu nyapdeiamuk touk, sik Lewi yala nang bukni, sik nebikce keting tamun dua puluh tahun (20) eitam kiamne nang dem, sik nong nukuka, sik si sekamik.

²⁸ Ura, sik Lewi yala nang, ara Harun elce deiamukba, dadeipdanin yangalamik imam-imam nang ara, Allah Yahweh arye anang wipdeiamuka anya arye, sikce el si eren aik noutam, mambul weik pil talibuka dolamik. Ara, minop talak kintinip domik aik, sapi bol arye doltakne tenda aik domik ning babye, aminyan talak weik urasin teleb keil ap, yo ap, kat ning ap arye domik ning babye, sik anang aryuk apil melibuka dona uk ulamik. Anang arye pil talibuka dolamik ning ara, Allah el si eren aik dam bukni, bai tam ap, anyaik pum noutam ap, anyaik noutam urasin pia teleb lek ning, pil don ning ap, ‘Aning nirya ara, Allah el ninguk ulula anya arye, malye ning tonok ning babye, anyaik pum tam kum unamleʼ tenen, aning nirya mek likna ap, sung-sung kina ap, Allah arena ap deice arye, aning nirya teleb-teleb kibuka delilamikba, pia lek dem ulamuk. Sik Lewi yala nang aryuk apil talibuka dolamik.

²⁹ Tonda, anang nirya adiparyuk, Allah el arena ati, roti kwaning ara, Allah Yahweh el dam arye pia tuba-tuba kintinibuka delina uk ulamik. Tonda, Allah Yahweh si erebuka kina ap, ‘Nun ap, Allah ap, teleb ubuka neika unamapʼ tenen ati arelamubu ning, el si ara tepung terigu ap, mitik din ning, el si kue, nena kum ning, el si ragi arye tabakuka dana kum ning ap, tonda tepung ara minyak zaitun arye likuka, tabakne ning ap, kintinibuka delilamik. Sik ayala nang aryuk, yata arin ning do nirya, ‘El ikin ara, yata wiribuka ulul do? Tonda, el nong ara, yata wiribuka cang ap, el pala ap ara, yata wiribuka ulul do?’ tenen, diribuka kiklilena ap ara, anang aryuk, apil talibuka dolamik.

³⁰ Ton ning ara, sik imam deiyok nang arye nyabikura, sik amu tam ulamik Lewi yala nang aryuk, asum-asum beren tam talak babye, lukunyan talak noutam nirya babye, Allah Yahweh el si erena ati, mot nyalamikce, “Nun ni koproba Allah, anda pia teleb ulyame. Ance melipnamsilam ning nirya ara, pia teleb nyapkiyabe,” nyabuka, mot nyalamika deice arye, Allah Yahweh ati si erebuka kilamikce, el si erelamik.

³¹ Tonda, aning atouk, asum-asum nirya Allah Yahweh el si erena ap, el arena ap ati, pil dona kumce, dikdik sen sum, Sabat sum deice arye, kam ning opnarye, aning nirya boyangalamikce, uku dongolamik talak babye, Lewi yala nang aryuk mot nyalamikce, Allah el si erelamik. Aning atonun, winiryuk wala upmalye talak babye, Allah arye nyapdeiamuk touk,” Awala, atanggal deice arye, mambul weik sum uplyopura, na arena ap, na si erebuka kina ap, na si erena ap ati, aning arenamnulume,” nyapdeibuk touk, sik Lewi yala nang aryuk, aning boyanuka arelamikce, mot nyalamik. Atalak-atalak nirya ara, sik imam deiyok nang arye, ‘Winipnamlum-winipnamlum,’ nyabuka laka nyapdeiamuk touk, sik amu tam ulamik Lewi yala nang aryuk, apil talibuka dolamik. Minop talak ulamik atonun, winiryuk nang nirya babye, sik aLewi yala nang sikcuk, apil talibuka pia dopnin balamik touk, tuba pil donyake.

³² Ura, sik Lewi yala nang aryuk, Allah Yahweh ap, ninye ap elana ati, tenda arye domik aik pum tam wilibuka kintinibikce, dobik aik pia teleb lek ning ap, tonda anyaik bai tam dana-dana ap, anyaik pum tam kalikin pil dona ati, melin pil don nang ap ati, kintinip deiamik ning nirya ara, pil talibuka dolamik touk, tuba donyake. Apil donyaka ara, imam Harun, elce deiamukba, dadeipdanin yangalamika ani, deibik nang arye, sik kayapu Lewi yala nang bukni, sik amu tam ulamik nang ati, “Winipnamlum, winipnamlum,” nyapdeiamik touk, sik Lewi yala nang arye, apil talibuka dolamik. Aning ara, Allah el si eren aik ati, minop talak kintinibuka sapi bol arye memebuka doltakne tenda aik domik ning babye, aminyan talak Salomo elda weik keil arye domuk aik babye, sik Lewi yala nang aryuk, apil talibuka dolamik touk, tuba donyake.