1 Tawarikh 22 - Eipomek

Allah Yahweh el aik dopnamika ati, kintinilamik yupu

¹ Atalak aryuk ninye deiyoknye Raja Daud birye, “Nun ni koproba el siuk erenyapnye bira, Allah Yahweh ulule. Asukumuk, el si erena ap, el arena ap ati aik dopnamabe. Tonda, nun Israel yala nang arye, ‘Allah ara nun malye unyap ning namin kipdeiplirye, kum kipdeipnamsilʼ tenen, keil pala boyanuka taplakuka yangapdeibibirye, mesba dopnamabe. Dobibyopura, aning deice uku sekibirye,sapi ato ning obuka uku dongobibiba, uku dipnamla deice arye Allah ati arenamabe,” nyabuk.

² Ati ara, ninye deiyoknye Raja Daud birye, “Sik yuk mutuku nang, ninye asik nang ululum bukni, Israel mutuku noutam umunye nang ara, bulupnulume,” nyabuk. Nyabukopura, “Pil donamlume,” nyabuka, pil arebuk. Winibuka pil dibukce, ton nang ara, ‘Gat ning besi arye, urasin teleb keil sekikceba, urasin pia teleb uplyopura, Allah Yahweh el si eren aik dopnamakʼ tenen, yuk nang ton wipdeibuk.

³ Nyabukopura, Raja Daud birye Allah Yahweh el aik dona ati, adiparyuk kat ning el si besi weik tonun kintinip deibuk. Aning ara, ‘Anyaik yo talina ati, el si paku ap, tonda bublan kukuna ati, bublan dana tam talina ati, el si engsel ap, aning nirya ara, pia weik tonun kintinip deipnamakʼ tenen, besi ning deibuk. Tonda, el adiparyuk yuk yala kat ning el si tembaga, pia weik tonun kintinip deibikba, ninye nirya arye el ikin weik ati kum nukmanto ubik.

⁴ Tonda, sik pera mutuku, ara eitam Tirus mutuku nang ap, Sidon mutuku nang ap arye, urasin teleb kat yo el si ara, cemara yo pia weik tonun boyanuka Daud dam boyanamik. Aning ati, Daud birye, cemara yo deiyok kum nukmanto ubuka, kintinip deibuk.

⁵ Raja Daud tenebukce winibuk ning deiyok ara ani. ‘Kume, Allah Yahweh el si eren aik dona ati patapmalye ning nirya ara, na adiparyuk kintinip deipnamne,’ tenebuk. Utenebukce, nyabuk. “Aning kintinip deipnamana deiyok ara, ani. Na mi Salomo elda, winiryuknye ulula ati, anyaik atonun ning kanam kum dolamuka anya arye, el pil dona ati ara, mitik weik tonun kum tenilula atia. Aminyan talak Allah Yahweh el aik aminyan dopnamle ning ara, urasin pia teleb-teleb upnamle. Winipliba, weik mutuku sirya, im sirya nirya, unyak nang nirya eibicopura, ‘Se, anyaik ara urasin pia teleb ulula anya arye, yuk mutuku noutam ara, anyaik atonun ton pia kum ulule. Anyaik asukum ara ani, aning uka tenenamake. Ati, na Raja Daud kum dipnamnye talak aryuk aik don ning nirya ara, pia teleb ninguk kintinip deipnamne,” nyabuk. Nyabuk touk, Daud min kum dibuk talak nirya ara, anyaik dona ati pia teleb ning kintinip deiamuk.

⁶ Ura, Raja Daud elce deiamuknye Salomo biti, yukubuk. Yukubukce, “Nun Israel nang melilul Allah ati, an Salomo birye adiparyuk Allah Yahweh el si erena ap, si erebuka kina ap ati aik dopnamlume,” nyapdeibuk.

⁷ Nyabukopura, ayupu ton nyabuk. Na mio, min talak ara, na tenepsirye, ‘Na ni koproba Allah Yahweh el si erenun Allah ati, el si eren aik pia teleb ning dopnamne. Aning arye el si ati weik tonun si erebuka kinamne,’ tenelamsirye kintinip deipse.

⁸ Kintinip deipse bukni, Allah Yahweh arye nati nyapnuk yupu ara ani. ‘An Daud bira, ninye olbana deiyoknye keplumce, yin talina mikip weiknye ulamluma anya arye, ninye pia weik tonun akunum oplume. Yuk mutuku nang ati ninye mal olbana uk ulamlume. Na dinak arye ninye weik oplumba, sik ining weik balamukba el lilamse. Ati ara, ance na si eren ap, kina aik ap ara, pia kum dopnutume,’ nyamnuk.

⁹ Bukni, pia dipkoprob winipnamkin ning ara, ani. Ance sal deipnamlame. Anye bira, pia namin arye dakeiam asa unanye unamle. Elda yuk nang ap yu upliba kum olanamake. Tonda, na Allah arye elti, pia melipniba, elti, mal olan nang ara, dana-dana tam mutuku nang ara, el dam kum olyanganamake. Aning wininmale ning deiyok ara, el si Salomo nyanamake. Tonda, na Allah arye arepnyeba, an mi Salomo birye, deiyok kibuka Israel nang talipnamle talak noutam nirya ara, elcuk yupu nyalamliba unamake. Tonda, na Allah arye arepnyeba, dana-dana tam unyak nang ap, Israel nang ap, mal olana kumce, namin arye teleb kibuka neika unamake. Salomo birye talibuka yupu nyapnamle talak nirya ara, olana kumce, telebuk unamake.

¹⁰ Ati, ance deipnamlamnye Salomo, elcuk na si erena ati, pia teleb aik dopnamnile. Anye Salomo biryuk, na mi koproba atonun unamnile. Na Allah ara, el li koproba atonun unamne. Winipnirye, Salomo elce deiyok kibuka, Israel nang taliplirye, el yupu nyapnamle talak ara, narye el mikip kina deiyok ning, el deice deipniba, elce deiplyeura, dadeipdanin banamak nang noutam arye, el tam nang, ‘Naʼ tenen, nang, sik Israel ninye ara, pia ati talikirye, ninye deiyok kibuka Raja nang unamake. Elce deipliba, sik dadeipdanin banamak Israel nang deice uk pia ati, na mikip sik deice deinamne. Allah arye minop talak ayupu nyapdeipnuke.” Daud birye el mi Salomo biti nyabuk.

¹¹ Raja Daud birye, ayupu nyabukopura, ton dukdongobuka Salomo biti nyabuk. “Ati wini talak ara na mi Salomo, na patapniliba, anti Allah moronamkin ning ara ani. Ara, wini talak arye dipdongobuka dounamlam talak ara, Allah Yahweh el ap neika urumunce pil donamlam talak ara, elce melipkiliba, pia unamrume. Winipkilyopura, Allah Yahweh arye melipkiliba, ance an ni koproba Allah Yahweh, el si eren aik teleb kibuka donamlame. Ara, ‘Allah elcuk, nyalin yupu deice arye nyapdeiamuk touk dopminyeba, anyaik ara dipkoprob unamleʼ tenen, moronamne.

¹² Tonda, an ni koproba Allah Yahweh, elce anti, kel weik kina deiyok ning ap, tonda ‘Anye una teleb ning ap, tonda aning ara malye un ning, ani, teleb un ning ani tenen bikilina deiyok ning ap nirya ara, an deice deipkiliba, sik Israel yala nang unyak mutuku ap, Israel yala nang nirya ap talibuka umince, yupu nyanamlam talak nirya ara, Allah el yupu uk moubuka talipmince, aninguk winipnin banamlame. Ara, ance el si erelyam Allah, Yahweh arye, ‘Aning winipnamlum, aning ara pia kum winipnamlume,’ nyapdeiamsuk yupu uk, ‘Ance ayupu moubuka talipmince, unamlamʼ tenen, narye nyapkine.

¹³ Allah Yahweh arye, ‘Aning ara wininamlume. Aning ara pia kum wininamlume nyapdeibuk yupu ap, ‘Teleb una ara ani, malye un ning ara ani,’ nyapdeibukce, ‘Wininamlume-wininamlume,’ nyapdeibuk yupu nirya ap ati, pia moubuka tenepminyak arye, aninguk winipminyopura, an winipnamlam ning nirya ara, teleb kibuka nong upnamle. Ayupu nirya ara, Allah Yahweh arye Musa biti, ‘Sik Israel nang wininamak ning ara, ‘Aning ara wininamake, aning ara pia kum wininamakeʼ nyapdeibuk yupu ati nyapkine. Allah arye anyapdeiamuk yupu moubuka tenepminyopura, an ilil pia kum unamkile. Mikip weik unamlame. Tonda, yata ikin ning do nirya, ance ilil tenena ap, ‘Seʼ tenena ap ara, pia kum unamkile. Mikip kipmince, teleb kibuka pil donamlame. Ilil pia kum unamkile.

¹⁴ Allah Yahweh el aik dona ap, anyaik noutam delinamlum ning ap ati ara, ikin upnuka babye, na Daud birye pia dipkoprob uk deibuka, teleb ning weik kintinip deipse. Ara, emas el ikin ara, yupa pia weik, tiga ribu empat ratus ton (3.4000) bulubuka deiamse. Tonda, dekna weik kat ning el si perak, el ikin ara yupa pia weik, tiga puluh empat ribu (34.000) ton akunum kintinip deiamse. Ton yuk kat ning ara, perunggu ap, besi ap ara, aning ikin ara yupa pia weik, nukmanto kum weik tonun kintinip deiamse. Tonda, pia urasin teleb kat yo ap, urasin teleb keil ap nirya ara, narye akunum weik tonun kintinip deiamse. Bukni, ance ton ap tabakuka deilinamlame. Aning nirya ara, Allah el si eren aik dona ati, kintinip deipnalame.

¹⁵ Tonda, anyaik pil dona ati kel weik nang ara, pia weik unyake. Ara, keil urasin teleb una ati, besi arye keil sekna kel nang ap, tonda keil aik dona kel nang ap, yo deice deibuka aik dona kel weik nang ap, tonda yuk urasin teleb ning kintinibuka delina kel weik nang ap, apil yuk-yuk ning nirya ara, kel weik nang unyake.

¹⁶ Tonda, apil-apil nirya kel weik kiamik nang arye, dekna weik kat ning emas ap, perak ap, tembaga ap, tonda kat ning el si besi ap, aning nirya deice arye urasin pia teleb ning kintinibuka deipmanto kel weik nang ara, pia kum nukmanto weike akunum aunyake. Ati ara, Allah el si eren aik pil dona ara, minopce pil deiyok koubuka donamlume. Apil donamlum talak nirya ara, Allah Yahweh elcuk melipkilirye, neika unamlume. Raja Daud birye, el mi Solomo biti nyabuk.

¹⁷ Nyabukopura, ninye deiyoknye Raja Daud, elce Israel mutuku noutam talibuka ulamik ninye deiyok nang nirya ati, ‘Na mi Salomo melinamlume,’ nyapdeibukba, sik nirya arye Salomo biti melibuka pil dolamik.

¹⁸ Tonda, anyaik pil deiyok koubuka dopnamik talak ara, Daud birye sik Israel yala nang nirya ati nyabuk.” Dipkoprob nyapsine. Anggun ni koproba Allah ati, anggunce el si erelulum Allah Yahweh ara, anggun Israel nang ati akunum pia melisulule. Allah arye mikip areyamnuka deice arye, narye deiyok koubuka, nun ap dana-dana tam unyak nang ap, nun mal olan nang nirya ara, akunum olbinamupa deice arye, anang yuk-yuk ning nirya akunum malye kibuka sirya dakupu. Ati wini talak ara, sik ap, yuk yala nang nirya ap, olana kumce, teleb ubuka namin aryuk dakeiam asa unamlume. Allah el taruk deice arye, amutuku noutam nirya ara, neika kipdeipsukce, akunum teleb kipdeibuka ulule. Tonda, amutuku nirya ap, amutuku noutam ulamik nang nirya ap ara, Allah Yahweh ap, elce wipdeiamsuk Israel nang nirya ara, anggun amu tam kipdeibuk.

¹⁹ Ati wini talak ara, anggun nong ap, anggun kanye talima ap nirya arye, Allah Yahweh nun Israel nang melisulul Allah ati, pia pi dobuka, pribuka umunce, ‘Allah el yupu uk moubuka talipnamabe. Elce tenepsilye ninguk wininamabeʼ tenen, Allah damuk unamlume. Anggunce si erelulum Allah ati, ena uk unamlume. Winibuka umunyopura, adiparyuk deiyok koubuka, pia teleb lek sukum, Allah Yahweh el si eren aik donamlume. Winipmunyopura, minop talak Allah Yahweh arye, ‘Aning ara wininamlume, aning ara pia kum wininamlume nyapdeiamsukce, ayupu sekuka arebukba, Peti Perjanjian marikna pum tam deibik ning ap, tonda, el si eren aik pum tam pil don ning, pia teleb lek ning nirya ap ara, sik imam nang arye aning nirya boyanuka, Allah Yahweh el si eren aik noutam wekelbikirye, dipnamake. Anyasik dopnamluma ara, nun ni koproba Allah Yahweh, el si erena ati, dopnamlume. Raja Daud birye, sik Israel yala nang nirya ap, sik deiyok-deiyok nang ap ati, nyabuk.