1 Tawarikh 21 - Eipomek

Daud birye, ‘Ninye si nukuka seklulume,’ nyabuk yupu

¹ Isa mer nirya, sik weik deiyoknye, Isa Mutuku Dongonye birye, ‘Sik Israel yala nang nirya ara, ikin ning weik sik nong deice deipnirye, kum kipdeipnamne,’ tenebuk. Utenebukce, Raja Daud el kanye pum tam pil dobuka deice, Daud birye, ‘Israel yala nang kan-kan arye, yata wiribuka yin talen nang unyak do?’ tenebukce, ‘Israel yala nang nirya ati, sik si nukuka seknamabe,’ tenebuk.

² Utenebuka ati, Raja Daud birye yin nang nirya, sik weik deiyoknye Yoab ap, el amu tam ulamik yin talen nang, yupa yuk-yuk ati deiyok kibuka ulamik nang ap ati, nyabuk. “Wini talak ara, anggun nirya arye Israel yala nang unyakak nirya ara, dabu tam mutuku noutam ap, tonda anyasik Bersyeba mutuku arye dipdongobuka, iknapye tam ap nuknin banmamunya ani, eitam mutuku noutam ap, Dan yala nang unyak mutuku noutam nirya ara, sik Israel nang nukuka sik si seknamlume. Awinipmunya deice arye, ‘Israel mutuku noutam unyak nang nirya ara, yupa winibuka unyakeʼ tenen, na biknamne,” Daud birye nyabuk.

³ Nyabuk bukni, Yoab birye Raja Daud biti nyabuk, “Teleb ning ara atalak, ‘Allah Yahweh arye, teleb kipdeipsutumce, nun Israel nang ara ton ap tabaksutuba, nun aninye ara pia weik uptibye,’ tenepne. Na deiyoknye Raja, sik Israel nang nirya ara, ance taleblum nang kum unyaka ati, ‘Nuknune,’ teneplam do? Kume na nio, nun nirya ara an amu tam ubirye, an piluk donamabe. Yata deiyok ati, ance nunti, ‘Israel nang si seknamabe tenepmalamce, yata barye unyak do, tenen, biknamane,’ tenepmalamce nyapmasilam do? Se na nio, ance anyapmasilam ning winina ara, malye upnamaba ati, doyanamle talak ara, nun deice uk ikin ning yalyeba, dopropnamabe,” Yoab birye nyabuk.

⁴ Yoab arye, asukum yabuk bukni, Raja Daud birye ayupu kum kekebuka ati, elce, “Winipnamlume,” nyapdeipmuk touk, Yoab birye anyapdeipmok touk ubukabukce, el ap, el amu tam deiyok nang ap, sik Israel yala nang ulamik mutuku biyikce, sik amutuku-amutuku ulamik nang nirya, nukuka bikna ati, si sekik. Sik si sekikopura, tamubuka Yerusalem mutuku uk yayik.

⁵ Winibikopura, Yoab birye Raja Daud dam yayukce, sik Israel tam ulamik nang noutam arye, yin talibuka ninye olbinmanto du nang yupa ara, satu milyar, seratus ribu (1.100.000) nang kibik. Tonda, sik Yehuda tam ulamik nang noutam arye, yin talipmanto nang yupa ara, empat ratus tujuhpuluh ribu (470.000) nang kibik. Aning nirya ara, Raja Daud el dam yanuka laka nyabuk.

⁶ Bukni, Israel yala nang si sekenmek talak ara, Lewi yala ulamik nang ap, Benyamin yala ulamik nang ap, sikda kum nukik. Ayala bitinye kum nukuka deiyok ara, Yoab birye, ayala nang unyak mutuku noutam ara, Raja Daud birye, ‘Si seknalame,’ nyamnuk ning ara, narye sikda nukuka si kum seknune. Aning ara, pia malye un ning anya arye, aning ara na pia like,’ tenebukce, anang si nukuka kum sekuk.

⁷ Bukni, Daud birye,’ Anang nukuka, sik si seknalame,’ nyapdeibukba, apil dobik ning ara, Allah arye kanye kum deibuk anya arye, Allah elce sik Israel nang nirya ati wenebukce, ikin ning sik nong deice deibuk.

⁸ Wenebukce, ikin ning arebukopura, Raja Daud birye Allah ati morobukce nyabuk, “Se, na ni Allah, aninye nukmana deice arye, dipkoprob malye weik ning winipmane. Nara walwalnye binya arye, narye malye winipmane. Na ni, an dam malye winipmana ati, na wenena ati talye luparabuka opnutum bukni, na malye upmase ning ara, ance bataknutumce, aning ati namin kipnamnilam tenen, moropkine,” nyabuka morobuk.

⁹ Nyabuka morobukopura, Allah arye Raja Daud dam yupu nyalina ati ara, nabi Gad, el dam yanuka, yupu nyapdeibuk.

¹⁰ Allah arye anabi Gad biti nyapdeibuk yupu ara ani. “Anda Raja Daud el dam bimince, elti, nyapnulyame. ‘Daud, na Allah arye deiyok winilye ning arepnamkinʼ tenen, kintinip deipmane. Ati arepnamakin ning ara, Daud ance, ‘Na deice ara, aninguk arepniliba, dopropnamne,’ nyaplye ninguk arepnamne ati, ance binuka nyapminyeura, ‘Aninguk dopropnamle.’ Tonda anyapnamle ninguk, yanuka nyapnunilyame,” Allah arye nabi Gad biti nyapdeibukba, laka nyalbiyuk.

¹¹ Nabi Gad, adiparyuk Daud dam yayukce, Allah arye nyapdeipmok yupu ara, Raja Daud el dam yanuka nyabuk. Ayupu ara ani. “Daud bira, Allah Yahweh arye an dam yanamakil ikin ning ara, deiyok winilye aupmal ara, yata ning yakiliba deiyok tonok ning doropnamlam do?” nyabuka asipdeyuk.

¹² Tonda, ayupu nyabuk. “Ura winipmanto ara, aikin ning winilye kintinip deipmal ning noutam ara, tonok ninguk wipnulyame. Amutuku noutam, Allah arye winipnamala ati, kintinipmal ning ara ani. Tonok ning ara, ‘Keting tamun winilye noutam ara, kwaning weik patan li ton arepnamne,’ tenepmale. Bitinye ning ara, na deiyoknye Raja anti, wala winilye noutam ara an mal olan nang arye, ‘Israel nang opnuyapʼ tenen, bobana diamuk upkikirye, an tam nang weik tonun opnamake,’ tenepmale. Allah arye aning ton kintinipnamale. Tonda, winilye ning ara ani. Ara, Amutuku noutam, kanye imun weik uk dina deiyok ning, like winilye deice arepnyeura, dibina deiyok ning talin malaikat arye, amutuku noutam nirya bobaliba, Israel nang opliba, weik tonun ton dipnamakʼ tenen, kintinipnamale. Ati, na deiyoknye Raja, ance, ‘Na dam aninguk yaniliba, dopropnamane,’ tenepminye ning ara, ance, ‘Aninguk dopropnamne,’ nyapminyopura, narye Allah el dam adiparyuk binuka, laka nyapnune,” nyabuka, nabi Gad birye yanuka laka nyabuk.

¹³ Nyabukura, Raja Daud elce tamubuka nyabuk. “Se, aning nyapdeipmanilama ati ara, na pia kanye imun upnile. Bukni, na kanye ara, tukwak ninye arye ikin ning dobuka, na deice delina ara, na pia like. Ati, pia teleb ning ara, Allah Yahweh, elcuk na deice ikin ning deipnetupa, doproptinye. Ara, na ni koproba Allah Yahweh, nun tukwak nang ati, weik tonun arye bico tenesululnye ulula ati nyapne,” Daud birye, nabi Gad biti nyabuk.

¹⁴ Nyabukopura, Allah Yahweh arye kanye imun weik uk deiyok ning arebuk. Ara, tonye talipmana, anye akunum dipnopura, yuknye dinmana, anye babye dipnopura, ton yuknye ton uk talibuka, dakdongopdanin balamika ani, ninye weik dibik. Allah arye ninye dibina deiyok uk, kanye imun weik ning arebukba, Israel nang nirya weik uk dinauk ulamuk. Auk dilamuk talak noutam arye, diplamik nang yupa ara, tujuhpuluh ribu (70.000) nang dibik.

¹⁵ Tonda, Allah arye, ‘Yerusalem mutuku nang obuka sirya daknamne,’ tenebukce, el pil amu tam donanye, ninye opmanto malaikat wipdeibukba, Yerusalem mutuku noutam ulamik nang olyangana ati yayuk. Bukni, amalaikat yanuka kintinip deibuk talak noutam arye, gandum duk daklamikce, duk teleb ning wina ati pil dolamikak ara, Yebus mutukunye el si Arauna, el ulamukak arye, ‘Ninye opnunʼ tenen, malaikat arye akunum kintinip deibuk. Winibuk talak ara, Allah Yahweh arye, tuba ton ap kintinip deibukce,’ Se, Yerusalem mutuku unyak nang nirya obuka sirya daknuneʼ tenepmana ara, bataknirye kum winipnune,’ tenebuk. Utenebukce, el pil don malaikat ati, “Winina meme, bataknulyame. Asukumuk deipnulyame,” nyabuka yupu sekuk. ‘Amutuku noutam nirya ara, akunum kum kipdeipnamne,’ tenepmok kanye nirya ara, adiparyuk batakuk. Winibukce, yupu nyapdeibukba, amalaikat kekebukce, batakuk. Ninye ton ap kum oplobuk.

¹⁶ Atalak aryuk, ninye deiyoknye Raja Daud birye, dileyukba, ‘Israel yala nang, weik asik domik ning Yerusalem mutuku noutam ulamik nang nirya opnunʼ tenen, yayuk malaikat ara, tukwak kiapna, im deice kiapna kibuka, lakuka yangayukce, ninye ona ati yu parang ya boyangayukba eibuk. Daud birye eibukopura, Daud birye amutuku noutam ulamik nang ati, yuk-yuk deiyok kibuka talilamik nang, sikti, nyabukba, sik nirya arye malye karung arye wiamik baju ongobukabikce, “Se, nun malye unyap ning ati opnasila atia,” nyabuka, malye kanye bobikce, tuku deice pubuka mabik.

¹⁷ Winibikopura, Daud bira Allah morona deice arye, ayupu nyabuk. “Se, na ni Allah Yahweh, malye winipman ning ara, natia. Narye Israel mutuku unyak nang nirya ati, ‘Sik si sekmunyeba na ton biknamne,” nyapsiba, pil dobike. Sik amutuku unyak nang arye aning ara kum winibik. Tonda, sikce malye kum ubike. Narye malye una deiyoknye unune. Ati, na ni koproba Allah, an siuk erekunune. Anda Allah Yahweh, ance na apu yapu, sikce deiamik nang ap, na ap, na mapu silip ap, nun damuk ikin ning deipsimince wenepsilyame. Tonda, An mapu amutuku noutam unyak nang, sik deice ara, ikin weik ning, kanye imun uk dinmal ning ara, bataknulyame na nio,” nyabuka morobuk.

Allah arye nyapdeibukba, Raja Daud birye, Allah arena ati, mesba kintinip deibuk yupu

¹⁸ Aminyan talak ara, Allah el pil donanye malaikat arye, ninye deiyoknye Raja Daud nyalbana ati, nyabuk. “An nabi Gad, adiparyuk Raja Daud el dam binuka ayupu nyapnulyame. Ara ani. ‘Raja Daud anda adiparyuk tonoknye el si Aruana, el gandum duk teikina ap, duk teleb ning wina ap ati, pil dolulak bimince, Allah el si erena ap, el arena ap ati, pala keil dobuka yangapdeipminyak arye, mesba memepdeipnulyame,’ nyabuka laka nyapnulyame. Allah arye el malaikat ati, “Winipnulame,” nyabuk.

¹⁹ Nyabukba, Allah el pil donanye malaikat arye, nabi Gad dam binuka, ayupu nyapdeibukba, el Gad birye Raja Daud dam yanuka laka nyabukba, ayupu kekebukce adiparyuk biyuk. Ara nabi Gad birye nyapdeipmok touk, Daud bira, aninguk winibuk.

²⁰ Atalak ara, anye el si Aruana ap, el mapu dumbarye nang ap, sik gandum duk teikin pil donak, pil donmeka ani, Allah el malaikat sik dam yayukopura, Aruana eibuk. Eibukura, elda pil tuba donmok. Bukni, el mapu dumbarye arye eibikce, ‘Se, Malaikat arye nun opsilyakʼ tenen, ilil ubukba, sikce bai sakuka, bikbik abuka duknulbiyik.

²¹ Atalak ara, anye Aruana birye dinmokba, ninye deiyoknye Raja Daud yanganmoka ani, Arauna el dam banmokak eibuk. Eibukopura, ‘Se na deiyoknye Raja, na dam yanganmalaʼ tenen, el adiparyuk Raja Daud dam tuku deice binuka mabuk.

²² Winibukopura, Raja Daud birye Aruana biti morobukce nyabuk. “An gandum duk teikin ap, teleb ning wina ap ati pil dolyamak ara, narye ‘Deknamanʼ tenen, yanmane. Ati asukum tuku dekna ati ara, yata barye moropnamnilam do? Ance tenepminye touk, aning nirya arepnukine,” nyabuka morobuk. “Atuku deknirye, adiparyuk Allah Yahweh el si erebuka kina ap, el arena ap ati, teleb ning arebikceba, uku dongonak memepdeipnamne. Winipniba, pia imun kanye bon uk dilulce, Israel nang yupa weik dibinmaka ara, adiparyuk tunim apnamle,” nyabuk.

²³ Nyabukba, Arauna birye Daud biti ayupu nyabuk. “Kume na ni Rajao, narye awinibuka batakanun ning ara ance, Aning ara telebe,’ tenepminye ning ara, talye luparabuka dopropminyak arye, Allah ati arepnulyame. Tonda, ance Allah arena ati obuka uku dongona ati, na sapi basam ara, asukum dam wininmaka ara, ton dobuka arepnamkine. Tonda, asapi obuka uku dongona ati, uku ara gandum duk teleb ning wina ati unirye, kintinip deipse yo ap, yo lakase ap, aning aryuk arepkiniba, uku dongopnulyame. Tonda, Allah arena ati, gandum duk ton asukum wipdeipman ning ara, dopropminyak arye, Allah ati amesba deice arepnulyame. Tonda, awinipnuminye ning nirya ati, na deiyoknye ance yo bok kum deknamlyame. Aning-aning nirya ara, dekna kumce, na kanye deibuka talye ati arepkine,” nyabuk.

²⁴ Arauna birye Daud biti ayupu nyabuk bukni, ninye deiyoknye Raja Daud elce tamubuka nyabuk. “Kume, ance aning ara winina meme. Aning-aning nirya ara, dekna kumce talye ati kum arepnunilyame. An ning nirya ara, yuk nang arye yo bok weik tonun dektinga atonun, narye aning atonun arepkinirye deknamakine. Narye Allah Yahweh el si erebuka kina ap, arena ap ati ara, an ninguk talye luparabuka dopropnirye, Allah ati kum areptinye. Ati, talye kum arepnunilyame. Narye anti dekna kum buk ance talye aryuk, Kanye deibuka arepnutum ning dobuka, na ni koproba Allah Yahweh ati kum arepmanto,” Daud birye Arauna biti nyabuk.

²⁵ Raja Daud birye nyabuka ati ara, elce anye Arauna biti, el gandum duk teikina ap, wina ap ati, pil dolamukak nirya dolona ati, dekna weik kat ning, el si emas ara, yupa pia weik enam ratus (600) dobuka arebuka deice arye atuku dekuk. Arebuk emas ikin ara, tujuh kilo (7 kg) ubuka anya arye, el dekna ara pia weike.

²⁶ Daud birye atuku ap, aning nirya ap, akunum dekukopura, Allah Yahweh el si erebuka kina ap, el arena ap ati, weik pala keil taplakuka yangapdeibukce, domba totoa obuka uku dongolyanganak, el si mesba kintinip deibuk. Kintinip deibukopura, asapi basam obukabukce, ‘Allah arye na malye un ning kilipnamnilʼ tenen, uku sekukce, asapi basam sekdoba ara, uku dongobukura, uku arye dibuk. Auku ara, Daud elcuk kum sekuk. Daud birye, Allah ati morobukopura, Allah im deice arye uku buk dopdeibukba, amesba deice kintinip deipmok yo ap, asapi kalimna ap, uku arye yanuka, dibuka sirya dakuk. Winibuka dibuk. Winibukce agandum duk ara, Allah ati arebuk. Ara, ‘Allah ap, na ap, teleb kibuka epdanimirye, neika unanamʼ tenen, aning ton arebuk.

²⁷ Aning-aning nirya akunum arebukopura, Allah Yahweh arye, el pil don malaikat ati nyabuk. “Anda, an dobuka kintinip deipmalam yu parang ya, ninye ona ati yu ya tuba tamubuka, el lin ning lipdongopnulyame,” nyabuk. Nyabukba, Allah arye nyabuk touk, aninye on ya talipmok ning ara, tamubuka el lin ning pum tam lipdongobuk. Ara, ‘El parang ya el linak lipdongobukopura, kanye imun weik uk arepmokba, Israel nang weik tonun dibinmak ning ara, aning nirya tunim apnamleʼ tenen, ayupu nyabuk.

²⁸ Atalak ara, Raja Daud birye aning nirya eibukce bikuk. Ara, ‘Kume, Yebus yalanye el si Arauna, el gandum duk teleb ning wina ati kintinip deibuk tuku, asukumuk unman talak noutam arye, na ni koproba Allah Yahweh arye, na moropmanu ning akunum arepmanile,’ tenebukce bikuk. Ati ara, Allah el si erebuka kina ap, el arena ap ati, Daud birye aning-aning nirya akunum kanye deibuka sirya arebuk.

²⁹ Ura, sik Israel nang ara, weik pata mutuku talye balamik talak ara, Musa birye, “Winibuka kintinipnamlume, Allah el si erena ati, cang sapi bol arye doltakne tenda aik dopmunce, deipnamlume,” nyapdeiamuk touk, aning akunum awamuk. Daud birye apil dobuk talak ara, Allah el si eren aik, adoltakne tenda aik ara, yuk mutuku kon deice deiamikba dauamuk. Aning atonun, Allah el si erebuka kina ap, arena ap ati, keil pala yangabuka deiamik ning el si mesba ara, aning babye Gibeon mutuku noutam bukni, tonok mutuku kon deice uamuk.

³⁰ Amesba ap, Allah el si erena ati doltakne tenda aik kintinip deiamik ning ara, Gibeon mutuku kon deice akunum awamuk bukni, Daud bira, ‘Kume, aning ara pia lek ning anya arye, narye aning dam dipkoprob kum bitinye,’ tenebukce, ilil weik ulamuk. Deiyok ara, ‘Aning dam talye luparabuka binyopura, Allah el pil don malaikat bolye yu parang ya arye, opnilyakʼ tenen, ilil weik ulamuk.