1 Tawarikh 20 - Eipomek

Raja Daud birye, Raba mutuku alupdobuka doprobuk yupu

¹ Winibuka keting tamun noutam, aning-aning palamle talak ubukura, sik ninye deiyok nang Raja-Raja nirya arye, ‘Nun olan tam nang olbinuyapʼ tenen, kintinibik. Israel mutuku noutam, ulamik talak ara, Israel yala yin nang, sik deiyoknye Yoab birye, el yin talin nang nirya ara kintinip deibukce, bobiyuk. Winibukopura, Yoab ap, el yin nang ap arye, Amon yala nang, sik ulamik tam nirya ara, adiparyuk binuka mal olbalamikce, amutuku nirya obuka, malye kibikce, sirya dakik. Winibikce, amutuku uamuk ning ap, asik nirya ap, alubuka doprobik. Tonda, Amon yala nang sik weik asik Raba, mutuku deiyok ara, ‘Anang obibirye, sik mutuku dopropnamapʼ tenen, anyasik nirya warikuka aknapdongobikce, ‘Amutuku nang yukak kum binmantoʼ tenen, anyasik dam binuka daunmek. Atalak ara, Israel nang ninye deiyoknye Raja Daud bira, Yerusalem mutuku uk tuba aunmoka anya arye, atalak ara el ap neika kum biyuk. Bukni, aminyan talak el ap, el yin talen nang ap, sik bulubukabikce, omutuku binuka, Yoab ap, el yin talen nang ap, sik ap, adiparyuk Raba mutuku noutam warikuka aknapdongobik. Winibikopura, amutuku noutam ulamik nang nirya obikce, anang nirya kum kipdeibik.

² Akunum winibikopura, ninye deiyoknye Raja Daud birye, Raba mutuku noutam uamuk ning yuk-yuk ning nirya ara, pia weik tonun yanuka doprobuk. Abona nirya dopropmok noutam ara, mambul weik ning tonok doprobuk. Ara pia teleb ning, dekna weik ning emas arye memebik ning alubuka doprobuk. Aning el si ara mahkota, sik ninye deiyoknye Raja, el kisok deice delilamikba, elcuk ongolamuk. Ati, Daud birye, ‘Amutuku nang nirya na amu tam unamakʼ tenen, Amon yala nang, sik ninye deiyoknye ongolamuk ning, mahkota ton doprobuk. Amahkota el ikin winipmanto ara, 34 kilo gram uamuk. Ara emas arye memebik bukni, anoutam ara tonok dekna weik keil, el si ara permata ton deiamik. Amahkota ara, el ikin weike, tonda el urasin pia teleb kipdeiamik ning uamukba, Daud birye doprobuk. Winibukopura, adiparyuk Raja Daud el kisok deice ongobuk. Atalak ara, Daud elce amutuku noutam uamuk teleb ning yuk-yuk ning nirya, pia weik tonun alubuka doprobuk.

³ Atonun, Raja Daud elce Raba mutuku noutam tuba kam ulamik nang ati, ikin pil dibukce, aning ara yo sekna ning, “Gergaji arye sekmunce pil dopnamlume,” nyalamukce pil aruklamuk. “Tonda, tuku palin ning, el si pikwel arye palinamlume, tonda yalila ya arye dongolamak ya, kapak arye pil donamlume,” nyabuka, ikin pil aruklamuk. Aning babye, sik Amon yala nang, yuk mutuku nang babye, Daud birye aning atonun ubukba, amutuku-amutuku nang nirya arye ikin piluk pia dolamik. Aning nirya akunum winibuka sirya dobikopura, adiparyuk Raja Daud ap, el yin talin nang ap nirya ara, sik mutuku koproba, Yerusalem mutuku noutamuk, tamubuka yayik.

Israel yala nang arye, Pilistin tam nang oplobikce, sik mutuku deice yanibik yupu

⁴ Aning nirya akunum winibikopura, ouku weik to ulamika ani, sik Israel nang ap, Pilistin nang ap ara, mutuku si Gezer mutuku noutam olalamik. Aolalamik talak ara, Husa mutukunye el si Sibkai, el nong cang pia weiknye ap, tonda el si Sipai, oplobuk. Oplobukba dibuk. Sipai bira, minop talak ulamik nang, sik nong pia cang weik nang arye deiamikba, dadeipdanin yangalamik nang arye, anye ton deiamik. Sik nirya olanmeka ani, Israel nang arye oltakana uk ubikopura, sik Pilistin yala nang nirya ara, Raja Daud el amu tamuk ulamik.

⁵ Daulamika ani, aminyan yuk talak ara, sik Israel yala nang ap, yuk mutuku ulamik Pilistin yala nang ap, tuba olanmek. Wininmek talak ara, tonoknye el si Yair, elce deiamuknye Elhanan birye, yuknye el si Lahmi oplobuk. Anye Lahmi bira, el du koprop ara, Kat mutukunye atia, pia cang weik ap, mikip weik ap ulamuknye, el si Goliat ulamuk. Ati, Elhanan birye, Kat yalanye Goliat, el weit koproba Lahmi oplobuk. Goliat bira, pia mikip weiknye binya arye, elce taleamuk ninye on tombak ara, ayukumna yo atonun, weik ning, ton ikin pia weik ning taleamuk. Winipmanto ara, ninye arye tenda el si kain lenan wilamak talak, pil donyak yo, urasin balok atonun ning uamuk.

⁶ Atonun ton, yuk talak babye, Kat mutuku noutam mal olana ton olanmek. Aolanmek mutuku noutam ara, tonoknye el nong pia cang weiknye ton aulamuk. Anye bira, minop talak dorapce, el delina ara weik cang yala nang arye deiamikba, dadeipdanin yangalamika ani, yanuka deiamiknye ulamuk. Anye, Kat mutuku noutam ulamuk. Nong pia weiknye, el yan duk ap, taruk duk ap ara, yuk-yuk nakub barye (6) uamuk. Anya arye, el taruk ap, yan ap, dana-dana nirya ara, dua puluh empat (24) uamuk.

⁷ Anye, elda pia cang weiknye, el Kat yalanye birye sik Israel nang ati nalinmok. Nalinmoka anya arye, ninye deiyoknye Raja Daud, el du koproba, el si Simea, elce deiamuknye Yonatan birye, pia cang weiknye bira oplobuk.

⁸ Ati ara, ninye deiyoknye Raja Daud ap, el amu tam yin talin nang ap arye, nong weik cang yala nang arye deiamikba, deipdanin yangalamik yala nang, Kat mutuku noutam ulamik yu nang ara, sik nirya akunum omikba diamik.