1 Tawarikh 19 - Eipomek

Daud birye, Amon mutuku nang ap, Siria mutuku nang ap, oplobuk yupu

¹ Ura winilamika ani, ouku weik akunum ubukopura, ninye deiyoknye Raja Nahas bira, Amon mutuku noutam talibuka ulamuknye dibuk. Dibukopura, el mi Hanun birye punubuka ninye deiyoknye Raja kibuk.

² Winibuka ati, Raja Daud birye nyabuk, “Min talak ara, Raja Nahas elda na kwit koproba kiamnumu. Nun bitinye ara, pia neika dukdongobuka ulamnumunye. Elda telebnye ulamukce, nati ara, telebuk tenelamnuk. Pia kum bataklamnuk. Ati ara, wini talak babye, na adiparyuk Nahas el mi Hanun bira, ‘Na kwit koproba atonun kipnirye, elti, telebuk,’ tenebuka unamne. Anye melipnirye kum bataknamne,” tenebukce nyabuk. Nyabukopura, Raja Daud birye el melin nang wipdeibukba, ‘Anye Hanun bira, el li koproba dibuka ati, elti, melinamakʼ tenen, el melina ati ninye ton wibuka dopdeibukba biyik.

³ Awibuka deipmuk nang, Amon mutuku akunum biyikopura, amutuku noutam talibuka ulamik ninye deiyok nang nirya arye, Raja Hanun biti nyabik, “Nun deiyoknye Raja Hanun, anda Raja Daud elce wipdeipmalce dopdeipmal nang ati ara, ‘Nun deiyoknye an ni koproba Nahas dipmala ati, si erebuka melilyanmanik nang,’ tenena kume,” nyabik. “Dipkoprop ara, Raja Daud el mapu wipdeipmalba, nun dam yanmak nang ara, amutuku noutam ara, yata wiribuka unyak do,’ tenen, maka melianmasiyake. Sikce, ‘Amutuku nang ara, winibuka-winibuka unyake,’ tenen, eibibirye yanuka obibirye, ‘Amutuku alubuka dopropnamapʼ tenen, maka meilyanmasiyake,” nyabik.

⁴ Nyabikura, ninye deiyoknye Raja Hanun birye, Daud wipdeipmokba yanmek nang nirya ara, tomobuk. Winibuka sik anang bam potong, ton tam nirya ara kobuka batakuk. Tonda, sik ongopmek baju der dam adiparyuk sekuka batakuk. Winibukopura, sik anang nirya ati, “Wini talak ara binulume,” nyabukba, tamubuka biyik.

⁵ Daud birye wipdeipmokba yanmek nang ara, sik mutuku tamubuka banmek talak ara, alye pia weik ubuk. Winibukba, yuk nang arye Daud dam binuka laka nyabikba, ayupu kekebukopura, el Daud birye, “Anggunda Yeriko mutuku ulamunya ani, bam potong kopsik ning ara, tamubuka tiknamsile,” nyabuk. Nyabuka ati, kekebikce, sik anang ara Yeriko mutuku biyik.

⁶ Sik Amon mutuku nang arye, awinibik ning moubuka kel kibikce utenebik. ‘Kume, nun winipmap ning ara, Raja Daud eipmalce nunti lik tenepmasile,’ tenebik. Atenibik ning ara, Raja Hanun ap, Amon yala nang ap, ‘Daud biti olbenamabe,’ tenebikce, sikce dekna weik kat ning perak, el ikin ara tiga puluh empat ribu kilo gram (34.000 kg) bulubuka deibik. Aning deiyok ara, kuda basam arye libuka, ninye olbana ati tuku deice balamle ning, el si kereta kuda perang ap, tonda kuda basam deice bukuka mal olbanyak yin talin nang ap, ‘Aning nirya deknamapʼ tenen, winibik. Aning weik tonun kel bikamik ninye mal olan nang, sik Mesapotamia tam ulamik yin nang ap, tonda Maakha mutuku ulamik yin nang ap, Zoba mutuku ulamik yin nang ap arye, yanuka melilyangana ati, mikip kin ning yanuka arebik.

⁷ Amon yala nang talibuka ulamik tekbarye ninye deiyok nang arye, tiga puluh dua ribu (32.000) kereta perang dekik. Tonda, Maakha mutuku talibuka ulamuknye biti, “Melipsilyame,” nyabikba, el yin talen nang ap boyayuk. Yayukce, Medeba mutuku dam yanuka, dolina aik el si tenda yanuka dobik. Tonda, Amon mutuku noutam ulamik yin talen nang nirya ara, sik asik dam arye bulubuka tonokak uk wekelyayik.

⁸ Awininmek ning ara, yuk nang laka nyabikba, Raja Daud kekebuk. Kekebukce, el yin deiyoknye Yoab biti, “An ap, an yin talen nang nirya ap, anggun adiparyuk nun mal olan nang ati, mal olalbinamalume,” nyabuk.

⁹ Sik Amon mutuku yin talen nang nirya ara, bulubuka yayikce, sik aweik asik wekelban ati, weik bisik bublan dam ara, Raba mutuku yayikce, kintinibuka lipsisikinmekce tikmek. Bukni, sik yuk mutuku ninye deiyok kibuka taleamik nang ati, “Anggunce nun dam yanuka melipsululume,” nyabuka, moronmek nang, sik yin talen nang nirya ara, talye bai tam kata sukumuk kintinibuka lipsisikinmekce tikmek.

¹⁰ Tikmek talak ara, Yoab birye dilamukce, el urasin tam babye, balye tam babye, el mal olan nang diamuk, yanuka langdibuka warikdongobikba eibuk. Eibukura, Yoab birye sik Israel yin talin nang noutam arye, mal olana kel bikamik nang nirya ati, wipdeibukce, Siria mutuku yin nang, sik urasin deipmek tamak kintinibuka weki.

¹¹ Tonda, Yoab birye Israel yin talin nang, yuk nang nirya ara bokukabukce, el weit koproba Abisai tam ton arebuk. Winibukba, Abisai el deiyok kouna ara, Amon mutuku yin talen nang, sik urasin deipmek tam uk kintinibuka tikik.

¹² Yoab birye el weit koproba Abisai biti nyabuk, “Winipmanto ara, narye sik Siria mutuku yin talin nang malye kina ati, kum winipmanto upnyeura, mitang upnilyopura, ance yanuka melipnamnilyame,” nyabuk. “Tonda atonun, winipmanto, na weit koproba an babye, Amon yala yin talin nang ati, kum malye kipmanto upmince, mitang kipkilyopura, narye anti, yanuka melipnamakine,” nyabuk.

¹³ Nyabukopura, ayupu ton nyabuk. “Nun yala nang ap, tonda nun ni koproba Allah Yahweh ap, el ‘Naʼ tenen mutuku noutam ulul asik ap nirya ati, ilil pia kumce, malye kibuka mikip aryuk unmabe. Ara, Allah Yahweh elce, ‘Winiptinye,’ tenepmalye touk ulule. Ati omutuku nang olbinuyabe, nyapne,” nyabuk.

¹⁴ Nyabukopura, Yoab ap, el yin talin nang ap, sik adiparyuk, ‘Siria mutuku yin talin nang opnuyapʼ tenen, sik dam olbiyik. Winibikba, Siria mutuku yin talin nang nirya ara, ilil ubukba, bai sakuka bikbik abuk bindobik.

¹⁵ Atalak aryuk, sik Amon mutuku yin nang babye dinmekba, Siria mutuku yin talen nang ara, ilil ati bai sakuka bikbik abuka banmekak eibik. Ebikopura, sik Amon mutuku yin nang babye, Abisai el dam arye, bai sakuka bikbik abuka adiparyuk tamubuka, weik asik dolamik mutuku noutamuk biyik. Winibikopura, sik nirya arye Amon mutuku weik asik noutam dungnubik. Winibikopura, Yoab el ap, el yin talin nang nirya ara tuba tamubuka, Yerusalem mutuku biyik.

¹⁶ Siria mutuku nang ara, ‘Sik Israel yala ninye arye obuka sirya daksikcakʼ tenen, ilil ubukba, sik mutuku koproba tamubuka biyik. Biyikce, tamubuka utenebik. ‘Kume, nunda akunum obuka sirya dakmanto upmasiyaka anya arye, yuk mutuku nang ton melipsitingba, nunce Israel nang malye kiptibye,’ tenebik. Winibuka tenibikopura, sik yala nang, Siria mutuku yala yin talen nang bukni, pera mutuku Efrat mek duman, bukni keting palanyangan tam ulamik nang ati, ‘Yanuka melipsululume,’ nyabuka morobik. Tonda, ninye deiyok kibuka, Siria tam taleamuknye, Raja Hadadezer, el yin deiyok nang, sik deiyoknye el si ara Sofak, elcuk deiyok kibuka ayin nang boyayuk.

¹⁷ Efrat mutuku, eitam ulamik nang ap, sik Siria tam nang ap, tuba ton ap bulubuka kintinibik talak ara, ninye deiyoknye Raja Daud birye ayupu kekebuk. Ayupu akunum kekebukopura, Raja Daud adiparyuk el yin talen nang Israel mutuku noutam ulamik nang nirya ara, bulupdeibukba, sik adiparyuk Yordan mek koubuka otam, keting palanyangan tam olbiyik. Abiyik mutuku ara, sik Siria mutuku yin nang babye, ‘Raja Daud ap, el yin nang ap, opdanamapʼ tenen, sik lelebuka tikmekce, kintininmek.

¹⁸ Opdanin yanganmek bukni, Israel yala nang sik yin talen nang arye, Siria mutuku yin talen nang weik tonun binuka obik. Daud ap, el yin nang ap, sikce, Siria mutuku yin talen nang taleamik ning ara, tapu kirikdongobuka lipdopniba, tuku deice ban ning, el si ara Kereta perang, aning deice tikuka ban nang ara, tujuh ribu (7.000) nang nirya obik. Tonda, sik yan aryuk banmek yin talin nang ton, empat puluh ribu (40.000) nang ton obik. Aonmek sukum aryuk, Siria tam nang, sik yin talina deiyoknye Sofak babye, Israel nang sik mal arye dopmikba, el deice yaribuka obika anya arye, aolanmek sukum aryuk dibuk.

¹⁹ Atalak ara, Hadadezer birye, weik ninye kibuka taleamukba, el amu tam ninye deiyok kibuka ulamik nang ap, el tam yin talin nang nirya ap ara, Israel yala nang yin nang aryuk obuka sirya dakik. Winibikura, sik Siria tam nang nirya arye akunum kekebuka bikik. Ati ara, sik Hadadezer amu tam ulamik nang ap, deiyok-deiyok nang ap, sik nirya yayikce, Israel nang ati, “Angguncuk talipsumunyeba, nun ap, anggun ap epdanuka, nunda anggun amu tam talye teleb ubuka neika unamabe,” nyabuka, yanuka morobikopura, amutuku ulamik nang nirya ara, Israel nang aryuk talibik. Talibika ati ara, Siria mutuku nang arye ton ap malye kibuka, sik Amon mutuku nang ati tuba ton ap pia kum melilamik. Sik yuk-yuk kipdobikce ulamik.