1 Tawarikh 18 - Eipomek

Daud birye, yuk mutuku nang nirya obuka, sirye dakuk ning ati, sekik yupu

¹ Yuk talak kunum ubukopura, ninye deiyoknye Raja Daud birye, sik Pilistin tam nang nirya obuka sirya dakuk. Winibukopura, adiparyuk weik asik el si ara, Gad mutuku ap, amutuku dana-dana tam ulamik mitik tonun ninye asik nirya ap ara, eluk doprobukopura, sik Pilistin nang tuba kam ulamik nang ara, el amu tamuk ulamik.

² Aning atonun, ninye deiyoknye Raja Daud, elcuk Moab tam nang babye, obuka sirya dakuk. Winibukopura, sik Moab yala nang nirya ara, el amu tam kanupdongobuka ulamik. Winilamikce, sik tuba kam ulamik Moab yala nang ara, Raja Daud amu tam ulamikce, el si erebuka kina ati, ‘Amutuku noutam tuba telebuk unamabeʼ tenena ati, yo bok ap, teleb arin ning ap ara, Daud el dam arelyangalamik.

³ Atonun tonda, ninye deiyoknye Raja Daud, elce eitam pera mutuku talibuka, Raja Hadadezer ap, el yin talin nang nirya ap, nirya oplobuk. Anye Raja Hadadezer bira, el taleamuk mutuku si ara Zoba. Amutuku ara, weik asik domikak, amutuku si ara, Hamat mutuku, aning ara, Siria tam noutamak uamuk. Daud birye, anye oplobuk talak ara, Raja Hadadezer bira, ‘Itam pera mutuku, Efrata mek kin arye, na mikip arye alubuka dopropnamneʼ tenen, ulamuk. Winilamuk talak noutamuk, Daud ei mutuku banmokce, anye bira oplobuk.

⁴ Anye bira, Raja Hadadezer ap, el yin talen nang ap, oplobukce, eitam bisik banmok talak ara, ninye olbana ati, kuda basam arye libuka, tuku deice balamukce, ninye bukuka ban ning, el si ara kereta kuda, ninye deiyoknye Raja Hadadezer el kereta kuda ara, seribu (1.000) minop wambuk bukni, Daud birye alubuka doprobuk. Tonda winibukba, kuda basam balye deice arye welebuka buknarye, tujuh ribu (7.000) yin talin nang ton, tongobuka bobiyuk. Tonda, dua puluh ribu (20.000) yin talin nang ton, tuku bisik arye biyik nang babye tongobuka bobiyuk. Winibukopura, Daud birye nyabukba, amutuku nang sik kuda basam ara, ninye olbana ati welebuka tikikce, tuku deice banmek ning, akereta kuda, tapu kirikdonobuka banmek kuda ninye on ning ara, akuda Daud el yin talin nang arye, ‘Ton ap bikbik abuka kum binamakʼ tenen, sik yan milmil nirya ara, sekrobik. Bukni, ton yuk kuda seratus (100) ekor ton, sik yan milmil ara, sik yin talin nang arye kum sekik.

⁵ Tonda, atalak aryuk, Siria mutuku yin talin nang ton, weik asik el si Damasyik arye, ‘Ninye deiyoknye Raja Hadadezer, el ton melipnamapʼ tenen, el dam yayik talak ara, Raja Daud birye ayala nang babye, obukba, yupa weik dua puluh dua ribu (22.000) nang dibik.

⁶ Adiparyuk ninye deiyoknye Raja Daud birye, Siria tam noutam bukni, weik asik Damsyik mutuku noutam arye, el yin talin nang sik auna ati, anyaik pum tam wipdeibukba daulamike. Winilamika ati ara, sik amutuku nang ara, ninye asik nang atonun ulamik. Amutuku tuku deice auna ati, yo bok ap, teleb arena ning ap, sikce bulubukabikce, apajak yo bok boyanuka, Daud el damuk arelyangalamik. Tonda, Raja Daud birye, ‘Ninye yuk mutuku nang olbinamana ati, binuka olan talak nirya ap ara, Allah Yahweh el mikip ara, Daud deice deiamukce melilamukba, yuk mutuku nang ati oltakana uk ulamuk. Yuk mutuku nang arye el Daud biti, yanibuka malye kum kipmanto ulamik.

⁷ Ura, Daud birye aning winibukopura, Raja Hadadezer oplobuk talak ara, Hadadezer el tam yin talin nang, sik taram dam lelilongolamik kat ning, el si perisai, ara dekna pia weik ning, el si emas arye kintinip deiamik ning ara, adiparyuk bobuka Yerusalem mutuku uk bobiyuk.

⁸ Winibuka bobiyuk bukni, ton bokuka el Daud birye weik tonun ton doprobuk ning, urasin pia teleb kat ning, el si ara perunggu, alubuka doprobukce, Yerusalem mutuku tamubuka bobiyuk. Aning perunggu ara, Hadadezer birye taleamuk mutuku bitinye, Tibhat mutuku ap, Kun mutuku noutam arye, aning-aning nirya doprobuk. Dobuka Yerusalem mutuku deiamuka ani, aminyan talak ara, elce deiamuk mi, Raja Salomo, elce akat ning, urasin pia teleb ning perunggu nirya ara, taleamukce imam nang arye, sik taruk mek likna ati, pala weik mek kwen deilinamukak ati memepdeiamuk. Tonda, Allah el si eren aik, weik keil arye domuk aik ara, ‘Anyaik dopnunaʼ ati, iklamak ning ayukumna yo ati ara, akat ning perunggu deice arye kintinip deiamuk. Tonda aning atouk, sik imam-imam nang arye, Allah Yahweh el si eren aik koproba, pil don ning ton, akat ning perunggu deice arye memepdeiamuk.

⁹ Ninye deiyoknye Raja Tou, bira Siria tam noutam bukni, mutuku si Hamat mutuku taleamuknye bira, yuk nang arye, ‘Raja Daud, nun tamnye ona ati, Zoba mutuku talilamuk Raja Hadadezer ap, el yin talin nang ap oplobuk. “Oplopmake,” nyabikba, Raja Daud birye ayupu kekenmok.

¹⁰ Kekebukopura, adiparyuk, el mi Yoram biti wipdeibukba, ninye deiyoknye Raja Daud dam yayukce, ‘Awinipmalam ning ara, pia telebe,’ nyana ati, el mi uk wipdeibuk. Awinibuk ning deiyok ara, Raja Hadadezer birye, anye Raja Tou biti, sikda min arye ton opdanamrik. Ati ara, “Daud birye akunum Hadadezer bira obuka batakmale,” nyabika ati, Raja Tou birye, ‘Se, anye opmalum ning ara, pia telebe, nyapnamanʼ tenen, Raja Tou birye el mi Yoram wibuka dopdeibuk. Yoram bira, Daud el dam yanganmok talak ara, elti, ‘Telebeʼ nyan ning ati, teleb arin ning ara, dekna weik kat ning emas ap, perak ap, perunggu ap, weik tonun boyayukce arebuk.

¹¹ Yoram birye aboyayuk ning nirya ara, Raja Daud birye minopce Allah Yahweh si erebuka kina ati, ‘Aning nirya ara, Allah el ninguk unamleʼ tenen, adiparyuk Allah Yahweh ati arebuk. Allah el si eren aik noutam, pil don talak una ap aning nirya ara, Allah ati arebuk. Aning nirya boyanuka arebuk touk, bona ara, emas ap, perak ap, Raja Hadadezer dam arye alubuka doprobuk ning nirya ap, tonda elce oplobuk mutuku nirya ara, Edom yala nang ap, Moab yala nang ap, Amon yala nang ap, Pilistin yala nang ap, Amalek yala nang ap nirya, oplobuk talak arye, alubuka doprobuk ning ara, dekna pia weik ning nirya ara, Allah ati binuka arebuk.

¹² Ura Daud el yin talina deiyoknye tonok, el si Abisai, ulamuk. Eli bira, Zeruya ulamuk. Sik Edom yala nang, sik tam noutam bukni, Asing mutuku tam ulamik nang ara, yupa weik, delapan belas ribu (18.000) nang oplobuk.

¹³ Winibukopura, adiparyuk ninye deiyoknye Raja Daud birye, Edom tam noutam ara, el yin talin nang una ati, anyaik pum tam wipdeibukba, daulamik. Winilamika ati ara, sik amutuku nang ara, ninye asik nang ulamak atonun ulamikce, amutuku tuku deice unamika ati, yo bok ap, teleb arin ning ap, bulubukabikce, pajak yo bok arena atonun, Daud el damuk arelyangalamik. Unilamikba, Edom mutuku noutam ulamik nang nirya arye, Raja Daud el amu tam ulamik. Tonda, Raja Daud birye, ‘Ninye yuk mutuku nang olbinamana ati, binuka olanman talak nirya ap ara, Allah Yahweh el mikip ara, Daud deice deiamukce melilamukba, yuk mutuku nang ati oltakana uk ulamuk. Yuk mutuku nang arye, el Daud biti yanibuka malye kum kipmanto ulamik.

¹⁴ Raja Daud birye aning nirya Winilamuka anya arye, Raja Daud elcuk sik Israel nang nirya ara, elce taleamukba, sik telebuk ulamik. Tonda, elcuk amutuku noutam nirya ara, kaliklamukba, sik Israel nang ara, sik yupu bokolina ap, lipsisikuka nyana ap, diksukum una talak nirya ati, elce teleb yupu nyalilamukba, sik nirya ara teleb kibuka ulamik. Ara, ninye urasin maka meina kum deice arye, ‘El amu tam uk ulamika anya arye, sikce, “Patapne touk nyapnune,’ tenebuka, diksukum ulamukce, yupu lipsisiklamuk.

¹⁵ Raja Daud, el amu tam ulamikce, ninye deiyok kibuka ulamik nang ara ani. Anang ara, ninye deiyoknye Raja Daud, elda weik deice tam eren nang ati wipdeibuk nang, sik si ara ani. Yin talen nang, sik weik deiyoknye tonok, el si Zeruya birye deiamuknye, el si Yoab wipdeibuk. Daud el aik noutam si sekna ati, sekna deiyoknye bira, Ahilut el mi Yosafat wipdeibuk. Atonun, sik imam-imam nang ara, Ahitub birye deiamuknye Zadok ap, tonda Abyatar birye deiamuknye, el si Ahimelekh ap, wipdeibuk.

¹⁶ Atonun ton, aning-aning pil dolamik ning ap, winilamik ning nirya ap, sekna ati, sekna deiyoknye weik mutuku ara, ‘Sausa pil donamleʼ tenen, wipdeibuk.

¹⁷ Tonda, Raja Daud melibuka bana ap, kalikna ap ati, yin talenanye bira Yoyada, elce deiamuknye Benaya wipdeibuk. Anye Benaya bira, Kereti mutuku ap, Peleti mutuku ap, ulamik nang ati taleamuk. Ati ara, mambul weik pil pemerintahan deiyok talibuka pil don nang nirya ara, ninye deiyoknye Raja Daud, el mapu koproba erepdeibukba, apil talibuka dolamik.