1 Tawarikh 17 - Eipomek

Allah Yahweh arye nyapdeiamuk yupu ara, Natan birye Daud biti, nyabuk yupu

¹ Israel nang, sik deiyoknye Raja Daud, el weik aik akunum domikba, anyaik noutam binuka daulamukce, dakeiam asa bukukce kanye deibuka asik ulamuk. Atalak ara, Daud birye nabi Natan biti ayupu nyabuk. Natan bira talinye kume elda Allah el yupu lak nyana deiyoknye nabi unamle. Daud birye Natan biti nyabuk yupu ara ani. “Se na ilil kanye bopne. Ara, nara urasin teleb aik pum tam unune. Na aik ara, pia teleb yo, cemara yo, Libanon mutuku aryuk boyanuka aik domnikba, asukumuk unamne bukni, Allah Yahweh arye nyapdeiamuk yupu sekukce, boyanuka deiamik ning Peti Perjanjian marikna deibikak ara, talye tenda aik pum tam dongobuka deiamik touk tuba aulule,” nyabuk.

² Nyabukopura, nabi Natan birye Daud biti nyabuk, “Allah el si Yahweh ap, an ap neika urumunya anya arye, Allah arye anti melinamkile. Ati ara, an kanye pum tam arye, ‘Winipnamne,’ tenepminye touk, aninguk winipnulyame.

³ Nyabuk bukni, atalak lukunyan noutam aryuk, Allah el si Yahweh arye, nabi Natan biti nyabuk.

⁴ “Ance Daud biti, “An tenepminye touk winipnulyame,” nyabuka nyapdeiplum bukni, aning ara pia meme. Ati an adiparyuk bimince, na amu tam pil donanye Raja Daud biti, nyapnulyame.” An ni koproba Allah Yahweh arye nyapdeipmakil ning ara atia. “Na Allah ati, na si eren aik dopnamnilanye bira, ance kume. Ance na si eren aik kum dopnamnilame.

⁵ Deiyok ara ani. Na tenen nang, Israel nang Mesir mutuku noutam arye lyepdopsirye, anang boyanuka, amutuku noutam boyanamse talak arye, dipdongobuka wini talak nirya babye, nara yo arye domikce aik pum tam ton kum bukuka ulamse. Tonda tuba kum unune. Aning atonun, kat yo arye donyak aik kum bukni, talye tenda arye donyak aik uk kintinip deiamnikba, anyaik pum tamuk unune. Unirye, sik Israel yala nang banyak talak ara, na aik babye bobaninyak ak, na ap neika banyabe. Atenda arye domik aik noutam deipmana tuba ulubuka bobinapna, tuba boyanapna, kinyak talak ara, na babye ayanapna, obinapna kinune. Ati, na pia un aik ton kum upmanile.

⁶ Atalak noutam nirya ara, na ap, sik Israel nang ap, neika tuba ulamupu. Sik bisik noutam balamik talak babye, tonok mutuku ulamik talak babye, na ap neika ulamupu. Tonda, sik Israel nang talibuka kalikna ati, narye ninye deiyok kibuka yupu bokolina deiyok nang kina ati, wipdeipse nang ati, Na aik dopnamlume. Deiyok yata ati, aik yo cakuka, kat teleb aik min kum dopnulum do?” nyabuka, pia kum nyalamse.

⁷ Ati ara, Natan ance na amu tam pil donanye, Raja Daud biti nyapnulyame. ‘Na Allah Yahweh aning-aning nirya kwepdeibuka talipsirye, adeice tam unirye, im deice tam unyak yin talin malaikat, sik mikip weik deiyoknye unune. Narye an Daud biti nyapkine. An talye domba weinanye ulalum talak arye, akunum dopropkisirye, anda ‘Naʼ tenen, nang, sik Israel yala nang talibuka umince, sik ninye deiyoknye Raja kipnulyame. ‘Winipnalamʼ tenen ati, narye an dobuka, erepdeipkise nyapne.

⁸ Ati ara. Na Allah arye yate mutuku do nirya balamlum talak nirya ara, narye melilamkise. Tonda, anti, Anye opnuyap,’ tenelamkik nang nirya babye, narye sik kanye walwal kipdeipnarye, melilamkise deice arye, sik anang nirya obuka sirya dakamlume. Narye anti weik tonun kanye deipkise. Ati ara, ‘Tukwak mutuku ninye deiyok nang winilamak atonun nang, unamleʼ tenen, narye an erepdeipmakine. Amutuku nang nirya arye an si bikinamkiyake.

⁹ Na Allah arye, ‘Na mapu koproba, sik Israel nang unamak mutuku ati ara, pia teleb mutuku arepnamsine. Na nyapnyopura, namin asa telebuk unamake. Yuk malye nang ara, Allah ati pia dib kum tenenyak nang arye, minop talak ulamikce, Israel yala nang ati, tuba olyangalamikba, ‘Naʼ tenen, nang mitang kipdipmanto ulamik touk, tuba kum wininamake. Aning nirya ara, kum kipdeipnirye, sik Israel nang ara, pia teleb kipdeipniba, telebuk unamake.

^10-11 Ara, minop talak, sik Israel nang yupu bokolina deiyok nang kina ati, na Allah arye wipdeipse talak arye dorapce, dipdongobuka wini talak ton, Israel nang ara ikin weik ulamik bukni, wini talak ara, sik mal pina ati ara, sik amu tam kipdeipnamne. Winipnyopura, an Daud biti, na Allah Yahweh arye an erepdeipkiniba, sik Israel nang ati, ninye deiyoknye unamlame. Aninguk kum bukni, ton ning ara, an daulaminya ani, aminyan talak dipminyopura, an apu yapu nang dam binuka unamlame. Atalak ara, ance deipminyeba, dadeipdanin, yanganamak nang noutam, naryuk tonoknye ton erepdeipniba, sik Israel nang dorapce deipdanin yangalamik nang, sik deiyoknye kiplirye, yupu bokolinamle. Naryuk an yala nang erepdeipniba, Israel nang talibikirye, pia ati yupu nyanamake. Ayupu nirya ara, Allah Yahweh arye nabi Natan biti, “Ance Daud biti laka nyalbinulyame,” nyapdeibuk.

¹² Nyabukce ayupu ton nyabuk. “Daud an akunum wisi damince dipminyopura, an apu yapu nang diplamikba, tuku lukuka weilamik touk, an babye dipminba, tuku luknamkiyake. Tuku lukikcopura, an pununa ati, ance deipnamlam mi uk wibukapnirye, erepdeipnamne. Tonda, an mi erepdeipniba, elce Israel nang talipnamle. Elce deipliba, dadeipdanin binamak nang arye, Israel nang pia talinamaka ati, mikip weik kipdeipniba, el yala nang aryuk ninye deiyok kibuka talinamake. Winibikiba, yuk yala nang nirya pia kum malye kipnamake. Tonda, ance deipnamlamnye birye, na si erena ati unamne aik ara, elcuk dopnamnile. Anyaik dopnilyopura, sik Israel nang anyaik pum na si erenamniyake.

¹³ Winipnyeura, nara el li koproba Allah unamne anya arye, anye bira, na mi atonun unamle. Ati anye biti, pia bico tenenamna ara, tuba teninauk unamne. Pia bico tenepnirye, elti, pia kum bataknamne. Pia ati teleb kipdeipniba, telebuk unamle. Daud, anda min kum erepdeipkise talak ara, Raja Saul malye ubukba, narye elti, wenepsirye batakse. El ninye deiyok kibuka taleamuk ning nirya ara, kum kipdeipse. Aning winipsa atonun, ance deipnamlam mi babye, atonun kum winipnamne. El ti tuba bico tenepnirye, pia melinamne.

¹⁴ Ance deipnamlam mi ara, narye erepdeipnyopura, elce ‘Naʼ tenen, nang sik Israel yala nang ara, pia talipnamle. Tonda, elce deipliba, dadeipdanin banamak nang noutam arye, yuk nang ton erepdeipnipnirye, mikip kipdeipniba, sikce ton, Israel nang pia talinamake. Sikda na dam unamake. Yuk mutuku nang arye sikti, malye kibuka obuka sirya kum danamake. Naryuk pia kalikuka melinamne.” Allah arye nabi Natan biti laka nyabuk.

¹⁵ Nyabukura, nabi Natan birye Daud dam binuka, Daud biti laka nyabuk. Ara, Allah arye nyabuk yupu ap, lengdar mapmok deice arye yanuka nyapdeiamuk yupu ap nirya boyanuka, nabi Natan birye Daud biti laka nyalbiyukura, kekebuk.

Raja Daud birye, “Na ni koproba Allah, ance melinamnilama ati, telebe nyapkine,” nyabuka, Allah morobuk yupu

¹⁶ Nabi Natan birye Daud biti, Allah arye nyapdeibuk yupu akunum nyabukura, Daud kekebukopura, Allah arye nyapdeiamukce sekuka arebukba, sikce deiamik yupu dobuka, Peti Perjanjian marikna dongamik dam binuka bukukce, Daud birye Allah ati morobukce nyabuk. “Na ni Allah, anda Yahweh Ulyame. An ap, an si ap atibuk, kibuka si erekunune. Bukni, na kele, na ap, na kilapu ap, na mapu ap, na mapu silip ap nirya ara, mambul weik nang pia kum unyabe. Nunda talye nang anya arye, nunda yata ning deice arye, Allah Yahweh ance adiparyuk weik tonun melipnamsilam do? Tonda, nara pia mambul kumnye ulamse talak arye, pia teleb kibuka bok yangalamsuluma ani, wini talak babye pia teleb sukumak boyanmasilamce, nati pia teleb kipdeipmanilam do?

¹⁷ Aninguk kum bukni, wini talak ara weik tonun akunum melisilyama anya arye, anda mambul weik ap, mikipnye ap ulyamnye arye, ‘Aning nirya ara, mitik tonun ulula anya arye, akunuma nyabuka bataksutume. Bukni, na yala nang ati aminyan talak noutam babye, narye deipniba, dadeipdanin binamak nang, na yala nang ati teleb kipdeipnamsilam ning ton lak nyapdeipmanilame. Se, na ni Allah, an si Yahweh ulyamnye birye, aminyan talak teleb kipdeipnamnilam ning ati, lak nyapdeipnilama ati ara, na weik tonun ilil kanye bopne. Nara an amu tam, talye pil donanye unun bukni, ance, ‘Anye bira, pia mambul weiknye atonun ululeʼ tenen, pia teleb yupu nyapdeipmanilama ati, ‘Seʼ tenen, na kanye deipne.

¹⁸ Ati ara, na ni koproba Allah, narye yata yupu ton nyapkitinye do? Nara an amu tam melinanye unune. Mambulnye kum ununa ati, na wininye ning nirya ara, na ni ance akunum bikamnulume. Na nie, anda na si weik erepdeipnimince, weik deiyoknye Raja kipdeipnamnilama ati ara, yata yupu ton nyapkitinye do? Aning ara, ancuk aning-aning nirya deice tam talibuka umince, an amu tam talye pil donanye, nati, an akunum bikamnulume.

¹⁹ Diba, anda na ni koproba Allah Yahweh Ulyame. Ati ara, an yupu ap, an kanye pum tam arye, ‘Wininamne,’ teneminye ning ap ara, apiluk donamlame. Ati, ance, ‘Winipnamkine,’ nyabuka, lak nyapmanilam mambul ning winipnalam ning nirya ara, na melibuka teleb ulina ati, winipnamnilame. Aning ara, na ni ance, ‘Akunum winipnamne,’ nyabuka, lak nyapdeipmanilam ning nirya ara, lak sukum aryuk nyapdeipmanilama ati nyapne.

²⁰ Diba, na ni Allah Yahweh Ulyame. Winimince aning-aning nirya deice tam talibuka umince, an teneminye ning nirya winipmanto kum, pil dolyamnye ulyame. Yuk nang tukwak mutuku noutam unyak nang ton, aning nirya atonun ton pia kum wininyake. Anda, Allah Yahweh tonok Ulyame. Yuk nang arye, ‘Allah ara aning ton winilule, elce aning ap, aning ap akunum winilamuk,’ nyabuka, lak nyasikiba, nun amul arye pia kekenyabe. Ati nun kele, anda Allah Yahweh uminya atonunye ton, dipkoprob pia kum ulule. An tonok ulyame.

²¹ Tonda, dan mutuku nang ton an mapu koproba, sik Israel yala nang unyak touk, yuk mutuku nang ton atonun unyak do? Kume, yuk yala nang nirya ara, sik Israel nang atonun kum unyake. Yuk yala nang nirya ara, mutuku sirya im sirya nirya noutam daunyak bukni, ance, Sik Israel nang ara, ‘Naʼ tenen, nang ukirye, na si erenamniyakʼ tenen, ance nun dobuka, Mesir mutuku noutam arye lyepdopsulume. Lyepropsulum deice arye, yuk-yuk mutuku unyak nang nirya kekebuka bikikura, sikce, ‘Se, dipkoprob Allah Yahweh, elda mikip weiknye, elda mambul weiknye ululeʼ tenen, bikamik. Tonda, tuba bikinyake. Ton ning ara, bikinamake. Mesir mutuku noutam arye, akunum lyepromsulumce, Kanaan tam noutam ulamik nang, nun Israel nang, nun mal olan nang nirya ara, sik mutuku noutam arye minop yakuka dopkweteplumba, an ‘Naʼ tenen, nang, nun Israel nang ati, amutuku tuku areamsulumba, wini talak aning talibuka telebuk unyabe. Aning nirya winilamluma deice arye, ninye kekelamikce, ‘Se, Allah Yahweh el si ara, mambul weiknye ululeʼ tenen, biklamkike.

²² Tonda, nun ni koproba Allah, ancuk, Sik Israel nang nirya ara, na mapu koproba atonun unamakʼ tenen, nun Israel yala nang ati, akunum wipdeiamsulum nang ara, an ‘Naʼ tenen nang pia unamabe. Aning atonun, na ni an si Yahweh erenamkinyabe. Nun ni koproba Allah, anda pia talibuka unamsilame.” Raja Daud birye Allah ati nyabuk.

²³ Daud bira, nyabukopura, ayupu ton dukdongobuka nyabuk. “Na ni Allah, an si Yahweh, wini talak na an amu tam pil donanye ap, narye deipniba, dadeipdanin banamak nang, na yala nang nirya ap ati, ance, ‘Winipnamsine,’ nyabuka, lak nyapdeiamsulum touk, pia teleb kibuka upnamle. Ara, ancuk melisimince, yuk talak nirya ara, ‘Mambul weik pil donamsine,’ nyapdeiamsulum touk, ‘Aninguk wininamsilamʼ tenen, moropkine na nio. Winipminyopura, aning nirya ara, min kum kum danamle. Pia ati upnamle.

²⁴ Ati ara, nun ni koproba Allah, ance nyapdeiamsulum touk, winipsimnyopura, na ni Allah, an si ati, ninye mutuku sirya im sirya nirya weik arye, pia weik tonun erepkikirye, nyanamkiyake. “Se, Allah el si Yahweh, elda Israel nang sikce, ‘Nun ni koproba Allah ani,’ tenen, si erenyaknye bira, Allah el ap, el si ap, dipkoprob pia unamle. Elda, im deice tam unyak yin talen malaikat nirya ara, elda, sik weik deiyoknye ulule. Israel ninye arye, el siuk erenyake. Allah el ning ara, aninye atibuk, ‘Na tenen nang unyake,’ tenen, pia kalikuka melisulule,” nyabuka nyanamake. Tonda, aning nirya winipsiminyeba, Daud yala nang nirya ati ara, ance mikip weik arisiminyeba, ninye deiyok nang kibuka, Israel nang talibuka, pia unamake. Anda nun damuk pia kalikuka melisimince, neika unamabe.

²⁵ Na Daud, na yala nang arye, Israel nang talibuka, pia unamaba deiyok ara ani. Ara, anda na si erekunun Allah ancuk nati akunum lak sukum arye lak nyapdeipnulume. Ara, ance, ‘Winipnamkine, ance deiplumnye birye, Israel nang talipnamle. Tonda, elce deipliba, dadeipdanin yangakirye, deipnamak nang aryuk, Israel mutuku noutam unyak nang nirya ati, deiyok kibuka talinamake. An yala nanguk, ninye deiyoknye kipdeibikba, sikce Israel nang talibuka unamake,’ nyabuka nyalin yupu deice arye nyapdeiamnulume. Ati, ayupu nyapdeiamnuluma deice arye, na ni koproba Allah, anti na Daud birye, ilil una kumce, moropkine.

²⁶ Wini talak ara, anda nun ni koproba Allah Yahweh, anuk Ulyame. Tonda, nun ni koproba Allah ancuk, ‘Pia teleb ning ara wininamne,’ nyabuka, nyapdeiamnulume na nio. Ati ara, na Daud birye na ni koproba Allah anti moropkine,” Daud birye nyabuk.

²⁷ Nyabukce, aning morobuk. “Na ni anda, Allah Yahweh Ulyame. Nyalin yupu deice arye, ‘Teleb kipdeipnamkine,’ nyabuka, nyapdeiamnuluma anya arye, an tenepminyak arye nyalyam yupu nirya ara, dipkoprob uk unamle. Nun Israel nang ap, na yala nang nirya ap ati, pia weik tonun teleb ulisilyame. Ati, ‘Narye deipseba, dadeipdanin banamak nang nirya ara, na ni koproba Allah ance melipminya deice arye, sikda pia mikip kipdeipminba, pia ati ninye deiyok nang unamake. Sik ti ance pia bico tenebuka pia melinamlamʼ tenen, moropkine. Tonda, winipminyopura, ‘Na yala nang ara, an damuk ubikirye, an siuk pia erenamakʼ tenen, moropkine na nio.” Daud birye, Allah Yahweh ati nyabuka morobuk.