1 Tawarikh 14 - Eipomek

Daud birye, Yerusalem mutuku noutam pil talibuka dolamuk ning ati, nyabuk yupu

¹ Tirus mutuku noutam, sik ninye deiyoknye, Raja Hiram birye, Daud el aik koproba dona ati, ninye wibuka dopdeibuk. Ara, aik don yo el si cemara yo, weik yo ap, aik dona kel nang ap, yo cakne nang ap, tonda keil aik dona ati, keil teleb uka dona nang ap, dobuka deibukce, sik anang nirya dopkwetebukba, sik nirya Daud el dam yayikopura, Daud el weik aik bulubuka dolamik.

² Aning nirya winibuka deice arye, atalak ara, el Daud bikukce, ‘E, aning nirya ara, Allah el si Yahweh arye, teleb kipdeipmanile. Ara, Allah arye, ‘Anye ‘Naʼ tenen, nang talibuka, weik deiyoknye Raja unamle,’ tenelamnuk touk, ‘Ninye deiyoknye kibuka erepdeipnuke,’ tenebuk. Tonda, Allah arye, ‘Israel yala nang nirya ara, pia telebuk unamakʼ tenen, ninye deiyoknye Raja keipnukce, na talenun ning nirya, pia teleb kibuka delinulule. Awinibuk nirya ara, na dem ati kume. Deiyok ara, Allah Yahweh el ‘Naʼ tenen nang, sik Israel yala nang melina ati winipnuke,’ tenebukce, Daud birye bikuk.

³ Daud bira, daulamuka ani, Yerusalem mutuku noutam ulamuk talak ara, kilapu weika arye dobuk. Dobukopura, el mapu ara, sal ap, kilapu ap deibuk.

^4-7 Daud bira, Yerusalem mutuku ulamukce, deibuk mapu si ara, ani. Ara, Siamua ap, Sobab ap, Natan ap, Salomo ap deibuk. Tonda, Yibhar ap, Elisua ap, Elpelet ap, Nogah ap, Nepeg ap, Yapia ap deibuk. Ton nang ara, Elisama ap, Beelyada ap, Elifelet ap, nirya deiamuk.

Raja Daud birye, Pilistin yala nang obuka sirya dakuk ati, sekik yupu

⁸ Atalak noutamak ara, yuk nang arye, “Daud bira Israel yala nang, sik ninye deiyoknye Raja kipmale,” nyabuka lak nyabikura, sik mal olan nang, Pilistin tam nang arye kekebikce, adiparyuk, ‘Anye bira, nunce malye kibuka, oplopnuyabeʼ tenen, ninye yupa pia weika arye bulubuka, ‘El Daud bira, dam dan do?’ tenen dilyayik. Dilyayik talak ara, Daud akunum kekebuk. Kekebukopura, adiparyuk, ‘Sik Pilistin tam nang ara, opnunʼ tenen, sik dam binuka unmok.

⁹ Winibuk talak ara, sik Pilistin yala nang weike yayikce, mutuku si Refaim mutuku noutam, weik pala lu mutuku, sik adiparyuk langdibik. Winibikopura, ‘Amutuku unyak nang, sik talinyak ning ara, nunce dalubuka dopropnamapʼ tenen, sik anang arye, amutuku noutam yana, aning-aning weika arye upula doprobik.

¹⁰ Winibikba, atam nang arye lak nyabikura, Raja Daud bira, ayupu nirya akunum kekebukce, Daud birye, el li koproba Allah ati asipdeyuk. “Na ni Allah, anti asipdekine. Na adiparyuk, sik Pilistin yala nang ati olbinun do, kum do? Ati Allah ance na ninye olbisina ati deiyok ning ara, ance na deice areneminyeba, anang obuka malye kipnamne do, kum do?” nyabuka asipdeyuk. Nyabukura, Allah Yahweh arye, Daud biti nyabuk. “Yo, telebe. Daolbilyame. Nyapmalam touk, narye ninye olbisina deiyok ning ara, an deice deipkiniba, sik Pilistin nang nirya obuka sirya daknalame,” nyabuk.

¹¹ Allah arye Daud biti, ayupu akunum nyabukopura, Daud birye mutuku si Bahal-Perasim nyalamik mutuku dam biyukce, amutuku ulamik Pilistin yala nang nirya ara, obuka sirya dakuk. Akunum obuka sirya dakukopura, Daud birye nyabuk. “Na ni koproba Allah, ance melipmanilamba, na mal olan nang nirya ap, sik unak ap, sik nong nirya ap ara, mek weik arye oplirye balamle touk, akunum winipne. Na ni, ance menekuka banmalamce, melipmanilamba, na aminyan yanmance, anang nirya obuka sirya dakmane,” nyabuk. Daud birye nyabuka ati ara, anang nirya obuk mutuku ara, winiryuk si ton dobukba, nyalamik. Amutuku el si ara, Bahal-Perasim, ara ‘Mek weik obuka balamle touk, ululeʼ tenen, nyalamik.

¹² Daud birye, Pilistin nang akunum obuka sirya dakukopura, ilil ubukba, sik yin talin nang ara, bendobik. Sik amutuku batakuka biyik talak ara, Pilistin yala nang arye, sik isa si erelamik ning, isa si sekekuka ninye urasin atouk kibuka, memebuka delilamik ning ara, asukumuk batakikce, bikbik abuka bindobik. Winibikopura, Daud birye el melina nang ati, ‘Winiplulume,’ nyapdeibukba, anang arye, aisa si eren ning memebuka deiamik ning nirya ara, dobuka uku dongobikba, uku arye aning nirya dibukce, sirya dakuk.

¹³ Sik nirya daulamika ani, aminyan talak, sik Pilistin tam nang, ila tamubuka tonap tamubuka yayikce, aweik lu mutuku, el si Refaim mutuku luak, yanuka mal olanmek.

¹⁴ Winibikopura, Daud birye Allah ati, ila tamubuka tonap ‘Yata wiripnun do?” nyabuka, asipdeyuk. Asipdeyukura, “Allah el si Yahweh arye, tamubuka nyabuk, “Anda, ‘Asukum arye adiparyuk binirye opnune,’ tenena meme. Aning kum bukni, sik Pilistin yala nang, sik balye tam bimince, weik arye tikamlye yo palpal, el si murbei yo urasin tam kipminyopura, sik anang opnamlume,” nyabuk.

¹⁵ “Winibuka bimince, kekenmaminye buk, sik yin nang banmakirye, yan lelim nyalamak touk, keipyal yo dup arye, lelim nyapliba kekepminyopura, an babye adiparyuk, yin dopropnulyame. Ara, lelim kekenmaminye talak ara, sikce, ‘E winida, Allah el si Yahweh arye, menekuka banmala ara, nunti melipsilye deice arye, sik Pilistin yala nang nirya opnuyabeʼ tenen, adiparyuk olbinamlume.” Allah arye Daud biti, nyabuk.

¹⁶ Aning-aning nirya ara, Allah arye, el Daud biti, “Winipnamalyame,’ nyapdeipmok touk, Daud bira winibukce, sik Filistin nang nirya ati olbiyik. Olbiyikce, anang nirya ati, obuka malye kibik. Ara, Gibea mutuku arye bulubuka, anyapce dipdongobuka, Geser mutuku dam, Pilistin yala yin talen nang nirya ara, obuka sirya dakuk.

¹⁷ Aning nirya, Raja Daud birye winibuka ati ara, dana-dana tam ulamik ninye nirya arye, ninye deiyoknye Raja Daud, el si ara mutuku-mutuku nirya arye bikamik. Tonda, Allah el si Yahweh arye, amutuku noutam ati, ilil un ning deibukba, dana-dana tam ulamik nang, ayala-yala nirya ara, el Raja Daud biti, ilil weik ubukba, ‘Se,’ tenelamikce ulamik.