1 Tawarikh 12 - Eipomek

Raja Daud, Ziklak mutuku ulamuk talak ara, ‘El melipnamapʼ tenen, el dam yangalamik nang ati, nyabuk yupu

¹ Raja Daud bira, tonoknye el si ara Kisy, elce deiamuknye Raja Saul dam arye leibuka Ziklak mutuku noutam duknulbinmok. Deiyok ara, Raja Saul birye, ‘Anye opnunʼ tenen, epra yanganmoka ati, Daud bira duknulbinmok. Winilamuk talak ara, Daud el tam yin talin nang, ilil tenena pia kum nang arye, Daud el dam Ziklak mutuku yanuka melibik. Ayin nang ara, Daud el mal olan nang ati, olbinamuk talak, sikce yanuka Daud ati melilamik.

² Ayanganmek nang nirya ara, sik Benyamin yala nang ulamika ati, ninye deiyoknye Raja Saul ulamuk touk, el yala nanguk ulamik. Sik ayanganmek nang nirya ara, ninye ona ati, keil dikdongobuka donyak ning el si kartapel dona ap, tonda yin arye dipdongobuka dolamak mal dona ap, weik kel nang ulamik. Sikce sik sirik taruk deice babye, kwanim taruk deice arye dona babye, sik pia weik kel nang ulamikce, Daud melina ati yanganmek.

³ Sik ayin talinyak nang, sik si ara ani. Ara, sik deiyoknye Abieser ap, tonda, Yoas ap, abitinye nang ara Gibea mutukunye, el si Sema, el mapu ulamdik. Anang sikda Daud biti, ‘Ninye deiyoknye keptuʼ tenen, pia pi deibuka ulamaik. Ton nang ara, sik si ani. Ara, Asmawet el mapu bitinye Yeziel ap, Pelet ap ulamdik. Tonda, Berakha ap, Anatot mutukunye Yehu ap daulamdik.

⁴ Tonda, Gibeon mutukunye el si ara Yismaya, elda yin talin nang, sik tiga puluh nang (30), sik deiyoknye kibuka ulamuk. Sik nirya ara, pia ilil tenena kum nang ulamik. Tonda, Yeremia ap, Yahasiel ap, Yohanan ap, Yozabad ap, sik adumbarye nang ara, Gedera mutuku nang ulamaik.

⁵ Tonda, Elusai ap, Yerimot ap, Bealya ap, Semarya ap, tonda Sefaca ap, sik apamubarye nang ara, Harufi mutuku nang ulamik.

⁶ Tonda, Elkana ap, Yisia ap, Asareel ap, Yoezer ap, tonda Yasobam ap, sik adumbarye nang ara, Korah birye deibukba, dadeipdanin yangalamik nang arye deiamik nang ulamik.

⁷ Utouk, Yeroham el mapu bitinye ara, Yoela ap, Zebaja ap ara, Gedor mutuku nang ulamdik.

Daud weik tukwak mutuku noutam bukni, keil deiya pum tam dungnyamuk talak ara, el melina ati yayik nang ati, nyabuk yupu

⁸ Min talak ara, Daud el mikip kina ap, nimalyap arye, dakeiyam asa una ap ati, tonok mutuku pia tukwak mutuku noutam bukni, el mal olan nang arye, kum wekmanto sukum binuka ulamuk. Atalak ara, ninye Kat yala nang ton ninye deiyoknye, Raja Saul batakikce, Daud tam yanuka melibik. Sik Kat yala nang ara, weik kel yin talin nang ulamikce, mikip weik nang ap, ilil tenena pia kum nang apuk, yayik. Tonda, sik yuk arye bulubuka, ninye olban ning nirya weik arye, kel kiamik. Ara, sik bidamang aryuk, taram dam lelin ati melin ning ap, ninye lukna mal tombak ap ara, sikda kel weik nanguk yayik. Sikda, singa yu kus ninye opnulya ati, yu deibuka bikbik abuka bilirye, adiparyuk ninye olbalamak touk ulamaik. Sikda, ninye ona yu nang ulamika atia. Tonda, rusa basam, mutuku lu bikbik abuka balamle touk nanguk, ulamika ati, pia bibik abuka binmanto nang ulamik. Anang nirya ara, ‘Daud melipnamapʼ tenen, Daud el dam yayik.

⁹ Raja Daud dam yanmek nang ara, sik anang si lilibuka seknuyap ara, ani. Tonoknye, sik deiyoknye bira, Ezer ulamuk. El amu tam deiyoknye, bitinye anye bira, Obaja ulamuk. Obaja el amu tam ulamuk winilinye bira, Eliab ulamuk.

¹⁰ Dumbarye anye bira, Mismana ulamuk. Pamubarye anye bira, Yeremia ulamuk.

¹¹ Nakubnye (6) bira, Atai ulamuk. Teknye (7) bira, Eliel ulamuk.

¹² pinye (8) bira, Yohanan ulamuk. Toupnenye (9) bira, Elsabad ulamuk.

¹³ Takunye (10) bira, Yeremia ulamuk. Anye el amu tamnye bira, el si Makhbanai ulamuk.

¹⁴ Sik anang arye, si sekmapu Kat yala nang nirya ara, weik yin talin deiyok nanguk ulamik. Ton nang ara, pia weika arye, yin talin nang yupa weik, seratus (100) yin nang ati, deiyok kibuka talilamikce, yupu nyalamik. Ton nang ara, pia weika arye yin talina nang yupa weik, seribu (1.000) yin nang ati, deiyok kibuka, talilamikce, yupu nyalamik.

¹⁵ Anang ara, sik Kat yala nang, sik yin talen nang ulamika ati, keting yangan tam arye, Yordan mek koubuka otam keting koumulban tam biyik. Sik biyik talak ara, wala tonok deice, mek arye obuka sirya dakuk. Winibuk babye, sik yu arye amek koubuka otam biyik. Winibukce, Yordan mek kup-kup tam ulamik nang nirya ara, ilil weik ubukba, sik asik batakikce, bibik abuka bai sakuka bendobik. Ara, keting yangan tam mutuku ap, amek otam keting koumulban tam apuk, yakdonokik.

Ninye deiyoknye Daud biti, melibuka bana nang ara, Benyamin yala nang ap, Yehuda yala nang apuk ati, nyabuk yupu

¹⁶ Utouk tonok talak ara, ton tam nang, sik Benyamin yala nang ap, tonda sik Yehuda yala nang ap, yu nang kum wekmanto sukum, el ninye deiyoknye Daud, mikip kina ati ulamik sukum atouk, pata mutuku noutam keil deiya dam biyik.

¹⁷ Biyikopura, ninye deiyoknye, el Daud birye eibukopura, nyabuk, “Anggunda dipkoprob nati, ‘Nun kwet koproba,’ tenepnulumce, meliamnulum do? Winipopura, nun ap neika nun tam kipnuyabe,” nyabuk. “Ati ara, nunce sikti, nun kanye teleb deice aryuk dopropsiabe,” nyabuk. “Bukni, sik kanye nirya ara, nunti ‘Optibyeʼ tenen, kanye bobuka yalumce, na nong dobuka, sik yu nang ati, dobuka arepnumunyopura, na Daud birye ton, anggunti yu tenepnamsine,” nyabuk. “Ati, telebe nun apu yapu nang arye, el si erelamik Allah, elce aning anyalirye, anggunti weik arye wenebuka, menenga ning arepnamsile,” nyabuk.

¹⁸ Nyabuk talak ara, Allah el Lek Sambala, Amasia el deice langdibuk. Tiga puluh (30) nang, sik deiyoknye, el Amasia birye nyabuk. “Isai, elce deiamuknye Daud, ‘Nunda, an ap an mapu nirya ap neika aunmabe. Dipkoproba Isai bira deiamuknye an ap, nun melina nang ap ara, nimalyap aryuk neika aunmabe. Tonda, Allah arye melipkiliba, teleb deice arye upmalame. Tonda, anti melipkice nang babye, Allah arye melipliba, teleb deice arye unamake. An ni koproba Allah, elcuk anti melikulula ati nyapkine,ʼ nyabuk. Nyabuka ati ara, Daud birye el dam yayik nang ati, ‘Telebe, neika unamabe,’ nyabukce, anang nirya bobuka, ‘Na yin talin nang, sik deiyok nang unamakʼ tenen, anang wipdeibukba, apil talibuka ulamik,” nyabuk.

Ninye deiyoknye Daud, el melina ati yayik nang ara, Manasye yala nang ati, nyabuk yupu

¹⁹ Pilistin yala nang arye, Israel yala nang, sik ninye deiyoknye Raja Saul ap, mal olana ati yayik talak ara, Daud birye, ‘Na ap ansinibuka melipnuneʼ tenen, yayuk. Atalak ara, Manasye yala nang kan-kan arye, ton yin talina nang ton, Raja Saul tam arye batakuka, ‘Daud ap ansinibuka melipnuyabeʼ tenen, Daud tam kiamikce, ayin nang babye yayik. Atalak dipkoprob ning ara, Daud birye, sik Pilistin yala yin nang ati, kum melibuk. Aning deiyok ara, sik Pilistin nang, sik deiyok-deiyok Raja nang arye, yupu talepdayikce nyabik. “Kume, Daud anda tamubuka binulyame, kum ansinibuka melipsetume,” nyabik. Ayupu ara, Pilistin nang, sik deiyok-deiyok Raja nang ara, ‘Kume, nun olan talak noutamak ara, Daud elce tamubuka, el tamnye Raja Saul ap, tamubuka kiplirye, nun Pilistin nang nirya opsilyak,’ tenebikce, “Nun ilil,” nyabuka, yupu sekik.

²⁰ Ati ara, Daud bira, Ziklak mutuku tamubuka banmok talak ara, sik Manasye yala nang ninye deiyoknye, Raja Saul tam arye batakikce, tamubuka Daud el tam kipdobik. Daud el tam kiamik nang, sik ap neika, Ziklak mutuku tamubuka banmek nang ara, sik si ara, ani. Ara, Adna ap Yozabad ap, Yediael ap, Mikhael ap, yuknye ton, el si Yozabad ap, Elihu ap, Ziletai ap, sik nirya Daud ap, tamubuka biyik. Sik anang yuk-yuk ara, Manasye yala nang ulamikce, min talak ara, Saul el yin talin nang talibuka yupu nyana ati, deiyok kibuka ulamikce, sik amu tam ara, yin talin nang ton yupa weik, 1.000 nang ulamikce, yuk mutuku nang ati, olbalamik.

²¹ Sik anang ara, Manasye yala nang ulamikce, ninye deiyoknye Daud ati, ansinibuka melibuka olbalamik. Ara, bai tam ulamik yu nang arye, amutuku-amutuku nirya olyangalamikce, amutuku noutam ulamik nang, sik ning dalubuka dololamik talak ara, aManyase yala nang arye, Daud ap melibuka olbalamikce, sik bai tam ulamik yu nang ati, malye kibik. Sik Manasye yala nang nirya ara, ninye deiyok kibuka, Manasye mutuku yin talin nang talibuka ulamika ati, sikda ninye ati, ilil tenena kum aryuk, yu kanye bobuka, ninye ona ati, mikip weik nanguk ulamaik.

²² Atalak noutamak ara, asum-asum nirya, batakna kumce, yuk nang ton, kong kibuka, ninye deiyoknye Daud, el damuk yangalamikce, el ap ansinibuka melilamik. Winilamik ati, Daud el yin talin nang nirya ara, weik arye tabaknin balamikce, pia weik ulamik. Sik yupa, pia weik upnin balamika ati, Allah el im deice yin talin malaikat yupa utonun kibuka ulamik.

Daud el yin talin nang ap, Hebron mutuku yayikce, tabakik nang ati, nyabuk yupu

²³ Ninye olban ati, yin talin nang ongolamak ning nirya bobikce, ‘Nun ni Daud biti ansinibuka melipnuyabeʼ tenen, ninye deiyoknye Daud, el Hebron mutuku unmok sukumuk, el tam kiprobikce, yangalamik nang ton, weik ulamik. Ara, ‘Israel yala nang taleamuknye, ninye deiyoknye Raja Saul biti olbibirye, malye kibuka, ninye deiyok kina ning nirya ara, nunce doprobibirye, Daud ati arenamabeʼ tenen, Daud tam kiprobikce, Hebron mutuku yangalamik. Aning nirya ara, ‘Allah Yahweh arye nyapdeiamuk touk, Daud birye Raja Saul punubukce, Israel yala nang sik ninye deiyoknye Raja unamsileʼ tenen, Daud binyuk melibuka yangalamik.

²⁴ Sik ayayik nang yupa nirya ara, abuku outam seknuyabe. Ara, Yehuda yala nang nirya ara, yupa pia weik, enam ribu delapan ratus (6.800) nang, ‘Saul tam nang olbinamapʼ tenen, Daud tam ansinibuka yayik. Ayin talin nang ara, ninye olban ning nirya weik arye kel bikikce, ninye nong taram dam lelin ati, kat ning ap, el si perisai ap, tonda ninye lukun ning, el si tombak ap ara, sikda kel weik nanguk yayik.

²⁵ Utouk, sik Simeon yala nang ara, yupa weik tujuh ribu seratus (7.100) nang ara, weik kel kiamik yin talin nang yayik. Anang ara mikip ap, ninye ilil tenena kum nanguk, ‘Saul tam nang olbinamapʼ tenen, yayik.

²⁶ Utouk, sik Lewi yala yin nang ara, empat ribu enam ratus (4.600) ninye olban ati yayik.

²⁷ Tonda, yuknye ton el si Yoyada, elda Harun birye deibukba, dadeipdanin yangalamika ani, deiamik nang arye deibiknye ulamuk. El ap, el yin talin nang ap, sik Lewi yala nang ap ansinibuka, neika yayik. Yoyada ap neika yayik yin talin nang ara, yupa weik, tiga ribu tujuh ratus (3.700) nang yayik.

²⁸ Aning atouk, tonoknye ton, el si Zadok, elda ilil tenena kum, welnye ulamuk bukni, ninye ona ati, kel kiamuk. El ap, sik Lewi yala nang ap ansinibuka yayik. Zadok ap, el yala nang ap, yayik yin talin deiyok nang ara, duapuluh dua (22) deiyok nang, Zadok ap neika yayik.

²⁹ Tonda, Benyamin yala nang ton, Daud tam kibuka yayik. Anang sik yupa, tiga ribu (3.000) nang ulamik. Anang ara, ninye deiyoknye Raja Saul, el yala nang ulamika ati, sik min talak ara, ‘Saul elcuk nun deiyoknye unamsileʼ tenen, el tam ulamik bukni, atalak ara, sik yuk kanye tenebikce, Daud el tam kiprobikce, Hebron mutuku melibuka yayik.

³⁰ Tonda, Efraim yala nang ara, yupa pia weik, dua puluh ribu, delapan ratus (20.800) nang ara, sik mikip weik ap, tonda ilil tenena kum nang ap ulamik. Tonda, Daud tam kibikce yayik. Anang ara, ninye olban ati, weik kel kiamik nang ulamika ati, sik yuk-yuk bukni, sik yala nang koproba arye, ayin nang, sik si nirya kel kiamikce, sik si erebuka kilamik.

³¹ Utouk ton, sik Manasye yala nang bukni, sik yala noutam bokuka, Yordan mek koubuka otam, keting koumulban tam ulamik nang babye, Daud tam kiprobikce yayik. Anang ara, yupa pia weik, delapan belas ribu (18.000) nang ulamik. Sik yayik tam nang arye, anang wepdeibikce, “Anggunda Daud tam kipmunce, sikda Saul tam nang ati, melibuka mal olbinamlume,” nyabuka dopdeibuk. Ara, ‘Anggunce melipmunce, ninye deiyoknye Daud, Israel yala nang nirya talepsilirye, Raja unamsileʼ tenen, melibuka yayik.

³² Atouk, Isakar yala nang noutamak ara, kel weik deiyok nang, dua ratus (200) nang ton yayik. Adeiyok nang ap, sik duweit ap, Daud tam kibuka yayik. Adeiyok nang ara, aning-aning pia weik kel kiamikce, mambul ning kel nang ulamika ati, sikda, ‘Israel yala nang nirya arye, talibuka upnamak ara, aniʼ tenen, akunum tenelamik. Tonda, adeiyok nang ara, ‘Atalak ara, aning winipnamabe, atalak ton aning winipnamabe, teleb talak ara, aniʼ tenen, kel weik ning laka nyana deiyok nang ulamik.

³³ Atouk ton, Zebulon yala nang ara, yupa pia weik, lima puluh ribu (50.000) yin talin nang ton, Daud tam kibikce, yayik. Ayin nang nirya ara, ninye olban tenen nang nirya ap, ninye ona ati, yin yala-yala nirya ara, ‘Winibuka winiptibye, winibuka winiptibyeʼ tenen, weik kel nang ulamikce, Daud tam kina ati, Hebron mutuku yayik. Anang nirya ara, kanye teniltona pia kum aryuk, ‘Daud elcuk nun weik deiyoknye kibuka, elcuk Raja kibuka talepnamsile,’ tenelamikce yayik.

³⁴ Tonda, Naftali yala nang noutam arye, weik yin talin deiyok nang, yupa weik, seribu (1.000) nang ap, sik amu tam yin talin nang ap, yupa pia weik, tiga puluh tujuh ribu (37.000) nang ansinibuka yayik. Ayin talin nang arye, ninye ona ati, el si tombak ap, tonda ninye nong, taram dam lelina ati melin kat ning, el si ara perisai ap, aninye on ning, kel nang ulamika ati, aning ton bobuka, Daud dam boyayik.

³⁵ Atouk ton, sik Dan yala nang noutamak ara, yin talin nang, yupa pia weik, dua puluh delapan ribu, enam ratus (28.600) nang ton, ninye olana ati, kel weik nang ulamik ati, ninye ap, olan ning weik bolamik nang ton, Daud dam yayik.

³⁶ Tonda, Asyer yala nang noutamak ara, yin talin nang, yupa pia weik, empat puluh tujuh ribu (47.000) nang, ninye olbana ati, pia weik arye kelkin nang ap, Daud dam yayik.

³⁷ Atouk ton, Yordan mek koubuka otam, keting yangan tam arye, Daud melina ati yangalamik nang ara, Ruben yala nang ap, Kat yala nang ap, Keting yangan tam arye ulamik Manasye yala nang ap, Daud tam kibikce, el dam yayik. Sik ayin talin nang nirya ara, yupa pia weik, seratus dua puluh ribu (120.000) nang, Daud dam yayik. Sik ayin talin nang arye, ninye olbana ati, ayala-yala nirya kintinibuka bomikce, Daud dam yayik.

³⁸ Adeice tam sekmapu yin talin nang nirya ara, sik mining kanye aryuk tenebik. Ara, ‘Hebron mutuku uk yabirye, Daud tam kebibirye, Saul tam nang ati, ninye olbinamapʼ tenen, kintinibuka, Hebron mutuku wekelbiyik. Winibikopura, ‘Saul tam nang obuka malye kebibirye, Israel mutuku noutamakuk unamap nang ati, ninye deiyoknye bira, Daud binyuk erebuka deibipyeba, elcuk nun ninye deiyoknye Raja unamsile,’ tenebik. Tonda, sik Israel yala nang bukni, anang sik tam nang nirya ara, tonok kanye bobikce, ‘Aninguk winipnamabe,’ tenebik.

³⁹ Hebron mutuku yayik talak ara, sik ayin talin nang nirya ara, Daud ap neika amutuku noutamakuk unmekce, yin ap, mek ap nirya ara, sik kayapu nang, sik mutuku yuk-yuk ulamik Israel yala nang nirya arye, akunum kintinibuka deiamika ati, mek babye din babye, asukumuk dobuka, neika ulamikce, dilamikce dilamik.

⁴⁰ Aning atouk, sik Isakar yala nang ap, Zebulon yala nang ap, Naftali yala nang ap, meneng dam aulamik nang ara, kam ulul ning, Keledai basam balul deice arye, ayim ning yala-yala nirya kintinibuka deibikce, tapu arye kitibuka, adiparyuk Hebron mutuku boyayik. Tonda, unta basam ap, bagal ap, keledai basam ap, tonda el sapi basam aryuk, tepung atouk ning boyangalamuk. Tonda, Arah yo duk ap, kismis ap, anggur mek ap, minyak Zaitun mek ap, kikliman bobuka yayik. Anang nirya babye, sapi basam ap, domba basam ap obuka, sekekuka deipnarye, dobuka dilamik ning ap ati, sik Israel nang ara, pia kanye delilamik.