1 Tawarikh 11 - Eipomek

Ninye deiyoknye Raja Daud, el Israel mutuku ap, Yehuda mutuku noutam ap, deiyoknye kiamuk yupu

¹ Israel mutuku noutam ulamik ninye deiyok nang nirya arye, Raja Daud el dam Hebron mutuku uk yanganmekce nyanmeke. “Nunda nun deiyoknye Raja Daud, an tam nang koproba yanganmabe. An apu yapu ara, nun babye nun apu yapu uk ulamika ati, nun yala ara tonok nang uka. Ati, ance nun bikisilyame.

² Ura nun kele. Minop talak, Raja Saul birye nun yupu nyalamsuk bukni, atalak noutam babye, an Daud birye Israel mutuku noutam ulamik yin talin nang ati, asum-asum nirya deiyok kibuka, sik deiyoknye ulamlumce, ‘Ninye olbinuyabe,’ nyalamsulume. Aning atouk, Allah Yahweh arye anti akunum nyapkuke. Ara, ‘An Daud bira, na mapu koproba, sik Israel yala nang melibuka unamlanye, nyabuka an wipdeipkuke. Tonda, sik dam ninye deiyoknye Raja kibuka, sik yupu nyananye deiyoknye wininamlame. Ance anang nirya talibuka, Raja unamlame,’ nyabuka nyapkuke,” Israel deiyok nang nirya arye Daud biti nyabik.

³ Nyabikopura, Israel mutuku noutam talibuka ulamik ninye deiyok-deiyok nang nirya ara, Hebron mutuku, Daud el damuk bulubuka yanganmek. Yayikopura, Hebron mutuku sik deiyoknye Daud, Allah Yahweh el dam unmokce, kekenmokce Daud birye, “Aning ara, sik Israel nang ati winipnamsine. Winipsinyopura, anggunce nati wininamnulume,” nyabuka, nyalin yupu deice arye nyapdeibuk. Nyabukura, sik aninye deiyok nang nirya arye, Daud el kisok deice, minyak zaitun mek dikeibik. Ara, ‘Anye bira, Allah arye akunum Israel mutuku noutam arye, ninye deiyoknye wibuka deipmasileʼ tenen, bikilina ati winibik. Awinibik ning ara, Allah Yahweh arye, nabi Samuel el deice nyapdeibukba, Samuel birye nyabuk touk winibik.

Yerusalem weik asik domik ning, malye kibukabikce, dalubuka dopromik ati, nyabuk yupu

⁴ Tonok talak ara, sik deiyoknye Raja Daud ap, Israel mutuku noutam ulamik nang nirya ap, Yerusalem mutuku olban ati biyik. Atalak ara, amutuku tonok bukni, amutuku si ati Yebus mutuku nyalamik. Deiyok ara, sik Yebus nang ara, amutuku koproba noutam nang ulamikce talilamik.

⁵ Yebus nang arye yu ubukba, Raja Daud ati nyabik, “Anda amutuku noutam yanuka wekna ati ara, kum winipmanto upkile,” nyabik. Nyabik bukni, Daud birye amutuku malye kibuka obisibukce, doprobuk. Dalubuka doprobukce, minop talak amutuku nang arye, mikip weik keil poka deibuka domik asik el si ara Sion mutuku uk doprobuk. Winibuk ati, wini talak, amutuku si ati, ‘Raja Daud el asik ani,’ nyabuka nyanyake.

⁶ Tonda, min talak noutam adiparyuk, Raja Daud el mapu nirya ati yupu arebukce nyabuk. ‘Aminyan talak ara, minop Yebus nang obuka malye kipnamlanye bira, yin talina deiyok nang, sik weik deiyoknye, panglima keipdeipnune. Tonda, amutuku unamak nang bataklirye, sik deiyoknye unamlelarya,’ nyabuk. Ati ara, Yebus mutuku binuka opdayik talak ara, Yoab elda minop talak Yebus nang olbinamuknye ati, elda yin talin nang, sik deiyoknye panglima kibuka deibukba, ulamuk. (Yoab el lin bira, Zeruya ulamuk.)

⁷ Raja Daud anyapmek mutuku, Sion mutuku ara, mikip weik keil arye deibuka domik cang poka noutam domik ning ara tuba aupmoka. Wininmoka ati ara, amutuku noutam el si ati, “Daud el weik asik ara ani. Elce talenamle mutuku ara ani,” nyalamik.

⁸ Daud birye amutuku noutam, weik keil poka warikdongobuka dobuk. Winibukce, el pil deiyok kibuk tam ara, Milo mutuku tam tuku arye erebuka deibukce, bulubuka, keting yangan tam mutuku dam deilyayuk. Winibukopura, el Yoab birye dukdongobuka dolamuka ani, Yebus mutuku asik dana-dana tam lipsisikuka dobukce, sirya dakuk.

⁹ Raja Daud daupra balamuk talak, mikip weik kipnin balamuk. Winibuk deiyok ara, Allah Yahweh aning-aning nirya talibuka, deice tam ulul mikip weiknye birye, Daud biti meliamukba winilamuk. Allah el mikip areamuka deice arye, Daud bira mikip weik kipnin balamuk.

Daud elti, ‘Ninye deiyoknye Raja kepnamleʼ tenen, ulamik nang ara, bikamik yupu

¹⁰ Ninye deiyoknye Raja Daud, el yin talin nang, yuk nang ati ilil una kum arye, Daud ap melibuka bana ati, weik deiyok nang, sik si ara asukum nyapnuyabe. Sik anang ap, sik Israel mutuku noutam talye ulamik nang ap, neika ninye deiyoknye Raja Daud biti, ‘El adiparyuk talepsilirye, welepnamleʼ tenen, el yupu kekelamikce, elti, miliamik. Winilamika ani, Raja Daud el tibuk, Allah Yahweh arye, “Israel nang, sik deiyoknye unamle,” nyabuka nyalin yupu nyabukce, sik Israel yala nang deice nyapdeiamuk touk, Daud ninye deiyoknye erebuka deibikura, teleb kibuka ulamuk.

¹¹ Ninye deiyoknye Raja Daud, el dam unmak weik yin talin kel nang arye ulamik ara, lak nyapnuyabe. Ara ani. Hakmoni elce deiamuknye, el si Yasobam nyamuk. Anye bira, yin talin ati, weik kelnye ulamukce, sik yuk yin talen nang, mikip weik nang ulamik bukni, sik deice tam minyuma deiyoknye bira, el ulamuk. Anye Yasobam elda, mikip weik yin talin deiyok nang ton, winilye nang ati, buluna deiyoknye ulamuk. Anye Yasobam bira, minop talak, pia ilil una kum diparyuk, tonok ninye olban ati binamik talak ara, yuk mutuku nang, ninye yupa pia weik tiga ratus (300) nang, ninye ona ati, el si tombak arye lukamukba, atalak aryuk sik nirya diamik.

¹² Yasobam, el amu tam bitinye anye bira, nebuka tikna winilye nang buluna ati ara, Dodo elce deiamuknye, el si ara Eliazar ulamuk. Eliazar ara, Ahohi mutukunye ulamuk.

^13-14 Minop talak ara, Pas-Damim mutuku noutam arye, Eliazar bira Daud el ap neika ansinibuka, sik Pilistin nang olbana ati unmarik. Winiprik talak ara, sik Israel tam yin talin nang nirya, ‘Se, sik Pilistin nang arye opsicakʼ tenen, sik dam arye adiparyuk bibik abuka banmekce, Daud ap, Eliazar ap ara sik wininmek talak ara, Eliazar ap, Daud ap ara, tonok gandum wa wiamika noutam tikmarikce, talibuka delinmarikce, sik Pilistin nang arye, ‘Anang bitinye opnuyap tenen, yanganmek buk, sik bitinye arye, Pilistin yin talin nang yupa weik 300 nang onmarek. Atalak ara, Allah Yahweh el mikip weik sik anang deice deibukba, pia mikip weik arye aninye nirya opdikce sirya dakrik.

^15-16 Tonda, tonok talak ton, Daud el weik kel yin talin nang ara, 30 nang ulamaik bukni, sik kan-kan arye, ninye winilye nang ara, ‘Nun ninye deiyoknye Raja Daud, el epdanamapʼ tenen, tonok mutuku el si keil mutuku nyalamikak ara, Adulam mutuku dam uamuk keil pum biyik. Ninye deiyoknye Daud elda, weik keil arye domik sukum, ‘Nimalyap arye dakeiyam asa unaʼ tenen, domik mutuku noutam unmok. Amutuku noutam unmok talak ara, sik Pilistin nang, iknapye tam mutuku, Refaim nyalamik mutuku unmek. Ton yupa ara, Betlehem mutuku sik Pilistin yin talin nang ton unmek.

¹⁷ Sik nirya daunmeka ani, tonok sum ara, ninye deiyoknye Raja Daud, el mutuku koproba ati tenenmokce nyabuk. “Se, na tepnarye patapnile. Ninye ton na mek din ati, Betlehem mutuku wekelban bisik dam ara, mek pu arye mek kwebuka arepnikiba, na kanye deiptinye,” tenebukce nyabuk.

¹⁸ Nyabukura, sik weik kel yin talin nang, sik ninye winilye nang arye, yupu tana kumce talye karin arye Pilistin yin talin nang, sik kalikmikbuk, bisibuka biyikce mek kwebuka, duknubuka tamubuka yayik. Amek kwebuka yayikopura, adiparyuk bobuka, Daud dam boyayik. Dobuka yayik bukni, Daud elce amek kum dibuk. Amek adiparyuk Allah Yahweh el arena ap, el si erena ap, bikilina ap ati diklobuk.

¹⁹ Amek diklobukce, Raja Daud elce nyabuk. “Diba na ni koproba Allah an si deice arye, aminyan na kum dipnune! Na amek dipnyopura, malye upnyake. Ara, sik anang kam una ati nirya dobuka, na melina ati asukumuk deipmaniake. Pilistin nang arye awinilye nang opmanto upmaka babye, anang arye omutuku binuka kwebuka boyanmaniake. Ati, amek dipnyop ara sik winilye nang, sik ining dobuka din atouk una ati, aning ara kum winiptinye,” nyabuk. Ati Daud bira amek dipkoprob pia kum dibuk. Aning ara, sik weik kel yin talin nang, winilye nang arye winibik ati sekmabe.

^20-21 Ura, Yoab el weit koproba Abisai bira, yupa tigapuluh yin talina deiyok nang, sik deiyoknye ulamuk. Elda pia ilil kumnye kibuk. Ara, el Abisai bira, ninye yupa pia weik, tiga ratus (300) nang ton, ninye on ning el si tombak arye, lukamukba sik nirya diamik. Aning ati ara, ninye tiga puluh (30) nang ara, sik deiyoknye ulamuk. Amutuku ninye nirya arye, el si bikamikce, elti, si erebuka kilamik. Sik Israel nang arye, sik yin talin nang, 30 ulamik nang kel kiamik bukni, sik anoutamak ara, elti, weik arye, si erebuka kilamikce, el si kel kiamik. Bukni, sik yin talin weik kel kiamik nang, sik winilye nang ara, sik kibuka kum erelamika ati, sikda amu tamuk ulamuk.

²² Tonda, ninye si Yoyada, elce deiamuknye Benaya bira yu yin talenanye ulamuk. Benaya elda, Kabseel mutukunye ulamuk. Benaya elda, ilil pia tenena kum, tonda elda weik kanye imun ning ulamukba, ninye nirya arye elti, bikamik. Benaya elce mikip weik yin talin nang, Moab mutuku nang ton obuk. AMoab mutuku nang bitinye obuk ara, sik ni koproba si ara, Ariel ulamuk. Aning atouk, tonok talak arukna talin li noutamak ara, im noutam arye pia bul mok celamuk talak ara, aning el si salju saklamuk talak ara, anye Benaya bira tonok mutuku noutam weik bon uamuk. Atuku pum tam wekamuk talak ara, weik yu pus, el si singa tonok ton aunmokak, Benaya birye obuk.

²³ Tonda, minop talak ara, Benaya birye Mesir mutukunye, weik nong cangnye ton omuk. Mesir mutukunye, el nong cang ara, pia weik kiklina ara, dua setengah meter (2.5 meter) arye nemuk. Aobuknye babye, el ninye on ning el si cang weik tombak, weik cang ap, ikin ning ap ton bomuk. Bukni, Benaya birye, Mesirnye dam, talye kama dem bobuka yayuk. Yayukopura, Mesirnye bopmuk ninye on ning, tombak alubuka, Benaya adiparyuk anye el mining tombak arye, Mesir mutukunye oplobuk.

²⁴ Aning atouk Yoyada el mi Benaya ulamukba, amutuku noutam ulamik nang nirya arye, el si kel kiamik. Sik Israel nang arye, sik yin talin nang 30 ulamik nang kel kiamik bukni, sik noutamak ara, el Benaya biti, weik arye si erebuka kilamikce el si kel kiamik. Bukni, sik yin talina kel weik kiamik nang, sik winilye nang ara, sik atouk kum ulamuka ati, Benya bira sik amu tamto ulamuk.

²⁵ Atiga puluh (30) yupa tonok arye kepdopnye pamubarye yin talina weik kel nang, el Benaya bira, sik yupa noutam ton ulamuk. Ilil kum diparyuk, mikip weik ulamuka ati, amutuku nang arye el si kel kiamikce, si erebuka kilamik. Bukni, Benya bira, weik kel kin ning kong winilye ara, sikce weik kanye imun ning ulamik touk, el ton kum winilamuk. Bukni, mikip weiknye ulamuka ati, Raja Daud birye, ‘Yu nang arye opnicakʼ tenen, el nong kalikna ati, yin nang ton wibuka deibukce, Benaya erepdeibukce, sik deiyoknye kibukba, apil talibuka ulamuk. Raja Daud el nong kalikna deiyoknye kipdeibuk.

Daud el weik kel kiamikce, mikip weik yin talin nang ati, nyabuk yupu

²⁶ Ura, Raja Daud, el mikip weik ap, weik kelkin ning ap, ulamik yin talin nang ara, sik si ani. Ara, Yoab el weit koproba Hazael ulamuk. Tonda, Dodo el mi Elhanan bira, Betlehem mutukunye ulamuk.

²⁷ Utouk, Harod birye deibukba, dadeipdanin yangalamik nang arye deibiknye, el si Samot ulamuk. Tonda, Peloni birye deibukba, dadeipdanin yangalamik nang arye deibiknye, el si Heles ulamuk.

²⁸ Tonda, Tekoa mutukunye Ikesi, elce deiamuknye Irad daulamuk. Abieserda, Anatot mutukunye ulamuk.

²⁹ Husa mutukunye arye deibukba, dadeipdanin yangalamik nang arye deibiknye, el si Sibkai ulamuk. Ahohi mutukunye arye deibukba, dadeipdanin yangalamik nang arye deibiknye, el si Ilai ulamuk.

³⁰ Tonda, Maharai bira Netofa mutukunye ulamuk. Tonda, Baana el mi Helet bira, Netofa mutukunye ulamuk.

³¹ Tonda, Ribai elce deiamuknye Itai bira, Gibea mutukunye bukni, Benyamin yala nang ulamik tam noutam ulamuk. Tonda, Beanaya bira, Piraton mutukunye ulamuk.

³² Hurai bira, Gaas mutuku kup-kup bukni, amutuku lu tamnye ulamuk. Tonda, Bet-Araba birye deibukba, dadeipdanin yangalamik nang arye, deibiknye, el si Abiel ulamuk.

³³ Asmawet bira, Bahurim mutukunye ulamuk. Elyaba ara, Salbon mutukunye ulamuk.

³⁴ Hayem bira, Gizon mutukunye ulamuk. Sage, el mi Yonatan bira, Harari mutukunye ulamuk.

³⁵ Sahar el mi Ahiamda, Harari mutukunye ulamuk. Ur el mi Elifal ulamuk.

³⁶ Mekeratinye arye deibukba, dadeipdanin yangalamik nang arye deibik nye, el si Hefer ulamuk. Ahiada, Peloni mutukunye ulamuk.

³⁷ Hesraida, Karmel mutukunye ulamuk. Ezbar elce deiamuknye, Naarai ulamuk.

³⁸ Natan el weit koproba si ara, Yoel ulamuk. Hagri elce deiamuknye, Mibhar ulamuk.

³⁹ Amon yala nang arye deibikura, dadeipdanin yangalamik nang arye deibiknye Zelek ulamuk. Yoab el yin ap, mal ap, parang ap ara, Beerot mutukunye, el si ara Naharaidi boyanamuka ati, el ton daulamuk.

⁴⁰ Ira ap, Gareb ap ara, Yetri mutuku nang ulamdik.

⁴¹ Uriada, Het yala nang arye deimikak daulamuk. (El kil si ara, Batsyeba ulamuk). Ahlai elce deiamuknye, Zabad ulamuk.

⁴² Siza elce deiamuknye, el si ara, Adina ulamuk. Elda Ruben yala nang, sik deiyoknye, yin talinatiga puluh (30) deiyoknye kibuka taleamukce, daulamuk.

⁴³ Maakha elce deiamuknye, el si ara Hanan ulamuk. Yosafat bira, Mitni mutukunye ulamuk.

⁴⁴ Uziada, Asytarot mutukunye ulamuk. Hotam el mapu ara, Syama ap, Yeiel ap, sikda Aroer mutuku nang ulamdik.

⁴⁵ Simri el mapu ara, bitinye. Ara Yediael ap, Yoha ap, ulamdik.

⁴⁶ Elielda, Mahawim mutukunye ulamuk. Elnam el mapu ara, bitinye ulamdik. Ara Yeribai ap, Yosawya ap, ulamdik. Yitma bira, Moab mutukunye ulamuk.

⁴⁷ Ninye si winilye Eliel ap, Obed ap, tonda Yaasiel ap ara, Mezobaya mutuku nang ulamik. Sik asi sekmapu nang nirya ara, Raja Daud, el yin taleamik nang ara, weik kel kiamikce, yin talina mikip weik nang ulamik.