1 Tawarikh 10 - Eipomek

Israel yala nang, sik deiyoknye Raja Saul dibuk yupu

¹ Pilistin yala nang ap, Israel yala nang ap, olalamik. Winilamik bukni, sik Pilistin yala nang arye, Israel yala nang ati, malye kipmanto kibikce, olanmeka ani, Raja Saul ap, el yin talin nang ap ilil ubukba, sik anang nirya, bai sakuka, bibik abuka biyik. Israel yala nang ara, aolalamikak arye weik tonun dibik. Ton nang ara, Gilboa mutuku dam oplobikba, asukumuk dibik.

² Saul ap, el yin nang ap, bai sakuka biyik bukni, sik Pilistin nang aminyan dobolbiyikce, Saul el mapu ara, winilye nang ton binuka obik. Anang sik si ara ani. Ara, Yonatan ap, Abinadab ap, tonda Malkisua ap, sik awinilye nang nirya obik.

³ Aolana ara, sik Pilistin yala nang arye, yu weik kanye bobuka, olan deice arye olanmik. Wininmik ati, sik Pilistin yala nang, sik olanmik yin arye marabikba, Saul babye obik bukni, adiparyuk kum dibuk. Mal arye marabikba, Saul el weik dila upmuka deice arye dipmanto upmok.

⁴ Winimikura, Saul dipmanto upmok bukni, ninye olan ati, el melibuka ikin ning ap, el yin ap talibuka balamuk welnye biti nyabuk. “An ninye ona ati bopmalam parang ya arye dopmince, adiparyuk lukuka opnilyame. Pilistin nang ara, Allah el si walwal nang unyak ati, sik den bam bola deice tam ning kum sekenyake. Ati, Allah el dam yanmanto kum nang unyake. Tonda, sik amalye weik unyak nang arye, na ati, ‘Elda talinyeʼ tenen, nati malye kipnikirye, opnamniyake. Winipnikcak ati, parang ya dopmince, adiparyuk lukuka opnilyame,” nyabuka morobuk. Nyabuka morobu bukni, awelnye bira, ilil pia weik ubuka ati, Saul kum lukuka obuk. Awel nye, el weik ilil ubukba batakuk. Winibukopura, Saul el mining liamuk yu weik parang ya dobuka ikupce, aya si deice poulbiyukba, adiparyuk lukdanuka opdayukce, dibuk.

⁵ Saul akunum dibukura, Saul el melina ati, ninye olban talak ongolamuk kat baju ap, el yin ap, talibuka balamuk wel nye, akunum eibukura, el babye ilil ubukba, el nong erebuka, el mining bopmuk parang ya ikuka, atace deice poulyanuka, opdayukba dibuk.

⁶ Aning nirya, winilamik deice arye, Saul ap, el mapu winilye nang ap, sik nirya dibik. Winibik deice arye, Saul el ninye deiyok talibuka, Raja kibuka ulamuk ning ara, asukumuk deibuk. El ap, el mapu silip nirya ap ara, akunum olanauk ubikce, sirya dakik.

⁷ Atalak ara, Yisreel mutuku lu ulamik Israel yala nang nirya arye, aning bikikce, ton nang ara, ‘Se, Pilistin yala nang arye, Saul ap, el mapu winilye ap, akunum obuka sirya dakik. Tonda, Israel mutuku yin talen nang nirya ara, akunum bai sakuka bindobake,’ nyabuka, lak nyabikura, Israel yala nang nirya arye, ayupu kekenmek nang ara, ilil ubukba, sik mutuku ap, sik asik dolamikce ulamik sukum arye batakuka, bai saka biyik. Amutuku ulamik Israel nang arye bindobikba, sik Pilistin yala nang arye, aning eibikce, amutuku yauka, amutuku noutam teleb ning, ulamuk ning nirya ara, yana alubuka doprobikce, amutuku uk talebuka ulamik.

⁸ Amutuku yan alabuka dorobikce, mapmika berekukura, Pilistin mutuku yin talin nang yayikce, ‘Sik Israel yala yin nang opmap nang nirya, sik talilamik ning ap, baju ap, sik nong deice tuba aupmalye ning nirya ara, upula dopropnuyapʼ tenen, Israel nang obuka batakmek sukum yanuka eibik. Ara, Gilboa mutuku deice welebikce, Saul ap, el mapu winilye nang ap, oplopmik nang nirya ap, sik nong eibik.

⁹ Winibikce, Saul el ninye olban talak ongolamuk kat baju ara, yanuka kwiribuka doprobikce, Saul el kisok sekuka dobikce, libuka biyik. Winibikopura, ‘Pilistin mutuku noutam ulamik nang nirya kekenamakʼ tenen, laka nyalbana ati, ninye ton wepdeibikce, dopkwetebikba, ayupu kekebik nang arye binuka, amutuku-amutuku ulamik asik ap, amutuku nang arye, ‘Nun ni koprobaʼ tenen, talye ning si erelamik ning delilamikak nirya ap, weik yupu deice arye, lak nyalbiyik. Ati, anang arye laka nyalbiyikak, amutuku nang nirya kekebik.

¹⁰ Saul birye, ‘Ninye olbinun tenen, ongolamuk kat baju ara, Pilistin yin talin nang arye, aning bobuka, Pilistin nang, sik si erelamik ning delina ati domik aik pum tam deiamik. Tonda, Saul el kisok duk ara, sik si erelamik isa, el si ara Dagon nyalamik ning, el si eren aik pum tam noutam arye kirik kwetebik.

¹¹ Awinipmek bukni, Yabesh mutuku nang bukni, Gilead mutuku dam ulamik Israel yala nang arye kekenmek. Ara, yuk nang arye, “Se, Pilistin yala yin talin nang arye, Saul opmakce, el kisok duk ara, Filistin nang sik si erenyak isa, el si eren aik koproba binuka, kerikwetepmake,” nyabikura, kekebik.

¹² Kekebikopura, Yabes-Gilead mutuku nang, yu weik nang ulamika ati, ilil una kumce, mikip pia weik nang wibuka deibikura, anang biyikce, Saul ap, el mapu winilye ap, oplopmek sukum binuka, sik nong doprobikce, Yabesh mutuku tamubuka boyayik. Akunum bobuka yayikopura, sik opmek nang, sik nong ap, sik yok ap nirya ara, weik yo tekamuka deiyok amu tam yanuka, tuku lukuka weibik. Winibikce, sik Israel nang nirya ara, like nakub barye sum noutam nirya ara, ‘Se, nun deiyoknye Saul obikeʼ tenen, din dina kum diparyuk, din si tebuka, talye engana uk ulamik.

^13-14 Saul dibuka deiyok ara ani. Ara, Saul birye Allah ati, “Winipnamne,” nyamuk ning ara dukdongobuka kum winilamukce, batakuk. Aning ara, Allah Yahweh nyamuk yupu ati, dukdongopra kum ulamuka deice arye dibuk. Tonda, Allah Yahweh arye, “Wininamlume, aning ara, pia kum wininamlume,” nyapdeiamuk mem yupu ati ara, Saul birye ayupu kekebuka kum ulamuka deice arye dibuk. Aninguk kum bukni, Saul bira, Allah ati, “Na walwal upnil ning ara, ance lake nyapnilyame, aninguk unamne,” nyabuka, kum moryamuk bukni, elda ninye diamik nang, sik kanya ap, yupu nyana kel nang, sik dam bin morobuk. Elce, ‘Aning winipnamne do, aning winipnamne do?’ tenena kum arye, walwal ulamuk talak ara, amalye pil dobuka ulamaik nang, sik dam binuka, morobuka ati, Allah Yahweh arye Raja Saul el wenen ati, arebukba dibuk. Dibukopura, el pununa ati, Allah Yahweh arye Saul elce Israel nang ati, ninye deiyok kibuka, Raja kiamukce, amutuku nirya talilamuk ning pununa ati, aning nirya dobuka, Isai el mi Daud ati arebuk.