1 Samuel 6 - Eipomek

Allah arye nyapdeiamuk mem yupu sekuka arebuk ning ara, Peti Perjanjian yo pum dongamik ning, Pilistin nang arye, Israel yala ninye ati, tamubuka arebik yupu

¹ Allah Yahweh arye, nyapdeiamukba, sekukabukce, Israel ninye ati areamuk mem yupu ara, sikce aning dongobuka deiamik peti yo pum el si ara, Nyalin Yupu Marikna (Peti Perjanjian), amarikna pum dongamik ning ara, sik Pilistin yala ninye ulamik mutuku nirya, amarikna dobuka, deiamikba, dauamuk talak nirya ara, wala tekbarye (7) deice arye, amutuku uamuk.

² Ulamik talak ara, sik Pilistin nang arye, sik mutuku nirya ulamik imam yala nang ati yu kubik. Tonda, asing keten nang ap ati, yukubikce asipdeiyik. Ara, “Israel ninye sik ni koproba, Allah Yahweh arye, mem yupu nyapdeibukba sekukabukce, Peti Perjanjian yo pum deibik ning ara, nun mutuku noutam aupmal bukni, wini talak ara, yata wiripnamap do? Nun adiparyuk tamubuka, sik Israel ninye min arye deiamikakuk, bobibirye arepnamap do? Tonda, yata ning deice deibibiba, marikna yo bobinamap do? Tonda, amarikna talye urdemuk bobinamap do? Kumopura, yata ning ap tabakuka, apeti ap deibibirye, aning tamubuka bobinamap do?” nyabuka, asipdeiyik.

³ Asipdeyikba, sik amutuku noutam ulamik imam-imam nang ap, asing keten nang ap nirya arye, tamubuka nyabik. “Allah arye, mem nyapdeiamukce, yupu sekamukba, sik Israel nang arye aning dobuka, marikna pum dongamik ning ara, ‘Sik Israel yala ninye unyak mutuku bobinuka, apeti pum tam deiamik ning ara, talye urdemuk, tamubuka bobibirye, omutuku uk dadeipnuyabe,’ tenena pia meme. Aning kum bukni, anggun ap, neika ansinibuka, malye umunye ning dekena ap, kum danalina ap ara, amarikna ap, Allah el arena ati, yuk deken ning ap, dekena teleb ning ap, bobinuka arenamlume. Aning akunum winipmunyopura, Israel ninye, sik ni Allah arye, nun Pilistin nang ati, malye ubupu ning namin kipsilirye, nun amutuku unyap ninye kwetebuka, teleb kipdeipnamsile. Tonda, anggun biknamlume. Ara, Israel ninye arye, si erenyak Allah ara, elce tuba-tuba pia ikin ning, nun deice deilisulula ara, ‘Deiyok aniʼ tenen, biknamlume,” nyabuka, sik imam-imam nang arye nyabik.

⁴ Nyabikba, sik Pilistin deiyok nang arye, tuba tamubuka, “Nun malye unyap ning, kum daneibuka teleb kilina ati, nunce Allah elti, yata deken ning areptibye do” nyabuka, sik Pilistin deiyok nang arye asipdeiyik. Nyabikba, sik imam-imam nang arye, tamubuka nyabik, “Nun ap, nun pamubarye ninye deiyok nang ap, kanye imun weik suse dilamsuk touk, aning urasin atonun ubuka, dekena weik ning, emas arye puturubuka deipnamlume. Winipmunce, pamubarye weik torok atonun suse, weik tonun nelamle ning ap, tonda kub mana urasin atonun ubuka, pamubarye ap, kat ning emas arye puturubuka deipnamlume. Deiyok ara, anggun ninye deiyok kibuka, ululum nang nirya ap, anggun talye Pilistin mutuku noutam daumunye ninye ap, anggun deice, aning weik awamuka anya arye, aning urasin atonun puturubuka bobinamlume. Allah arye ikin ning, sik nong deice deibuk ning ara, suse weik tonun nelamukce, bukuka dilamuk ning ap, kub mana weik ton ap areamuk. Ati, kat ning emas arye, aning urasin atonun ubuka puturupdeimunce, Allah yukuna ati, bobinuka arepnamlume,” nyabik.

⁵ Ati, sik Pilistin nang ara, suse weik tonun nelamukce, bukuka dilamuk suse ap, tonda, kub mana anggun mutuku noutam koulamik ning, weik tonun dilamuk ning ara, akub ap, asuse ap, urasin atonun ubuka, kat ning emas deice arye, puturubuka deipmunce, kintinip deipnamlume. Anggun nirya arye, anggun ninye deiyok nang ara, aning weik uamukba, imun kanye bobuka, ikin asa ulamluma anya arye, aning dobuka, Allah ati arenamlume. Winipmunyeba, Israel ninye arye, si erenyak Allah ati, ‘El si erepnamapʼ tenen, el si erepmunce, el dam binuka, kibuka si erenamlume. Winipmunyopura, elce anggun wenena ati, ikin ning weik aresulul ning ara, ‘Tuba tamubuka doproplirye, aning kum kipdeipnamle do, kum do?’ tenen, dinamabe. Ara, anggun nong ap, anggunce talibuka ululum mutuku ap, anggunce si erelulum ning ap ara, ‘Wenen ning ara, kum daneiplirye, bataknamle do, kum do?’ tenen, dinauk unamabe.

⁶ Tonda, tenipdelulume. Anggunce anyapmasin ning ton, kum winipmunce, mandipna kanye bopmunyopura, min talak Mesir mutuku taleamuknye, Firaun ap, el taleamuk ninye nirya ara, sikce Allah yupu kekena kumce, mandipna kanye bobikura, sik dam yata wiryamuk do? Allah arye, kanye imun ning, sik nong deice deiamuk touk, anggun Pilistin mutuku ululum ninye babye, atonun winipnamsil do? Aning ara, luba kipmunyake. Allah arye, sik Mesir mutuku ninye ap, sik deiyoknye Firaun ap ati, weik tonun wenebukba, ninye weik dibik. Ton ning ara, ikin ning weik, sik nong deice deibukba, sikda imun kanye weik bobuka ulamikce, ikin kanye weik bolamik. Winilamika ani, aminyan talak ara, Mesir mutuku, sik deiyok nang arye, Israel ninye nirya batakikba, adiparyuk bindobik. Aning nirya ara, anggun Pilistin ninye ton, kum biklum do?

⁷ Ati ara, sapi basam deice deibuka, tapu koupdongobikiba, tuku deice bukuka ban ning, winiryuk ning ton kintinip deipnamlume. Tonda, kil sapi basam bitinye ton kintinip deipnamlume. Ara, akil sapi basam, sik mapu moum tuba dinmarikce ninguk, kintinip deipnamlume. Tonda, asapi basam bitinye ara, tuku deice ban ning, kereta libuka bobana ati, sik ngang deice delinyak kat yo ara, asapi basam ngang deice ton, ngang delinyak ninguk, wipdeipnamlume. Winipmunce, akil sapi basam bitinye ara, tuku deice ban ning, tapu arye kiriknamlume. Abitinye sapi basam arye, deipdik sapi basam mi ara, dobuka yuk sukumak bobinuka kiriknamlume.

⁸ Winipmunyopura, Allah Yahweh arye, “Aning ara, wininamlume, aning ara, pia kum wininamlume,” nyapdeiamukce, sekdeiamukba, sik Israel imam nang arye, ayupu bobuka, Nyalin Yupu Marikna pum deiamik ning, apeti dobuka, asapi lipdongopniba, tuku deice ban ning, kereta deice deipnamlume. Tonda, apeti dam dana-dana ara, Allah el arena ati, dekena weik ning, emas deice kub mana ap, suse ap, urasin ato ning puturubuka deipmamunye ning ton, akereta deice deipnamlume. Aning ara, ‘Nun malye wininyap ning, namin kipsutueʼ tenen, kintinip deipnamlum ning ati nyapmabe. Aning nirya dobuka, kereta deice deipmunyeba, asapi basam kil bitinye arye, akereta libuka bobinamdake. Sik yuk, otam Israel ninye unyak mutuku noutam, libuka bobinamdake.

⁹ Winipmunyeura, sapi basam bitinye arye, bobarikce talak ara, anggunda dinamalulume. Allah arye nyapdeiamuk yupu, Nyalin Yupu Marikna (Peti Perjanjian) pum libuka deibik ning bobanmarikca ani, ton tamubuka yangana kumce, tuba nong bisikuk banmarica ani, Israel yala ninye, sik tam bukni, mutuku si Bet-Semes mutuku asik dobuka, unyakak berikcopura, adeice arye anggun biknamlume. Ara, ‘Israel ninye, sik ni koproba, Allah arye, nun dam kanye imun ning deiamsukba, uk dilamsuka ara, akunum diplamupuʼ tenen, biknamlume. Bukni, Allah yupu nyapdeiamukba, libuka deibik Nyalin Yupu Marikna yo ap, (Peti Perjanjian) emas arye suse ap, kub mana urasin ato ning puturubuka, deipmamunye ning, asapi basam arye, libuka bobanmalye ning ara, sapi basam Bet-Semes bisik kum bilirye, tamubuka nun mutuku uk tuba yalyopura, ‘Se, nun deice ikin ning, yayukba dopromubu ning ara, Israel ninye sik ni koproba Allah, elce kum deipsuke. ‘Nun malye ububa deice arye, aning yayukba, ikin upsukʼ tenen, biknamlume.

¹⁰ Sik Pilistin mutuku imam-iman nang ap, asing keten nang ap arye, nyabuka lak nyabikopura, sik Pilistin ninye arye, anyabik touk winibik. Ara, sik Pilistin nang arye, aning nirya akunum winibikopura, asapi basam bitinye, sik mapu moum dinin marika doprobikce, asapi basam bitinye tapu arye, kirikdongobuka bobiyikce, tuku deice bana ati, kereta libuka bobiyik. Winibikura, sik mapu moum dinin marikak arye dobuka, yukak poka dobuka, antanalongamik aik pum dongobik.

¹¹ Winibikopura, Pilistin nang, Allah arye, “Aning ara, wininamlume, aning ara, pia kum wininamlume. Aning ara, meme,” nyapdeiamukce, sekuka areamukba, sik Israel nang arye, aning dobuka, Nyalin Yupu Marikna (Peti Perjanjian) pum dongamik ning ap, kat ning emas arye puturubuka, kub mana urasin atonun, memebuka deiamik ning ap, tonda weik nelamuk suse bukuka dilamuk ning urasin atonun, memebuka delilamik ning nirya ara, marikna pum dongobikce, akereta balye deice deibikura, asapi basam bitinye lopdongobik. Lopdongobikba, asapi basam kil bitinye arye, tuku deice bana ati domik kereta libuka bobirik.

¹² Asapi basam bitinye ara, akereta libuka bopmarikce, yuk bisik bana kumce, Bes-Semes mutuku balamik bisik diamuk birik. Asapi basam bitinye ara, bisik banmarikce, yupu nyapnin banmarik deice aryuk banmarik. Weik bisik yokauk banmarik talak ara, kwanim tam okipdopna, sirik tam akipdopna winipnin kum banmarik. Sik Pilistin mutuku ninye deiyok nang pamubarye nang babye, akereta aminyan tam melibuka dobolbanmeka ani, sik tam mutuku ap, Bet-Semes mutuku ap, wilyamikak asukum birik.

¹³ Atalak ara, Bet-Semes mutuku noutam ulamik ninye, gandum wa wilamik ning ara, akunum wisamukba, amutuku luh nirya ara, yupmekce, linmek. Wininmek talak ara, Allah arye, “Aning ara, wininamlume, aning ara, pia kum wininamlume, aning ara pia meme,” nyapdeiamukce, sekuka areamukba, sik Israel nang arye, aning dobuka, Nyalin Yupu Marikna (Peti Perjanjian) pum dongomikba, sapi basam bitinye arye, libuka akereta boyangamarikba, sik gandum linmek nang eibikce, amutuku ninye nirya kanye weik deibik.

¹⁴ Aning boyanganmok sapi ara, bukuka yanmarik kereta ara, Bet-Semes mutukunye Yosua birye, wa wiamuka dam ara, weik keil ton abukamuk anya arye, asukumuk yanuka tikrik. Akereta asukumuk baplobuka, yanuka tikrikopura, amutuku noutam ulamik nang nirya arye, akereta deice deibuka, domik yo nirya dakukabikce, asapi basam bitinye babye, obuka libikce, Allah Yahweh si erebuka kina ati, aning nirya dobuka, uku dongobik.

¹⁵ Winibikopura, sik Lewi yala nang ara, Allah Yahweh arye nyapdeiamukba, dobuka Nyalin Yupu Marikna (Peti Perjanjian) pum dongamik ning ap, tonda, kat ning emas arye puturubuka, liamik ning, kub mana ap, weik torok ap, urasin atonun ning puturubuka, deiamik ning, yuk-yuk nirya ap, ayo marikna pum deipmek ning ara, kereta deice dobuka laka deibik. Deibikopura, adiparyuk, awa windam weik keil bukamuka deice binuka deibik. Aning akunum winibikopura, Bet-Semes mutuku noutam ulamik nang arye, Allah Yahweh el si erebuka kina ati, kam ning obuka, uku dongolyanganmek. Tonda, Allah si erena ati, yuk-yuk teleb ning yala-yala nirya ap boyanarye, yanuka arenmekce, Allah ati si erelamik.

¹⁶ Atalak ara, sik Pilistin mutuku arye yanganmek nang, sik pamubarye ninye deiyok nang arye, aning nirya akunum eibikopura, Bet-Semes mutuku batakuka, sik asum aryuk sik mutuku, Ekron mutuku uk, tamubuka biyik.

¹⁷ Aning akunum winibik deice, sik Pilistin nang malye ulamik ning ara, Allah Yahweh, elce pamubarye mutuku nirya ulamikce, sik pamubarye ninye deiyok nang, Raja Pilistin mutuku ulamik nang nirya, sik wenena ati, kanye imun weik suse areamuk ning ap, kub mana weik areamuk ning ap, ‘Kum daneipnamsilʼ tenen, Allah ati arebik. Ara, sik malye ulamik ning ap, malye yupu nyalamik ning ap ara, ‘Allah arye, tuba wenepsilyakʼ tenen ati, aning nirya arebik ara, ‘Tonap tamubuka telebuk uptibyeʼ tenen ati, Allah ati arebik. Aninye deiyok nang winilamik touk, emas arye, puturubuka deibik suse urasin atonun, puturubuka deibik ning ara, ani. Sik pamubarye mutuku nirya awamuk touk, emas ton puturubuka arebik. Amutuku si ara, Asdad mutuku ap, Gasa mutuku ap, Askelon mutuku ap, Kat mutuku ap, tonda Ekron mutuku ap, sik malye ulamik ning dekna ap, pununa ap ati, emas ton arebik.

¹⁸ Aning atonun, sik Pilistin ninye deiyok nang, pamubarye ulamik touk, emas arye puturubuka, deibik kupmana urasin atonun, puturubuka deibik ning ara, amutuku nirya ulamik touk, kub urasin ato ning babye, pamubarye arebik. Amutuku noutam bukni, sik pamubarye ninye deiyok nang arye, weik asik domik ning taleamik touk, aning babye pamubarye arebik. Ara, kat keil tembok arye antanap dongobuka, poka domik mutuku ap, tonda mitik-mitik mutuku ara, keil poka tembok deibuka, min domik ning ap, amutuku nirya ara, weik suse urasin ato ning ap, kupmana urasin ato ning ap, kat ning emas deice puturubuka deiamik ning arebik. Ura, apil domik ning ati, ‘Tuba aning tenipnamapʼ tenen, lak bikilina ati aning ara, Yosua el wa windam nirya, weik mutuku yangamuk keil tuba aulule. Akeil dam ara, sik Lewi yala nang, Allah Yahweh arye, “Aning ara, wininamlume, aning ara, winina pia meme,” nyapdeiamukce, sekuka areamukba, sik Israel nang arye, Nyalin Yupu Marikna (Peti Perjanjian) yo peti pum deiamik ning, asukumuk binuka deibik. Apil dobik ning lak bikina ati, atalak noutam arye, dipdongobuka, wini talak babye, akeil ara, tuba Bet-Semes mutukunye, Yosua birye wa windam aubuk touk, tuba aulule.

¹⁹ Bukni, asum ara, sik Bet-Semes mutuku nang nirya arye, ton nang ara, Allah Yahweh arye, “Aning ara, wininamlume, aning ara, winina pia meme,” nyapdeiamukce, sekuka areamukba, sik Israel nang arye, Nyalin Yupu Marikna yo peti, el si ara, Peti Perjanjian pum deiamik, noutamuk binuka dinmek. Awinibik ning ara, pia winipmanto kum ning, pia mem ning ati, sikce apeti pum dilendenmek talak ara, Allah Yahweh yu ubukba, elce sik wenena ati, sik ap, sik mapu ap, ara tujuh puluh nang (70) obuka kum danaibuk. Allah Yahweh arye, kanye imun ning dobuka, sik deice deibukba, awinibuk ning ati ara, amutuku noutam ulamik nang nirya arye, ‘Seʼ tenen, weik tonun engenmekce, imun kanye bobuka unmek.

Allah arye nyapdeiamukce, sekdeibukba, Israel nang arye, Nyalin Yupu Marikna, Peti Perjanjian pum dongamik ning dobuka, Kiryat-Yearim mutuku deiamika ati, nyabuk yupu

²⁰ Winibikopura, sik Bet-Semes mutuku noutam ulamik nang nirya arye nyabik, “Se, yatanye birye, Allah Yahweh el dam tia ati, binuka tiktu do? Kume, Allah Yahweh elda, pia teleb ulule. Elda pia telenye ulule. Apeti pum ara, nun mutuku noutam tuba awaplyopura, ‘Allah arye opsilyakʼ tenen, ilil upmasila ati, nun min pola yata mutuku bobitibye do? Winibuka, nun Bet-Semes mutuku nang dam arye, Nyalin Yupu Marikna (Peti Perjanjian) bobinuka, dan mutuku ton binuka deiptibye do?” nyabik.

²¹ Nyabikopura, adiparyuk, sik Bet-Semes mutuku noutam ulamik ninye arye, yuk mutuku nang ati, ara Kirya-Yearim mutuku noutam ulamik nang ati, yupu nyapdeibik. Yupu nyapdeipnuyika ati, sikce wipdeibik nang arye, nyalbiyik yupu ara, ani. “Anggunce, sik Pilistin nang ara, Allah Yahweh arye, nyapdeiamuk yupu sekuka arebukba, Israel nang arye, aning bobinuka, Peti Perjanjian pum deibik ning, akunum tuba tamubuka deipmake. Ati ara, asukum yamunyopura, ayo marikna peti ara, anggun Kiryat-Yearim mutuku nang arye, asukum yanuka, aning dopropmunce, anggun umunye mutuku uk, tamubuka bobanamlume,” nyabik.