1 Samuel 5 - Eipomek

Allah el nyalilamuk yupu dongamik marikna, Peti Perjanjian ara, Pilistin ninye, sik ulamik mutuku noutam, tuba uamuk ning ati, nyabuk yupu

¹ Pilistin nang arye, Allah el nyalin yupu dongobuka deiamik marikna, el si ara Peti Perjanjian, Haezer mutuku arye alubuka doprobikce, sik mutuku koproba Asdod mutuku binuka deibik.

² Sik Pilistin nang arye, amarikna doprobikce, sik si erelamik isa si erena ati delilbiyik. Sik si erelamik isa, el si ara, Dagon nyalamik aik delilbiyik. Aisa si erena ati, puturubuka deyamik dam ara, Allah el nyalilamuk yupu liyamik marikna, Peti Perjanjian deibik.

³ Deibuka mapmika ani, berekukopura, sik Asdod mutuku kili sal arye, Allah el nyalilamuk yupu liyamik marikna anyaik pum deibuka mapmikak anyuk binuka dililbiyik. Dipdeyikbuk, sikce isa si erelamikce, aisa el si ara, Dagon nyalamik ning ara, yanuka dipdeyikba, Allah Yahweh el nyalilamuk yupu liyamik marikna, Peti Perjanjian dam, dakasakuka poulbinmokce, el asok ara, amsuna deice lumlumubuka poulbinmoke. Aning eibikce, aputurubuka deiamik ning, el si Dagon dobuka, ila tamubuka min arye deiamik sukumuk delilbiyik.

⁴ Min arye deiamikakuk, delilbinmek buk, ila tuba mapmika ani, berekukopura, yanuka delelamikop unyak talye ning ati, ‘Nun ni,’ nyabuka, si erelamik ning Dagon ara, ila tuba tonap, Allah el nyalilamuk yupu deiamik marikna, Peti Perjanjian dam, daksakuka poulbinmokce, el asok urasin ara, amsuna deice lumlumubuka poulbinmoke. Atalak ara, gambar ara amarikna dam sakuka poupmokce, el taruk yuk-yuk bitinye ap, el kisok ap bongobuka yuk-yuk poulbinmok. Bukni aDagon patung ara, el nong pia kum colopmok.

⁵ Winyamuka ati, sik Dogon ati, si erelamik imam-imam nang ap, yuk nang nirya ap, ‘Aning si erepnuyap’ tenen, Asdod mutuku ulamik ninye, aning daksakuka poulbinamok bublan dam ara, kum yanibuka, kum wekelbalamik. Awinilamik touk, wini talak babye, Asdod mutuku banyak ninye abublan dam yanibuka kum banyake.

⁶ Tonda, Allah Yahweh el mikip weik deice arye, Asdod mutuku ulamik kili sal ap, amutuku dana-dana ulamik ninye nirya ap wenena ati, ikin weik ning, sik nong deice delilamuk. Ara, weik suse el si ara tumor, sik nong deice deibukba, uk dilamuk. Tonda, kupmana weik arye, arelamukba akup balamuka deice arye, weik uk ton dilamukba, amutuku-amutuku ulamik ninye weik diplamik.

⁷ Sik Asdod mutuku kili sal pia weik, suse sik nong deice arebukba, dilamuk ning ap, winipre balamika deice arye, uk dilamuk ning ap, abitinye ning winilamuka deice arye, sik Asdod mutuku noutamak ulamik kili sal nirya arye, moubuka elilamikce, nyalamik. “Se, Israel ninye arye, si erenyak Allah arye, sikti, el nyalin yupu areamunkba, amarikna Peti Perjanjian pum bisik deibik ning ara, nun dam pia kum bataknamabe,” nyalamik. “Tonda, anyalamuk yupu deiyoknye bira, el taruk mikip deice arye, ikin ning weik aresulule. Nunce si erenyap isa, el si Dagon babye, elti, pia ikin weik ning arelule,” nyalamike.

⁸ Ati ara, sik amutuku ulamik deiyok nang nirya arye, Pilistin mutuku atam-atam nirya, sik ninye deiyok kibuka taleamik nang, sik Raja pamubarye nang ati, yukubikba bulubuka yayik. Sik Pilistin mutuku noutamak pamubarye ninye deiyok Raja nang nirya ati, akilisal arye asipdeyik. Asipdeyik yupu ara, ani. “Israel ninye arye, si erenyak Allah arye nyapdeiamuk nyalin yupu deibik Peti Perjanjian ati, nunce yata wiripnamap do?” nyabuka asipdeyik. Asipdeiyikbuk, sik ninye deiyok Raja nang arye nyabik. “Israel kili sal, sik ni Allah arye nyalilamukba, ayupu dobuka amarikna pum bisik deibik ning ara, sik isa si eren aik noutam arye, dobukapmunce, takupdakuka, Gad mutuku delilbilulume. Ara, Pilistin mutuku bukni, yuk pera mutuku ton, amutuku si ara, Gad mutuku takupdakuka delilbilulume,” nyabik.

⁹ Nyabikba, Allah el nyalilamuk yupu dongamik marikna, Peti Perjanjian, amutuku arye bobuka, Gad mutuku delilbiyik talak babye, Allah Yahweh arye, amutuku ulamik ninye ati, weik uk talin ning arebuk. Ara, neplirye weik ulamle uk, el si ara tumor arebuk. Anelamuk tumor ara, sal kim dam ap, kilapu kim dam ap nelamuk. Tonda, wisi ninye babye, kam nang babye, mitik mapu babye, nirya arebukba nelamuk. Tonda, Allah arye amutuku ulamik kili sal wenena ati, weik mutuku lulukna arebuk. Pia ikin weik ning arebukba, amutuku noutamak ulamik ninye ikin kanye bolamik.

¹⁰ Aning akunum winibukopura, Gad mutuku ulamik ninye arye, ikin kanye bolamikce, Allah nyalilamuk yupu dongamik marikna dobuka, Pilistin mutuku buk, yuk pera mutuku ton, el si Ekron mutuku delilbiyik. Allah el nyalilamuk yupu dongamik marikna, Peti Perjanjian, Ekron mutuku delilbiyik talak ara, amutuku asik dam wekelbanuyik ati, sik Ekron mutuku ulamik ninye nirya arye, weik malye yupu nyabuka ngaluklamikce, nyalamik yupu ara, ani. “Se, Allah arye, sik Israel ninye ati, moulin yupu areamukba, Peti Perjanjian pum libik ning ara, nun dam boyanmasuluma ara, yata ati do? Nun amutuku noutamak unyap ninye nirya, opnamsiaka ati, aning nun dam benelyanganmasulum do?” nyabik.

¹¹ Ati ara, Ekron mutuku ulamik kili sal nirya arye, Pilistin mutuku talibuka ulamik ninye deiyok nang nirya ati, yukubikba, bulubuka yayik. Yayikopura, akilisal nirya nyabik. “Israel kili sal talibuka ulul Allah el nyalin yupu libuka, deibik marikna ara, ila tuba tamubuka dobukapmunce, elce min arye bobuka deiamukakuk, binuka deiplulume. Aning winipmunyopura, nun amutuku unyap kili sal nirya, wisi kili sal ap, mapu kilmapu ap nirya, ‘Amarikna nun dam aupnamla deice arye opsilyak’ tenen, nyababe. Bukni, aning bobuka, min yuma talak Israel kili sal arye, deiamikakuk, binuka deipmunyopura, aning arye nun kum opnamsile,” nyabik. Aning ara, talye ati kum nyabike. Ara, atalak babye, sik amutuku kili sal wenena ati, Allah arye, pia ikin weik ning, sik deice deiamukba, ikin kanye bobuka, weik arye malye yupu nyalamike. Tonda, amutuku ulamik kili sal nirya arye, ‘Se, yata wiriptibye do?’ tenen, ilil weik ulamakba, kwarabuka balamik. Ara, Allah arye sik amutuku ulamik kili sal nirya, sik nong deice, ikin ning weik delilamuka anya arye, ilil weik ulamuke.

¹² Ikin ning sik nong deice delilamukba, yupa weik ton tam ara, diplamik bukni, yupa mitik tonunuk ton kam tuba ulamik. Akilisal nirya kum dibik bukni, sik nong deice nirya, weik arye neplirye, torok atonun moulamle ning, el si ara tumor, areamukba, akilisal sik nong deice moulamuk. Amoulamuk tumor ara, sal konduk kim dam ap, kilapu konduk dam ap, uk nebuka moulamuk. Winilamukba, sik amutuku ulamik kili sal arye, “Se, na nio ance yanuka melipsilyame,” nyabuka, yupu weik arye ngaluklamikce, malye yupu nyabuka morolamike.