1 Samuel 31 - Eipomek

Saul ap, el yin talinanye tonoknye ap, sik bidamang oprarik yupu

¹ Atalak ara, sik Pilistin yala nang arye, Israel yala ninye ati, ‘Obuka, sirya daknuyap’ tenen, olyanmek. Olanmekba, sik Israel ninye ilil ubukba, bikbik abuka biyik bukni, Pilistin nang arye, ninye weik obik. Ara, mutuku si Gilboa mutuku deice arye, Israel ninye weik obik. Obikba, Saul ap, el mapu koproba ap, el melin nang ap, nirya bikbik abuka bindobik.

² Biyik bukni, Pilistin nang arye, Saul el mapu silip ati, dobolbinuka, el mapu winilye binuka tomobikce, obik. Anang sik si ara, Yonatan ap, Abinadab ap, Malkisua ap, binuka obik.

³ Weik arye opdanin banmeka ani, Saul ap banmek nang nirya, sik mal olan nang arye, marapnin yanganmikce, el nong nirya ara, mal dila weik ubuk. Saul babye maraplobikba, dipmanto ubuk.

⁴ Dipna dam ubuka ati, Saul birye, el mapu yin talinanye, el ninye olan ning bobana ati, melibuka balamuknye, tonok ati nyabuk. “Wini talak ara, an bopmalam parang ya arye, dobuka lukdongobuka, opnilyame. Kum opniminyeura, sik Pilistin yala nang, pia malye unyakce, den bol mouse kum sekenyak yala nang arye, opnicake. Sikce opnicopura, na nong dobuka, arikal dolamaka atonun, winipnicake. Tonda, ‘Na nong dobuka, pia malye kipdeipnicak,’ tenepne. Aning ara, pia malye ati, nun babye nun yalanye, ancuk an parang ya dobuka, opnilyame,” nyabuka morobuk. Nyabuka morobuk bukni, el melinanye, ilil weik ubuka ati, Saul kum obuk. Tonda, anye birye, Saul biti, weik arye si erebukce, ‘Na ni kum optinye,’ tenebuk. Winibukba, Saul el bidamang aniryuk, cang parang ya dobuka, tukwak ikdeibukce, itam arye sakuka, lumupdayukba dibuk.

⁵ Dibukopura, el ap melipmokba, banmarik yin talin welnye, Saul dibukba eibukopura, el babye atonun, el bidamang cang parang dobuka, tuku deice ikdeibukce, aning deice sakukce opdayuk. Winibuka asum aniryuk, Saul dipmokakuk, anye babye dibuk.

⁶ Ati ara, Saul ap, el mapu koproba winilye nang ap, Saul el melinanye ap, tonda, Saul el yin talin nang nirya weik ap, sik nirya ara, atonok sum aryuk dibik.

⁷ Ura, aning nirya, akunum winibuka, eibik nang arye, laka nyalbiyikba, sik yuk Israel yala ninye, talye ninye kekebik. Ara, weik lyu mutuku ulamik nang ap, tonda Yordan mek otam ulamik nang ap, kekebik. Ara, Pilistin yala yin talin nang arye, Israel yin talin nang weik ap, Saul el mapu winilye nang ap, obikopura, yuk Israel yin talin nang, bikbik abuka bindobikba, tonda Saul akunum opdayukba, akunum kekebikce, bikikopura, atam mutuku noutamak ulamik Israel ninye ilil weik ubuk. Ilil weik ubukba, sik aik yuk-yuk ulamikak nirya batakuka, bai sakuka bindobik. Sik asik batakuka bindobikba, sik Pilistin yala nang arye, yanuka anyaik nirya, alabuka kipdobikce, amutuku uk, wekuka unmek.

⁸ Tonda, sik nirya mapmeka, berekukopura, sik Pilistin nang arye, ambusum oplopmapu nang, ‘Sik nong ongolamungu ning ap, sik bon-bona ap dopropnuyap’ tenen, opdanmekak yanuka dipdeyik. Gilboa mutuku deice, binuka dipdeyikba, Saul ap, el mapu winilye nang ap, oplopmekba, atuba upmokak eibik.

⁹ Eibikopura, Saul el ngang sekuka, el kisok doprobik. Tonda, el olana ati, ongopmok kat baju nirya kwiribuka, ubula doprobik. Winibikopura, sikce nyapdeibikba, yuk nang arye awinipmek ning ati, yupu lak nyalbamek. Ara, amutuku-amutuku noutamak nirya, ‘Israel sik ninye deiyoknye, Saul akunum obuka, sirya dakmabe,’ nyabuka, lak nyalbanmek. Nyabuka nyanmekba, sik yala nang ulamikak nirya ap, sik Isa Mutuku Dongonye si eren aik noutamak, ninye urasin atonun puturubuka, delilamik aik nirya ap, ayupu nyanmekba, sik yala nang nirya arye kekebik.

¹⁰ Sik Pilistin deiyok nang arye, Saul el olana ati, kat baju ongopmok ning ara, dobuka, sikce sik Isa Mutuku Dongonye si erelamik aik, Isa Mutuku Dongonye, el si ara Astoret, el si eren aik binuka deibik. Saul el nong ara, dobukabikce, mutuku si Bet-San asik domikak, kup-kup tam ikuka deiamik keil poka deice, lumupdeibik. Ara, ‘Nun yala nang nirya arye, eilinamak’ tenen, Saul el nong dobuka, apoka deice lumupdeibik.

¹¹ Winibikopura, yuk nang arye, laka nyalbiyikba, mutuku si Jabes-Gilead mutuku nang arye, ‘Saul obikce, el kisok sekuka, el nong dobuka, poka deice kirikdongobuka deipmek ning,’ nyabikba, kekebikopura, ‘Se, aning ara, pia weik malye,’ tenebik.

¹² Utenebika ati, Jabes-Gilead mutuku nang, ilil pia kum nang weik nang arye, ‘Bet-San mutuku bibirye, Saul el nong dopropnamabe’ tenen, alukunyan noutamak nirya ara, bisik banmek. Banmek ani, Bet-San mutuku biyik. Biyikopura, Saul ap, el mapu ap, sik nong poka deice kirikdeipmekak, anyuk doprobikce, tuba tamubuka, sik mutuku koproba, Jabes mutuku biyik. Biyikopura, Saul ap, el mapu winilye ap, sik nong dobukabikce, uku dongobikba, uku dibuk. Ara, atalak sik si erena ati, winilamik ning atonun winibik.

¹³ Uku arye, sik nong akunum dibukba, Jabes mutuku nang arye, Saul ap, el mapu winilye ap, sik yok diamuk ara, dobukabikce, Jabes mutuku noutamak bukni, weik yo tikamuka donga tuku palibuka, ayoka ara, duk moulamle yo, el si ara Tamariska yo dam weibik. Winibikopura, Saul el si erena ap, dipmoka ati engena ap ati, like tekbarye sum arye, din kum diamek. Din dina kum diparyuk, urdemuk ulamik ani, akunum ubik.