1 Samuel 30 - Eipomek

Daud ap, sik Israel yin bon nang ap arye, Amalek yala nang obuka kum danaibik yupu

¹ Like winilye deice arye, Daud ap, el melina yin talin nang ap, mutuku si Ziklak mutuku biyik. Atalak ara, Negeb mutuku nang ap, Ziklak mutuku nang ap nirya ara, sik Amalek yala nang arye, akunum olyangalamik. Olyangalamik ani, sik Ziklak mutuku ulamik ninye ara, obuka sirya dakamikce, sik aik nirya, uku dongobikba dibuka, sirya dakrobuk.

² Sik Amalek yala nang, aning akunum sirya obuka, dakikopura, Ziklak mutuku nang ap, kilapu ap, tonda wisi nang ap, wel ninye ap, mitik mapu ap, kilmapu nirya, sik amutuku ulamik ninye nirya ara, kum obik bukni, tomobuka, tapu koubuka, ‘Nun mutuku bobinamap’ tenen, bobuka delilbinamik.

³ Sik Amalek nang, akunum bindopmekopura, aminyan talak Daud ap, el yin talin nang ap, Ziklak mutuku biyikce, dinmekba, asik domika nirya, Amalek nang arye, uku dongomikba, dibuka sirya dakamukak eibik. Tonda, sik Amalek yala nang arye, sik kilapu ap, sik mapu kilmapu nong nirya ap, akunum tapu koubuka, bobinamek ning babye, akunum bikik.

⁴ Winipmek ning ara, Daud ap, el yin bon nang ap nirya, aning eibuka, kel bikikopura, weik arye engebike. Engenmikce, sik nong mitang ubukba, tonap engena kum ubik.

⁵ Atalak ara, Daud el kilapu bitinye, sik si ara, Ahinoam ap, Abigail ap ulamdik. Ahinoam bira, Yisreel mutuku kil, ton kil ara Abigail, Karmel mutukunye, el si Nabal domuka dibukba, youwak dakamuk kil ulamuk. Sik Amalek nang arye, Ziklak mutuku malye kibuka, nirya obik talak, abitinye kilapu tomopmekce, ‘Nun mutuku tamubuka bobinamap’ tenen, akunum bindobik.

⁶ Aning nirya winipmekba, Daud el melina nang, sik yin talin nang ara, weik kanye ikin ubukce, ‘Se, nun kilapu ap, nun mapu kilmapu nirya ap, Amalek nang arye, akunum dobuka bobinmake. Winipmasiaka ati ara, nun deiyoknye Daud biti, keil dobuka, opnuyap do?’ teninmek. Utenebikba, Daud birye, ‘Se, yata wiriptinye do?’ tenen, tenipdeyukce, ikin kanye bobuk. Bukni, Allah el si Yahweh arye talima pum tam mikip arebuk deice arye, Daud el talima melibukba, Daud el mikip tuba ubuk.

⁷ Winibukba, Daud birye, ninye si Abyatar biti, yupu nyabuk. Abyatar bira, ara Ahimelek el mi bukni, Allah el si eren aik pum tam pil dolamuknye ulamuk. Daud birye, anye biti nyabuk. “Nunce Allah ati, ‘Yata wiripnuyap do?’ tenen, morobibirye, dipdenuyap, ning ara, el si Efod dobuka boyanilyame,” nyabuk. Nyabukura, Abyatar birye, abaju el si Efod dobuka, Daud dam boyayuk.

⁸ Boyayukce, Daud biti arebukopura, Daud birye, aning eibukce, Allah el si Yahweh ati asipdeyuk. “Na ni Allah, sik Amalek yala nang, nun mutuku arup olyanmakce, obuka sirya dakakce, banmak nang ara, aminyan dobolbinuyab do? Dobolbipyopura, anang dam bitinye do, kum do?” nyabuka asipdeyuk. Asipdeyukura, Allah arye, Daud biti nyabuk. “Diba, ance aminyan dobolbinamlyame. Amalek nang dam bimince, obuka sirya daknamalyame. Telebe anggun kilapu ap, anggun mapu ap, anggun tam nang nirya ap ara, tomobuka bobinmak bukni, ance anang nirya binuka, lyebuka dopnulyame. Winipmince, anggun kilapu ap, mapu ap ara, tuba tamubuka dopropnamalume,” nyabuk.

⁹ Amorobuk ning ati, Allah arye, “Telebe,” nyabukba, Daud birye, deiyok koubukba, el melina yin nang, sik yupa ara, enam ratus (600) nang ap, aminyan melibuka dobolbanmek, ‘Amalek nang olbinuyap’ tenen, Besor mutuku mekin biyik. Amekin biyik bukni, ton nang ara, mitang akunum ubukba, Besor mekin dam anyuk batakikce, neika kum biyik asukumuk unmek.

¹⁰ Sik mitang ubuk nang yupa ara, dua ratus nang, Besor mekin koubuka, otam binmanto kum ubikba, atam unmek bukni, Daud ap, el yin talin nang yupa ara, empat ratus nang ap, amekin koubuka, otam binmekce, Amalek nang tuba dobolbanmek.

¹¹ Winibik talak ara, Daud ap minopce menekuka, biyik nang ara, pia weik lu mutuku banmek, Daud el melipmek nang arye, Mesir mutukunye ton eibikce, dobuka, sik deiyoknye Daud dam bobuka yayik. Boyayikopura, el anye biti, din ning ap, mek ap, arebikba dibuk.

¹² Sikce, anye arebik ning ara, mitik tonun kwarang yo duk atonun, ara duk dobuka, roti atonun, kue memepmek ning ap, tonda anggur duk kel-kela umok ning, kue memebuka deipmek ning bitinye ap, arebikba dibuk. Akunum dibukba, el mikip tuba ubuk. Anye bira, beren tam winilye ap, lukunyan winilye ap deice arye, din ap, mek ap pia kum dipmoka ati, mikip ara, kum mitang upmok bukni, din dibukba, el mikip tonap ubuk.

¹³ Akunum dibukce, mikip ubukopura, Daud birye, “An deiyoknye bira, yatanye do? Tonda, anda dan mutukunye do?” nyabuka asibuk. Nyabuka asibukba, aMesir mutukunye birye nyabuk. “Nara, Mesir mutukunye bukni, na deiyoknye bira, Amalek mutukunye birye, deknuknye anya arye, el amu tam talye pil melinanye unune. Neika banmanumu bukni, uk dipnukba, na deiyoknye birye, na batakuka bindopnuke. Winipmanua ati ara, like winilye sum arye uk dinmanuba, unmanue.

¹⁴ Na uk min kum dipmanuk talak ara, na ap, sik Amalek nang ap arye, Negeb mutuku tam noutamak bukni, Kereti yala nang, sik mutuku iknapye tam, obuka sirya dakupe. Tonda, sik Yehuda yala nang talilamik mutuku obuka, sirya dakupe. Tonda, Kalep el yala nang talilamik mutuku, mutuku si Negeb nang ton, obuka sirya dakupe. Tonda, tonok asik domika ara, Ziklak mutuku, obuka sirya dakupe, sik asik nirya, uku dongobuka, sirya dakupe,” nyabuk.

¹⁵ Nyabukura, Daud birye tamubuka nyabuk. “Ance nun yala nang ati, obuka sirya dakik nang, unyak mutuku bana ati, melibuka bobisutum do?” nyabuka asibuk. Asibukba, Mesir mutukunye birye, tamubuka nyabuk. “Allah dinmasilak dam arye, el si nyabuka, nyalin yupu deice arye, nyapnutumopura, narye melipkitinye. Ara, ance nyapnunilyame. ‘Allah el si deice arye nyapkiabe. Anda kum opnamkiyabe. Tonda, an dobuka, an deiyoknye dam bobikibirye, anye biti tamubuka, kum arepnamkiyabe,’ nyapnutumopura, narye melipsinirye, na tam nang dam bobinamsine,” nyabuk.

¹⁶ Nyabukura, Daud ap, el mapsilip ap arye, ‘Telebe, amorop malam touk, winipnamkiyabe,’ nyabik. Nyabikopura, anye birye, sik nirya dobukabukce, sik Amalek yala nang, talye bukuka ulamikak bobiyuk. Ayu nang ara, tonokak kum ulamik. Talye mangkau kanye dobuka unmekce, amutuku dana-dana nirya, eldem bukuka, din ap, kanye wangalamak mek ap, dinmikce, talye kanye bobuka, malye-malye unmek. Deiyok ara, sik Amalek ninye arye, Pilistin tam noutamak bukni, Ziklak mutuku ulamik nang ap, Yehuda yala nang ulamik mutuku noutamak ap, aninye nirya obuka, malye kipmekce, ubula dobuka yanamik bon-bona pia weik anya arye, talye mangkau kanye bobuka, pin-pin asa arye, wininmikce din ap, kanye wangalamak mek ap, weika arye dinmek.

¹⁷ Wininmekce, asum sintam arye, deiyok koubuka, alukunyan ap, beren tam ap, keting noutam ap, anyapce sintam ap, atalak noutamak nirya, Daud ap, el yin talin nang ap arye, sik Amalek yala nang ati, mal pibiyik. Pilbiyikce, pia olanmek ani, lukunyan kibuk. Daud ap, el yin talin nang ap arye, Amalek nang weika arye, obuka sirya dakikura, amutuku ulamik kam nang yupa ara, empat ratus (400) nang, ‘Bura sakuka binuyap’ tenen, unta nyalamak ning, balye deice bukukabikce, bai sakuka bindobik. Bindobik bukni, yuk Amalek nang nirya ara, tonok babye, ton kum biyik. Anang nirya obuka, sirya dakik.

¹⁸ Winibuka, Daud ap, el yin talin nang ap arye, sik Amalek nang arye, ubula dobuka boyanuka deiamik ning nirya ap, boyanmek ninye ap, tonda Daud el kilapu bitinye ap nirya ara, binuka dalubuka, doprobik.

¹⁹ Dobikce dipdeyikba, aning-aning nirya ap, aninye nirya ap, teleb ubuka ulamik. Tonok ning babye, tonok ninye babye, kum wangamik. Ara, Amalek nang arye, dalubuka dopromik ning nirya, ninye ap, kilapu ap, wisi ninye ap babye, kam ninye babye, aning-aning nirya tuba aulamik. Anang nirya ap, aning-aning nirya ap, Daud doprobukce, tuba tamubuka, sik mutuku koproba, boyanuka deibuk.

²⁰ Atalak aniryuk, sik Amalek nang arye, ubula dopropmek domba basam ap, sapi basam ap, maka aning-aning nirya ap, menekuka banmekba, yuk kam ulamle ning yala nirya ara, aminyan dukdongobuka, yanganmek. Banmekce, nyanmek. “Aning nirya ara, Amalek nang arye, ubula doprobik bukni, Daud birye, Amalek nang obuka sirya, dalubuka, dopropmal ning ara, ani. Wini talak ara, abona nirya ara, Daud el ning uka,” nyapra banmek.

²¹ Nyapra banmekce, Daud nong tamubukce, sik kwit capu mitang ubuk nang, Besor mekin kup-kup wilibuka, bataka binmekak, unmik nang yupa, dua ratus (200) nang ulamikakuk, tamubuka yayik. Ara, Besor mekin dam ulamik nang arye, Daud deiyok kibuka, tamubuka yanganmikce, eibikura, “Telebe anggun tamubuka yalume,” nyabuka, winilinmek. Wininmikba, Daud el deiyok kinak arye, abatakuka binamik nang ati, “Telebe, nun tamubuka yanmabe,” nyabuk.

²² Daud birye kanye deibuka, ‘Telebe,’ nyabuk bukni, Daud ap binamik nang kan-kan bukni, ton tam nang ara, pia kanye talima malye nang ap, tonda malye-malye unmek nang ap arye, sik anang arye, sik kwit capu mitang ubukba, Besor mekinuk ulamik nang ati, “Sik anang ara, Amalek nang olbana ati, neika kum binmeka ati, Amalek nang arye dobuka, delilbinamsikak boyanmap ning ara, sik kum doproptinge. Aning bokuka, sikti, kum arepnuyabe. Bukni, sik kilapu ap, mapu ap ara, ananguk doprobikirye, sik mutuku koproba bobinamake,” nyanmek.

²³ Nyanmekbuk, Daud birye sik anang ati, “Amapo, Allah el si Yahweh arye, nun nirya ati, melibuka arepmasil ning anya arye, ayupu nyana kume. Aning ara, nun olana ati yayik nang, Allah arye kalikuka, melipmasilba, sik yu nang akunum obuka, sirya dakmabe. Amalek mutuku nang kan-kan arye, lyepmasila ati, nyalana meme.

²⁴ Anggun malye yupu nyanmalum ning ara, yatanye birye kekepnamasil do? Kume, nun binamuburye, Amalek nang obupu nang babye, sik mitang ubukba, nun bon-bona kalikna ati, Besor mekin dam, aulalum nang babye, neika atonun dopropnamabe. Nun nirya, bon-bona weik ato touk dopropnamabe. Anggun nirya ati, nyapsine,” Daud birye, el yin talin nang nirya ati, nyabuk.

²⁵ Daud birye, anyabuk deice, “Dipkoprop diksukum ning ara, aninguk wininamabe,” nyabuka, laka nyabuk. Nyabukba, sik Israel ninye ara, aninguk winipra yangalamik ani, wini talak babye, tuba wininyake. Ara, ‘Sik mal olan nang, olbana nang babye, sik aik ap, sik bon-bona ap, mining dam anyuk kalikna nang babye, sik dekna ning atonun, dolona telebe,’ tenebik. Deiyok ara, Daud birye, ‘Aning ara, pia wininamabe,’ nyapdeibuka anya arye, sik Israel nang arye, atalak arye dipdongobuka, wini talak babye, aninguk wininyake. Yuk nang obisibikirye, bon-bona doprobikirye, aning nirya bokuka, neikto touk dolonyake.

²⁶ Ura, atalak ara, Daud birye nyabukopura, Daud ap el yin nang ap, tamubuka, Ziklak mutuku biyik. Biyikce, Amalek nang arye, bobuka binamikbuk, dalubuka boyayuk ning ara, Daud birye, ton bokuka, Yehuda yala ninye deiyok nang, wisi nang ton arebuk. Aning ara, el kwit capu nang anya arye, aning arebukce, nyabuk, “Telebe aning ara, talye arepsine. Aning ara, Allah el si Yahweh arye, yu tenelye nang obuka, sirya dakamapce, sik kan-kan arye bobuka, boyanmap ning dopse ning ara, arepsine,” nyabuk.

²⁷ Ara, sik Betel mutuku ulamik nang ap, Yehuda yala nang bukni, Ramot Negeb mutuku nang ap, tonda Yatir mutuku ulamik nang ap ati, Daud birye, abona bokuka, arebukba doprobik.

²⁸ Aning atonun, tonda Airor mutuku nang ap, Sifmot mutuku nang ap, Estemoa mutuku ulamik nang ap,

²⁹ tonda, Rakal mutuku ulamik nang ap, Yerameel mutuku nang ap, Keni asik dolamik nang ap,

³⁰ Horma mutuku nang ap, Bor-Asan mutuku nang ap, Atak mutuku nang ap, Hebron mutuku nang ap, sik nirya doprobik.

³¹ Tonda, Daud ap, el yin talin nang ap, mutuku-mutuku nirya, neika balamik mutuku ulamik nang nirya ati, abona bokuka arebukba, sik ton doprobik.