1 Samuel 3 - Eipomek

Allah arye Samuel biti, nyabuk yupu

¹ Samuel bira kamnye ulamuk talak arye, Allah el si Yahweh biti, el pil moubuka dolamuk. Atalak ara, Yahweh arye, el aik pil dona deiyoknye, Eli ulamuka anya arye, Samuel bira, Eli el amu tam ubuka pil dolamuk. Atalak noutam ara, Allah Yahweh arye, ninye ati, el yupu weika arye, kum nyalamukba, el yupu laka nyan nang arye, mitikto aryuk kekelamik. Aning atonun, Allah arepliba, lengdar mabica deice arye, elilamak ning ton, mitik anun aryuk arelamuba, mitik aryuk elilamik.

² Atalak ara, Eli bira, akunum wisi danamuka anya arye, el asing malye ubukba, mitik tonunuk elilamuk. Tonok sum, lukunyan akunum ubukba, atalak-atalak nirya, tonokakuk malamuk touk, asum lukunyan babye, asukumuk mabuk.

³ Alukunyan noutamak ara, Allah el si eren aik pum tam pil dona ati, upna delilamik ning min kum tangapmok. Ati, beren tam talak dam akunum ubuk bukni, tuba kunuknauk ubuk. Winipmokba, Samuel anyaik pumuk, Allah Yahweh, el si eren aik pum mapmok. El mapmokak ara, Allah arye, el yupu nyalamukba sekamik yo marikna, el si ara Peti Perjanjian pum bisik deiamikak, aning dam anyuk mapmok.

⁴ Winipmokbuk, Allah el si Yahweh arye, Samuel biti yukubuk. Yukubukba, Samuel birye “Naio na aunman atia,” nyabuk.

⁵ Nyabukce, Samuel adiparyuk bukuka, Eli dam biyukce, “Naio, ance yukupmanilam ati, na yanman atia,” nyabuk. Nyabukura, Eli birye tamubuka nyabuk. “Na anti ton kum yukupmakina anya arye, tamubuka malbilyame,” nyabuk. Nyabuka ati, Samuel ila tamubuka, binuka mabuk.

⁶ Samuel ila tamubuka biyukce, mapmok talak ara, Yahweh arye ila tuba tonap, “Samuel, Samuel,” nyabuka, Samuel biti tamubuka yukubukba, bukuka biyukce, tuba Eli damuk biyukce, “Naio, ance yukupmanilam ati, na yanman atia,” nyabuk. Nyabukura, Eli birye tamubuka nyabuk, “Na mio, narye an kum yukupmakina anya arye, tamubuka malbilyame,” nyabuk.

⁷ Ura, atalak ara, Allah el si Yahweh arye, Samuel deice ton, el aminyan winipnamuk ning yupu ap, yuk mambul yupu ap, lakak kum nyalilamuka anya arye, Samuel bira, Allah ati, moubuka min kum kel kiamuk. Aning ara, kabula.

⁸ Like winilye ning ara, Yahweh arye Samuel biti yukubukba, Samuel bukuka biyukce, Eli dam biyukce, tuba atonun, “Naio, ance yukupmanilam ati, na ayanman atia,” nyabuk. Nyabuk talak ara, Eli adiparyuk moubuka bikuk. Ara, ‘E, Allah el si Yahweh arye yukukunmale’ tenen, bikuk.

⁹ Bikukopura, Eli birye, Samuel biti nyabuk. “Tamubuka malbinulame. Winipminyeba, ila tuba tonap, Allah arye yukupkilyopura, nyapnamlyame. ‘Na ni Allah, anda Yahweh ulyame. Nara, an amu tam ununye kekenmakina anya arye, yupu nyapnilyame,’ Nyapnalyame,” Eli birye nyabuk. Nyapdeibukopura, adiparyuk Samuel tamubuka malbiyuk.

¹⁰ Winibuk talak ara, Allah adiparyuk Samuel dam yayukce, min yuma nyanmok touk, yanuka yukubuk. “Samuel, Samuel,” nyabukopura, Samuel birye tamubuka, “Naio, nara, an amu tam ununye kekenmakina anya arye, yupu nyapnilyame,” nyabuk.

¹¹ Nyabukopura, Allah arye nyabuk. “An dinamlyame. Na Yahweh arye, Israel ninye ati, weik mambul ning ton, sik dam winipnyeba, ton nang ara, dinamaniake. Ton nang ara, kekenamniake. Kekebicopura, ‘Se, aning ara, weik mambule’ tenen, ninye kanye lopnamle,” nyabuk.

¹² Nyabukce, ayupu ton nyabuk. “Atalak ara, Eli el mapu ap, el yala nang nirya, sik wenena ati, owala arye nyalamse ning nirya ara, wini talak winipnamne. Tonok ning babye nyapse ning ara, kum bataknune. Aning nirya winipnune,” nyabuk.

¹³ “Narye, Eli biti, nyapse ning ara, ani. Ara, Eli el mapu arye, sik pia malye ning winililamnirika deice arye, nati yanibuka, pia malye winililamnirike. Winilamnirik talak ara, sik ni birye, el yupu si bam bol aryuk, ‘Batakdurume,’ nyabuka, mikip asa arye, kum wenelamukce, sikti, yupu kum sekelamukba, sik anang tuba malyeuk winilamdik. Ati ara, Eli el yala ninye nirya ati, wenen ning pia arenamne.

¹⁴ Ati ara, Eli el nong ati nyapse. El mapu pia weik malye ning winilamdik ning ara, ikin weik anya arye, Eli el yala nang arye, teleb ning arepnitinga babye, tonda kam ning obuka boyatingce, arepnitinga babye, sik malye un ning kum kilipnamne. Sik wenena ara, pia kum bataktinye. Aning atonun, sikce kam ning weika arye opnirye, na arena ati, keil pala yangapdeiamika deice, uku daptinga babye, sik malye ning ara, kum namin kipnamne, pia aupnamle,” Allah arye nyabukba, Samuel birye kekebuk.

¹⁵ Nyabukba kekebukopura, Samuel mapmoka ani, beren tam arye bukuka, Yahweh el si eren aik bublan kukuka biyukopura, ilil ubukba, Allah nyapdeipmok ning nirya ara, Eli dam binuka nyalina ara, kum nyabuk.

¹⁶ Kum laka nyalbinmok bukni, Eli birye, “Na mi Samuelo,” nyabuka yukubukba, “Naio, na aunmana atia,” nyabuk.

¹⁷ Nyabuk buk, Eli birye tamubuka asipdeyuk. “Allah arye yata nyapmaku do? Ayupu nirya ara, na ton laka nyapnilyame. Allah arye nyapmaku yupu nirya, kum laka nyapmanilamce, ton ning ara, kunusa dopminyopura, el weika arye wenepnamkile tenepne,” Eli birye, Samuel biti nyabuk.

¹⁸ Nyabuka ati, Samuel bira, Allah arye nyapmok yupu nirya, Eli dam laka nyabuk. Pia tonok ning babye, ton kum siklipdongobuk. Nyabukopura, Eli birye nyabuk, “Kume, elda Allah, el si Yahweh anya arye, elcuk, ‘Aning telebe,’ teneplye ning ara, anyuk winipnamle. Akunuma,” nyabuk.

¹⁹ Ura, atalak arye dipdongobuka, dotalak noutamak nirya ara, Allah arye, Samuel biti melilamukba, nepnin balamuk talak noutamak nirya ara, Allah arye nyalamuk yupu nirya, tonok babye kum batakuke. Samuel ayupu nirya kekebukce, laka nyalamukopura, Allah arye, ‘Winipnamne. Winipniba aning ton winipnamle,’ nyapdeibukba, Samuel birye, Israel ninye ati, laka nyalamuk yupu nirya ara, dipkoprob winilamuk.

²⁰ Winibukba, Israel ninye ulamik mutuku noutamak nirya kel bikik. ‘Samuel bira, Allah el pil donanye ulirye, Yahweh nyalul yupu kekebuka laka nyananye dipkoproba ulule,’ tenebikce, kel bikik. Ara, amutuku deice tam Dan yala nang ulamikak arye, dukdongobuka, outam mutuku si Bersyeba mutuku nirya bikik.

²¹ Atalak noutamak ara, Allah Yahweh ara, el si eren aik, Silo mutuku damak arye yanuka, deiyok kouna talak ara, el nyalamuk yupu deice arye, Samuel dam laka kipdeibukura, adeice Samuel birye, Allah el si Yahweh ati, moubuka tenelamukce, weika arye kel biklamuk.