1 Samuel 29 - Eipomek

Pilistin mutuku ninye arye, Daud biti, “Nun mutuku batakuka, yukak tamubuka bilyame,” nyabikba, biyuk yupu

¹ Pilistin ninye arye, dana-dana ulamik mutuku nirya arye, sik yin talen nang nirya, bulupdeibikce, yanuka Afek mutuku uk, bulubuka wekmek. Ara, Israel tam ninye ati, olbinamabe,’ tenepmeka ati, Afek mutuku wekmek. Bukni, sik Israel yala ninye ara, Yizrel mutuku mek pudobuka, balamuka luakuk, tenda aik dobuka wekmek.

² Atalak ara, sik Pilistin mutuku, ninye deiyok talibuka ulamik nang ara, pamubarye Raja nang nirya arye, yuk-yuk deiyok kibikba, sik yin talen nang ap, yupa yuk-yuk lelebukabikce, bisik banmek. Ara, ton yupa ara, pia weik seribu (1.000) nang banmek. Ton yupa ara, pia weik, seratus (100) nang banmek. Sik winibuka banmekopura, Daud ap, el melibuka balamik yin talen nang ara, sik nirya, Raja Akhis ap, el yin talen nang ap, sik aminyan tam banmek.

³ Sik aminyan tam banmekbuk, Pilistin yin talina deiyok nang arye, eibikce asipdeiyik. “Yata deiyok ati, anggun Ibrani yala nang ara, nun ap banmap do?” nyabikura, Akhis birye tamubuka, sikti, nyabuk. “Kume, anye Daud bira, Israel ninye talibuknye, Raja Saul, el pil donanye ulamuk. Tonda, el anye bira, Raja Saul batakukabukce, na dam yayukba, na ap, neika weik ulamnume. Yayukba ulamnumu talak arye, dipdongobuka, wini talak nirya ara, el malye ulamuk ning ton, kum ubukba, narye kum bikse,” nyabuk.

⁴ Nyabukura, Pilistin yin deiyok nang kekebikce, Akhis biti, weik tonun wenebuka, derebikce, nyabik. “Kume, anye bira, ance elti, ‘Anda amutuku arye, batakuka, an arepkisiba uminye mutuku uk, binulyame,’ nyapminyeba, adiparyuk, tamubuka binule. Winipminba, Daud bira, el ulamuk mutuku uk, binuka unamle. Anye bira, nun mal olalbana ati, binamap talak ara, el ap neika kum bitibye. El ap bana kume. El ap bibirye, mal olanmabya noutam arye, el kanye tamubukaplirye, ‘Nun mapu ap, nun tam nang ati, ton oplyakʼ tenen, nyapmabe. Tonda, anye birye tenepnamla ara, lo talak ara, ‘Akunuma, na deiyoknye Raja birye, kanye weik deipnamnila ati,’ teneplirye, nun yin talen nang ton opsilirye, el deiyoknye, Raja Saul kanye delina ati, arepsilyak ati, anye bira, nun ap neika mal olalbana ara, kumeʼ tenen, nyapmabe.

⁵ Tonda, anye bira, Daud kum ulul do? El ti, min talak ara, kilapu weik tonun mot senmana deice arye, elti, nyalamik. “Saul elda, ninye weik beribu-ribu obuk bukni, Daud bira, ninye yupa kum nukmanto, berpuluh-puluh ribu (lebih 10.000) ninye olule,” nyabuka, mot selamik.

⁶ Nyabikopura, atalak aryuk, Akhis birye, Daud biti yukubukba, yayukopura, ayupu nyabuk. “Nara, Allah el si Yahweh, an deiyoknye si deice arye, nyapkine. Dib tenepse. Anda, na ap neika ulamnumu talak ara, malye kum kipdeipnulumce, diksukumuk ulamlume. Na kanye deipkina anya arye, an ap, nun ap, neika mal olan dam bana ara, teleb uka. Tonda, anda minop talak, na dam yanamlumba, ulamnumak arye, dipdongobuka, wini talak nirya ara, ance malye uplum ning ton, narye kum bikse. Bukni, wini talak ara, na tam yuk ninye deiyok nang nirya arye, anti ara, ‘Nun ap neika bana ara, kume,’ tenepmakiyake,” nyabuk.

⁷ Ati ara, anda adiparyuk, teleb kanye bopmince, an mutuku tamubuka, binulyame. Tonda, Pilistin mutuku arye, talibuka unyak nang, sik dinmak noutam arye, banumunye talak ara, ance malye ton winipminba, malye-malye nyapsikcak ati, ‘Teleb aryuk binulyamʼ tenen, nyapkine,” nyabuk.

⁸ Raja Akish birye nyabukba, Daud birye tamubuka nyabuk. “Se, na deiyoknye Raja, aning ara, narye yata ning ton, malye upse ati nyapnilam do? Tonda, ance nati, nyapnuluma ara, ‘Anda na dam yanamlumba, neika unimnya nirya ara, ance malye uplum ning ton kum bikise,’ nyapnulume. Ati, yata deiyok ati, na deiyoknye, ance nati, ‘Mal olan dam ara, kum binamlame,’ nyapmanilam do?” nyabuka asipdeyuk.

⁹ Nyabukura, Akhis birye, tamubuka nyabuk. “Kume, anda bita biklyame. Narye anti bikise. Ara, Allah el pil don nang Malaikat, pia diksukumuk irye, moubuka pil donyaka atonun, an babye pia telebnye ulyame. Bukni, sik Pilistin mutuku yin talina deiyok nang arye, nyapmaniyaka ara, ‘El ap, nun ap, mal olalban dam ara, neika kum binamabe. Nun yuk binamabe,’ nyapmaniyaka anya arye, yata winiptinye kume,” nyabuk.

¹⁰ Nyabukce, ayupu ton dukdongobuka nyabuk. “Ati ara, anggun Raja Saul dam arye, batakuka yalumba, na ap neika ulamupu nang, anda Daud ap, an mapu sik yin talen nang ap, anggun nirya ara, adiparyuk ambusum beren tam, keting panabuka, tikilyangalamle talak aryuk, narye areamkise mutuku, tamubuka binamlyame. Tonda, sik yuk deiyok nang arye, anti malye nyapmakiyak yupu ati ara, malye kanye bobuka, tenina kume. Aning ara, daupmalye. Dipkoprop na dam ara, an pia teleb ubuka winilamnulume. Ati, mapmaminya, bereklyopura, beren tam arye, amutuku batakuka binulyame,” nyabuk.

¹¹ Raja Akish birye nyabuka ati, Daud ap, el tam nang ap, mapmeka berekukopura, beren tam koprop arye, sik nirya ara, adiparyuk, Pilistin mutuku tamubuka biyik. Winibikopura, sik Pilistin yin talen nang ara, amutuku batakukabikce, otam Yisreel mutuku biyik.