1 Samuel 28 - Eipomek

Saul bira, Isa Mutuku Dongonye taleamuk kil mororbana ati, Endor mutuku biyuk yupu

¹ Ura atalak ara, Pilistin mutuku yin bon nang nirya, bulubuka yupu talibik. ‘Israel ninye olbinamap’ tenen, kintinibik. Kintinibikopura, tonoknye el si Akhis birye, Daud biti nyabuk. “Anda moubuka tenepnulyame. An ap, an amu tam unyak yin bon nang ap, nirya bulubuka, kintinipmunba, na ap, na yin bon nang ap arye, yuk mutuku nang ati, mal olbinamabe,” nyabuk.

² Nyabukopura, Daud birye, Akhis biti tamubuka nyabuk. “Telebe, nara an melinanye unirye, na winipnaman ning ara, eibuka kel biknamanilame,” nyabuk. Nyabukopura, Akhis birye, Daud biti tamubuka nyabuk. “Telebe. Ati ara, an unalam talak noutamak nirya ara, ance nati, ‘Malye nang arye opnicak’ tenen, pia kalikuka dilmilinamnilyame. Na nong kalikna deiyoknye unalame,” nyabuk.

³ Ura, atalak ara, Allah el yupu laka nyalamuknye, Samuel bira akunum dibuk. Dibukopura, Israel ninye nirya engenmika ani, el nong bobukabikce, el mutuku koprop, mutuku si Rama mutuku weilbiyik. Tonda anoutam ara, Raja Saul birye, Isa Mutuku Dongonye si erelamik nang ap, asing keten nang ap, akunum diamik ninye kanye arye, yupu asik selamik nang nirya ap ara, Israel ninye ulamik mutuku noutamak ara, min arye akunum yakuka, dopkwetebukba binamik.

⁴ Ura atalak ara, sik Pilistin ninye arye, ‘Israel nang ap opdanamabe’ tenen, akunum kintinibikce, sik baju doltakna aik ara, Sunem mutuku dam binuka dobik. Dobik talak babye, Saul ap, Israel nang, sik yin bon nang nirya ap, Gilboa mutuku binuka, sik baju doltakna aik dobik. Ara, amutuku dam ‘Israel nang ap, Pilistin nang ap opdanuyap’ tenen, kintinibik. Amutuku bitinye ara, mitik damto kibuk.

⁵ Sik nirya bulubuka, kintibika wekikba, sik Pilistin yala nang, sik yin talin nang ara, pia weik bulubuka wekmekba, Saul eibukce, ilil pia weik ubukba, ikin kanye bobukce, yok sirim talibuk.

⁶ Winibukba, Saul birye, Allah el si Yahweh ati, moron deice arye, “Naio, yata wiriptinye do?” nyabuka asipdeyuk. Asipdeyuk bukni, Allah arye elti, yupu tamubuka lak kum nyabuk. Tonda, ‘Yata wiripnaman do?’ tenen, dililamik ning, el si Urim aning ton dipdeyuk bukni, aning bisik arye, Allah arye yupu ton, laka kum nyabuk. Aning atonun, lengdar mana deice arye ton, yupu laka kum nyabuk. Tonda, aminyan winipnamuk ning, laka lena deiyok nang, Allah el nabi nang babye, Allah arye kum melibukba, anang arye Saul biti, yupu lak kum nyabik.

⁷ Allah arye aning-aning bisik arye, Saul biti, ‘Winiplyame,’ nyabuka lak kum lebuk. Ati ara, Saul birye, el amu tam melin nangak, nyabuk. “Akunum diamik nang, sik dib kanye ap, yupu nyalanyak kil tonok dipdemunce, eipmunyopura, ‘El mutuku ani,’ nyabuka, laka nyapnumunyopura, narye, akil dam binirye, yupu talipnaname. Akil ati, ‘Yata wiriptinye do?’ nyabuka asipdenamne,” Saul birye nyapdeibuk. Nyabukbuk, el melin nang arye, Saul biti tamubuka nyabik. “Naio, akunum diamik nang, sik kanye ap, yupu nyalanyak kil ara, mutuku si Endor mutuku ulule,” nyabik.

⁸ Nyabikopura, Saul bira, ‘Yuk nang arye, na urasin eipnicak’ tenen, el ongolamuk baju kwiribukabukce, yuk baju ongobukce, tonok lukunyan noutamak, el ap, ninye bitinye nang ap, neika akil el dam biyik. Biyikce, Saul birye, akil binyak morobuk. “Akilo, na melina ati, akunum diamik nang, sik dib kanye ap, yupu taliplulume. Ara, talye ning ati kum bukni, min arye diamuknye, narye, ‘El si ani,’ nyapnukinanye, el dib kanye yukupminya deice arye, yanule,” nyabuka, Saul birye, akil ati morobuk.

⁹ Nyabuka morobuk bukni, akil arye ‘Anyapnilanye bira, Raja Saul,’ kum tenebukce, tamubuka, elti, nyabuk. “Kume, dipkoprob an babye, akunum kel biklume. Raja Saul birye, ‘Akunum diamik ninye sik dib kanye ap, yupu sisikna meme,’ nyalamukce, diamik ninye dib kanye yupu talanyap kilapu ap, sal ap, tonda asing keten nang ap nirya ara, Israel ninye unyak mutuku noutam arye, akunum yakuka yakdonosikba, yuk mutuku akunum bindobupe. Ati ara, anda yata deiyok ati, ‘Akil tomobukapnirye, laka nyapniba, opnamak’ tenen, na dam duknubuka yanmalam do?” nyabuk.

¹⁰ Nyabuk bukni, Saul birye, “Kume dipkoprob nyalin yupu nyapkine. Allah, el si Yahweh, kam pia ululnye, el si deice arye, dipkoprob nyapkine. Na moropmakin ning melipniminyopura, dipkoprob yuk nang arye, wenebuka kum opnamkiyake. Allah el si deice arye nyapkine,” nyabuka, nyalin yupu nyabuk.

¹¹ Nyabukopura, akil arye nyabuk. “Ati ara, akunum diamik ninye, sik dib kanye weik daunyak bukni, yatanye el dib kanye yukupniba, an dam yanuka nyapnukil do?” nyabuk. Nyabukura, Saul birye, “Samuel el dib kanye sisibuka yukupminba, na dam yanutue,” nyabuk.

¹² Nyabukura, akil arye, Samuel el dib kanye sisibuka, yukubukba, Samuel el dib kanye lakak yayukba, eibuk. Eibukopura, weik yupu deice arye nyabuk. “Se, winira na kel biknamkine. An moropmanilamnye bira, anda Raja Saul ulyam atie. Yata deiyok ati, kunusa dobuka, tilila yupu deice arye, nyapmanilam do?” akil arye nyabuk.

¹³ Nyabukura, Raja Saul birye, akil ati nyabuk. “Akilo ilil una meme. Bukni, akunum winipmoba eipmom ninguk, laka leplyame. Ance yata ning eipmalam do?” nyabuka asipdeyuk. Nyabukura, akil arye tamubuka nyabuk. “Tuku pum bisik arye, tonoknye dib kanye ton yanmalba eipmane,” nyabuk.

¹⁴ Nyabukura, Saul birye tamubuka, akil ati, “El urasin ara, yata tonye do?” nyabuka asipdeyuk. Asibukba, akil arye, “Kume, ninye tonok wisinye cang baju ongamuknye ton, yanmalba eipmane,” nyabuk. Nyabukopura, Saul birye ‘E, dipkoprob ara, Samuel yanmale’ tenen, kel kibuk. Kel bikukce, adiparyuk el kisok kanupdongobuka, tuku tamuk dinmokce, si erebuk.

¹⁵ Winibukopura, Samuel birye, Saul biti nyabuk. “Amio, anda yata ati, na yukupmanilamce, kamulyanmanilam do? Talye mangkau asa unibukni, winira yata deiyok ati, yukupmanilamba, na tamubuka yanman do?” nyabuk. Nyabukbuk, Saul birye, tamubuka nyabuk. “Kume na nio, narye urdem ati, kum yukupkine. ‘Yata wiriptinye do?’ tenen, walwal kipnila ati, yukupkine. Nara, ikin kanye bopmance, ilil weik upmanila ati, yukupkine. Sik Pilistin tam nang arye opnuniyake. Tonda, nun ni Allah arye, nati akunum bataknuke. Allah ati moroptinya babye, kum kekenulule. Lengdar man deice arye do, el yupu laka nyana deiyok nang arye do, kum melinulule. Allah arye meliliba, anang arye, ‘Aminyan winipnamle ning ani,’ nyabuka, kum laka nyaninyake. Ati ara ance, “Aning winipnamlyame, aning ton winipnamlyame,” nyabuka, ‘Laka nyapnunilam’ tenen, yukupkine,” Saul birye nyabuk.

¹⁶ Nyabukura, Samuel birye, tamubuka nyabuk. “Yata deiyok ati, wini talak na yukupmanilam do? Kam ulamse talak ara, na yupu ara, kum kekelamnulume. Bukni, wini talak ara, Allah el si Yahweh arye, an eibuka akunum batakilce, an mal olananye bitonun, akunum upkila ati, yukupmanilam do?

¹⁷ Minop talak ara, Yahweh arye, anti, ‘Winipnamkine, winipniba Saul winibuka wininamlyame,’ nyabuka, na nyapdeiamkise yupu deice, laka nyalamkuk ning ara, akunum winipkile. Ara, ance malye weik winilamluma ati, Israel ninye ap, Israel ninye unyak mutuku ap nirya, ancuk talilamlum bukni, wini talak ara, Allah el si Yahweh arye, aning nirya akunum dalubuka dopropmakile. Dopropkilirye, an mining damnye biti, arepnule. Ara, Daud biti arepnule.

¹⁸ ‘Deiyok ara, yata deiyok ati winipnamnil do?’ tenena meme. Deiyok ara ani. Allah yu weik ulamukba, anti, ‘Amalek yala ninye obuka, sirya daknalame,’ nyapdeipkuk. Nyapdeipkuk bukni, aning atonun, kum winiplumce, el yupu yanipluma ati, Allah el si Yahweh arye, arup anti wenepkile.

¹⁹ Arup ara, el mikip an deice kum deipnukile. Ati, an ap, anggun Israel ninye nirya ap dobuka, sik Pilistin yala ninye ati, arepnule. Winiplyopura, sik Pilistin ninye arye, sik Israel ninye ati, obuka sirya daknuyake. Obuka sirya dakikirye, an ap, an mapu ap opsikiba, akunum dipmunyopura, ambusum ara, anggunda na dam yanuka unalume. Aninguk kum bukni, Allah arye, Israel yin bon nang nirya bataklibiba, Pilistin yala nang arye, obuka sirya daknamake.” Samuel diamuknye, el dib kanya arye, Raja Saul biti nyabuk.

²⁰ Nyabukura, Saul birye, ayupu akunum kekebukce, Samuel nyabuk yupu ati, pia ilil weik ubukce, yok sirim talibuk. Winibukopura, adiparyuk tuku deice sakuka, poulbiyuk. Tonda, el mikip nirya babye, mitang dem ubuk. Ara, asum noutamak nirya ap, alukunyan ap, din ton pia kum dipmoka anya arye, el mikip kum ubukce, tukwak sakuka poulbiyuk.

²¹ Winibukba, akil arye, Saul dam yanuka dililamakak, Saul ikin weik upmok ning eibukopura, nyabuk. “Naio, an amu tam unye kil ara, ance, ‘Winiplyame,’ nyapmanilam touk, akunum winipmakune. Narye, ‘Malye ning winipniba, opnicak’ tenen, ilil upmanubuk, an moropmanilam touk, akunum melipmakune.

²² Ati ara, na nyapnukin yupu ara, kekepnunilyame. Narye, din ning mitik tonun dem dabuka, arepkinyopura dipnamlyame. Dipmince, mikip upkilyopura, bisik dukdongobuka, binamalyame,” nyabuk.

²³ Nyabuk bukni, Saul birye tamubuka, “Kume, na kum dipnune,” nyabuk. Nyabuk bukni, el neika yanmarik nang, bitinye nang ap, akil ap, ila tamubuka yupu weika arye, ton nyabikopura, kekebukce, tukwak arye tikukabukce, ‘Din dipnun’ tenen, anyaik man amsuna deice bukuk.

²⁴ Winibukopura, akil arye, el sapi basam mi bol teleb ning tonok, el aik arye dobukabukce, adiparyuk obukce, sekuka kintinip deibuk. Tonda, roti dana deiyok ning, gandum teiklamak ning dobuka, roti nena deiyok ning, ragi dongona kumce, eldem memebuka, dabuk.

²⁵ Dabukopura, abasam tup ap, aroti ap dobukabukce, Saul ap, el melin nang ap ati, arebukba, sik nirya dibik. Akunum dibukabikce, alukunyan ara, aniryuk tikuka, el aik batakuka bindobik.