1 Samuel 27 - Eipomek

Daud birye, Kat mutuku ninye deiyoknye, Raja Akhis biti, melilamuk yupu

¹ Daud el kanye pum tam, tenibuk noutam arye, atonun nyapdayuk. ‘Kume, dan talak do, na walwal bukni, na kanye ara, aminyan talak arye, Raja Saul birye, ‘Anye optenyeʼ tenen, pia dobonamnile. Ati ara, yata teleb winin ning uptinyeʼ do, kuma. Nara, sik Pilistin ninye unyak mutuku noutamuk, panabuka bindopnirye, duknubuka, sik mutuku noutamuk upnyopura, Raja Saul birye, tuba kum epnamnile. Elce, Israel ninye unyak mutuku noutam arye, ‘Anye Daud opnamneʼ tenen, tuba kum enamnila anya arye, ‘Yuk mutuku noutam arye, talye kanye bobuka, telebuk uptinye,’ tenebuk.

² Aning tenibuka ati, el ap, el mapu silip ap, el melibuka neika balamik yin talen nang ap, yupa weik enam ratus (600) yin nang ara, amutuku batakuka, otam mutuku noutam, Pilistin nang, sik ninye deiyoknye, Raja Akhis birye taleamuk mutuku noutam, binuka ulamik. Raja Akhis bira, el li si ara, Maok. Maokda, Kat mutukunye ulamuk.

³ Atalak noutam ara, Daud ap, elce domuk kilapu bitinye, Yisreel mutuku kil Ahinoam ap, tonda Karmel mutuku kil Abigail ap, amutuku uk ulamik. Abigail bira, minop talak Nabal domuk bukni, dibuk ati youwak ulamukba, Daud birye domuk kil ani. Aning atonun, Daud el yin talen nang babye, sik ap, sik kilapu ap, sik mapu ap nirya ara, Raja Akhis taleamuk mutuku uk binuka, neika ulamik.

⁴ Ura, yuk nang arye, Raja Saul biti, “Daud ap, el mapu silip nirya ara yuk, Kat mutuku noutam binuka unyake,” nyabuka, lak nyabikba, kekebukopura, tuba ton ap, Daud biti, kum dolbiyuk. ‘Dawaplyeʼ tenebukce, batakamuk.

⁵ Atalak arye, Daud birye, Raja Akhis biti nyabuk. “Kume, ance nati, kanye deipnutumce, ‘Teleb,’ tenepnutum toura, weik asik dominyak kum bukni, talye bai tam mutuku ton nuknutumba, amutuku noutamuk unamne. Nara, an amu tamnye ununa anya arye, an Raja ap, weik teleb ninye asik, teleb kota noutam ara, na kum uptinye. Nara mambulnye kum ununa ati, ‘Pera yukak uptinyeʼ tenen, moropkine,” nyabuk.

⁶ Daud birye nyabukce, morobuka ati, Raja Akish birye, mitik tonun bai tam uamuk mutuku, Ziklak mutuku nukuk. Winibukba, Daud bira, amutuku talibukce, daulamuka anya arye, atalak arye dipdongobuka, wini talak nirya babye, ‘Ziklag mutuku ara, Yehuda nang, sik deiyoknye, el mutuku koproba,’ nyanyake. Tonda, Yehuda nang, sik ninye deiyok nang arye, amutuku tuba talinyake.

Daud Ziklak mutuku taleamuk talak winilamuk ning ati, nyabuk yupu

⁷ Daud ara, Pilistin ninye mutuku noutam ulamuk talak nirya ara, keting tamun tonok ap, wala dumbarye ap, amutuku noutam ulamukce taleamuk.

⁸ Aulamuk talak ara, Daud ap, el melilamik yin telen nang ap, sikce yuk mutuku ninye ati, ninye olbalamik. Ara, Gesur mutuku noutam ulamik ninye ap, Gersim mutuku noutam ulamik ninye ap, tonda Amalek mutuku noutam ulamik ninye ati olbalamik. Sik ayala ninye nirya ara, minop talak arye, amutuku noutam ulamik. Amutuku noutam ulamikba, Daud elce mal pibalamuk ninye ara, Sur mutuku arye dipdongobuka, Mesir mutuku tam ulamik ninye ati, olbalamuk. Sik nirya ara, minop talak arye, Mesir mutuku dam ulamik.

⁹ Daud ap, el yin talen nang ap, amutuku nirya ulamik Pilistin ninye ati, olbalamik talak nirya ara, amutuku ulamik ninye ap nirya, obuka bataklamukce, tonok babye kum bataklamik. Nirya oltakanauk ulamik. Bukni, amutuku ninye nirya olamukce, sikce weilamik domba basam ap, keledai basam ap, sapi basam ap, unta basam ap, tonda sik ongolamikce, dokola delilamik baju nirya ara, aninye obuka sirya dakikce, sik taleamik ning yuk-yuk nirya, alubuka dololamik. Aning nirya akunum winibikopura, Daud ap, el yin talen nang ap, tamubuka Akhis dam yayik.

¹⁰ Winibuka, ulamuk talak nirya ara, Raja Akhis birye Daud biti, “Arup ara, dan mutuku unyak ninye olbinmalum do?” nyabuka asilelamuk. Nyalamukba, Daud birye, tilila yupu deice arye, tamubuka nyalamuk. “Kume na nie, arup ara, Yehuda yala ninye unyak mutuku ara, iknapi tam (arah selatan) unyak ninye olbinmanue,” nyalamuk. Ton sum ara, “Kume, Yeramel mutuku unyak ninye tam olbinmanue,” nyalamuk. Akumopura, Keni yala ninye unyak mutuku tam olbinmanue,” nyabuka, lak nyalamuk.

¹¹ Daud birye warekuka, olbalamuk mutuku, Pilistin ninye ulamik mutuku noutam ulamik ninye ara, tonok nang ton bataknaba, kam kum ulamik. Aninye nirya obuka, sirya dakanauk ulamuk. Deiyok ara, ‘Ninye ton batakipyopura, anye birye, Kat mutuku ninye dam bilirye, ‘Daud ap, el melilamik yin talen nang ap, sikda winibuka-winibuka unyake,’ nyabuka, lak nyapsilyeba, ‘Raja Akish birye biksilyakʼ tenen, amutuku-amutuku nirya, ulamik ninye nirya obuka, bataknauk ulamuk. Atalak nirya ara, Daud bira, Pilistin yala ninye, sik mutuku noutam ulamukce, mal pibalamik talak nirya ara, aninguk winilamuk.

¹² Daud birye, ‘Dipkoprop yupu nyana kumce, tilila yupu aryuk nyanamneʼ tenelamukce, Raja Akhis biti, aninguk lak nyalamuka anya arye, Raja Akhis birye, Daud biti aning ara, utenelamuk. ‘Kume, dipkoprob Daud el mutuku koproba unyak ninye, sik Israel mutuku yala nang arye, Daud biti yu tenebikirye, ‘Anye bira, nun like,’ tenepnamake. Ati ara, el mutuku koproba tamubuka, kum binmanto unamla anya arye, Daud bira, ‘Na mutuku tam ulirye, na pil pia donamnile,’ tenelamuk.