1 Samuel 26 - Eipomek

Like, bitinye ning, ‘Daud birye Saul biti, kum opnamneʼ tenen, batakuk yupu

¹ Tonok sum ton, Zif mutuku ninye arye, Saul Gibea mutuku ulamukak, yayikce nyabik. “Daud bira, Yehuda yala ninye, Hakila mutuku dam eitam bukni, utam ara, Yesimon mutuku bukukak, duknubuka unmale,” nyabik.

² Nyabikura, adiparyuk Saul ap, Israel mutuku yin telen nang, pia teleb-teleb nang, sik melibik nang ara, yupa weik tiga ribu (3.000) yin nang melibikba, ninye kum ulamik pata mutuku, Zif mutuku binuka, ‘Daud opnuyapʼ tenen, Daud biti elbiyik.

³ Saul el tenda aik ara, Hakila mutuku dam deice dobuk. Ara, otam ninye pia kum ulamik pata mutuku uamukak domokce, amutuku balamik bisikak ara, dinauk unmok. Atam ara, yuk nang arye, “Saul bira, anti enmakilce, amutuku bisikak, pia dinmale. Aminyan dobolyanganmakile. Amutuku pata anyuk yanuka unmale,” nyabikba, Daud kekebukce, bikuka anya arye, amutuku pata noutamuk unmok. Amutuku bisik balamik sukum, kum yanganmok.

⁴ Yuk nang arye, nyabik yupu kekebukopura, Daud bira, talye mangkau dipre ban nang ton wipdeibukba, dilbiyik. Dipre banmeka ani, “Dipkoprop Saul bira, amutuku dam yanuka unmale,” nyabikba, el bikuk.

⁵ Winibukopura, Daud adiparyuk Raja Saul, el tenda tia domik asik dam biyuk. Asukum biyukopura, Raja Saul bira, ninye si Nar, el mi Abnar unmoka damuk mapmok. Daud birye, amopmok tenda dopmik aik ara, ebuka bikuk. Ara, sik yin talen nang arye, tia dopmek aik ara, dana-dana tam antanap dongobuka unmekbuk, Saul bira anoutam mapmokak, Daud birye eibuk.

⁶ Ati ara, Daud birye, Het mutukunye, el si Ahimelekh ap, tonda Zeruya birye deiamuk mi, el si Yoab, el kwit Abisai ap ati, “Yatanye ton, ilil pia kumce, malye kipmalce, na ap neika, Saul mapmalak, tia domik aik pum noutam, binuka weknamam do?” nyabuka asipdeyuk. Nyabuka asipdeyukura, Abisai birye, “Yo na nio, na ap binuka weknamame,” nyabuk.

⁷ Ati asum lukunyan ara, Daud ap, Abisai ap, kanupdongobuka, tenda domik aik noutam, wekelbirikce eiprik. Ara, Saul bira, el yin telen nang arye domik aik ara, antanap dongobuka aunmek ning, pia anoutamuk mapmokce, ninye olalbana ati, el bolamuk cang tatce kama ara, el kisok deipmoka damuk, tuku ikdeipmok. El mapmokak dana-dana ara, el yin deiyoknye Abnar ap, el amutuku tam yin nang ap, mapmek.

⁸ Saul amapmokak, sik bitinye arye, eipmarika ati, Abisai birye Daud biti, nyabuk. “Na nio, akunum, nun ni Allah arye anti, lo akunum arepmakile. Anti ‘Anye bira, optinye,’ tenekilinye bira, arup lukunyan arye dobuka, an taruk deice akunum deipmakile. Ati ara, ance nati, ‘Anye bira oplyame,’ nyapniminyopura, Saul el mining tombak dobukapnirye, like bitinye kum bukni, like tonok aryuk lukniba, tuku ap bikdongopnirye, opnune,” nyabuka morobuk.

⁹ Bukni, Daud birye tamubuka, Abisai biti nyabuk. “Kume, ance aning tenepmalama ara, kume. Anyapkina ara, talye ati kume. Deiyok ara, ani. Ara, Allah Yahweh arye, ‘Raja kipnamleʼ tenen, akunum wipdeibuknye, opminyopura, Allah elce awinipminye ning ati, ‘Dawaplye,’ kum tenepnamle. Aning kum bukni, ‘Dipkoprop tamubuka, wenepkilyakʼ tenen ati, winina kume.

¹⁰ Nuncuk kum opnuname. Allah Yahweh, kam pia ululnye, el si deice arye, dipkoprob nyapkine. Na kele, yuk talak ara, Allah elcuk, ‘Wini talak Saul opnune,’ teneplyopura, opnamlarya. Aning kumopura, narye, ‘Atalak ani,’ kum teneptinye bukni, Allah el kanye aryuk, ‘Saul bira, asum dipnamle,’ tenebuk talak kiplyopura, dipnamlarya. Aning kumopura, mal olan dam banmalye talak ara, ‘Yuk mutuku nang arye, obikiba dipnamle,’ tenyamlyopura, mal olan dam arye obikiba, dipnamlarya,” Daud birye nyabuk.

¹¹ Ati ara, na ni Allah ati moropmane. Elce melipniliba, el Yahweh arye, ‘Anye bira, Israel ninye, sik ninye deiyok kibuka unamleʼ tenen, wipdeiamuknye bira, narye kum opnune,” nyabuk. Nyabukopura, ayupu ton Abisai biti nyabuk. “Kum opnamlam bukni, Saul el kisok dam tuku ikmal ning, tombak kama ap, el mek lin makau ap, dopdakuka binuname,” nyabuk.

¹² Nyabukopura, Daud birye, Saul bolamuk ninye on tombak ap, kendi mek makau ap, Saul el kisok dam deipmok ninguk, dobuka bobirik. Adobuka bobirik ning ara, sik amapmek nang, tonoknye babye ton, aning eibuka kum bikik. Deiyok ara, Allah Yahweh arye, sik anang nirya ati, ‘Maptinge,’ tenebukba, maplukne ning arebukba, maplukmeka anya arye, tonoknye babye, ton kum bikmukce, aning ton eibuka kum bikik.

¹³ Daud bira, sik tenda aik tia dobuka unmek mutuku pata tam arye batakuka, yuk otam mitik tonun yukak mutuku deice, koulukuka biyuk. Ara, Saul el aik dobuka unmoka, pia yukak, ounmokak biyuk.

¹⁴ Yukak biyikopura, Daud birye, Nar elce deiamuknye Abnar ap, Saul el yin talen nang ati, yukubukce nyabuk. “Abnaro anda, na yupu kekepnilamce, tamubuka kum nyapnamanilam do?” nyabuk. Nyabukura, Abnar birye tamubuka nyabuk, “Anda yatanye yanuka ngalukunmalamce, nun ni Raja Saul biti, yupu nyanmalam do?” nyabuka asipdeyuk.

¹⁵ Asibukura, Daud birye tamubuka, Abnar biti derebukce, nyabuk, “Ance, Israel mutuku noutam ara, nauk mikip weiknye unune,’ tenelalyam do? Yuk nang ton aunyak bukni, an mikip weik unmalam touk, yuk nang ton kum unyaka anya arye, anda yata deiyok ati, an deiyoknye, Raja Saul biti, kum kalikmamum do? Alukunyanuk, ninye ton, anggun tenda aik doplum noutam wekukaburye, ‘Raja Saul, anggun deiyoknye ‘opnamanʼ tenen, yanmo bukni, bataka bindopmoe,” nyabuk.

¹⁶ Abnar an pil dona ati arepkik ning ara, mikip asa, teleb ubuka, min dopmanto kumnye ulyame. Ara, Allah Yahweh, kam una deiyoknye, el si deice arye, dipkoprob nyapkine. Allah Yahweh arye, ‘Anye Israel ninye, sik deiyoknye unamleʼ tenen, wipdeiamuknye biti, teleb ubuka kum kalikmalame. Ati, daopkitinge. Tonda, dipdelyame, an deiyoknye, el taleamuk ninye on tombak ara, dan upmal do? Tonda, an deiyoknye, el mek din makau kisok dam deipmo makau ara, dan upmal do? An ton bikmalam do?” nyabuka wenebuk.

¹⁷ Daud birye, nyabuka asipdeyukura, Saul bira, Daud yupu nyanmoka kekebukce, ‘E, ayupu nyanmalanye bira, Daud aunmalce nyapmasileʼ tenen, bikuk. Bikukce, tamubuka nyabuk. “Anda na mi Daud birye, ayupu nyanmasilam do?” nyabuka asipdeyuk. Asibukba, Daud birye, “Yo na deiyoknye, narye nyanmana,” nyabuk.

¹⁸ Nyabukce, Daud birye, ayupu ton ap dukdongobuka nyabuk. “Na deiyoknye Rajao, yata deiyok ati, an amu tam ulirye, pil donanye bitibuk, ebuka dobolsusunmalam do? Tonda, an amu tam ulirye, pil dolinye bira, yata ning ton malye ubuka ati, ‘Opnamanʼ tenen, enmalam do?

¹⁹ Ati ara, na an amu tam pil donanye birye, nyapmakin yupu ara, kekepnunilyame. Ara, winipmanto ara, na an pil donanye biti, Allah Yahweh arye, “Anye bira opnamlyame,” nyapdeipmakilba, bobanmaniminya ani, ance na opniminyopura, Allah el kanye deipnamakile. Bukni, ‘Ance kum opnamanilamʼ tenen, Allah ati teleb ning areptinyopura, Allah arye, kanye deipnuturye, “Dawinipmalye, anye bira, kum opnamlyame,” nyabuka, luba kipnutu do? Bukni, winipmanto ara, na deiyoknye, Allah arye kum bukni, talye ninye aryuk tenibuka, nyapmakiyak deice arye, ‘Anye opnune,’ tenepminyopura, Allah arye, sik anang ati ara, supnamle. Deiyok ara, sik aninye unyaka deice arye, na an pil donunye bira, Allah el dam arye yakniliba, Allah arye kalikilul nang, Israel ninye kan-kan ton, kum uptinye. Ati, ‘Yata wiripnuna kumaʼ tenen, sik yuk mutuku ninye dam tikilbisirye, amutuku nang arye, talye ning isa mer siuk, erebuka unyak touk, ‘Sik ap, unyap talak ara, na babye isa si erepnyakʼ tenen, nyapkine.

²⁰ Ati ara, na deiyoknye Raja, yata deiyok ati, yuk mutuku ninye un dam ara, Allah Yahweh el si erena kum mutuku ninye dam, opniminyeba dipnamne do? Tonda, yata deiyok ati, Israel mutuku nirya taliplum ninye deiyoknye birye, nara talye mi atonunye biti, ‘Opnamanʼ tenen, elyanmanilam do? Tonda, yata deiyok ati, ance, ‘Anye opnun,’ teneplumce, nara mambulnye kum ati, elyanmanilam do? Nara, talye bai tam ulamle maka atonunye ununa anya arye, yata deiyok ati, an weiknye bira, ‘Atalinye optinye,’ tenepmalamce, dobonilyam do?

²¹ Daud birye, ayupu nirya, akunum nyabukopura, Saul birye tamubuka nyabuk, “Se, winira na bikmakine. Narye, akunum malye upse. Na ni mi Daudo, an adiparyuk tamubuka, na dam yanulyame. Ara, narye ton, tuba tamubuka, an dam malye kum kipdeipnamkine. Ara, arup lukunyan ara, ance akunum opmanutum bukni, ance nati ‘Bico,’ tenepmanumce, kum opmanilame. Narye anti, malye upse ning ara, walwal arye upse. Ara, dipkoprob na kanye walwal upmanua deice arye, malye upse,” Saul arye nyabuk.

²² Nyabukura, Daud birye tamubuka, ayupu nyabuk. “Na deiyoknye, an ninye on tombak ara, abopmakine. Ati an yin nang ton nyapminyeba, asukum yanuka dobikirye, an dam tamubuka yatinge,” nyabuk.

²³ Tonda, moubuka tenipnulyame. Allah Yahweh arye, yatanye do nirya ara, elda, diksukum telebuk ukirye, batakna kumce, el yupu moubuka talibikirye, elti, dobolbanyak nang, sik dengna ati ara, melilirye, teleb kililule. Aning ara, arup lukunyan ara, na deiyoknye, anda Allah Yahweh arye dobuka, na taruk deice deipmanuba, narye, ‘Kume, Allah Yahweh arye, ‘Anye Raja unamleʼ tenen, akunum wipdeiamuknye biti, narye malye kum uptinyeʼ tenen, an kum opmakunue.

²⁴ Ati ara, na an amu tam unanye birye, anti, ‘Elda weik mambulnyeʼ tenen, kum opmakince, batakmakina atonun, Allah Yahweh arye nati, ‘Elda na tenenanye,’ tenepnuturye, melibuka talipnilirye, melibuka kalikinamnutueʼ tenen, moronune. Tonda, Allah arye nati, ‘Elda, kanye imun weik upliba, ikin weik uplyakʼ tenen, ‘Elce pia kalikuka melinamnilʼ tenen, moronune.

²⁵ Nyabukura, Saul birye Daud biti, tamubuka nyabuk, “Allah Yahweh arye, na mi atonunye anti, ‘Teleb kipdeipnamkilʼ tenen, moronmakine. Winipkiliba, an pil donamlama nirya ara, nonguk upkilirye, pia telebuk unamkile,” nyabuk. Ayupu nirya akunum sisikdikopura, Daud adiparyuk, el bisikuk dukdongobuka biyuk. Atalakuk, Saul bira tamubuka, el asik Israel mutuku noutamuk biyuk.