1 Samuel 24 - Eipomek

Daud birye, ‘Raja Saul kum opnamne,’ tenebuk yupu

¹ Ura yuk talak ara, Saul ap, el yin bon nang ap arye, Pilistin ninye olana ati, warikil balamik ani, aminyan talak tamubuka yayik. Yayikopura, yuk nang arye, Saul biti, “Daud bira mek ap, ninye ap kum mutuku, mutuku si En-Gedi mutuku ulule,” nyabuka laka nyabikba, Saul kekebuk.

² Kekebukopura, Saul birye Israel ninye ulamik noutamak, yin talin nang, sik yupa ara, tiga ribu nang wipdeibuk. Wipdeibukce, Saul ap, ayin talin nang ap arye, ‘Daud ap, el yin bon nang ap ara, dan sukum unyak do?’ tenen, bai mutuku elbinmek. Amutuku ara, sik amutuku ulamik nang arye, ‘Buru mutuku yim kambing weik ulul mutuku, tonda keil si ngelul mutuku,’ nyalamik mutuku, Saul ap, el yin bon nang ap, amutuku welebuka Daud biti elbinmek.

³ Saul ap el mapu silip ap banmeka ani, abisik kup-kup ara, domba poka domikak biyik. Amutuku dam ara, keil deiya ton awamuk. Saul bira ‘Lin patabuk ati, lin lalbinun’ tenen, akeil deiya pum bisik wekelbiyuk. Saul kum bikmok bukni, Daud ap, el yin talin nang ap ara, akeil deiya amu koproba akunum duknupmek bukni, sikda pia pum kopropak unmek anya arye, Saul kum eibuk.

⁴ Saul bira akeil deiya wekukba, Daud el yin talin nang eibikce, Daud biti nyabik. “Se na nio, nun ni Allah arye minop talak anti nyapdeipkuknye bira, wini talak akunum uple. Allah arye nyapkuke. ‘An mal olan nang dobukapnirye, an dam deipkiniba, opnalam do, bataknalam do, ance tenepminye touk, adiparyuk wininamlyame,’ nyapkuke. Ayupu nyapdeipkuk ning ara, akunuma. ‘Daud opnamne,’ tenekululnye, Raja Saul oupmala atia,” nyabik. Nyabikba, Daud bukukce, yupu nyana kum, tunim abukabukce, Saul unmokak binuka, Saul baju mouse tam kwilikuka doprobuk. Doprobuk buk, Saul kum bikuk anya arye, Daud bira el yin nang dam tamubuka biyuk.

⁵ Daud birye, aning akunum winipmok bukni, atalak ara, ‘Se, Raja Saul el baju mouse tam sekuka, dopropman ning ara, dipkoprob malye upmane,’ tenebukce, ikin kanye bobuk.

⁶ Ikin kanye bobukce, el yin talin nang ati nyabuk. “Kume nun ni Allah el si Yahweh arye, minop talak arye, ‘Israel ninye sik Raja unamle’ tenen, Saul wipdeiamsuka ati ara, Saul bira Allah elce erepdeibuknye tuba ulula ati, na deiyoknye ulule. Nara el amu tamnye unune. Ati ara, narye Raja Saul biti malye kum kipdeiptinye. Tonda narye Saul biti kum optinye. Winipnyopura, Allah arye nati wenepnilyake. Ati, Saul el baju mouse tam sekmanu ning ara, dipkoprob malye winipmana anya arye, ‘Allah arye wenepnilyak’ tenen, na malye kanye bopne,” nyabuk.

⁷ Daud birye ayupu nyabukace sik, el yin talin nang ati, “Anggun, ‘Raja Saul opnuyabe,’ kum tenenamlulume,” nyabuka wenebukce yupu sekukba, sikce Saul kum obik. Ati ara, Saul talye mangkau kanye bobukabukce, lin akunum labukopura, akeil deiya pum tam batakukabukce bisik dukdongobuka bai tam bisik biyuk.

⁸ Bai bisik binmokba, aminyan Daud birye akeil deiya pum tam arye bai biyukce, Saul obanmokak ati, weik yupu deice arye yukubuk. “Raja Saul, na deiyoknye ulyame,” nyabuk. Nyabukba, Saul kekebukce, tamubuka el aminyan tam dilamukak, Daud bita eibuk. Daud bira, Saul el si erena ati, kisok tukwak kanupdongobukce nyabuk.

⁹ “Raja Saul, yuk nang arye anti, ‘Daud birye anti malye kanye bokulule. Elce dipkoprob malye upnamkile,’ nyakinyak talak ara, yata ati anang yupu kekelyam do?

¹⁰ Arup an asing aniryuk akunum dinmalamce kel bikmalame. Anda akeil deiya pum tam binmom talak ara, nun ni Allah, el si Yahweh arye na dam arepmanuba, na taruk arye akunum opmakitinye bukni, kum opmakine. Arup talak akeil deiya pum tam unmom talak ara, ton nang arye, ‘Akunuma, Saul oplyame,’ nyapmaniyak bukni, kum opmakine. Narye, ‘Kume, na ninye deiyoknye Saul bira, Yahweh arye ‘Anye bira Israel ninye talibuka sik Raja unamle’ tenelamukce, Saul wipdeiamuka ati, elti, kum optinye,’ nyapmanue.

¹¹ Na ni Saul elinilyame. An baju mouse tam sekuka abopmakin atia. An mining dam winipmanu bukni, an nong ara, kum opmakune. Ati ara, moubuka tenepmince kel biknamnilyame. Na dipkoprob malye kum kipreipkunune. Tonda, anda nun deiyoknye ulyama anya arye, an kum yanikunune. An amu tam tuba ununa nyapkine. Narye anti malye kum upkise bukni, ance ‘Daud opnaman’ tenen, nati dobolbanilyame. Narye ‘Yata malye ning winipkisiba olyanganilyam do?’ tenen, asipdekine,” Daud birye Saul biti nyabuk.

¹² Nyabukce ayupu dukdongobuka nyabuk. “Ati ara, nun ni Allah, el si Yahweh arye, nun kan-kan noutamak yupu lipsisikuka bokolinamsile. Ance nati malye updeipnulum ning ati, Allah aryuk wenepkutu bukni, na taruk aryuk anti kum opmakine. Narye malye kum updeipmakine.

¹³ An kele, nun apu yapu arye minop talak nyalamik touk, nun yala nang tuba nyanyake. “Kanye talima malye nang arye malye winin ninguk wininyake,” nyanyake. Bukni, na bidamnye taruk aryuk anti malye kum updeipmakine. An nong deice ikin ning kum deipnamkine.

¹⁴ Anda Israel ninye sik ninye deiyoknye, Raja ulyame. Yata tonye biti, ‘Opnun’ tenen, yanmalam do? Yata tonye biti dobolbanmalum do? ‘Optinye’ tenen dobolbanmalumnye bira, talye oltaklamik kam atonunye tenepnulumce olyanmanulum do? Tonda, ninye potong dilamle ning amnye atonun, ‘Pia mikip asa kumnye ulule,’ tenepnulumce yanmanulum do? Kume, nara talinye kum unune.

¹⁵ Ati ara, nun ni Allah el si Yahweh arye, an ulyam ning ap, na wininun ning ap, moubuka dipdesilirye, nun yupu lipsisikuka bokolina deiyoknye usilirye, yupu lipsisikuka bokeipnamsile. Elcuk ‘Aning telebe, aning malye,’ teneplirye yupu bokeipsilirye, nyapnamsile. Tonda, Allah aryuk na wininye ning babye, na wininamne ning babye melinamnile. Ance nati, ‘Opnamane’ tenen, piripdenilam bukni, Allah melipnilirye lyepnamnile. Winipnilya deice arye, yuk ninye nirya ara kel biknamake. ‘E dipkoprob Daud bira, diksukumuk ulule. Saul bira malye ulamuk’ tenen, kel biknamake.” Daud birye, Raja Saul biti nyabuk.

¹⁶ Daud birye Saul biti ayupu nirya akunum nyabuka sengayukura, Saul birye Daud biti nyabuk. “Se, ance nyapnilamnye bira, na mi Daud birye nyapmanilam do?” nyabuk. Nyabukce weik yupu arye nyabuka engebukce ayupu ton nyabuk.

¹⁷ “Anda dipkoprob diksukum ulyam bukni, na uk ara malyeuk unune. Ance nati teleb kibuka ulilamnulum bukni, narye anda, malye kililamkise.

¹⁸ Aning atonun wini talak akunum laka nyapmanilame. Allah el si Yahweh arye, na dobuka an dam deipmanuak, akeil deiya pum tam ance adiparyuk akunum opmanutum bukni, kum opmanilame. Winipmalama deice arye, telebuk updeipmanilame.

¹⁹ Yata nang do nirya, sik mal olan nang ati, pia elamica ani, eibicopura, batakikirye, ‘Dabilyame,’ talye nyanyak do? Kume, sik mal olan nang eibicopura, adiparyuk onyake. Wininyak bukni, ance nati, kum opmanuma ati, Allah moropnamkine. Ara, ‘Allah el si Yahweh arye, dengna eripnamkil’ tenen, Allah moronamkine. Deiyok ara, arup ara, ance telebuk kipdeipmanila ati nyapkine.

²⁰ Tonda, na akunum kel bikmane. Aminyan talak ara, anda Israel ninye sik ninye deiyoknye Raja unamlame. Winipmince, Israel ninye ap, sik mutuku-mutuku nirya ap ara, ance teleb kibuka taleaminye bukni, sik nirya telebuk unamake. Yuk nang arye anti kum malye kipnamkiyake.

²¹ Winipnamlama ati ara, na patapnil ning ati, ‘Nyalin yupu nyapnunilam’ tenen, moropnukine. Ara, Yahweh el si deice arye nyapnunilyame. Narye deipseba, dadeipdanin, banamak ninye nirya ara, ‘Ance kum obuka sirya daknamsilyam’ tenen, moropkine. Tonda, ‘Na ni birye deipnukba, nun yala ninye nirya ap, nun yala si ap, na si koprop ap, kum kilipnamsilam’ tenen moropkine. Ara, ance nati, ‘Sik yala ninye opnirye, kum kibuka kum dakeipnamsine’ nyabuka, nyalin yupu nyapnunilam tenen, moropkine. Ance, ‘Aning ara kum winipnamne. An yala nang kum olyanamne,’ nyabuka, nyalin yupu nyapdeipnunilyame,” Saul birye Daud biti morobuk.

²² Nyabuka morobukba, Daud birye Saul biti, ‘Allah el si deice arye, aning ara dipkoprob kum winipnamne,’ nyabuka nyalin yupu nyapdeibuk. Nyabukba, Saul tamubuka el mutuku koproba biyuk. Atalak aniryuk Daud ap, el yin talin nang ap, sik duknulbinamik mutuku tamubuka biyik.