1 Samuel 23 - Eipomek

Daud birye, Kehila mutuku ninye lyepdobuk yupu

¹ Tonok sum ton, Daud kekenmokba nyabik, “Pilistin yala ninye arye, Kehila mutuku ninye opmakce, sik gandum dakuka, delinyak ning nirya ara, alubuka dopropmake,” nyabik.

² Ayupu akunum kekebukopura, Daud birye Allah ati nyabuk, “Na adiparyuk, Pilistin ninye olbitinye do?” nyabuka asipdeyuk. Nyabukura, Allah arye, “Yo aning ara, winina telebe. Ance Pilistin mutuku ninye binuka opmince, Kehila mutuku unyak ninye ati, lyepdeipnulyame,” nyabuk.

³ Allah arye, Daud biti nyabukba, Daud el mapu arye, tamubuka elti, nyabik, “Pilistin ninye olbinamap bukni, nun aunyab mutuku noutam ara, Yehuda yala ninye ati, mitik tonun ilil upmasilibuk unyap ati ara, Pilistin mutuku noutam, Kehila mutuku unyak ninye olbinamap bukni, ilil pia weik unamabe,” nyabuka asipdeiyik.

⁴ Nyabika ati Daud bira, “Allah elcuk wininamlyame, wininamlyame,” nyabuka, ‘Peterepnutueʼ tenen, morobuk. Morobukba, Allah Yahweh arye nyabuk, “An kanye bokoltona kume, adiparyuk Kehila mutuku binulyame. Narye an deice mikip arepkiniba, Pilistin mutuku yin telen nang nirya ara, obuka kum daneipnamalame,” nyabuk.

⁵ Nyabukopura, Daud ap el melin nang ap, sik nirya Kehila mutuku biyikce, Pilistin mutuku yin telen nang nirya, binuka obikce, sirya dakik. Winibikce sik amutuku ninye weilamik kam ning nirya ara, alubuka doprobik. Winibik deice arye, Pilistin nang arye, Kehila mutuku ulamik ninye ati, malye kibuka, taleamik bukni, atalak aryuk Daud bira, Kehila mutuku ninye nirya ati lyepdeibuk.

⁶ Aminyan talak ara, Abimelek el mi Abyatar bira, ‘Daud birye, na melibuka kaliknilirye, melinamnilʼ tenen, Daud dam bikbik abuka yayuk. Elce Kehila mutuku yayuk talak ara, imam nang arye, sik taram deice ongolamik baju, el si efod boyayuk.

⁷ Daud ap, el yin talen nang ap, Kehila mutuku biyik talak ara, yuk nang eibikce, Saul dam binuka, Saul biti, “Daud bira, Kehila mutuku unmale,” nyabuka lak nyabikba, Saul kekebukce, Saul elce utenebuk, “Kume ara, Allah arye, ‘Raja Saul birye Daud optuʼ tenen, na dam boyanmanile. Tonda, weik asik dobuka ukirye, weik cang kurun poka dobuka antanap dongobikce, kat ning arye, bublan moubuka memepdongomikak,akunum wekuka yanmala, ati, kanam aryuk bikbik abuka, bai sakuka kum bitue. Ati, kanam aryuk tomoptinirye, optinye,’ tenebuk.

⁸ Utenebukce, Raja Saul birye, el taleamuk mutuku ulamik nang ap, el kalikin yin telen nang nirya ap ati, “Anggun nirya kintiniplulume. Adiparyuk Kehila mutuku binuyabe. Ara, Daud ap, el melin yin talen nang ap nirya ara, Kehila mutuku unmaka ati, binuka warikibirye, opnamabe,” nyabukba, sik nirya arye, el yupu kekebikce, bulubuka yayik.

⁹ Yayik bukni, Saul birye, ‘Daud biti opnamne,’ tenepmok ning ara, yuk nang arye, Daud dam binuka, lak nyabikba kekebuk. Daud akunum bikuk ati, imam Abyatar biti nyabuk. “Anggun imam nang arye, anggun taram deice ongolulum baju, el si efod bopmalam ning ara, na dam boyalyame,” nyabuk.

¹⁰ Efod baju boyayukopura, Daud birye aning bobukabukce, Allah ati morobukce nyabuk. “Se, na ni Allah Yahweh, nun Israel ninye nirya arye, antibuk, si erekinyabe. Anda nun deiyoknye ulyame. Na kekepmana ara, Raja Saul birye, na an mi ati, ‘Kehila mutuku unmalak arye opnamanʼ tenen, kintinibuka yanganmale. Na amutuku binuka unmana ati ara, Saul ap, el yin talen nang ap arye, amutuku unyak ninye nirya babye, oplirye sirya daknamale. Yuk nang arye, ayupu lak nyapmanguba, kekepmane.

¹¹ Ati, na ni Allah Yahweh, ance nun Israel ninye melibuka, kalikisilyama ati, imun kanye bopman arye, moropmakine. Ayupu ara, yuk ninye arye, na dam yanuka, nyapmaniyaka ati, aning ara, dipkoprob nyapmak do, kum do? ‘Se, na ni Allah, ance lak nyapnutumʼ tenen, moropmakine,” nyabuk. Nyabuka morobukba, Allah Yahweh arye, tamubuka nyabuk. “Diba, Saul bira, bisik noutam akunum yanganmala anya arye, amutuku yanuka opnamasile,” nyabuk.

¹² Nyabukopura, Daud birye, ton ap Allah ati asipdeyuk. “Na nio, sik Kehila mutuku unyak ninye arye, Saul yalyopura, ilil upliba, sikce na ap, na melin nang ap ati, ‘Saul birye opnamaleʼ tenen, bataksikirye, Saul biti arepnamsiyak do, kum do?” nyabuka asipdeyukura, Allah arye, “Diba, aning babye winipnamake,” nyabuk.

¹³ Allah arye aning nyabukba, Daud kekebukopura, el damnye Daud ap, el melibuka yin talen nang ap, Kehila mutuku batakuka bindobik. El yin talen nang, sik ding ara, yupa weik enam ratus (600) nang unmek. Sik nirya ara, adiparyuk Kehila mutuku arye, batakukabikce, bai sakuka, yuk mutuku binuka, amutuku unmana batakuka, yuk binuka, unmana batakuka, yukak ton binmana, panabuka kilamik. Winibikopura, ninye arye, Raja Saul biti, lak nyabikba, Saul aning kekebukce, ‘Kehila mutuku Daud unmalak olbinune,’ tenepmok ning ara, batakuk.

Daud bai mutuku noutam binamukce, duknubuka ulamuk yupu

¹⁴ Daud ap, el melibuka balamik yin talen nang ap, akunum bai sakuka binamikce, sik nirya ara, mutuku si, Zif nyalamik mutuku noutam, keil deia binamikce, duknubuka ulamik. Ulamik talak nirya ara, Saul birye, ‘Daud bira optinyeʼ tenen, asum-asum nirya, pia ebuka doplamuk. Winilamukba, Allah arye, Daud dobuka, Saul taruk deice kum areamukba, Daud tomopmanto kum ulamuk.

¹⁵ Winyamukba, Daud bira, ‘Saul birye opnilyakʼ tenen, ilil tuba ulamuk ati, tonok sum ton, Daud ap, el melin nang ap, Zif mutuku noutam pata bukni, mutuku si ton, Hores nyalamik mutuku noutam unmek talak ara, ninye arye, lak nyabikopura, “Raja Saul tuba, ‘Daud optinyeʼ tenen, enmakilce, amutuku noutam kalikil yanganmakile,” nyabikba, Daud kekebuk.

¹⁶ Amutuku unmok talak ara, Saul el mi Yonatan birye, ‘Na kwit koproba, Daud ap ton epdatinimnyeʼ tenen, Hores mutuku noutam, el ulamukak biyuk. Biyukopura, ‘Daud bira Allah Yahweh ati, dip tenelul ning ara, aninguk mikip arye, taliplirye unamleʼ tenen, Yonatan birye, el kwit Daud dam binuka, talima mikip kin yupu, melibuka nyalamuk.

¹⁷ Yonatan birye Daud biti, binuka nyabuk, “An ilil una kume, na ni Saul bira, anti eipkilirye, tomobuka kum opnamkile. Ara, dipkoprop, elce anti, akunum bikuke, Israel ninye, sik deiyoknye bira, ancuk kipmince, sik talipnamlame. Winipminba, an amu tam melinanye bira, na unamne. Tonda, na ni Saul, aning akunum bikamuk bukni, ‘Lik,’ tenelule,” nyabuka, Yonatan birye, Daud el talima melin yupu ati, nyabuk.

¹⁸ Yonatan birye, ayupu nyabukopura, Daud ap, Yonatan ap, sik bitinye nang arye, nyalin yupu nyapdarik. Ara, ‘Na ap, an ap, nunda Allah dinmasilak arye, nyalin yupu akunum nyapdeipdaname. Nunda pia melipdanuka, unaname,” nyapdik. Ayupu nyapdikopura, Yonatan adiparyuk tamubuka, el asik biyuk bukni, Daud bira, Hores mutuku asukumuk ulamuk.

¹⁹ Daud bira, amutuku uk ulamuka ani, Zif mutuku nang arye, Saul ap, Gibea mutuku arye epdayikce nyabik. “Na nio, Daud bira, nun tam Hores mutuku noutam bukni, Akhila mutuku kon deice, mutuku dam keil deia duknubukce, binuka ulule. El ululak ara, Yehuda yala ninye, sik mutuku kon tam, amutuku ara, dabu tam (arah selatan) mutuku ulule,” nyabuka, lak nyabik.

²⁰ Nyabikopura, ayupu ton dukdongobuka nyabik. “Ara, nun akunum bikupe. Raja ance Daud biti, ‘Tomopnamne,’ teneplumce, elyama ati, yanuka lak nyapkiyabe. Anya arye, ninye deiyoknye ance, ‘Daud tomopnun,’ tenepminyopura, nun mutuku yalyame. Yaminyopura, nunce Daud tomobibirye, anti arepnamkiyabe. Winibibyeura, Daud tomopnamalame,” nyabik.

²¹ Nyabikbuk, Saul birye tamubuka, sik anang ati nyabuk. “Anggunce nati, weik tonun melipmanuluma ati ara, ‘Allah Yahweh arye, sikti, weik tonun melipnamleʼ tenen, moronamsine,” nyabuk.

²² Tonda, anggun adiparyuk tamubuka bimunce, tuba, ton ap moubuka, biknamlume. ‘Daud bira, dan tam keil deia pum ulul do?’ tenen, elbinamlulume. Tonda, ‘Yata nang arye ton, Daud akunum eipmangueʼ tenen, asipdenamlume. Sikce nyapsikcopura, Daud dipkoprob ulyakuk, biknamlume. Tonda, Daud ulyak eipmoce, yanuka nyapmasunye bira, ‘Yatanye birye yanuka nyapmasu do?’ tenen, moubuka biknamlume. Aning ara, talye ati kum nyapne. Na kekenune. Elda, etekdop weik arye, duknubuka balinye biti, nyapsine.

²³ Ati ara, Daud el duknubuka, ulul keil deia nirya ara, anggunce moubuka dipdemunce, bikmunyopura, anggun adiparyuk tamubuka, na dam nyalyanamnulume. Yanuka, nyapnumunyopura, anggun melipsiniba, na ap neika binamabe. Winipmanto, Daud el Yehuda mutuku noutam, tuba unmalyopura, amutuku ninye pia weik ulamtinga babye, amutuku noutam ara, Daud el ululak moubuka, elbinamne.” Saul birye nyabuk.

²⁴ Saul nyabukopura, ayanmek ninye ara, Saul el dam arye, batakuka, adiparyuk Zif mutuku tuba tamubuka biyik. Atalak ara, Daud ap, el melibuka balamik yin nang ap, sik nirya ara, Yehuda yala ninye, sik mutuku noutam bukni, dabu tam atonun, arah selatan tam, ninye babye kum mutuku pata mutuku, el si ara, Maon mutuku tuba, unmek.

²⁵ Ara, Saul ap, el yin telen nang ap, sik nirya arye, Daud biti, ‘Kalikil binamabe,’ tenepmek ning ara, yuk ninye arye, Daud kekenak binuka, lak nyabikba bikukopura, Daud el yukak biyukce, cang weik keil pata mutuku dam, Maon mutuku noutam unmok. Unmoka ani, ton yuk ninye arye, “Daud bira, Maon mutuku dam unmale,” nyabuka, Saul dam yanuka nyabikba, adiparyuk, Raja Saul birye, ebuka, dobolbiyuk.

²⁶ Atalak ara, Saul ap, el yin telen nang ap, sikda Maon mutuku bukni, atam sirya tam arye, leibuka binmek bukni, atalak ara, Daud ap, el melin nang ap, sikda Maon mutuku bukni, ortam sirya unmek. Unmeka anya arye, Saul birye Daud ap, el melin nang ap, ‘Warik dongobuka tomopnunʼ tenen, akunum dam ubukopura, Daud ap, el melibuka balamik yin talen nang ap, sik minop adiparyuk, Saul dam arye, batakuka bindobik.

²⁷ Winibuka unmek bukni, atalak aryuk, Saul el tam nang tonoknye birye, Saul dam nyalbana ati, dopdeipmekba, talye karin arye, pola Saul dam yanuka, nyabuk, “Na deiyoknye Raja, an adiparyuk tamubuka, an mutuku binulyame. Ara, Pilistin mutuku yin talen nang arye, nun unyap mutuku noutam yanmangurye, warekuka opmasiyake,” nyabuk.

²⁸ Ayupu kekebukopura, Saul birye, Daud biti, ‘Dobolbinirye opnamneʼ,’ tenyamuk ning ara, batakukce, Saul bira tamubuka, Pilistin mutuku yin nanguk, olbiyuk. Awinibuk ning ara, amutuku unmokak ara, “Daud lyebukce, bobiyuke,” nyabuka, si silamik.

²⁹ Atalak aryuk Daud birye, amutuku batakuka yuk mutuku si En-Gedi mutuku, binuka ulamuk. Ara, ‘Nun mal olan nang arye, yanuka opsicakʼ tenen, amutuku ninye ara, minop talak ara, weik keil arye domik asik sukumuk, yu nang arye kum wekmanto asik, amutuku binuka ulamuk.