1 Samuel 21 - Eipomek

Daud bira, Nob mutuku biyuk yupu

¹ Daud adiparyuk, Allah el si eren aik pum tam pil donanye, el si Ahimelek, Nob mutuku ulamukak biyuk. Biyukopura, Ahimelek Daud eibuk ati, lukdayukce, kutuksakuka, Daud dam yayukce asipdeyuk. “Anda yata ati, an yuk yanmalam do? Ninye ton kum melipmakiyaka ara, yata ati do?” nyabuk.

² Nyabukba, Daud birye tamubuka, Allah el aik pum tam pil donanye, Ahimelek biti nyabuk. “Nara, nun ninye deiyoknye, Raja Saul birye, nati ikin yupu arepnukce, nyapnuk. ‘Yuk nang kekenak ton, ayupu ap, narye nyapkiniba, pil donalam ning ap ati, laka nyana meme. Duknubuka binuka, pil donalyame,’ nyapnuke. Ati ara, talye diamuk dopdeipnuka ati, ‘An tonok ati, epdananam’ tenen, yanmane. Na melin nang ton, an dam neika kum yanmabe. Na melin nang ati, ‘Anggunda, omutuku binuka unmamunyebuk, aminyan talak na yanamne. Omutuku uk epdanamabe,’ nyapse,” Daud birye nyabuk.

³ Nyabukce, ayupu ton nyabuk. “Ati ara, yatato din ning aupmakil do? Aupmalyopura, din ning roti pamubarye arepnilyame. Aning kum uplyopura, yata ning do, aupmalye ninguk arepnilyame,” nyabuk.

⁴ Daud birye nyabuk bukni, Allah el aik pum pil donanye birye nyabuk. “Wini talak, nara roti kwaning talye ning ton, pia kum deipmane. Allah el arin ning ati, el aik pum tam deilinyab roti uk ton, aupmala ara, doproptume. Bukni, an melin nang arye, min kum yanmace talak, kil ap neika mapmace nang ara, aroti kum diptinge. Yata barye talak arye, kil ap neika kum mapmaricopura, aroti dobuka diptinge. An mapu ara, moupnamnyake. Aning ara, minop talak Allah arye nyapdeipsuk touk ati, nyapkine.” Ahimelek birye, Daud biti nyabuk.

⁵ Nyabukba, Daud birye tamubuka, Allah el aik pum tam pil dona deiyoknye, Ahimelek biti nyabuk. “Diba aning ara, akunum tenepmane. Ura, nunce yuk ninye olbana ati, binupye talak nirya ara, aning atonun wininyabe. Kilapu ap neika kum manyabe. Aning atonun, Allah arye, ‘Na dam yangana ap, na ikin pil dona ap ati, kum wininamlum ning ara, ani, ani,’ nyapdeiamsuk touk, wininyabe. Nunce tuba-tuba nun nong ati kalikdapyopura, na ap, na mapu ap, telebuk unyabe. Aning atonun, na mapu ara, Allah el mambul pil dona kum talak bukni, talye pil don talak babye, aning atonun wininyake. Na din ning, sik ning ap, sik nong ap ara, telebuk unyake. Tonda, asum ara, pia mambul ning anya arye, talye-talye kum winiptibye, telebuk unyabe,” Daud birye nyabuk.

⁶ Daud birye, ayupu nyabuka ati ara, Allah el aik pum tam pil dona deiyoknye, Ahimelek birye, Allah el si erena ati, arin roti kwaning ara, Daud biti arebuk. Ara, urdem ati kume. Asum ara, talye roti kwaning ton kum upmoka atia. Tonda asum ara, ‘Allah asukum ulule’ tenen, delilamik roti kwaning ara, Allah el arena aik pum tam arye, Ahimelek birye dopropmok ninguk upmok. Aning ara, min arye deiamuk ninguk dopropmokba, aroti pununa ati, sik yuk nang arye, winiryuk ning dabuka kintinipmek ninguk, punubikba, anyaik pum tam deibuk.

⁷ Ura, Daud ap, Ahimelek ap yupu talipdanmarik sum ara, yuknye el si Doeg ton eibukce, kekebuk. Anye el mutuku koprop ara, Edom mutuku. Tonda, Raja Saul el mapu weilamik domba basam kaliklamik nang, sik deiyoknye ulamuk.

⁸ Daud birye, anye Doeg eibukce, imam Ahimelek biti nyabuk. “Amio, ninye ona ati, cang yo taca ketena upmakil do? Akumopura, ninye on parang ya, aupmakilyopura, min arepnamanilam do? Na deiyoknye, Raja Saul birye dopdeipnuk pil ara, mambul weik anya arye, ‘Adiparyuk, an dam minopce yanaman’ tenen, na binuse talak ara, na parang ya ap, tonda yuk ninye olbana ati, bobuka banyap ning ton, arup arye mek dongobuka yanmana ati ara, wini talak aning nirya kum upmanile.”

⁹ Nyabuka, morobukba, imam Ahimelek birye, Daud biti nyabuk. “Kume, yuk parang ya kum upmanil bukni, Pilistin yalanye, weik cang ap, mikip weik ap ulamuknye, el si Goliat, el parang ya uk ara, aupmale. Anye Goliat bira, ance minop talak, Elah lyu mutuku binuka anye oplumba, el parang ya dopropsirye, cang baju arye, kitibuka na dokola deipse. Aparang ya ara, otam efod donga ‘Naʼ tenen, deipseba, tuba aupmale. Aning ara, patapkilyopura, aninguk dobuka bitume. Yuk parang ya ton, asukum kum upmala atia,” Ahimelek birye, Daud biti nyabuk. Nyabukbuk, Daud birye, tamubuka nyabuk. “Kume, aparang ya ara, teleb uka. Yuk parang ya ton, weik aupmal bukni, aning ara, weik mambul ning ati ara, Goliat el parang ya ara, arepnilyame,” Daud birye nyabuk. Nyabukura, Ahimelek birye, aning arebuk.

Daud bira, Samuel dam arye, bai sakuka biyuk yupu

¹⁰ Nyabukopura, Daud atalak aryuk, bai sakuka, bikbik abuka, Gad yala ninye, sik deiyoknye, el si Raja Akhis dam biyuk.

¹¹ Daud bira, Raja Akhis dam akunum biyukopura, el pil don nang arye, Akhis biti nyabik. “Ara, Daud el mutuku noutam ninye deiyok kibuknye bira, ayanmal do?” nyabuka asipdeiyik. Tonda, sik kilapu nirya, mot senmeka deice arye, Daud elti, nyanmek. “Saul bira, ninye yupa weik, sepuluh ribu (10.000) atonun omuk bukni, Daud bira, ninye yupa pia weik beratusan ribu (100.0000 lebih) nang omuke,” nyabuka, mot senmeknye bira, el akunum do?” nyabik.

¹² Ayupu nyabuka, Akhis mutuku ninye, sik deiyoknye biti, Raja Akhis asinmek talak ara, Daud kekebukce, ‘Aning ara, Akhis birye nati, yata nyapnamanil do?’ tenen, kanye pum tam teninmokce, ilil unmok.

¹³ Daud ilil ubuk ati, atalak ara, Daud bira, ninye weik unmekak, banmok talak ara, motona taleamananye birye, winilamak touk winipnin banmok. Wininmoka arye, ‘El nong ara, tunim aptueʼ tenen, yuk nang arye talipdenmek bukni, ninye teleb kanye bobikirye, ulamak nang atonun kum unmokce, motona nang kanye bolamak nang atonun, ubuka banmok. Weik asik dobuka ulamik noutam wekelbana ati, bisik bublan dam tikmokce, bublanuk kirip-kirip anmok. Tonda, winimokce, si ula mek ara, bataklopmukba, si bam potong deice, dol-dol abuka sakanmok.

¹⁴ Wininmokba, Raja Akhis eibukce, el pil don nang ati nyabuk. “Anggunda, kum bikmalumce, motona talipmonye bira bobuka, asukum boyanmalum do?” nyabuka asipdeyuk.

¹⁵ El atonun kwisi yung kum nang ara, amutuku noutam, ton kum unyaka ati, amotona talibuknye bira, yata ati na aik boyanmalum do?” nyabuk.