1 Samuel 20 - Eipomek

Yonatan birye, Daud biti melibuk yupu

¹ Ura, Daud bikbik abukabukce, Rama mutuku dam bukni, Nayot mutuku dam batakuka biyuk. Yonatan el dam biyukba, epdarikce, Daud birye asipdeyuk. “Na kwito, nara, yata ning malye upman do? Na yata ning malye winipmanba, an ni birye, ‘Elda malye wininanye,’ tenepmanilce, ‘Anye bira opnamne,’ tenenulul do?” nyabuka asipdeyuk.

² Asipdeyukura, Yonatan birye tamubuka nyabuk. “Kume na kwito, anyapmanilam touk, nyana kume. Na dipkoprob nyapkine, an opkiliba kum dipnalame. Ati biknalyame. Na ni birye, winilye ning nirya ara, weik arye tenena babye, mitik tonun arye tenelye ning babye, na ton lak nyanulule. Nati, min kum nyapmanilye talak ara, tonok pil babye, kum dolule. Ati ara, anyabuk yupu ara, na dam min kum nyapmanila anya arye, yata deiyok ati ato ning duknupmanil do? Aning pia kum winipnamle. Na kum nyapmanila ati, na kanye ara, anda dipkoprob kum opnamkile,” nyabuk.

³ Nyabuk bukni, Daud birye, “Allah el si deice arye nyapkine. An ni birye, akunum kel bikuke. Ance nati bico tenenilyamce, kanye delinilyame. Ati ara, na kanye ara, elce akunum tenelule. ‘Kume, na mi Yonatan biti, Daud opnamne ning ara, kum laka nyapnamne. ‘Aning kekeplyopura, el ilil kanye boplyakʼ tenen ati, elti, lak kum nyapnamne, akunum,’ tenelule, tenepne. Ati ara, na dipkoprob nyapkine, an ap nun ni koproba Allah ap, kam tuba ururume. Aning dib ulul touk, teniltona kum unulule. Na dipkoprob kel bikse. Saul birye opnamnil anya arye, na dipna dam upnile,” Daud birye Yonatan biti nyabuk.

⁴ Nyabukba, Yonatan birye tamubuka, Daud biti nyabuk. “Ati ara, ance talima pum tam arye, ‘Se,’ tenepmalamce, teniplam touk nyapniminba, an patapmakil ninguk dipkoprob melibuka arenamkine,” nyabuk.

⁵ Nyabuka ati, Daud birye tamubuka nyabuk. “Ati kel biklyame. Ambusum ara, wala tikilongon talak weik kwalya kwalinyap ning ara, akunum upmala ati ara, na ap, an ni Raja Saul ap, dipnamaname. ‘Winipnaname’ akunum nyapnuk bukni, ance telebe urtenepminyopura, na adiparyuk bai tam binirye, duknubuka unamane. Duknubuka daunmanya ani, like bitinye akunum uplyopura, daunmanya ani, sintam kipnamale.

⁶ Bai daunmanye talak noutamak ara, an ni birye, ‘Daud dan do?’ nyabuka, asipdekilyopura, ance, ‘Kume, Daud bira, mikip asa arye moropnukba, narye, ‘Telebe dabilyame,’ nyapmase. Daud birye, nyapnuke. ‘Na mutuku koproba, Betlehem ara, na yala nang nirya arye, aketing tamun, aketing tamun nirya noutamak, Allah el si erena ati, kam tuba ulamle ning obuka, Allah ati arenamake. Aning ati, na minopce Betlehem mutuku tamubuka binamane,’ nyabuka moropnukba, ‘Dabilyame,’ nyapsiba biyuke,’ nyapnamalyame.” Daud birye, Yonatan biti nyabuk.

⁷ Nyabuka ayupu ton nyabuk. “Nyapminba, an ni birye, ‘Telebe,’ ur nyapkilyopura, adeice arye na kel biknamne. Nara, ‘Telebuk unamne’ tenepnamne. Bukni, anyapmakin yupu nyapminba, an ni koproba, Saul birye yu uplyopura, adeice arye kel biknamne. ‘Dipkoprop elce opnamnil’ tenen, kel biknamne.

⁸ Amio nara, an amu tam unirye, an pil donanye bitonun unune. Nun ni koproba Allah, el si Yahweh arye dinmasukba, ance nati, teleb yupu nyapdeipnulume. Ati ara, bico tenepnimince, teleb kibuka melipnamnilame. Na kanye ara, na dipkoprop, malye ning akunum winipnyopura, ancuk opnamnilyame. Yata deiyok ati, ance na tapu koubuka, an ni binyak arepnamnutum do? Teleb ning ara, ancuk opnunilyame,” Daud birye, Yonatan biti nyabuk.

⁹ Nyabukba, Yonatan birye tamubuka nyabuk. “Kume aning ara, pia kum winipnamne. Na ni birye, anti, ‘Daud optinye,’ akunum tenepkilyopura, kel biknirye, kum nyapkitinye do? Aning akunum kel biktinyopura, dipkoprob akunum nyapkitinye,” nyabuk.

¹⁰ Nyabukba, Daud birye, “An ni birye, anti, yu yupu deice arye, nyapkilyopura, yatanye birye, na dam yanuka nyapnutu do?” nyabuka asipdeyuk.

¹¹ Nyabukba, Yonatan birye, “Ni kwito ayalyame, nun bitinye bai mutuku neika binuname,” nyabukba, sik bai sakuka birik.

¹² Bai mutuku akunum birikopura, Yonatan birye, Daud biti nyabuk. “Nun ni koproba Allah, el si Yahweh arye, nun Israel ninye, pia kalikuka melisulule. El dinmasila ati ara, el si deice arye nyapkine. Bitinye sum ton akunum kiplyopura, aunmab keting akunum uplyopura, na ni koproba tenelye ning akunum kel biknamne. Elce anti, teleb kanye boplyopura, na dipkoprob yupu dopdeipnamkine.

¹³ Bukni, na ni birye, ‘Daud opnamne,’ tuba teneplye ning, kel biknyopura, na dipkoprob laka nyapkinirye, teleb kibuka kum opnamkiyak tenenakuk dopdeipnamkine. Aning kum winipnyopura, nun ni Allah weik arye wenepnilirye, pia ikin ning, na nong deice deipnamnile. Bukni, na patapnil ning ara, nyapnukine. ‘Allah el si Yahweh arye, anti pia weika arye melipnamkile’ tenen, Allah moronamkine. Ara, minop talak Allah arye, na ni koproba ati, weika arye meliamuk touk, wini talak ara, an Daud biti, ‘Weika arye melipnamkile’ tenen, ‘Se,’ tenenune.” Yonatan birye, Daud biti nyabuk.

¹⁴ Nyabukce, ayupu ton dukdongobuka nyabuk. “Allah arye, pia melinamkil bukni, ‘Yuk nang arye, na ton opnicakʼ tenen, moropkine. Ara, Allah arye nunti, batakna kum diparyuk, bico tenesilirye, pia teleb ubuka melisulul touk, ance nati, na kam unamne talak nirya, ance kanye deipnimince, pia melinamnilame.

¹⁵ Tonda, aning atonun, ance na kil ap, na mapu ap, na bona nirya ati ara, teleb kanye deibuka pia melinamsilame. Na kanye ara, aminyan talak, Allah el si Yahweh arye, ‘Daud optibye’ tenenyak ninye nirya ati, wenebuka oplopnamle. Aninye oplirye, sirya daklyopura, tukwak mutuku im sirya, mutuku sirya nirya, aninye pia kum danamake. Atalak babye, ‘Na bona ati, tuba melinamnilam’ tenen, moropkine,” Yonatan birye, Daud biti morobuk.

¹⁶ Yonatan birye, ayupu nyabuka morobuka deice arye, Daud el yala nang nirya ati, nyalin yupu nyapdeibuk. Tonda, Yonatan birye nyabuk. “Nun ni Allah, el si Yahweh arye, ‘Daud el mal olan nang nirya ati, wenebuka oplopnamle’ tenen, Allah moronamne,” nyabuk.

¹⁷ Tonda, Yonatan birye, Daud biti ‘Bico,’ tenelamukce, kanye delilamuka anya arye, Daud biti morobuk. “Amio minop talak ara, ance nyalin yupu nyapdeiamnulum ning ara, tuba tonap ayupu uk nyapdeipnilyame,” nyabuka morobuk.

¹⁸ Nyabukopura, Yonatan birye, Daud biti nyabuk. “Ambusum ara, wala tikilongon talak akunum yalyopura, weik kwalya kwalipnamabe. Kwalina kwalibuka, din dipnamap talak ara, an bulalamak kum buknalama ati, anyaik nang arye kel bikikirye, ‘Daud dan do?’ nyabuka, asipdenamkiyake.

¹⁹ Ati, alukunyan ap, ambusum lukunyan ap, mapmaminya ani, like winilye sum kiplirye sintam ara, aikin ning deiyok koupkuk talak binuka, duknuplumakuk, tuba tamubuka binulyame. Amutuku ara, weik keil el si Ezel bukukak ara, anyuk duknupnulyame.

²⁰ Dungnupmaminyeba, narye mal winilye, akeil dam dopdenamane. Ara, ‘Aupmal ning dam dopnun’ tenen, pirilelamap touk, pilina ati mal dopdenamane.

²¹ Winibuka yin tapu, singibuka dopnyopura, narye tonok mi anyak nyapnamane. “Anda na dopman mal ati, elbilyame,” nyabuka dopreipnamane. Winipniba, ami elbilyopura, na nyapnaman yupu moubuka kekepnamalyame. Narye, ‘Amio na dopman mal ara, atam ulule, mitik anun tamubuka yamince, amal dobuka boyanilyame’ nyapnyopura, ance aning teneipnamalyame. Ara, ‘E, wini talak ara, na tamubuka, Saul aik bitinye. Saul birye, kum opnamnile’ tenenamlyame. Aning ara, talye kum nyapkine. Nun ni Allah, el si Yahweh dipkoprob kam ulul touk, narye dib nyapkine. Narye, ‘Amal ara atam ulule’ nyapnyopura, anda talye kanye bobuka, Saul aik tamubuka yatume.

²² Bukni, narye ami ati, ‘Kume, na dopman mal ara, an unmalamak bukni, per otam upmale. Ortam yukak dolbinulyame,’ nyapnyopura aning tenipnulyame. Ara, ‘E na adiparyuk yuk mutuku bikbik abuka binamane,’ tenepnulyame. Ayupu nyapnyopura, dipkoprob ‘Yahweh arye, dopkwetepniliba, yuk mutuku binamane,’ tenepnulyame.” Yonatan birye, Daud ati nyabuk.

²³ Nyabukce, ayupu ton dukdongobuka nyabuk. “Tonda, an ap, na ap, sisiknumu yupu ara, tuba tenena uk, unamlame. Nun ni koproba Allah, el si Yahweh arye, nun nyapdanumu yupu kekepsukce, pia moubuka dinamsile. An kele, na ap, an ap arye, ayupu nyapdanumu. Ara, ‘Dipkoprop bico tenelanyame. Ati, nun pia teleb ubuka, kanye talima dukdongobuka unaname,’ nyabuka, nyalin yupu deice arye nyapdanamnumu. Ati, aning ara, pia kum batakdananame,” Yonatan birye, Daud ati nyabuk.

²⁴ Yonatan birye, Daud biti winibuka nyabukopura, Daud bira, bai tam duknubukce, unmok. Daud daunmoka ani, aminyan talak wala tikilongon talak akunum ubukba, weik kwalya yun talak akunum kibukopura, Raja Saul ap, el mapu silip ap, ‘Din dipnuyap’ tenen, el aik pum tam yanuka neika bukmek.

²⁵ Saul bulamuk touk, anyaik abilinga dam bukmok. El mi Yonatan bira, el urasin tam bukmok. Tonda, Saul el yin deiyoknye Abnar, Saul dam bukmok bukni, Daud bira, anyaik kum yayuka ati, Daud bulamukak ara, lo uk ubuk.

²⁶ Saul birye, aning eibukce, asum ara yupu kum nyabuk. Elce utenebuk, ‘Kume, Daud kum yanmal deiyok ara, Allah arye, ‘Aning ara, talina meme,’ nyapdeiamsuk ning, malye ning mangkau arye, bol pibuka anya arye, elce ‘Na malye unmana ati, anang ap neika kum diptinye,’ tenepmala anya arye, kum yanmale.’ Saul birye, aninguk tenebuk.

²⁷ Utenebukce, mapmeka ani berekukopura, wala tikilongon talak bukni, like bitinye sum akunum ubukba, ‘Din dipnuyap’ tenen, sik nirya anyaikuk neika bulbinmek talak babye, Daud kum yayukba, el min arye bulamukak ara, lo ubuk. Winibukopura, Saul birye, el mi Yonatan biti asipdeyuk. “Na mio, Isai el mi Daud, yata deiyok ati din dina ati, kum yanmal do? Ambusum ap, arup ap ara, anyaik kum yanmal ara, yata ati do?” nyabuka asipdeyuk.

²⁸ Asipdeyukura, Yonatan birye, Saul biti kunusa dobuka nyabuk. “Kume na nio, Daud birye, ‘Se, ance telebe ur nyapniminba, na mutuku Betlehem tamubuka bitinye’ nyabuka, pia pi dobuka, moropnuke.

²⁹ Daud birye nyapnuke. ‘Nun ni Allah si erena ati, na yala nang nirya arye, kam ning obikirye, Allah ati arepnamake. Winipnamaka anya arye, na du birye, ‘Anda adiparyuk yalyame,’ nyapnuke. Ati ara, ance nati teleb tenepniminyopura, ‘Dabilyame,’ nyapniminba, narye, na du yapu dilbinamne,’ nyabuka moropnuke. Moropnukba, narye, ‘Telebe dabinamlyame,’ nyapsiba, biyuke. Biyuka ati, na ni Raja Saulo, Daud birye, an aik kum dilyanmala ara, deiyok akunum laka nyapkine,” Yonatan birye, Saul biti nyabuk.

³⁰ Yonatan birye nyabukura, Saul bira, yu weik ubukba, malye kanye bobukce, Yonatan biti nyabuk. “Na yupu yaniltan kil, tonda malye winin kil arye, deipkuka anya arye, an babye, pia malye wininanye ulyame. Narye, an tenelyam ning kel kum kiyamkise do? Kume, na kele. Isai birye deibuk mi Daud bira, ance na batakuka, Daud biti, akunum bico tenelyamce, el tam akunum kiproplume. Winipluma ati ara, alye dakdanalame. Tonda, awinipmuma deice arye, an deipkuk kil ton, alye dakalanamle.

³¹ Na dipkoprob nyapkine. Isai el mi Daud tukwak mutuku noutamak tuba kam unamle talak ara, amutuku nang arye, anti kum ereipnamkiyake. Tonda, ance amutuku nirya talibuka, ninye deiyoknye Raja pia kum unalame. Daud birye, Raja tiknamle. Ati ara, Daud tomopmince, na dam boyanunilyame. Anye bira, adiparyuk opnamne,” nyabuka, yu asa arye nyabuk.

³² Nyabukopura, Yonatan birye tamubuka nyabuk. “Kume na nio, Daud bira, yata ning ati el opminyeba dipnamle do? Daud birye, yata malye winin ning winipkuka deice arye, wenebuka opnalam do?” nyabuka, el li Saul biti asipdeyuk.

³³ Asipdeyukura, Saul birye, el cang yo taca keten, el si tombak dobukabukce, ‘Na mi Yonatan opnaman’ tenen, Yonatan dam dobuka, opmanto ubuk. Winibuka deice arye, Yonatan bikuk. ‘Kume, dipkoprop, na ni birye, ‘Daud opnamne,’ tenelule.’ Yonatan birye, aning moubuka, tenebukce bikuk.

³⁴ Kel kibukce, yu weik ubukopura, anyaik batakukabukce, aning-aning nirya, dina kum diparyuk batakuka biyuk. Ati, winiryuk wala ati kwalya, like bitinye sum ara, sik ap neika kum dibik. Deiyok ara, el li birye Daud biti, pia malye weik nyapmoka anya arye, ikin kanye bobukce, alye ubukba, bindobuk. Ara, ‘Na ni Saul birye, Daud opnamle ning ara, yata ati do?’ tenen, bouku sukubukba, anyaik batakuka biyuk.

³⁵ Biyukba, mapmeka ani berekukopura, beren tam talak ara, Yonatan birye, ‘Daud ap, na ap arye, epdananam nyapdeipmok touk, epdanamanam’ tenen, Daud bai mutuku duknulbinmokak biyuk. Yonatan birye, mitik mi tonok, el melina ati doprobukce, neika bai tam birik.

³⁶ Yonatan birye, ami ati nyabuk. “Anda bikbik abuka bimince, na dopnun mal nirya elbilyame. Eipmince, bulubuka boyanilyame,” nyabuk. Nyabukura, ami bikbik abuka biyukura, Yonatan birye, mal tonok dobukura, ami binmokak, kisok deice tam poulbiyuk.

³⁷ Mal dopmokba, poulbinmokak bayukbuk, ami amal dam biyukura, Yonatan birye, ami ati weik yupu arye nyabuk. “Adopmanu mal ara, antikmalamak arye, otam ton yukak binmaue tenepmane,” nyabuk.

³⁸ Nyabukce, minopce ayupu ton nyabuk. “Ura minopce, bikbik abuka bilyame. Kum bataknamlyame, bikbik abuka banulyame,” nyabuk. Yonatan dopmok mal ami dobukabukce, tuba tamubuka, el deiyoknye Yonatan dam yayuk.

³⁹ Yonatan birye, ayupu nyabuk ning ara, Daud biti nyabuk bukni, ami ara aning nirya kum bikukce, ayupu deiyok kum bikuk. Daud ap, Yonatan ap, sik bitinye ara, ‘Ayupu deiyok ara, anyeʼ tenen, akunum kel bikrik.

⁴⁰ Amitik mi, Yonatan dam tamubuka yayukba, Yonatan birye ami ati, el yin ap, mal ap arebukce, nyabuk. “Winira aning dobuka, ninye asik tamubuka bilyame,” nyabuk.

⁴¹ Ami akunum biyukba, Daud bira, el duknulbinmokak, weik keil deiyok arye tikuk. Daud tikukce, Yonatan dam yayukopura, Yonatan si erena ati, kisok kanupdongobuka gutam tuku dipdongobuk. Aning ara, like winilye deice arye, tuba tonap winibuk. Winibukba, Daud ap, Yonatan ap, asok melekuka mutupdarikce, engelanmarik ani, Daud bira, pia weik arye engenmok.

⁴² Winibuka aning akunum mutupdarikce, engepdarikopura, Yonatan birye, Daud biti nyabuk. “Telebe, wini talak teleb kanye bobuka, dabinalyame. An ap, na ap, nun ni koproba Allah, el si Yahweh si deice arye, akunum nyalin yupu nyapdanume. Ara, ‘Nun teleb kanye deipdanimirye, pia kanye talima dukdongobuka, teleb ubuka neika unaname,’ nyapnumue. Tonda, Yahweh kekepsilirye, pia dinamsila anya arye, nun nyapdanumu yupu ara el kele. An ap, na ap, tonda ance deipminba, deipdanin banamak ninye babye, na yala ninye babye, Allah arye, ‘Sik nyapdarik yupu ara, tuba wininamak do?’ tenen, pia dinamsile. Elce melipsiliba, aning tuba unaname,” Yonatan birye, nyabuk. Nyabukopura, Daud adiparyuk yuk mutuku bindobuk bukni, Yonatan bira, tuba tamubuka asik biyuk.