1 Samuel 18 - Eipomek

Daud ap, Yonatan ap ati, nyabuk yupu

¹ Atalak ara, Daud ap, Saul ap, sik akunum yupu taliprik. Winipdikce, daulamika ani, Saul el mi Yonatan ap, Daud ap, sik bitinye nang ansinibuka, tonok kanye boprikce, pia kanye deipdarik. Yonatan birye, Daud biti, kanye talima arebuka anya arye, ‘Bico,’ tenelamukce, pia kanye delilamuk.

² Awiniprik talak aryuk, Saul birye, Daud bobuka, el aik deibuk. Saul birye, ‘Daud tamubuka, el li dam bilyak’ tenen, yupu pia seklamuk. Ati, el li aik tamubuka, pia kum balamuk.

³ Yonatan ap, Daud ap, kanye deipdarik ning ara, Yonatan birye, Daud biti, nyabuk. “An nong ara, na nong atonun ulyame,’ tenekuna anya arye, na talima arenulule. Narye anti, pia bico tenekuna anya arye, anti pia kanye deipkine. Ati ara, nun neika pia melipdanimirye, teleb kibuka unamname,” nyabuka, nyalin yupu nyapdarik.

⁴ Nyapdarikce, Yonatan ongolamuk cang baju kwiribukabukce, Daud ongopdeibuk. Tonda, olanuna ati, ongolamak baju ap, deiyok deice koulamak ning ap, tonda el parang ya ap, el mal ap, yin ap, aning nirya dobuka, ‘Na kwit koproba’ tenen, Daud biti arebuk.

⁵ Akunum tonok kanye boprikopura, anyapce dipdongobuka, otalak nirya, Saul birye Daud biti, “Winipnulyame, aning ton winipnulyame,” nyalilamuk ning nirya ara, Daud birye, pia teleb ubuka, apiluk dolamuk. Winilamuka ati ara, Saul birye, el yin talin nang ati, ninye deiyoknye kina ati, wibuka tikeibuk. Winibukba, Saul el yin talin deiyok nang, yuk nang nirya ap, el taleamuk ninye nirya ap arye, ‘Naie, Daud bira, bita merekuka wipdeiple. Aning ara, nun kanye deibabe,’ tenelamik.

Saul birye Daud biti, yu kanye bolamuk yupu

⁶ Ura, Daud deiyok koubuka, Pilistin nang olbinamika, sik deiyoknye, nong weik cangnye, Goliat, Daud birye, akunum obukba, tamubuka sik mutuku koproba yanganmek talak ara, dana-dana tam nirya arye, sik Israel kilapu nirya, bulubuka wekmekce, ‘Nun Raja Saul epdanamabe’ tenen, yanganmek. Saul ap, el yin nang ap, bisik banmekbuk, akilapu nirya arye, ‘Teleb’ tenen, kanye deibikce, mot senmekce, mot sena uk unmek. Mot senmek talak ara, sik si bam bol dam deibuka, pong-pong anmek. Pong-pong nyalamle ning, el si kecapi ap, tonda lelim nyalamle ning, el si rebana, sik taruk arye bok-bok abuka, mot senmekce, ayin talin nang ati, si erenmek.

⁷ Mot senmekce anang ati, si erenmek talak ara, mot deice arye, ayupu nyanmek. “Saul ance ninye yupa ara, mitik weikto beribu-ribu olyame. Tonda, Daud anda, ninye yupa ara, pia weika arye, kum nukmanto sepuluh ribu (10.000) ton, sepuluh ribu kibuka weika arye olyame,” nyanmek.

⁸ Nyanmeka ati ara, Saul birye, sik nyanmek yupu kekebukopura, talima pum tam pia yu weik ubuk. Ara, utenebuk. ‘Akilapu ara, Daud ninye, pia weik beribu-ribu, ninye kum nukmanto olule,’ nyanyak bukni, na Saul bira, ‘Mitik tonun ribuanuk olule,’ nyapmaniaka ara, yata deiyok ati do? Wininmakca ani, aminyan talak ara, sik aninye arye, ‘Daud binyuk ninye deiyoknye wipdeibikirye, nara bataknicak,’ tenebuk.

⁹ Utenelamukce, Saul bira, asum arye deiyok koubuka, pia yu weik ulamukce, ‘Malye kipnilirye, na batakuka deiyoknye kipnamle do?’ tenen, Daud biti, pia moubuka kaliklamuk. El talima pum tam ara, Daud biti kanye wilililamuk.

¹⁰ Utenepmoka anya arye, berekukopura, Saul bira, cang tace kama dobuka, el aik koproba, pum tam bukmok. Aik pum tam bukmokba, Allah arye, isa kanye talye karin arye, dopreibukba, Saul talima pum tam yanuka wekelyanuka, yupu nyanmok. Wini talak ara, Daud min arye winilamuk touk, pong-pong ana, el si kecapi, talipmokce, mot senmokba, Saul kekenmoke. Wininmok bukni, aisa Saul talima pum tam wekmokba, Saul bira, motona talilamle nang selamak touk, senmokba, malye kanye bobuk.

¹¹ Wininmokba, Saul birye, tenebuk, ‘Adiparyuk, cang tace kama donoknirye, Daud bukmalak, abilinga ap labuka marapnune,’ tenebukce, like bitinye mal dobukba, adiparyuk Daud bira, kisikdobukba, abilinga uk, bisik abuk.

¹² Saul birye, aning winibuka deiyok ara, Saul birye Daud biti, ilil ulamuka ati ara, winibuk. El tenebuk ning ara, ani. ‘Ara, dipkoprob Daud bira, Allah el si Yahweh arye, melilul bukni, nati ara, akunum batakuka bindopnile,’ tenebukce, Daud biti, yu kanye bobuk.

¹³ Saul bira, winibuka tenelamuka ati ara, Saul birye nyapdeibukba, Daud el dam arye, leibuka yukak biyukce, Saul dam ton kum ulamuk. Tonda, atalak ara, Saul birye, ‘Daud bira, yin talin nang, sik deiyoknye ulirye, yupa-yupa seribu nang talinamle,’ tenebukce, wipdeibuk. Winibukba, Daud birye, ayin talin nang dobuka, sik yuk mutuku mal olan nang ati, olbalamik talak ara, el dem arye, melibuka balamik.

¹⁴ Atalak nirya ara, yata ning do nirya, Daud birye, pil dolamuk ning nirya ara, pia teleb ubuka dolamukba, teleb ubuk. Deiyok ara, Allah el si Yahweh arye, Daud biti, weika arye melilamuka deice arye, telebuk ulamuk.

¹⁵ Telebuk ulamukba, Saul elilamukce, Daud biti, ilil weik ulamuk.

¹⁶ Saul birye Daud biti, ilil ulamuk bukni, sik Israel tam ulamik ninye ap, Yudea tam ulamik ninye nirya ara, Daud biti kanye delilamik. Deiyok ara, ‘Daud birye, nun mal olan nang olbana ati, elce menekuka balamukba, nunce yuk mutuku ninye olbinamupa ati, elda pia telebe,’ tenelamikce, Daud biti kanye delilamik.

Daud birye, Saul el kilmu dobuka ati, nyabuk yupu

¹⁷ Raja Saul, el kanye tenebuk ning ara, ‘Daud bira, Pilistin nang ap, mal oldakce talak ara, sik Pilistin nang arye, elti, opnamake,’ tenebuk. Tonda, winibikirye, na tam nang arye, ‘Saul elce ami opmala kume, tenepnamniyake,’ tenebuk. Utenebuka ati, tonok sum ara, Saul birye Daud biti, nyabuk. “Na kilmu el si Merap, elda du kil ulula anya arye, el boyanuka, anti arepkiniba, dopnalame. ‘Na kilmu dopnalam,’ tenepman ning ara, ani. ‘Atalak ara, an adiparyuk mal olalbana ati, kintinip deiplum ninguk, winipnulameʼ. Ara, dipkoprob Allah Yahweh arye, el teneplye talak ara, ‘Omutuku nang mal olbinamlume,’ tenepnirye, nyapnyopura, anang olbinamabe. Anda atalakuk melibuka, neika mal pibinamabe,” Saul birye nyabuk.

¹⁸ Nyabukopura, Daud birye tamubuka, nyabuk. “Se na ni Rajao, nara, yata tonye ununa ati, ayupu nyapnilam do? Nara, weiknye kume. Tonda, na ni ap, nun mapu silip nirya ap, na ni el yala nang ara, talye bona ton kum ninye unyabe. Nun nirya ara, mambul ninye kume. Tonda, nara, talye melinanye ununa ati, nara, weiknye kum ununa ati, an kilmu kum doptinye. An yamal kum kiptinye, tenepne,” Daud birye nyabuk.

¹⁹ Daud birye, ayupu nyabukabukce, talye daunmoka ani, Saul birye, “Na kilmu Merap arepkiniba, ance dopnalame,” nyabuk bukni, dipkoprob ning ara, el kilmu Merap, Daud birye dopnamok talak kibukopura, Daud bikukce, ‘Dopnamnaryaʼ tenen, kintinyamuk bukni, Saul birye, akil dobuka, Daud kum arebuk. Daud biti kum arebuk bukni, el kilmu dobuka, yuk mutukunye, Mehola mutukunye el si ara, Adriel areamukba, anye birye, Merap domuk.

²⁰ Bukni, Saul birye deiamuk kilmu ton, el si ara, Mikhal, akilmu ara, Daud biti, aning ara kanye deibukce, el kanye tenen ning nirya ara, ‘Daud binyuk dopnamne,’ tenebuk. Akil arye tenebuk ning ara, yuk ninye arye, kekebuka bikikce, Saul dam lak nyabikba kekebukce, ‘Aning ara, telebe,’ tenebuka, kanye deibuk.

²¹ Ati ara, Saul birye, Daud biti, ‘Na lik,’ tenebuka ati, el Saul birye, aning ton tenebuk. ‘Wini talak ara, na kilmu Mikhal bobinuka, Daud biti arepnyopura, akil doptopura, Daud el ikin ning dopropnamle. Ura, na kanye ara, winipnya deice arye, sik Pilistin yala yin nang arye, Daud opnamakeʼ, tenebuk. El kanye teninmok noutam arye, aning tenebuk bukni, Saul birye Daud biti, aning laka kum nyabuk. Saul birye, like bitinye talak arye, Daud biti nyabuk, “Wini talak ara, na kilmu arepkiniba, dopminyopura, anda na yamal unalame,” nyabuk.

²² Nyabukopura, atalak aryuk, Saul bira, el aik pum pil don nang nirya ati, tenepce, yupu ton nyabuk. “Anggunce, mangkau kanye bobuka bimunce, Daud el kekenak binuka, nyapnamalum yupu ara, ani. ‘Ninye deiyoknye Raja Saul ap, el amu tam pil don nang ap, sik nirya ara, anti kanye deilikinyake. Atalak ara, Raja Saul el kilmu uk dopnamle,’ tenepmakiyaka ati, “Anda el yamal unalame,” nyabuka, “El kekenak binuka nyapnamlume,” nyapdeibuk.

²³ Saul el amu tam pil don nang arye, Daud kekenak binuka, ayupu lak nyabikba, ayupu kekebukopura, Daud birye tamubuka nyabuk. “Anggunce nati ara, ‘Ninye deiyoknye Raja, el yamal una ara, kanam ning ulula ati, Raja Saul kilmu ara, pola talye mangkau dopnamle,’ tenepmalumce, nyapmanulum do? Bukni, nara, dipkoprob talye bona ton kumnye unune. Nara, deiyok ton una kumnye ununa ati, ayupu nyapmanulum ning ara, ‘Kanam aryuk winiptinye,’ pia kum tenenune,” Daud birye nyabuk.

²⁴ Nyabukba, Saul el amu tam pil don nang arye, Daud nyabuk yupu nirya, kekebikopura, tamubuka, Saul dam binuka, lak nyabik.

²⁵ Nyabukba binuka, lak nyabikura, Saul ayupu kekebukopura, tamubuka, el pil don nang ati nyabuk, “Daud dam bimunce, ayupu binuka nyapnamlume. Ara, ‘Nun deiyoknye Raja birye, nyapnamkila ara, ani. ‘Na kilmu arepkiniba dopminyopura, akil dopmince, el tabuka arena ati ara, yuk dekena weik ning kume. Na patapmanil ning ara, Pilistin nang yupa weik, seratus (100) nang opmince, sik den bam bol mouse ning seknamlyame. Aning sekminyopura, aning seratus sekeipnamnelyame. Winipniminyopura, aning arelyanamnilyame,’ nyapmakile,” nyabuk. Nyabukba, “Daud dam binuka nyapnamlume,” nyabukba, yanuka lak nyabik. Ara, sik Pilistin ninye ara, Israel tam taleamuknye, ninye deiyoknye Saul, el mal olan nang ulamika ati, elce ayupu nyapdeibuk ning ara, talye kum nyabuk bukni, elda tenepce, dungnun yupu nyabuk. Saul birye tenebuka ara, ani. ‘Ayupu nyapnya deice arye, Daud bira, Pilistin mutuku nang olbalibuk, sikce obikceura dipnamle,’ tenebukce, nyabuk.

²⁶ Saul birye, tenebuk ning ara, Daud bira, kum bikuk. Ati, Saul el pil don nang arye, el nyapdeipmok yupu nirya ara, Daud dam lak nyabikba, Raja Saul birye, nyapdeipmok yupu nirya, kekebukopura, ‘Yo, Raja Saul, el kilmu dopnyopura, el yamal unamna ati, aning ara telebe,’ tenebuk.

²⁷ Winibuka tenebukura, sik Pilistin ninye pibana ati, Saul bira, ‘Atalak noutamuk, sik Pilistin nang olbinamlume,’ nyapdeibuk touk, Daud birye, ‘Lo arepmok talak, sirya daklyakʼ tenen, Daud adiparyuk, el melin nang ap, neika Pilistin mutuku binuka, mal pibiyik. Pilistin mutuku biyikopura, Daud ap, el melibuka banmek nang ap arye, Pilistin yin telen nang yupa ara, 200 nang binuka obik. Winibuka obikopura, anang sik den bam bol mouse tam nirya, sekuka doprobikce, Daud birye, aning nirya boyanuka, Saul dam arebuk. Ara, tonok babye ton, kum batakuk, anirya arebuk. Aning winibukopura, Saul birye, el kilmu Mikhal bira, Daud kaibukba dobuk.

²⁸ Atalak ara, Saul bikukce, utenebuk, ‘E, dipkoprob Daud bira, Allah arye, melibuka deice arye, teleb ulule. Tonda, na kilmu Mikhal bira, Daud biti, pia kanye deibuk,’ tenebukce, bikeibuke.

²⁹ Bukni, atalak ara, Daud biti ara, Saul bira, ilil ulamuk. Tonda, Saul bira, atalak arye dipdongobuka, orulamuk talak, el kam ulamuk talak nirya ara, Daud biti, ‘Na like,’ tenelamukce, pia yu kanye bobuka, mal pilamuk.

³⁰ Tonda, atalak-atalak nirya ara, Daud bira, Pilistin nang ap, mal olanmana ani, pia winilamikba, Daud elcuk, Pilistin yin telen nang weik tonun obuka, sirya daknin balamuk bukni, Saul el yin talen nang ara, aning atonun kum winilamik. Daud birye, aning winilamuka ati ara, amutuku noutam ulamik ninye nirya arye, Daud el si weik biklamikce, ‘Elda weik mambulnye,’ nyalamik.