1 Samuel 17 - Eipomek

Nong pia weiknye, el si Goliat birye, Israel ninye olbana ati, kintinibuk yupu

¹ Atalak ara, Pilistin ninye, sik yin talin nang nirya bulubukabikce, kintinibik. Ara, mutuku si ton, Soko mutuku bulubik. Yehuda yala nang, talibuka ulamik mutuku tam, sik aik ara, Soko mutuku bulubik. Sik doltakna baju aik ara, Aseka mutuku atam, Soko mutuku otam, anoutamak, mutuku si Efes-Damim mutuku dam, yanuka dobik.

² Winibikopura, Saul ap, Israel ninye ap, nirya bulubukabikce, sik doltakna baju aik ara, Ela mutuku lu noutamak yanuka, dobik. Winibikopura, Pilistin nang ap, mal olalbana ati kintinibik. Yin talin nang nirya, lelebuka, yuk-yuk kintinibik.

³ Kintinibikopura, sik Pilistin nang ton, atam mutuku deice, Israel ninye ton, otam mutuku deice bulubuka lelebikce, yuk-yuk kibikce kintinibik. Tonda, amutuku noutamak ara, weik lo ton uamukce, lu pia weik uamuk.

⁴ Atalak ara, ninye olana ati, weik kel kiamuknye, el si ara Goliat, Gad yala nang arye deiamiknye, ulamuk. Pilistin nang, sik unmek mutuku arye, Pilistin nang, sik doltakna aik dopmikce, unmekak yayuk. Ara, urdem ati kume. ‘Israel ninye olbinun’ tenen, yayuk. Anye, el nong cang ara, pia cang weike, tiga meter tinggi ton nyalamik.

⁵ Tonda, anye el kisok kalun ning ara, topi atonun bukni, yin nang arye, kalulamak ning ara, kat ning tembaga arye, memamikak kalupmok. El ongolamuk baju ap ara, pia kat ning, tembaga arye wiamik. Ara, ‘Mal dobica kum biknamle’ tenen, aning el si ara, tembaga arye wiamik ning ongobuk. Aning ara, el ikin ara ‘Ado, ado?’ tenen, nyabik ning ara, lima puluh tujuh (57) kilogram kibuk. Pia ikin weik ubuk bukni, Goliat bira, mikip weiknye anya arye, aikin baju ikin kum asa, ongobuka balamuk.

⁶ Anye el yan ara, kat ning tembaga arye, ongolamuk. Tonda, el takunya deice dana-dana ara, weik kat ning, tembaga arye deiamuk. Aning atonun, el ninye on yo taca keten tombak ara, kat ning, el si tembaga arye, memamik ning, el balye deice wanwanubnp arye balamuk.

⁷ El yo taca keten tombak ara, pia ikin weik, kum erepmanto ning, besi ning arye memamikbuk, Goliat birye bolamuk. Ayo tace tombak ikin ara, ‘Ado, ado?’ tenen, nyanyaka ara, 7 kilogram ton nyabik. Ura, el kelapye ara, aning ara, tonok yin talinanye birye, minopce ninye dinmek tam, bobuka banmok buk, Goliat aminyan yayuk.

⁸ Winibuka ulamuka ati, atalak ara, Goliat birye tikukabukce, yupu weik arye, Israel ninye yin talin nang kintinibuka, wekmek ning ati nyabuk. “Anggunda, yata ati lelebuka kintinipmalum do? Nara, anggun ona ati kintineipse. Nara, Pilistinye ununa ara, kum bikmanulum do? Anggunuk ara, talinye Saul el melin nang ululume. Ati, ‘Dipkoprop tonok mikip weiknye ton, Goliat ap opdanamdak’ tenen, wipdeipmunyeba, anye menekuka yaliba, na ap opdanamname.

⁹ Winipmunba, anye ap, na ap, nun olana deice arye eipnamabe. Anggun wipdeipnamlumnye birye, na opnamnil do? Narye, anggun tamnye opnamne do? Anggun tamnye birye, na opnilyopura, nun Pilistin nang ara, anggun amu tamuk unamabe. Bukni, narye anggun tamnye opnyopura, anggun Israel nang ara, nun amu tamuk unamlume,” nyabuk.

¹⁰ “Ati wini talak aniryuk, ‘Anggun Israel tamnye birye, nati kum obuka sirya daknutue,’ nyapsine. Israel ninye, anggun yin talin nang kan-kan arye, tonoknye wipdeipmunba, anye ap, opdanamaname,” Goliat birye nyabuk.

¹¹ Ayupu nyabukopura, Saul ap, Israel ninye ap nirya, ayupu kekebikce, lukdanuka, aninye pia ilil weik ubuk. Goliat bira, mikip weiknye anya arye, sik nirya ilil ubuk.

Daud birye, Saul el tenda aik dam biyukce, winibuk ning ati, nyabuk yupu

¹² Efrata yalanye, el si ara Isai, elce deiamuk mi ara, Daud ulamuk. Isai bira, Yehuda noutam bukni, mutuku si ara, Betlehem mutuku noutam ulamuk. Isai elce deiamuk mapu ara, pinbarye (8) mapu deiamuk. Atalak ara, ninye deiyoknye, Raja Saul akunum tikamukce, yupu nyalamuk talak, Isai bira, el akunum pia wisi danamuk.

¹³ Isai el mapu, min yuma deiamuk nang winilye ara, sik nirya ara, ninye deiyoknye Raja Saul ap, neika melibukabikce, mal olan dam binmek. Isai el mi min yuma deiamuknye, el si ara Eliab, tonye el si ara Aminadab, winilinye el si ara Syama, deiamuk. Isai el mapu du nang ara, winibuka winilye akunum deiamukce, aminyan sirya deibuk mi ara, Daud ulamuk.

¹⁴ Isai el min yuma deiamuk mapu winilye ara, ninye deiyoknye, Raja Saul ap, ansinibuka mal olalbanak biyik. Bukni, Isai birye, sirya deiamuk mi ara, sik weit Daud ulamuk.

¹⁵ Bukni, Daud bira, el du yapu melina ati, ninye deiyoknye Raja Saul dam, tia binuka ulamika ani, tuba tamubuka, el li dam Betlehem mutuku binuka, el li birye, weilamuk domba basam dam biyukce, melibuka weilamuk.

¹⁶ Atalak ara, like empat puluh (40) sum deice ara, asum-asum nirya, beren tam talak ap, tonda sin tam ap nirya ara, Pilistinye tonok, el nong cang weik ap, mikip weik ap ulamuknye, el si ara Goliat birye, sik Israel ninye, yin talen nang mining dam yanopura, sik Israel yin talen nang ati, yupu weik arye, malye kibuka derelamuk.

¹⁷ Atalak tonok sum ara, Isai birye, el mi Daud biti nyabuk, “Amio, gandum duk dapmakce ning, bopminyopura, sepuluh kilogram (10 kg) ap, roti kwaning dapmakce ning, takubarye (10) ap dopmince, adiparyuk bobinuka, an du yapu dam, bobinuka arepnulyame. Ara, sik Israel ninye, yin talen nang, sikti, tenda arye, tia aik dopmaca damak, bobinulyame.

¹⁸ Aning atonun, kambing basam moum yung arye, memebik din, el si keju, takubarye ara, (10) bobinuka, yin talen nang, sik yupa weik seribu (1.000), sik yupu nyana deiyoknye, el dam bobinuka arepnulyame. Winipminyopura, an du yapu ati, ‘Sikda yata wiribuka unyak do?’ tenen, sik deiyoknye asipdenulyame. Asipdeminyeba, tonda, sik ap epdamunyopura, sik wininyak ning nirya bikminyopura, na dam tamubuka, lak nyalyanunilyame. Nyapniminyopura, narye, ‘Wini talak ara, akunuma, el du yapu dam binuka, eipmal ning ara, teleb aryuk unyakba, eipmalce, yanuka lak nyapnile,’ tenepnamne.

¹⁹ Ura, Isai birye, ayupu nyabuk talak ara, Daud el du yapu ap, sik Israel ninye deiyoknye, Raja Saul ap, el yin talen nang ap ara, mutuku si, Ela mutuku noutam bukni, tonok lyu noutam unmek. Unmekce, sik Israel yin talen nang nirya arye, sik mal olan nang, Pilistin nang dam binuka, ‘Olbinape,’ tenepmekce, kintininmek. Ton sum ton olanmeka ani, ton sum ton talye unmek.

²⁰ Isai birye, ayupu nirya nyabukba, mapmeka berekopura, asum beren tam arye, Daud mapmoka bukukabukce, el li nyapdeipmok domba basam ara, melibuka kalikinamnye dam dobuka, deibukce, ‘Adibaryuk, Ela mutuku binunʼ tenen, kintinibuk. Ara, Daud binamoka ati, agandum ap, adin el si keju ap, dobuka libukce, bisik banmoka ani, Ela mutuku biyuk. Aning nirya ara, el li Isai birye, Daud biti nyapdeiamuk touk winibuk. Daud adiparyuk Israel ninye, sik yin talen nang arye, tia aik dobuka, tia ulamikak, yayuk talak ara, sik Israel yala yin talen nang ara, ‘Pilistin nang olbinuyapʼ tenen, akunum kintinipmekce, olal balamikak, akunum binuka tikmek. Atalak ara, sik yin talen nang, yuk-yuk nirya arye, kanye pia deibuka, yupu weik tonun nyanmekce, ‘Anggunda opnusiyabe,’ nyabuka, yupu weik tonun nyanmek.

²¹ Ati ara, sik Pilistin yala yin talen nang ap, sik Israel ninye yin talen nang ap nirya ara, adiparyuk sik urasin dam dilanmekce, kintinipmeka ara, nebuka tikmekce, ‘Olalbinamapʼ tenen, dilanmekce, yu yupu nyanmekce, kintinibuka wekmek. Asukumuk, Daud birye dilbiyuk.

²² Wininmekopura, Daud adiparyuk, el boyanganmok ning nirya ara, yin nang, sik bona melibuka kalikina ati deiyoknye, el damuk deibuk. Winibukopura, Daud adiparyuk bikbik abuka, mal olalbinamika ati, nebuka tikinmeka, amutuku dam ara, el du yapu ton, ‘Eipnamne,’ tenepmokce, sik dam bikbik abuka, binuka tikmokce, el du yapu ati, eipdayikce, ‘Telebe,’ nyabuk.

²³ Bukni, Daud ap, el duyapu ap epdayikce, neika yupu tuba talipmek talak aryuk, Pilistinye, mikip weik tonun ap, nong cang ap ulamuknye, Kat mutuku nang arye deiamiknye, el si ara Goliat bira, yanuka, mitik tonun otam sik urasin dam tikuk. Sik tikmeka urasin tam yayukce, sik Israel ninye yin telen nang wekmekak yayukce, malye yupu nyabuka derenmokce, mikip weik arye yanuka nyabuk. Ara, asum-asum nirya, anye Goliat min arye asukum yanuka, malye yupu nyalamuk touk, asum babye yanuka nyabuk. Amikip weiknye, Goliat yanuka unmokce, malye yupu nyanmok ning ara, Daud el babye akunum kekebuk.

²⁴ Ura, min yuma sik Israel ninye arye, akunum Goliat yayukba eibik. Goliat eibikce, elce nyabuk yupu kekebikopura, sik Israel yala yin talen nang nirya ara, ilil ubuka ati, yukak bikbik abuka biyikce, sik tia domik tenda asik, tamubuka biyik.

²⁵ Asum ara, Goliat yanganmokce, malye yupu nyanmokak, sik Israel yin talen nang arye kekebik. Yanganmokba eipmekce, sik Israel yin talen nang ilil ubukba, tamubuka bikbik abikce, sik tenda tia domik aik pum bukmekce, tonok-tonok nang arye, yupu nyanmek. “Se, anye el yanmalarye, nyanmalye yupu ara, nun nirya arye kekenyabe. Goliat birye, nun deice pia malye yupu nyanmasilanye biti ara, nun deiyoknye, Raja Saul birye, ‘Nara, anye bira pia lik,’ tenelula anya arye, nun kanye ara, elce winipnamsile. Yata nang arye do, Pilistin mikipnye Goliat, opnamlanye biti ara, Raja Saul birye, Goliat opnamlanye biti, el dengna pia weik tonun arepnamle. Tonda, nun ninye deiyoknye, Raja Saul birye, deibuk kilmu babye, Goliat oplinye, binyuk taruk murupnamle. Anye bira, Saul el kilmu arepliba, dopnamle. Tonda, anye bira, el li, sik mapu silip nirya babye, Raja Saul biti arenyak yo bok, el si pajak arenyak ning ara, talye batakikirye, tuba kum arenamnyake. Talye kanye deibuka, telebuk unamnyake,” nyabuka, ayupu nyalanmek.

²⁶ Ura, Daud birye, asum sik dam tikilbiyukce, sik dam atikilyanmek nang ati asipdeyuk. “Se, sik Pilistin nang ara, pia teleb ning ton kum wininyake. Allah arye, ‘Aning ara, wininamlume, aning ara, pia kum wininamlume,’ nyapsuk yupu, pia kum kekekirye, Allah arye nyapdeipsuk touk, sik mapu den bam bola deice tam, kum sekenyaka anya arye, Allah dam kum bitinge. Nun ni Allah ara, pia kamuk ululnye binya arye, yata deiyok ati, amalye ning Goliat bira, nun si erenyap Allah ap, elce wipdeiamsuk ninye ap atibuk, ngalukuka nyalirye, malye kibuka, malye yupu nyapsutu do? Aning ara, pia malye ulule,” nyabuk. Nyabukopura, Daud birye atikmok yin telenanye tonok ati, asipdeyuk. “Raja Saul birye, Pilistin nang oplinye biti, yata dengna arepnamle do? Tonda, anye birye, Israel ninye ati, ‘Likʼ tenen, yupu nyamuk ning ara, anye opmalya deice arye, malye nyasulul yupu kilipnamle. Ati, Goliat oplinye doproptu dengna ara, nun ninye deiyoknye, Raja Saul birye, yata ning arepnamle do?” nyabuka asipdeyuk.

²⁷ Asipdeyokopura, ayin telenanye ap, sik ayin telen nang nirya arye, Daud biti nyabik. “Kume, arup nyapmap ning akunuma. Nun weik deiyoknye, Raja Saul birye, Goliat opmanto nang arye, dipkoprob Goliat opmalyopura, nunce nyapmap ning ara, dipkoprob arepnamlarya. Elce, ‘Akunum winipnamne,’ nyabuka, nyalin yupu akunum nyabuka ati, nyapmabe,” nyabik.

²⁸ Daud el du Eliab bira, Daud ap, sik yin talen nang nirya ap arye, yupu neika talipmekce, nyanmek yupu nirya ara, moubuka kekenmok. Kekebukce, Eliab bira, el weit Daud biti, wenebukce nyabuk. “Anda yata deiyok ati, amutuku yanmalam do? Tonda, an yatanyebak moropmomba, nun domba weik tonun dobuka, pata mutuku noutam deiamlumba, yuknye birye kalikinmal do? Na kele, an ikin kum asa, malye tenepmalam ning ara, bikmane. Anda, ilil kum deice aryuk, asukum yanmalamce, an talima noutam arye, ‘Winipnamne,’ tenepmalam ning babye, na kele. Na kanye ara, an amutuku noutam yanmalama deiyok ara, ‘Ninye olanmakcak ton, narye eipnamneʼ tenen, an akunum yanmalame.

²⁹ Daud el du birye, ayupu nyabuk bukni, Daud birye, elti, tamubuka nyabuk. “Na yata ton malye upman ati do? Nara, talye asina ati asipmanue,” nyabuk.

³⁰ Ayupu nyabukce, el du Eliab batakukce, Daud bira, yuk atikmek nang ati, asum asipmok ning atonun, tuba ton ap, yuk yin telen nang ati asipdeyuk. Asipdeyukura, sik yuk yin talen nang arye tamubuka, “Kume, nun Raja Saul birye, Goliat opmantonye biti, “Winipnamle, winibuka arepnamle,” nyabikba, Daud birye, kekebuk ning ara, min talak Daud birye asipmokba, kekepmok yupu uk tamubuka lak nyabikba, ayupu uk kekebuk.

³¹ Bukni, aunmek nang kan-kan arye, ninye ton, Daud birye nyapmok yupu ap, asipmok yupu ap, kekepmek. Sik ayupu kekepmek nang ara, akekepmek yupu uk, ninye deiyoknye, Raja Saul, el kekenak babye, ayupu uk yanuka lak nyabik. Nyabikaura, ninye deiyoknye, Raja Saul birye, Daud biti yukubukba, Daud arye Saul dam yayuk.

³² Wini talak aniryuk, Daud birye, ayupu kekebukce, Saul biti nyabuk. “Anye bira, ‘Sik kanye mitang upnamle do?’ tenen, ayupu nyapmasile. Malye kibuka, ayupu nyanmasil ning ati ara, nunda Pilistin nang ati, ilil una kume. Nara, an amu tam talye pil donanye ununa ati ara, ance teleb ur nyapniminba, anye biti, narye binuka, el opnamane,” nyabuk.

³³ Nyabuk bukni, Saul birye, tamubuka Daud biti nyabuk. “Ance Pilistin nang ap, mikip weiknye, Goliat ap ati binuka, kum opdatume. Anda pia mitik mi ati ara, aweiknye Goliat bira, ance kum optume. Elda, pia mitik talak arye, yin talinanye ulamukce, ninye weik akunum olamuk. Ninye ona ara, akunum kel kibuk ati, binuka kum optume,” nyabuk.

³⁴ Nyabuk bukni, Daud birye, tamubuka Saul biti nyabuk. “Nara, an amu tam talye melinanye unune. Keting tamun yupa weik deice ara, na ni koproba, el domba kalikuka weinune. Atalak noutamak nirya ara, bai kam babye, nong weik ap, mikip weik bai tam pus, el si ara singa kus babye, ‘Domba basam obuka dipnun’ tenen, yangalamik talak ara, narye obuka, sirya daklamse.

³⁵ Bai tam arye, yu kam yangalamuk ning nirya ara, domba bobuka, ‘Sekuka kum opnamle’ tenen, aning yukulbanune. Ayu kam kisok deice opnyopura, domba lyepdeipna arye, telebuk winilamse. Tonda, bai ulamle kam do, nong mikip weik kuse, singa kus do, yuk yu kam do, aning arye, ‘Adomba opnuyap’ tenen, yangalamik talak ara, olamse. ‘Anye bira opnuyap’ tenen, na dam yangalamik bukni, narye sik kisok deice potong talipdongobuka, oplopnaba, adiparyuk dibilamik.

³⁶ Ati ara, na an pil melinanye birye, bai ulamle kam do, weik yu kuse do, yuk yu ning do, naryuk aning nirya onune. Ati, anye Goliat bira, talye bai tam, yu ning oltakalamse atonun oploptinye. Elda, Pilistinye anya arye, sik den bam bol kum sekenyak nang ara, talye nang ati ara, elti, oploptinye. Deiyok ara, ani. Ara, elce aning-aning nirya, deice tam ulul Allah, Kam Una Deiyoknye ulirye, Israel sik yin talin nang nirya wiamukce, kalikuka melilule. Bukni, Goliat birye, Allah el ‘Naʼ tenen, ninye ati, malye yupu tanmalce, Israel yin talin nang ati, ‘Obuka, sirya daknamne’ tenen, yanmala ati ara, Allah melipnilaba, anye oploptinye.

³⁷ Ara, urdem ati kum nyapne. Kume, Allah el si Yahweh arye, nati lopdeipmanukba, weik yu kuse singa kus ap, bai ulamle kam ap, opse touk, Allah arye melipnilaba anye, Goliat babye, talye parapkabuka, oplopnamane. Daud birye nyabukopura, Saul birye, “Telebe, aning ati, Allah arye pia melinamkile anya arye, anye olbilyame,” nyabuk.

³⁸ Nyabukce, Saul birye mal olalbana ati, ongon baju kat ning ara, el ning koproba, Daud biti arebukce, ongopdeibuk. Tonda, Saul birye, kat topi, kat ning el si tembaga arye, wiamik ning, Daud el kisok kalupdeibuk.

³⁹ Winibukopura, Daud birye, aolana ati cang parang ya dobuka, akat baju deice kikipdongobuk. Winibukopura, sik ongolamak baju kat ning ap, kat topi ap, cang parang ap, nirya ongobuka, ‘Bisik bitinye do?’ tenen, bikbik abuka, bindeyuk bukni, Daud sakdebuka, binmanto kum ubuk. Ikin weik ubuk ati, Daud birye Saul biti, nyabuk. “Olana ati, ongolamak ning ara, kat baju ap, topi ap ara, min talak ton kum ongonune arye, binmanto kum upnile,” nyabukce, aolan talak ongolamak ning ara, anirya kwiriplobuk.

Daud birye, Goliat obuk yupu

⁴⁰ Aikin kat ning ongolamak ning, kwiriplobuk talak ara, adiparyuk el basam weilamukce, bolamuk kama dobuka, bobukopura, mek pum tam keil duk pinilamle ning, pamubarye dobukabukce, el domba basam weilamukce, bolamuk aling pum bisik libuka bobuk. Tonda, akeil deibuka, dopnamuk ning, benemna atonun ning, el si ara umban, el taruk deice bobukopura, Pilistin weiknye, Goliat dam biyuk.

⁴¹ Daud banmok talak babye, Goliat adiparyuk Daud dam yanganmok. Tonda, el melinanye birye, sik mal olan nang bolamik ning, el si ara, kelapye bobuka, Daud tam yanganmarik.

⁴² Yarikce, Pilistinye birye Daud biti, dinmokce, utenebuk. ‘Kume anye bira, el pia mitik mi ulule. Tonda, el urasin teleb ap, el nong ara, mitang nang atonun ulula ati, elda na kum opnamnute ati, dayanmalye babye, dauplye,’ tenebuke. Ati ara, weiknye Goliat birye, Daud biti eibukce, akutubuka nalinmok.

⁴³ Pilistin mutukunye, Goliat birye Daud biti, nalibuka nyanmokce, nyabuk. “Anda yata ati akama bobuka, erepra yanganmalam do? ‘Elda, talye kam atonun ulule,’ tenepmalamce, talye mangkau arye, na dam yanilam do?” nyabukce, Isa Mutuku Dongonye mikip deice, “Arye malye kipdeipnulyame,” nyabukabukce, el isa si deice arye nyabuka, Daud biti subuk.

⁴⁴ Aning atonun, Pilistin mutukunye birye, tonap Daud biti nyabuk. “Anda, adiparyuk na dam yaminba, narye an opkinirye, an tup dobuka, maka ayala-yala nirya, balamak maka ap, talye tukwak ulamle ning, bai kam ap, bai basam ap, arepneba dipnukiyake,” nyabuk. Nyabuk bukni, Daud birye, tamubuka Pilistin mutukunye biti, nyabuk.

⁴⁵ “Anda ninye olana ati cang yo tace ap, parang ya ap, aning nirya kintinipmalamce, yanmalame. Bukni, nara, aning-aning nirya, deice tam ulirye mikip weiknye, Allah el si Yahweh, el si deice arye yane. Allah ara, mikip weik deiyoknye, el si Yahweh deice, aniryuk yanmane. Allah ara, Israel ninye, sik yin talin nang kalikuka melilule. Ance malye yupu nyaplame deice arye, Allah ati yanipmalame.

⁴⁶ Tonda arup Allah arye, anti opnamakilarye, akunum kintinipmakile. Allah arye melipnilaba, an akunum opnamakine. An kisok duk daklopnamakine. Opkinirye, an nong ap, Pilistin yin talin deiyok nang ap, anggun nong nirya babye, oplopkinyeba, maka ap, tukwak talye ulamle ning nirya arye dipnamakiyake. Winipkilyopura, mutuku-mutuku nirya unyak ninye arye, kel biksikirye, ‘Diba Israel ninye ara, Allah ap unyake’ tenen, kel kibikirye, Allah elti, si erepnamake.

⁴⁷ Ati ara, aunmak ninye nirya eibikirye, kel biknamake. Ara diba, Allah el si Yahweh, elda talye ning yo taca ap, parang ya ap deice arye, ninye kum lyesulule. Ninye nirya, olanyak bukni, olbisina ap, lyena ap ara, Allah el si Yahweh, el mikip deice aryuk aresulule. Elcuk lyesulule. Utenebikirye, kel biknamake. Arup olanamaba ara, Allah elcuk melisulula anya arye, aolan talak ara, Allah el mikip nun deice deipsiliba, anggun Pilistin ninye obuka, sirya daknamasiyabe,” Daud birye nyabuk.

⁴⁸ Atalak ara, Goliat ap, sik Pilistin ninye ap arye, ‘Anye bira opnuyap’ tenen, mitik anun ton, Daud unmoka dam yayikba, adiparyuk Daud minopce, bikbik abuka biyukce, sik mal olan nang lelebikce, kintinibuka wekmek tam, Pilistin mutukunye, kalimna weiknye, Goliat dam biyuk.

⁴⁹ Biyukopura, Daud birye, el aling pum tam taruk dongobuka, keil duk bubuka doprobukce, deibuka don ning, (kartapel atonun ning), el si ara umban deice arye, Goliat kisok deice dobukba, el asok deice poulbiyukce, kisok yok botobuka wekuk. Botobuka wekukba, Goliat daksakuka, tukwak lokuka, poulbiyukce, dibuk.

⁵⁰ Ati ara, Daud birye, Pilistin nang, sik weik deiyoknye, mitik keil duk deice arye obuk. Anye obuk ning ara, tace ning kume, parang ya arye kume. Elce talye keil duk ap, keil bubuka dolamak ning ap, el si umban, aning deice aryuk obuk.

⁵¹ Obukura, Daud adiparyuk, bikbik abuka, Goliat dam biyukce, ninye olan ati talilamuk ning, weik cang parang ya binuka kuprobuk. Aning akunum binuka doprobukopura, Goliat el mining parang ya arye, el kisok sekuka daklobuk. Pilistin ninye sik olan ati, weik deiyok kounanye dibukba, eibikura, adiparyuk bai sakuka, bikbik abuka, bindobik.

⁵² Bai sakuka bindobikopura, Israel yala nang mikip dobikce, malye kibuka, sik ap, Yehuda yala yin nang nirya kanye deibikce, weik yupu arye lubikce, ‘Pilistin nang opnuyap’ tenen, dobolbanmek. Dobolbanmeka ani, sik si Kat yala nang, talibuka ulamik mutuku biyik. Tonda, Ekeron mutuku asik domikce, keil poka arye, aknapdongobuka, domik bublan damak ara, Pilistin nang olbiyik. Pilistin nang nirya, obuka dobolbanmeka ani, sik nong nirya ara, taplomekba, mutupu si Ekeron mutuku ap, Kat mutuku ap, bana ati, Saraim mutuku cang bisik noutamakuk, unmek.

⁵³ Israel nang arye, sik Pilistin tam yin nang, opra banmeka ani, akunum obuka, sirya dakikopura, Pilistin nang arye, tia doltakna aik ati dopmekakuk, tamubuka yayikba, sik ning nirya, dalubuka doprobikce, sirya dakik.

⁵⁴ Daud birye, Pilistin nang, sik weik deiyoknye Goliat, el kisok dakuka, Yerusalem mutuku bobiyuk. El weik cang parang ya ara, Daud el damnye dobuka, doltakna baju aik pum bisikuk dongobukce, dokola deibuk.

Daud bobuka, Saul dam bobiyikba, bikuk yupu

⁵⁵ Atalak ara, Saul dinmokba, Daud bira, ‘Pilistin nang Goliat opnunʼ tenen, el dam biyukba, Saul eibuk. Daud biyukce, Goliat obukopura, Saul eibukce, Saul birye, yin nang sik deiyoknye Abnar biti, asibukce nyabuk, “Apnero, Pilistin nang Goliat opmonye bira, elda yatanye birye deiamuk mi ulul do?” nyabuka, asipdeyuk. Asibukba, Abnar birye tamubuka nyabuk. “Na deiyoknye Raja, anda mambul weiknye, kam ulyama anya arye, talye kum nyaptinye. Dipkoprop nyapne. Anye bira, na bikina kumnye binya arye, el li koproba si ara, na walwale,” nyabuk.

⁵⁶ Nyabukopura, Saul birye tamubuka, Abnar biti nyabuk, “Ati, wini talak ara, bimince, awiniryuk nepmalanye bira, ‘Yatanye el mi ulul do?’ tenen, asilbinulyame,” nyabuk.

⁵⁷ Daud birye, Pilistinye, Goliat akunum obukopura, el tenda bola aik, tia domik asik dam tamubuka yayuk. Yayuk talak ara, Abnar birye binuka, Daud bobukabukce, Raja Saul dam boyayuk. Atalak ara, Goliat el kisok duk ara, Daud birye dakuka, tuba talipmok touk, Saul dam boyayuk.

⁵⁸ Yayukopura, Saul birye tamubuka, Daud biti asipdeyuk, “Winiryuk nepmalamnye, anda yatanye birye deiamkuk do? Anda, yatanye mi ulyam do?” nyabuka asibuk. Nyabuka asibukba, Daud birye, tamubuka nyabuk. “Na ni bira, an amu tam ululnye, el si Isai, elda Betlehem mutukunye birye deipnuke,” nyabuk.