1 Samuel 14 - Eipomek

Yonatan ninye deiyoknye, kipdeibik yupu

¹ Tonok sum ara, welnye el si Yonatan birye, el yin bobalamuknye biti, nyabuk. “Wini talak ara, nun adiparyuk, nun mal olan nang, sik Pilistin yala nang, yin talen nang arye domik asik otam koubuka binuname,” nyabuk. Nyabuk bukni, el li Saul biti, “Naio, nunda binamaname,” nyabuka kum morobuk.

² Saul atalak aryuk, Migron mutuku noutam delima yo tikamuka dam binuka, tia ati unmok. Abinuka unmokak ara, yukak kum bukni, Gibea mutuku dam arye, dipdongobuka, mitik tonun otam unmok. Pia mining dam anya arye, Saul biti melibuka, banmek yin telen nang ara, weik enam ratus (600) nang ap, amutuku binuka wekmek.

³ Atalak, sik imam yala nang, sik ongona ati, efod baju bobiyik touk, Saul el melibuka binmek nang kan-kan ara, tonoknye, el si Ahitub, el mi Ahiya unmok. Ahitub el weit bira, Ikabod anya arye, Ikabod elda, Ahiya el mam ulamuk. Sik ni bira, el si Pineas ulamuk. Pineas el mi koproba si ara, imam Eli ulamuk. Elda, Silo mutuku noutam, Allah Yahweh el pil dona ati, imam pil talibuka ulamuk. Amutuku noutam unmek nang nirya, Saul ap, el yin telen nang ap nirya arye, ‘Yonatan bira akunum amutuku batakuka, omutuku sik Pilistin tam nang dam binmalʼ tenen, pia kum bikmek.

⁴ Sik Pilistin nang arye, yaka kin asik domikce, kaliklamikak bukni, atam arye otam bana ati, keil dup mutuku tonok bukamukce, bisik bocamukba, akeil kup-kup dana-dana arye, yanuka antanap dongopmanto, uamuk. Yonatan bira, abisikuk biyuk. Aweik keil mutuku bukamukce, dana-dana arye yanuka, antanap dongoamuk ning ati, aning ara, si yuk-yuk si nyalamik. Ara, utam ap, tonda iknapye tam ap, bukamuk mutuku ara, tonok ati ara, el si Sene nyalamik. Tonda, otam ning ati ara, el si Boses nyalamik. Anyalamik mutuku dana-dana bukamuk noutam bisik ara, Yonatan wekuka biyuk.

⁵ Utam mutuku, dabu tam bukamuk keil ara, Mikmas mutuku tam urasin deiamuk. Atonun, iknapye, selatan tam bukamuk keil ara, el urasin Geba mutuku tam deiamuk.

⁶ Yonatan birye akamnye, el yin melibuka bobanmok kamnye biti, nyabuk, “An adiparyuk minop yaminba, nun neika binimirye, Allah el si kum bikikce, kum erenyak nang, sik Pilistin nang arye, sik kalikina ati, yaka kin asik dobuka yan unyaka dam binuname. Binimnyopura, nun ni Allah Yahweh, elce nunti melipsilirye, ninye obuka, sirya dakan ning, nun deice deipnamsile. Melipsilyopura, Allah elce, sik Pilistin nang dobuka, nun taruk deice deipsiliba, sik anang nirya opnuname. Ara, ninye mitik tonun do, weik tonun do, kum teneipnuname. Allah el mikip deice arye, ninye weik aunyaka babye, ‘Opnirye sirya daknamne,’ teneplyopura, akunuma elce olule. Ati, elce melipsilya deice, obinimirye binuka, anang nirya obuka, sirya daknuname,” Yonatan birye, el melipmok kamnye biti nyabuk.

⁷ Nyabukura, Yonatan el melipmok kamnye birye, tamubuka nyabuk, “Na deiyoknye, ance, ‘Aning ara telebe,’ tenepmince, ‘Winipnune,’ tenepminye touk, aninguk winipnuname. An tenepmenye touk, na babye aninguk, akunum tenipnirye winipnuname.

⁸ Nyabukba, Yonatan birye nyabuk. “Yo telebe, atalak aryuk, nun otam koubuka, binuname. Winipnimirye, nun binimnyopura, sik Pilistin nang arye, eipnamasiake. Sik kalekinyakak, nun nong lak kipnamname.

⁹ Winipnimiba, sik Pilistin mutuku bisik kalikinyak nang arye, nunti, “Kume asukumuk tikmarumunce, dinmarumunyopura, nunce anggun atikmarumunba, yanuka opdanuyabe, nyapsikcopura, nun otam kum koubuka, binamname. Asukumuk tiknamname. Sik Pilistin nang arye, nun dam yanamak talak ara, nun pia asukumuk unamname.

¹⁰ Bukni, sik Pilistin nang, sik bisik bana ati, bisik bublan dam kalikin nang arye, nunti, “Winira nun dam yarurume,” nyapsikcopura, sik dam otam binamname. Aning lak nyapmakin touk, lak bikin ning atonun upnamasila anya arye, adeice arye biknamaname. “Anggunda, nun tam yanmarume,” nyapsikcopura, aning ara akunum, Allah Yahweh arye, sik Pilistin nang dobuka, nun Israel yala nang ati, akunum arepmasilba, nun bitinye arye anang obuka, sirya daknamaname,’ tenepnimirye, adiparyuk sik tam olbinamaname,” Yonatan birye nyabuk.

¹¹ Ati ara, atalak Yonatan ap, akamnye el yin talibuka, melipmoknye ap, otam adiparyuk Pilistin nang, sik asik domikce, kaliklamika dam binuka, lake tikilbirik. Winipdikura, sik Pilistin nang, anang bitinye eibikce nyapdayik, “Anggun nirya, moubuka dipdelulume. Wini talak, sik Ibrani yala nang bitinye ara, mutuku dam duknulyanmaraka ani, kutukukapdakce, laka yanganmarake,” nyabuka nalibik.

¹² Tonda, amutuku deice wekmek Pilistin yin talen nang nirya arye, Yonatan ap, tonda el melipmok kamnye ap ati, nyabik, “Anggun aweleyarumba, nunce anggunti, imun ning peterepnamasiabe. Ara, nunce anggunti, adiparyuk opnusiyabe!” nyabik. Nyabikba, Yonatan birye, el melipmok kamnye biti, nyabuk, “Akunuma, winira nun biknamabe. Allah Yahweh arye, sik Pilistin nang dobuka, nun Israel yala nang akunum arepmasilba, el mikip deice arye, anang obuka, sirya daknuname. Ati, na menekuka banyopura, anda na aminyan dobolyanilyame,” nyabuk.

¹³ Nyabukopura, Yonatan el melipmok kamnye ap, Yonatan ap, sik adiparyuk neika mikip arye, kanupdongobuka welebidik. Ilil tenena pia kumce, malye kibuka welepdikce, Yonatan birye, awekmek Pilistin nang weik tonun, minop opnin banmokopura, aning atonun ton, el yin bobuka, melipmok kamnye birye, aminyan banmokce, anang ton opnin banmok.

¹⁴ Yonatan ap, el melipmok kamnye ap, minop olbirikopura, winipmanto ara, dua puluh (20) nang opdikba, sik anang nong sakuka, upmokak ara, pala weik mutuku nirya, winipmanto ara, tonok sum arye, talye wa wilamika atonun unmok. Amutuku el pala ara, seper empat hektar nyalamak touk unmok. Asukumuk anang opdikba, sik nong sakuka, dana-dana kibuk.

¹⁵ Winipdikopura, awinibuk ning ati ara, sik Pilistin nang aik dobuka, ulamika noutam unmek ninye nirya arye, eibikopura, ilil pia weik ubuk. Tonda, kata mutuku noutam mutuku-mutuku nirya, daulamik ninye nirya, sik ilil ubuk. Pilistin mutuku noutam taleamikba, ulamik mutuku bisik dam, kalikna ati, domik asik nirya, opnirye ubula alubuka dolona ati, Pilistin nang yuk-yuk nirya ara, sik ilil weik ubuk. Tonda, amutuku nirya babye, weikto lulukuk. Aning winibuka, ati ara, sik Pilistin mutuku nang nirya babye, ilil pia weik ubukba, bikbik abuka, otam binapna, atam yanapna kibik.

Israel yala nang arye, sik Pilistin nang ati, obuka sirya dakik yupu

¹⁶ Atalak ara, Saul el yin nang arye, Gibea tam bukni, Benyamin mutuku melibuka kalikinmek nang ara, sik Pilistin nang bikbik abuka, otam binapna, atam yanapna kinmekce, sik kanye ara, pia walwal upmoka ati, yanganmekba, eibikce lukdayik.

¹⁷ Eibikce, lak nyabikba, Saul birye, el melin nang yin talen nang ap, el ap neika awekmek nang ap ati, nyabuk, “Wini talak ara, adiparyuk, nun tam yin talen nang nirya nuklulume. Tonda, adiparyuk lilipmunyeba, yatanye ton, asukum kum yanmal do, nunce biknamabe,” nyabuk. Nyabukura, sik adiparyuk, ayupu nyapdeibuk touk, ebuka nuknin banmeka ani, Yonatan ap, el yin bobuka, bana ati, melipmok kamnye ap, kum yanmarikba, ebuka bikikce, Saul biti lak nyabik.

¹⁸ “Winibikopura, imam nang arye, efod baju ongonyaka ara, asukumuk boyalulume. Aning ara, lak bikin ning ulula anya arye, efod dipdepya deice, Allah arye, ‘Winipnamlume,’ tenesilya ara, nunce biknamabe,” nyabuk. Ara, Raja Saul birye, imamnye Ahia biti, nyabuk. Atalak noutam ara, sik Israel yala ninye nirya, dinmek talak aryuk, imam Ahia birye, el taram deice, efod baju bobinuka ongopmok. Ati, elce aning efod boyayuk.

¹⁹ Imamnye Ahia birye, efod boyanmokba, ‘Allah arye yata wiripnusil do?’ tenen, aning dinmarikce, el ap, Saul ap, yupu sisikinmarik. Saul elce aimam deiyoknye, Ahia ap, yupu nyanmarik talak aryuk, sik Pilistin ninye ulamik asik dam nirya ara, yupu weik nyanmekce, kwelanmek. Wininmekce, lelim weik nyanmokba, Saul birye aimamnye biti, nyabuk. “Wini talak ara, alak bikin ning, efod dina ara, dauaplye. Nunce Allah Yahweh asina ap, morona ap ati, winipmanto talak ara, lo ton pia kum upsile. Adiparyuk, otam unmak Pilistin nang dam binuka, opnuyabe!” nyabuk.

²⁰ Nyabukopura, Saul ap, el ap, neika unmek nang ap, sik yin talen nang ap nirya ara, sik nirya neika adiparyuk, mal olanmikak biyik. Sik anang arye binuka, Pilistin nang dam binuka dinmekba, sik Pilistin nang ara, ilil weik ubuka, anya arye, sik kanye ilil weik ubuka ati, moubuka tenina kumce, kanye walwal upmok ati, sik bidamnye arye, sik tam Pilistin nang ati, olanauk unmekba, Israel nang arye eibik.

²¹ Aninguk, kum bukni, minop talak ara, sik Israel tam ninye mitik weikto, Pilistin mutuku ninye kan-kan ton, binuka ulamikce, Pilistin tam kipdobikba, amutuku melibuka, yanamik nang nirya babye, atalak aryuk, Pilistin yala yin talen nang ati, deiyok kubuka, onauk unmek. Ara, sik Israel yala nang nirya arye, adiparyuk tamubuka, Saul ap, Yonatan ap, sik tam yin talen nang damuk, sik neika kipdobikce, sik Pilistin yala nang ati, onauk unmek.

²² Aning atonun, sik Israel yala ninye weik tonun ton, ‘Pilistin nang arye, opsikirye, sirya daksikcakʼ tenen, ilil ubukba, iknapye tam, Efraim mutuku dup, sukum binuka duknupmek nang nirya babye, yuk nang arye, “Pilistin tam nang nirya ara, ilil upmalba, bikbik abuka balonmake,” nyabikba, kekebikopura, sik babye adiparyuk, sik duknul binmekak arye, batakuka, Pilistin yala nang bikbik abuka, banmek bisik binuka, Saul ap, el yin telen nang ap, neika ansinibukabikce, Pilistin yala nang olbiyik.

²³ Atalak ara, sik Israel ninye, yin talen nang arye, Pilistin yala nang ati, bisik noutam arye, opdanin banauk, unmeka ani, weik mutuku ara, Bet-Awen mutuku babye, Pilistin nang ona ati, opra banmika ani, batakik. Dipkoprop, asum ara, Allah Yahweh, el mikip weik arebuk deice arye, sik Israel ninye ati, lyebukabukce, teleb kipdeibuk.

Akunum opdayik talak winibuk ning ati, nyabuk yupu

²⁴ Atalak ara, Saul birye nyabuk. “Na dipkoprob nyapsine. Arup ara, na mal olan nang, sik Pilistin nang ati, yu upnuk ning, min kum winipmanirye, sik nirya obuka, sirya kum dakmanyopura, atalak arye, yata ning do nirya, din dinmak nang ara, dipkoprob supnamane. Ati din pia kum dipnamlume,” nyabuk. Ara, ninye deiyoknye, Raja Saul birye, ayupu nyabuka ati, asum lukunyan arye, dipdongobuka, asum keting duk-duk ap, lukunyan ap, nirya ara, tonoknye babye, din ton pia kum dibik. Sik Israel ninye nirya ara, din kum dipmeka arye, din patabukba, sik nong nirya, mitang ubuka ati, kwaning patan asa unmek.

²⁵ Atalak ninye deiyoknye, Raja Saul, el yin talen nang nirya ara, bisik banmeka ani, tonok mutuku bai, yo kan-kan wekelbiyikura, amutuku noutam ara, mong mek pia weik wekamuka anya arye, tuku deice ton saklamukak, eibik.

²⁶ Mong mek weik dongamuk bukni, ninye tonoknye babye, among mek uamuk ning ton dobuka, kum dinmek. Deiyok ara, ninye deiyoknye, Raja Saul birye, akunum nyabuka supmoka ati, ilil weik upmok.

²⁷ Sik yuk nang ara, ilil ati wininmek bukni, Yonatan bira, el li Saul birye, el yin talen nang ati, “Anggun nirya ara, din dina pia meme. Arup ara, dina kum dipnamlume. Din diplinye bira, akunum supmane,” nyapmok yupu ara, kum kekepmok. Yonatan bira, ayupu kum kekekmoka arye, aning tenena kumce, Yonatan minopce el bobanmok kama ara, dobuka, akama kum-kum arye, mong mek noutam lukdogobukba, mong mek sakanmok dam, deipdongobuk. Winibukopura, Yonatan adiparyuk, among mek dobukce dibuk. Dobuka dibuk talak ara, el nong mikip weik tabakukce, pia teleb ubuk.

²⁸ Winibukopura, yin talen nang awekmek nang kan-kan bukni, yin nye tonoknye birye, Yonatan biti nyabuk, “Ancuk awinipmalam deice arye, malye upmalame. Deiyok ara, nun babye, din patanmasilce, mitang upmasil bukni, ani ninye deiyoknye, Raja Saul birye, nyapmasu. ‘Arup ton din diplinye bira, akunum supmane,’ nyabuka, mikip yupu nyapmal arye, tapu koupmasu arye, arup ara, nun nirya din kum dipmabe. Ati, nun nirya mitang upmasile,” nyabuk.

²⁹ Nyabukura, Yonatan birye tamubuka nyabuk, “Dipkoprop na ni elce, akunum nun mutuku noutam nirya ati, ikin ning, nun nong deice deipmasuk deice arye, malye kipdeipmasile. Wini talak ara, na unmana urasin ara, bikmalume. Min ara, na babye mitang upmanu bukni, mong mek mitik tonun dobuka, dipman talak ara, mikip tabakmanilce, teleb unmane,” nyabuk.

³⁰ Nyabukce, ayupu ton dukdongobuka nyabuk. “Winipmanto ara, arup na ni elce, anggun yin talen nang ati, ‘Telebe,’ tenepturye, sik Pilistin nang obikba, anang arye batakamik din ara, sik adiparyuk doproptingce, diamting toura, anggun mal olan nang arye, weik tonun ton, opnamtinge. Ara, din dipmatingce, anggun mikip upsutopura, dipkoprob Pilistin nang ara, adiparyuk weik tonun obuka, sirya dakmatibye. Ati, teleb ning ara, na ni birye nyapmo yupu ara, kum nyapnamtue,” Yonatan birye nyabuk.

³¹ Atalak ara, sik Israel ninye arye, Pilistin nang weik tonun opnin banmek. Ara, Mikmas mutuku bisik arye, dipdongobuka, opdanin banmeka ani, Ayalon mutuku biyik. Opnin banmek bukni, sik Israel ninye yin nang nirya ara, din kum dipmek arye, sik mitang ubuk.

³² Pia mitang ubuka ati, sik Israel ninye yin talen nang arye, Pilistin nang bukuka balamik ning ap, yuk bona ap, nirya dalubuka doprobik. Dalubuka dopropmek ning nirya ara, domba basam ap, kambing basam ap, ton doprobikopura, minopce kam ning weik tonun, alubuka dopropmek ning ara, obuka, sekuka batakikce, asukumuk imbik dibik. Tonda, adiparyuk, adomba basam tup ap, sapi basam tup ap, ining tuba unmokbuk, talye mangkau arye dinmek.

³³ Ining kipman dinmek talak ara, yuk nang arye eibikce, ninye deiyoknye, Raja Saul biti binuka, lak nyabik, “Nun ninye deiyoknye Raja, an amu tam yin talen nang ara, Allah Yahweh arye, ‘Aning pia kum wininamlume,’ nyapdeiamuk ningak, yanibuka, kam ning opmakce, ining tuba unmal bukni, talye mangkau dinmak deice arye, akunum malye upmake. Deiyok ara, sik basam tup ara, ining tuba unmal ning dinmaka deice arye, malye upmake nyabik.” Nyabikura, ninye deiyoknye Raja Saul birye, el yin talen nang ati nyabuk. “Anggun anang ara, ‘Nun mutuku ati akunum lik,’ tenepmalumce, malye unmalume. Wini talak ara, weik keil tonok, kurukuka bongop kwetepmunba, asukumuk poulyanamle,” nyabuk.

³⁴ Sik deiyoknye, Raja Saul birye, ayupu boyanmek nang nirya ati, nyabukce, ayupu ton ap dukdongobuka nyabuk. “Winipmunyopura, na amu tam umunye, yin nang ara, dan mutuku do nirya, narye nyapsiniba bimunce, amutuku unyak ninye nirya ati, “Sik sapi basam ap, domba basam ap, boyanganamlume. Boyamunyopura, kam ning asukumuk, weik keil ubuk deice uku sekibirye, asukumuk uku dipnamlule. Ati ara, anggun anang ara, abasam tup ap, el ining ap ara, ansinibuka pia kum dinamake. Tonda, sik anang ati, aning ara, Allah Yahweh arye nyapsuk yupu ati, yanibikirye, malye kum kililanamake.” Raja Saul birye nyabuk. Nyabuka ati ara, asum lukunyan noutam aryuk, Raja Saul el yin talen nang ap, elce taleamuk mutuku noutam ulamik nang nirya ara, sik Pilistin ninye obikce, alubuka dobik kam ning nirya ara, pala keil uamukak boyayikce, asukumuk obuka sekik.

³⁵ Tonda, ninye deiyoknye, Raja Saul akunum winibukopura, asukum adiparyuk Allah Yahweh el arena ap, si erebuka kina ara, pala weik keil deibukce, uku dongonak ati, mesba memebuk. Amesba ara, ninye deiyoknye, Raja Saul birye, minop talak memamikakuk memebuk.

³⁶ Winibukopura, Saul birye, el yin talen nang ati nyabuk, “Nun Israel ninye nirya ara, yamunyeba wini talak aryuk, sik Pilistin nang ati, arup lukunyan aryuk, binuka onmabirye, sik talibuka winyak ning nirya, alunmabiba ani, inipmalya bereklirye, asum beren tam kipnamle. Tonda, sik Pilistin mutuku nang nirya ara, obuka sirya daknamabe.” Nyabukura, Raja Saul, el yin talen nang arye, “Yo na nio, ance, ‘Aning telebe,’ tenepminye touk, aninguk winipnamabe. An yupu kekenamabe,” nyabik. Nyabik bukni, imamnye tonok arye nyabuk. “Naie Raja Saul, na kanye ara, ani. ‘Nun adiparyuk yata wiriptibye do?’ tenen ning ara, teleb ning ara, minop talak arye, nun ni Allah ati, ‘Yata wiriptibye do?’ nyabuka morobibiba, elcuk, ‘Aning ara, wininamlume,’ nyapsilye touk, aninguk winipnamabe,” nyabuk.

³⁷ Imam bira, ayupu nyabuka ati ara, ninye deiyoknye, Raja Saul birye, Allah ati asipdeyuk, “Na nio, na tenepmana ara, teleb do? Ara, na ap, na yin talen nang ap arye, wini talak sik Pilistin nang ati olbinuyap do? Na nie, dipkoprob wini talak ara, ance Pilistin nang dobuka, nun Israel ninye, nun taruk deice arepnusilam do?” Raja Saul birye nyabuk bukni, asumuk Allah arye, ninye deiyoknye Raja Saul nyapmok yupu ara, ton tamubuka, yupu kum nyabuk.

³⁸ Ati ara, ninye deiyoknye, Raja Saul birye, Israel mutuku noutam talibuka, ulamik ninye deiyok nang nirya ati, nyabuk. “Anggun wini talak aryuk, bulubuka, na dam yamunce, na yin talen nang, anggun arup arye, yata malye upmalum ning nirya ara, yanuka weknamlume. Danye birye, malye upmaua deice arye, nun ni Allah arye, yupu ton kum nyapmasilce, tunim anauk upmasile. Aning deiyok ara, bita teneipdenamabe.

³⁹ Aning ara, talye ati kum nyapmane. Na dipkoprob nyapsine. Allah Yahweh ara, kam pia ululnye benya arye, el si deice arye nyapne. Yahweh elcuk, nun mal olal bana ati deiyok ning ara, nun Israel ninye deice deipsiliba, onyabe. Wininyaba ati, yatanye do nirya, ‘Arup el malye upmalinye bira, aniʼ tenen, bikipyopura, naryuk nyapdeipniba, anye biti wenebuka, obibiba dipnamle. Aning ara, talye kum nyapne. Ara, na mi koprop Yonatan babye, ‘Malye upmalye ning ara, akunum,’ bikmunce, nyapmunyeba, bikipyopura, el babye opnamabe,” nyabuk. Nyabuk bukni, ninye deiyoknye, Raja Saul elce nyapmok yupu, el amu tam unmek nang nirya arye, tonoknye babye, el yupu ton, tamubuka kum dopdonokik. Tunim anauk upmek.

⁴⁰ Wininmekopura, Saul adiparyuk, sik Israel ninye ap, el yin talen nang nirya ap ati, nyabuk, “Anggun nirya ara, otam arye tikuka kintinip deipnamlume. Aning atonun, atam babye, na ap, na mi Yonatan ap ara, yuk tam otiknamaname,” nyabuk. Nyabukura, el yupu kekenmekce, amutuku wekmek ninye nirya, tamubuka nyabik. “Yo na nio, nun weik deiyoknye ance, ‘Winibuka winipnune, tenepmalam ning ara, pia teleb uka. Aninguk winipnuyabe,” nyabik.

⁴¹ Nyabukopura, ninye deiyoknye, Raja Saul adiparyuk, Allah ati morobuk, “Allah Yahweh anda, minop talak Israel ninye, nun ni Allah ulamlumce, melilamsulumnye ulyam bukni, wini talak arup arye, na moronman ning ara, deiyok yata ati, yupu tamubuka, kum nyapmanilam do? Na ni Allah Yahweh ance, na melipnimince, pia teleb kurun keil deice arye, lak nyapnilyame. Amalye upmap ning ara, ‘Na mi Yonatan ap, na Israel ninye sik deiyoknye, Saul ap arye, malye upmanam do? Aning ara, Allah Yahweh ance, urim keil deice arye deibuka, lak nyapnusilamʼ tenen, moropmakine. Bukni, amalye ubik ning ara, an mapu koprop, sik Israel ninye kan-kan arye, yuk nang malye wamicopura, Allah Yahweh ance tumim keil deice arye, lak nyapdeipnusilyame,” nyabuka morobuk. Ayupu nyabuka morobuk touk, efod deice uamuk keil, urim ap, tumim ap dipdeyikba, Allah Yahweh arye, urim keil deice, lak bikin ning deibukba, sik nirya arye, ‘Se, Saul ap, Yonatan ap arye, malye upmarakeʼ tenen, bikik. Aning akunum winibukopura, sik Israel nang arye, malye kum ubik ning ara, akunum laka kibukak bikik.

⁴² Akunum bikikopura, Raja Saul birye nyabuk, “Se Allah Yahweh, ance Yonatan ap, na Saul ap, atikmanam bukni, dipkoprob yatanye malye ubuk do?” nyabuka, morobuk. Morobukba, Allah Yahweh arye, efod deice taplak deiamik keil deice arye, lak kibukba, adeice arye bikik. Ara, malye una deiyoknye bira, Saul kum bukni, Saul el mi koprop, Yonatan elcuk malye uamuke,’ tenebikce bikik.

⁴³ Winibukopura, ninye deiyoknye, Raja Saul birye, tamubuka Yonatan biti asipdeyuk. Na mio, anda yata ati malye wamlum do?” nyabukba, Yonatan birye, tamubuka nyabuk. “Kume na nie, nara, na taruk deice bomse kama kum-kum tam arye, mong mek uamukak, mek mitik tonun dobuka diamse. Ati wini talak ara, na aunmana anya arye, opniminyeba dipnune. Na dibina ati kintinip deipne,” nyabuk.

⁴⁴ Nyabukopura, ninye deiyoknye, Raja Saul birye, Yonatan biti nyabuk, “Se, narye Yonatan an deice ikin ning deipkiniba, kum dipminyopura, Allah arye, na wenebuka opniliba, na dipnamne. Akumopura, kanye imun weik ning, na deice deipnamnile. Ati, anuk dadipnamlyame,” nyabuk.

⁴⁵ Raja Saul birye nyabuk bukni, sik Israel ninye awekmek ninye nirya arye, Saul biti nyabik. “Se, nun ninye deiyoknye Raja Saul, an adiparyuk Yonatan opminba, dipnamal do? Nunce tenepmaba ara, ‘Aning ara, pia kum winipnulame,’ tenepmabe. Deiyok ara, nun otalak Pilistin nang mal olanmabu ning ara, Yonatan el deice arye, nun Israel ninye ara, weik omsik ning ara, nunce sik Pilistin nang ati, akunum opmapu. Ati, ‘Yonatan ona ara, pia kume,’ nyapmabe! Ara, nun dipkoprob Allah Yahweh, el kam pia ululnye binya arye, el si deice arye nyapmap ning ara, Yonatan el kisok deice ubuk potong tonok babye, ton kum kwinipsaknamle. Ara, Allah Yahweh arye, anye biti, melibukba, anye el deice arye, el ap, nun ap, neika tonok sum arye, Pilistin nang nirya, akunum opmabe,” nyabuka, yupu mikip asa nyabik. Awekmek nang nirya arye, ayupu nyanmeka ati ara, sik Israel ninye nirya arye, Yonatan biti, Saul birye, ‘Ikin ning deipniba, dipnamle,’ tenepmok ning ara, akunum lyepdeibikba, Yonatan kum obuk.

⁴⁶ Aning akunum winibikopura, sik Pilistin nang, tuba kam unmek nang ara, tamubuka sik mutuku uk biyik. Atalak babye, ninye deiyoknye, Raja Saul birye, ton ap tuba dukdongobuka, ‘Pilistin ninye opnunʼ tenen, kum dobolbiyuk.

Israel ninye, sik mal olan nang ap, tonda Saul el mapu silip ap ati, sekeibuk yupu

⁴⁷ Ara, sik Moab ninye ap, Amon ninye ap, tonda Edom mutuku ninye ap, Zoba mutuku noutam talibuka ulamik ninye deiyok nang ap, Pilistin nang ap nirya ara, olbalamuk. Tonda, yata mutuku do nirya, olbalamuk mutuku nirya ara, obukabukce, yuk yala ninye ati, obuka sirya dakuk. Ninye deiyoknye, Raja Saul birye, winilamuk talak ara, elcuk olbalamuk. Winibukopura, yuk mutuku ninye arye, Israel mutuku ninye, sik bona alubuka taleamik ning ara, lyepdobukce, tuba tamubuka boyangalamuk.

⁴⁸ Atalak noutam nirya ara, Raja Saul akunum Israel, sik ninye deiyoknye Raja wipdeibikba, tikuk. Winibuka tikuk talak noutam nirya ara, dan mutuku nang do nirya, sik Israel ninye ati, mal olan nang olbalamukce, Amelek mutuku ninye nirya ara, obukabukce, malye kilamuk.

⁴⁹ Ninye deiyoknye, Raja Saul birye, delilamuk nang, sik si ara, ani. Ara, Yonatan ap, Yiswi ap, Malkisua ap, deiamuk. Tonda, Saul el kilmu ara, min yuma deibuk kilmu, el si ara Merab ap, tonda, el kilmu weit kil aminyan deibuk kilmu, el si ara, Mikhal ap deiamuk.

⁵⁰ Tonda, ninye deiyoknye Raja Saul, el domuk kil si ara, Ahinoam. Akil el li koproba ara, el si Ahimas ulamuk. Tonda, Raja Saul el yin talen nang nirya, sik deiyok kibuka yin telenanye, el si ara, Abnar ulamuk. Ara, Saul el mam bira Nar, el mi Abnar ulamuk. Anya arye, Saul el mam Nar, el mi ara, Abnar ulamuk.

⁵¹ Saul el li koproba, el si ara, Kish ulamuk. Tonda, Abnar el li koproba ara, Nar ulamuk. Nar el li, el si ara, Abiel ulamuk.

⁵² Ninye deiyoknye Raja Saul kam tuba ulamuk talak ara, el mikip aryuk, Pilistin nang dam olbalamuk. Ati ara, ninye deiyoknye, Raja Saul birye dinmana ani, mikip weik nang ap, ilil tenena kum nang ap, eipnopura, adiparyuk, el amu tam yin telen nang wipdeibukba, el tam yin talen nang ulamik.