1 Samuel 13 - Eipomek

Israel ninye arye, Pilistin nang ati, olbinamik yupu

¹ Saul el winibuka, keting tamun yupa tonok keba pamubarye (30) tiga puluh tahun ulamuk talak ara, Israel sik ninye deiyoknye, Raja deiyok kinanye kibuk. Atalak arye dipdongobuka, keting tamun yupa tonok kepdopnye koklom dikin (42) empat puluh tahun deice arye, Israel ninye, sik weik deiyoknye talibuka ulamuk.

² Atalak noutamak ara, Saul birye, ‘Anang ara, na yin talin nang unamak’ tenen, Israel ninye yupa weik, tiga ribu (3.000) nang wipdeibuk. Winibukba, dua ribu (2.000) nang ara, Saul el ap Mikmas mutuku biyik. Mikmas mutuku ara, Betel tam noutamak bukni, mutuku kon bukamukak anyuk unmek. Ton seribu (1.000) nang ara, Saul el mi Yonatan ap, Benyamin yala nang ulamik tam bukni, Gibea mutuku biyik. Biyikura, ton yuk nang ara, sik Israel ninye, ayala-yala nirya ati, Saul birye, “Tamubuka, anggun aik koproba uk, yuk-yuk binululume,” nyabukba, sik aik tamubuka biyik.

³ Winibikura, Yonatan birye, Pilistin ninye, sik yin talin nang ulamik mutuku si, Geba mutuku binuka, anang obuk. Obukba, Pilistin ninye kekebik. Atalakuk, Saul birye nyabuk. “Wini talak ara, pong-pong ana, el si terompet, pong-pong ana weik arye, nyapmunyeba, Ibrani ninye unyak mutuku nirya kekepnuyake,” nyapdeibukba, pong-pong abikba, Israel ninye dana-dana tam nirya arye, kekebuka bulubik.

⁴ Nyabukura, Israel ninye kekebikopura, ‘Saul ap, el mi ap arye, Pilistin ninye, sik yin talin nang, Geba mutuku ulamik nang nirya opmaka anya arye, Pilistin nang arye, nun Israel ninye ati, pia lik tenenamsiake,’ tenebikce, bikik. Tonda, ‘Israel nang ap, Pilistin ninye ap, neika kum uptibye’ tenen, bikik. Ati, Saul birye nyapdeibukba, Israel ninye nirya, Saul birye deiyok koubukba, Gilgal mutuku yanuka bulubik.

⁵ Atalak ara, Pilistin ninye arye, Israel ninye olbana ati, ninye weika arye bulubik. Sik yin talin nang ara, laut mekwen kup-kup keil wenenga, pasir atonun ubika arye, nukmanto kum ubik. Tonda, sik kuda basam arye libuka, kereta bukuka, tuku deice ban ning ara, yupa weik, tiga ribu (3.000) kereta kintinibik. Aning atonun, akereta talin nang, yin talina deiyok nang ara, enam ribu (6.000) nang wipdeibik. Israel ninye olbana ati, Mikmas mutuku binuka kintinibik. Mikmas mutuku ara, atam keting yangan tam ara, Bet-Awen mutuku binuka kintinibik.

⁶ Akunum kintinibikopura, Israel ninye eibikce, ‘Se anang ara, nukmanto kum unyaka anya arye, nun yin talin nang arye, sik Pilistin nang obuka, kum sirya daktinge’ tenen, sik ilil ubukba, malye kanye bobikce, ninye nirya bikbik abuka, buru tam binuka, keil deiya pum bisik ap, maning kan-kan ap, keil deiyok ap, mutuku taram amu ap, tonda, ‘Mok ceplirye, mekwen deipnamle’ tenen, tuku palyamikak pum bisik ap, binuka duknubik.

⁷ Tonda, Israel ninye ton, Yordan mek koubuka, otam Gad yala nang talibuka ulamik tam ap, Gilead yala nang talibuka ulamik tam ap, biyik. Saul bira, Gilgal mutuku tuba ulamukba, ninye weika arye, el ap melibuka ulamik yin nang ara, ilil arye, yok sirim talibukba unmek.

⁸ Ati ara, Samuel birye Saul biti, el nyapdeiamuk touk, Saul birye elilamuk. Tek barye talak arye, Samuel yangana ati, dilamuk. Bukni, Samuel adiparyuk, Gilgal mutuku kum yayuk. Kum yayukba, Saul el yin talin nang noutamak arye bokuka, ton nang atalak ara, ‘Se, nun ni Samuel kum melipnamsil’ tenen, batakuka, yuk-yuk bindobik.

⁹ Ati ara, Saul birye, el mapu ati nyabuk. “Wini talak ara, ‘Nun malye un ning kilipsilirye, kum wenebuka opnamsil’ tenen, nun ni Allah, el si erena ati kam ning obuka, uku dongopnamap ning ap, tonda, ‘Allah ap, nun ap, neika teleb uptibye’ tenen, ‘Arepnuyap,’ teneplum ning boyanululume. Ara, anggun kam ning ap, yuk arin ning ap dobuka, na dam delilyalulume.” Nyabukura, boyayikba, Saul birye, ‘Nun malye winina ati, Allah arye wenebuka kum opnamsil’ tenen, el si erena ati, uku dan ning ara, el dem arye dobukabukce, Allah ati arebuk.

¹⁰ Bukni, aning nirya Allah ati arebukce, aunmek talak aniryuk, Samuel yayukba, Saul birye Samuel biti binuka, elti, “Telebe,” nyabuka, taruk talibuk.

¹¹ Taruk talibuk bukni, Samuel birye tamubuka, Saul biti nyabuk. “Amio, ance yata wiripmalam do?” nyabuk. Nyabukbuk, Saul birye tamubuka, “Na yin talin nang nirya, na batakuka bindopmaniake. Ara, urdem ati kume. Ance ‘Yanamne,’ nyapdeiamlumba, dilamkupa ani, min kum yanalum talak ara, sik Pilistin nang weika arye, bulubukabikce, Mikmas mutuku wekelyayik ati, naryuk apil dopmance, aning dobuka, Allah arepmanue,” nyabuk.

¹² “Tonda, tenepmanu ning ara, ani. Nara, Pilistin yin talin nang, na dam akunum olyanamaniyake. Ara, Gilgal mutuku dam kum yanmak talak ara, ‘Na ni Allah arye, melipnilaba, na mal olan nang malye kiptinye’ tenen, elti, kibuka, min kum arepmanue. Ati, ‘Naryuk pi dobuka, Allah el uku dongon ning arepnune,’ tenepmanurye, apil dopmanue,” Saul birye nyabuk.

¹³ Nyabukba, Samuel birye tamubuka, Saul biti nyabuk. “Kume, pia moupmince, unamlyame. Walwal arye, pia malye winipmalame. Nun ni koproba Allah, el si Yahweh arye, ‘Winipnamlulume,’ nyalisulul ning atonun, ance kum winipmalame. Ura, aning kum bukni, an kanye aniryuk tenepmalam ning ara, akunum winipmalame. Allah arye ‘Winipnamlulume,’ nyalisulul ning atonun, akunum winipmatum toura, Allah arye, Israel ninye unamak mutuku noutamak ati, melipkutuba, an ap, an mapu ap, an yala nang ap arye, Israel ninye, sik ninye deiyok nang pia unamtinge.

¹⁴ Bukni, pia kekena kumce, malye akunum winipmalama ati, wini talak ara, amutuku noutamak ara, pia ninye deiyoknye kum unamlame. Ance, Allah arye nyalilamsuk yupu, akunum yanipmalama ati ara, Allah el babye, talima diksukumuk ulul touk, elce eipkukce, el talima ulamuk ning atonye akunum kel kibukce, wipdeipnamale. Anye birye, Allah el ‘Naʼ tenen ninye ati, ninye deiyoknye, Raja unamle. Winiplirye, antiklumak punupnamle. Punubkilirye, Raja ulirye, Israel ninye nirya talibuka unamle,” Samuel birye Saul biti, laka nyabuk.

¹⁵ Samuel birye nyabukopura, Gilgal mutuku arye batakuka, Benyamin yala nang ulamikak, Gibea mutuku welebuka, biyukce unmok. Wini talak ara, Saul birye, ‘Na yin talin nang, yata barye unyak do?’ tenen, nukdeyuk buk, yupa weik enam ratus (600) nang ulamik.

Israel yala nang arye, sik yin talin nang, ninye olan ning nirya kum danamukba, kum talilamik talak ati, nyabuk yupu

¹⁶ Ura, Saul ap, el mapu Yonatan ap, sik ap unmek yin nang ap nirya, Benyamin yala nang tam noutamak, Gibea mutuku doltakna tenda aik binuka dobuka, aunmek bukni, Pilistin nang ara, baju bol doltakna aik, Mikmas mutuku yanuka dopmikce, tia talak ati, yanuka unmek.

¹⁷ Ayanuka donmekbuk, sik Pilistin nang aryuk, ‘Israel nang talye-talye warikibirye, obuka aupmalye ning, ubula dopropnamap’ tenen, sik yin nang noutamak arye bokuka, yupa winilye kintinibik. Yupa winilye kintinibikopura, sik yupa ara, winilye anya arye, ton nang ara, Syual mutuku dam bukni, Ofra mutuku dam biyik.

¹⁸ Ton yupa ara, Bet-Horon tam biyik. Ton winilye yupa ara, mutuku wiliba dam bukni, Zeboim lu tam kalikil biyik. Zeboim mutuku arye otam ara, mek kumak anya arye, ninye kum ulamik mutuku ton eibik.

¹⁹ Ura, atalak noutamak ara, Israel ninye ulamik mutuku noutamak nirya, kat ning, besi arye memena kel nang, tonok nang babye, kum ulamik. Deiyok ara, Pilistin nang arye nyalamik. “Kume, sik Israel yala ninye arye, ‘Nun dam yanuka opsicakʼ, tenen, kat ning arye memena, kel nang nirya arye, sik pil dona pia meme. Besi ning memen nang ati, Israel yala nang lo arebibyeba, sik pil dobikcopura, sik kat ning, besi taca lun ning memena ap, parang ya memena ap nirya ara, pil dobikirye, aning talibicopura, ‘Nun yanuka opsicakʼ, tenen ati, aning ara, pia meme. Pil kum donamake,” nyalamik.

²⁰ Nyabuka nyalamika ati ara, sik Israel yala nang arye, sik kat ning tace luna ati ara, Pilistin nang dam morolbinamik. Ara, sik wa tuku palina ati, besi ning ap, sik kapak ya ap, gandum maning sekna topnong ap, tonda, sik kat ning nirya, tace ketebuka luna ati ara, Pilistin nang moropnaba, anang aryuk ketelilamik.

²¹ Winilamik bukni, urdem aryuk, atace ning kum ketelilamik. Dekna weik ning, keil uang arepna arye, moropnaba, adeice aryuk tace ning ketelilamik. Ati ara, sik Israel nang ara, ikin kanye bolamik. Sik wa tuku palina ati, besi ning tace ketena ati ara, keil uang dekna weik ning bitinye arelamik. Sik kapak ya ketena ap, sapi basam, ‘Minopce bicak’ tenen, ona ati, besi ning ap, gandum moupdeibuka, erelon ning ap, tace ketena ati ara, keil uang dekna weik ning tonoknye, arelamik.

²² Ati ara, Israel yin nang arye, Mikmas mutuku binuka, Pilistin nang ati, min kum oldanmek talak arye, Israel ninye tonoknye babye, ninye on tace ning, kum talilamik. Ara, sik parang ya ap, ninye ona ati, lulamik yo tace ap, pia kum talilamik. Sik kum talilamik bukni, Saul ap, el mi Yonatan apuk, aning tuba talilamdik. Sik yuk yin talin nang ton, pia kum bolamik.

Saul el mi Yonatan birye, Pilistin ninye ati, olbiyuk yupu

²³ Atalak ara, Pilistin yin talin nang arye, yupa tonok bokukabikce, weik mutuku dana-dana bukamuka, kwang dona noutamak, amutuku ara, Mikmas mutuku dam biyikce, kalikinmek.