1 Samuel 11 - Eipomek

Saul birye, Yabesh mutuku ulamik ninye, lyepreibuk yupu

¹ Amon mutuku taleamuknye, el si Nahas birye, el mapu yin nang ati, “Gilead tam Yabesh mutuku binuka wareklulume,” nyabuk. Nyabuk buk, Yabesh mutuku ninye arye tamubuka, Nahas biti nyabik. “Kum opsimince, minopce ance nunti, ‘Teleb kibuka neika unamabe,’ nyapdeipsutumopura, nunda an amu tam nanguk unamabe,” nyabuka morobik.

² Nyabikba, Amon mutuku taleamuknye Nahas birye, sikti, tamubuka nyabuk. “Kume, anggun asing sirik ning lukdopsinya deice aryuk, narye anggunti, ‘Teleb kibuka neika unamabe,’ nyapsitinye. Anggun asing lukdopsinya deice arye, anggun Israel ninye nirya ati, alye dakeipnamsine. Aning kum winipnyopura, teleb yupu ton kum nyapnamasine,” nyabuk.

³ Nyabukba, sik Yabesh mutuku talibuka ulamik nang arye nyabik. “Nun ance ouku like tekbarye (7) lo arepsiminba, nunce ninye ton wipdeibibiba, Israel ninye unyakak nirya nyalbinamake. Atalak noutamak arye, ninye ton yanuka kum lyepdopsicopura, nunce an nyapmasilam touk, kum opdanamabe, an amu tamuk ulamibiba, ance talinamsilame,” nyabik.

⁴ Nyabik touk, ninye ton wibuka dopreibikopura, anang arye, Israel tam noutamak lak nyapra banmeka ani, Saul ulamuk mutuku, Gibea mutuku binuka laka nyabikba, anang kekebikce, mambul kanye bobuka, sik nirya weik arye engenmek.

⁵ Wininmik talak ara, Saul bira, wa winmoka batakuka aik yanganmokce, el sapi basam menekuka banmek bukni, el aminyan tam yanganmoke. Yayukce, sik ninye nirya, malye yupu nyabuka, engenmekba kekebuk. Kekebukce, Saul birye, “Yata ati do? Yata ning ati, amutuku nang nirya, malye yupu nyabuka engenmak do?” nyabuka asipdeyuk. Asipdeyukura, amutuku nang arye, sik Yabesh mutuku nang arye, yupu laka yanuka nyapmek yupu nirya, el dam laka nyabik.

⁶ Aning nirya laka nyabikba, Saul kekebuk. Akekebuk talak aryuk, Allah el Dib Kanye, Saul deice yanuka, el talima pum tam wekukba, yu weik ubuk.

⁷ Yu weik ubukba, Saul birye sapi basam bitinye dobuka obukabukce, kwalibuk. Kwalibukce, asapi basam tup mitik-mitik toubuka deipmoka dobuka, ninye arebukce, anang arye, ayupmok sapi basam tup dobukabikce, Israel ninye ulamik mutuku nirya bokra banmik. Bokuka arepre banmek talak ara, Saul birye nyapmok yupu, lak nyapre banmek. Ara, Saul birye nyabuk. “Dan kili sal do nirya, na Saul ap, Samuel ap kum melipsumunyopura, anggun sapi basam babye, opnirye kwalipnamne. Asapi mitikto ning babye, obuka kwalipnamne ara, anggun ning babye, obuka kwalipnamne,” nyabuk. Nyabukura kekebikce, Allah el si Yahweh arye, ilil una deiyok ning arebukba, Israel mutuku nang nirya ara, ilil weik ubukba, adiparyuk Saul dam yanuka melipmik. Tonoknye yangalamak touk, sik ninye weik bukni, neik sum aniryuk bulubuka, Sal dam yanuka melibik.

⁸ Winibik ati, sik nirya Besek mutuku uk bulubuka wekikba, Saul birye, sik anang nirya nukuka kintinip deibuk. Sik Israel yala nang ara, yupa pia weik, tiga ratus ribu (300.000) nang kintinibik. Tonda, Yehuda yala nang ninye ara, tiga puluh ribu (30.000) nang asukumuk bulubuka kintinibikce, awekik.

⁹ Anang weika arye, akunum bulubuka wekikopura, Yabesh mutuku nang arye, yupu laka nyalbana ati dopreipmik nang ati, nyabik. “Anggun nyalbilulume. Yabesh mutuku unyak ninye dam, binuka nyapnamalulume. ‘Ambusum keting panalyalirye, buppu akunum uplyopura, nunce anggun dam yanuka, lyepdopnamasiyabe.’ Ati ara, nyalbilulume,” nyapdeibik. Nyabikopura, anang arye, anyapmek yupu, bobuka laka nyalbiyikba, Yabesh mutuku nang kekebikce, kanye weik deibik.

¹⁰ Kanye deibik bukni, tenepce kwinisa dobuka aniryuk, sik Amon yala nang ati ara, nyabik. “Ambusum ara, nunce anggunti, olana kumce, nun nirya arye, anggun amu tam bukuka unamabe. Ati ara, anggun tenepmasulum ning, nun dam una ara, teleb uka,” nyabik.

¹¹ Nyabuka mapmika ani, akunum berekukopura, asum noutamak ara, Saul birye, el yin bon nang bokuka, yupa winilye kintinibuka deibuk. Winibuka unmokba, inipmoka ani, akunum bereknuyuk talak ara, el yin talin nang nirya arye, sik Amon mutuku doltakna aik, mapmeka noutamak yanuka warikik. Atalak aniryuk deiyok koubuka, Saul el tam nang arye, sik Amon mutuku ninye nirya ati, olanmika ani, berekukce, keting purupan talak arye, olanmeka ani, keting duk-dukan babye, tuba olanmekba, ninye weika arye obik. Obikce, Amon mutuku nang, mitik tonun dem batakdongobikba, anang nirya, bai sakuka bindobik. Biyik talak ara, sik ninye bitinye-bitinye kibuka, balona kumce tonok-tonok bokdanuka, bisik yuk-yuk bindobik. Sik nirya ilil weik ubukba, yuk-yuk bokdanuka, tonok-tonok bindobik.

Israel nang arye, ‘Nun ninye deiyoknye unamsil’ tenen, Saul bira, Raja kina ati, erepdeibik.

¹² Sik Amon yala ninye nirya, obuka sirya dakikce, bikbik abuka bindobikopura, Israel nang nirya arye, Samuel biti nyabik. “Kume, arup ara, dan nang arye, ‘Saul nun ninye deiyoknye dipkoprob unamsil do, kum do? ‘Elda nun Raja kum kipsutue,’ nyabuka malye kibuka, malye yupu nyabik nang dan do? Anang inibuka, nun dam boyasitingba, nun adiparyuk anang opnamabe,” nyabik.

¹³ Nyabik bukni, Saul birye tamubuka nyabuk. “Kume, nun ni koproba Allah, el si Yahweh, arup arye, nun Israel ninye nirya akunum lyepdopmasile. Ati ara, arup ara, Israel ninye tonok babye, ton kum opnamabe,” nyabuk.

¹⁴ Nyabuk buk, Samuel birye, anang nirya ati nyabuk. “Ura, anggun nirya yalulume. Gilgal mutuku bibirye, ‘Saul biti nun ninye deiyoknye, Raja unamsile,’ akunum tenebupe ati, tuba tonap tamubuka, elti, erepdeipnamabe,” nyabuk.

¹⁵ Nyabukura, aninye nirya kekebikce, sik adiparyuk Gilgal mutuku biyikce, Allah el dam bulubukabikce, “Saul bira dipkoprob nun ninye deiyoknye, Raja unamsile,” nyabikba, Allah arye kekebuk. Nyabikce, kam ning obukabikce, ‘Nun ni Allah, el si Yahweh ap, nun ap, teleb ubuka neika unamap’ tenen, Allah si erena ati arebik. Winibik talak ara, Saul ap, sik Israel ninye nirya ap, weik kwalya kwalibuka, kanye deibuka, pin-pin asa arye dibik.