1 Samuel 10 - Eipomek

Saul bira, Israel ninye deiyoknye, Raja kina ati, wipdeibik yupu

¹ ‘Ninye deiyoknye, Raja unamle’ tenen, Samuel birye Saul biti, wipdeibuk. Tonda, atalak sik Israel ninye ulamik touk, Samuel birye, zaitun yo duk, mek teleb cang makau arye, libuka deiamika dobukabukce, Saul kisok deice dikeibukce, Saul biti, taruk talibukce, ‘Telebe, akunum teleb kipdeipkine,’ nyabukce, amutuku nang ulamik touk, Saul mutubuk. Samuel winibukce nyabuk. “Allah el si Yahweh arye, Israel ninye, sik ninye deiyoknye kina ati, akunum wipdeiamkuke. Ance Israel ninye ati, sik ninye deiyoknye, Raja kipmince, talipnamlyame. Aning ati ara, aminyak mek an kisok deice dikeipmakina ara, Allah arye bikilina ati, narye an kisok deice dikeipmakine,” nyabuk.

² Wini talak ara, Saul an adiparyuk, na Samuel dam batakuka bimince, arup sik ninye bitinye, Zelza mutuku bukni, Benyamin mutuku noutam, Rahel weiamika damuk binuka epdanalume. Epdamunyopura, sik bitinye nang arye, tamubuka nyapnamakirak ning ara, ani. “Saul an enmalam keledai basam nirya ara, yuk nang arye, akunum eipmake. Ati wini talak ara, kam ning nirya ara, Saul an ni birye, ninye dopdeibukba, enmakiak bukni, el tuba, ‘Se, yata wiripnamne do?’ tenebuk ning ara, tuba kum unamleʼ. Aning ara, bataknamlule. Bukni, anti ara, elce, ‘Se, na mi Saul bira, dan mutuku unmal do?’ tenen, enmakilce, ‘Yata wiripnamne do?’ tenepmale,” nyapnamakirake.

³ Ati ara, abitinye nang ayupu nyapkirikcopura, Saul anda amutuku batakuka, asukum arye, deiyok koubuka pia balamince, Tabor mutuku noutam, weik yo tikuka damuk binamlyame. Biminyopura, ninye winilye ton, Betel mutuku Allah si erena ati, kam ning obuka, uku dongolbana ati, bobikirye, panabuka bakibuk, ance binuka eipnamalame. Aninye winilye nang bukni, tonoknye bira, kambing basam mi ara, winilye bobanmala ak eipnamalyame. Tonda, ninye tonok ton, roti kwaning winilye bobanmala ak eipnamalyame. Tonda, ninye tonoknye ton, kambing bola kitibuka, anggur mek lipmalirye, bobanmala ak eipnamalyame.

⁴ Sik awinilye nang arye, Saul anti, ‘Telebe,’ nyabuka, si erebuka kipnamakiyake. Sik ap epdamunyopura, sikce anti, roti kwaning bitinye arepkikiba, ance moubuka dopropnamlyame.

⁵ Aning akunum winiminyopura, Saul an adiparyuk, Gibea mutuku noutam bukni, amutuku si ara, ‘Gibea mutuku dup, Allah el ning,’ nyalamak mutuku binamalyame. Amutuku noutam ara, ‘Nun mal olan nang yanamakʼ tenen, sik Pilistin mutuku nang arye, weik keil arye, weik asik domik. Aunyak mutuku noutamuk binamlyame. Amutuku noutam wekelban bisik bublan dam ara, sik nabi-nabi nang yupa weik, tonok mutuku dup, Allah el si erebuka kina ati, kam ning obuka, uku dongolbanmikce, koulukuka yangakiba, epdanamalume. Sik anabi-nabi nang nirya ara, mot nyanarye, bolamak ning, sik si gambus ap, erebana ap, bung-bung ana, el si seruling ap, kecapi ap bopmakirye, yupu weik tonun nyapnin yanganmak ning ap, mot sepnin yanganmak ning ap, aminyan winipnamle ning, lak nyapnamak ning ap, nirya ara, an eipnamalyame.

⁶ Saul an atalak aryuk, Allah Yahweh, el Pia Teleb, Lek Dip Kanye arepkiliba, el mikip wekilyopura, an ap, anabi-nabi nang ap, neika ansinibuka mot senamlume. Tonda, aminyan winipnamle ning ati, lak nyapnamlyame. Tonda, yupu weik tonun arye, sik nabi-nabi nang arye, ngalukunmaka ara, an babye nyapnamlyame. Wininmaminyeba, Allah Yahweh arye, an min arye winilamlum touk, tuba kum wininamlame. Allah el Pia Teleb, Lek Dip Kanye mikip deice, winiryuk ning atonun, kipdeipkiliba, ninye yuk nang atonun unamlame.

⁷ Aning nirya akunum winipliba, eipminyopura, Saul ancuk, ‘Aning ara telebe, winipnamne,’ tenepminye ninguk, wininamlame. Deiyok ara, Allah ap, an na ap, neika unamduma ati ara, Allah arye melikiliba, neika urumunce, an tenepminye ninguk, wininalame.

⁸ Winipminyeura, anda minopce, Gilgal mutuku menekuka bimince, like tekbarye sum mabuka dinamlyame. Aminyan talak, tekbarye sum akunum uplyopura, na Allah arena ati, kam ning boyakirye, obuka uku dongolyanganamne. Atalak ara, ninye ap, Allah Yahweh ap, ansinipdeipnirye, teleb una ati, kam ning obuka, uku dongolyanganamne. Atalak aryuk, an wininalam ning nirya ara, narye yanuka lak nyanamkine. Ayupu nirya ara, Samuel birye, Saul biti nyabuk.

Saul bira, Allah el Pia Teleb, Lek Dip Kanye, mikip deice nyabuk ning ati, sekik yupu

⁹ Saul bira, ayupu nirya kekebukopura, adiparyuk Samuel ulamukak bataknirye, ‘Binun,’ tenebukopura, Allah arye Saul biti, el kanye ap, el talima noutam tenen ning ap, winiryuk ninguk arebukba, el talima noutam wekuka langdibuk. Winibukura, Samuel birye, “Aning winipnamkil, aning ton winipnamlame,” nyabuka, lak nyabuk yupu nirya ara, aning ton akunum winibuk. Aning nirya ara, Samuel birye, ayupu nyapmok ning nirya, atalak aryuk winibukba, laka kibuk.

¹⁰ Aning akunum winibukopura, Saul ap, el melinanye ap, Gibea mutuku birik. Bisik banmarik talak ara, bisik noutam arye, sik nabi-nabi nang weik yanganmeka ak, ton epdayik. Epdayik talak ara, adiparyuk, Allah el mikip, Saul deice wekuka langdibuk. Wekuka langdibukba, sik nabi-nabi nang, mot senmekce, yupu weik nyanmek ning nirya ara, Saul el babye neika ansinibuka, yupu nyanmekce senmek. Sik nirya neika, Allah el mikip deice, aminyan winipnamuk ning nyanmekce, Allah ati si erenmek.

¹¹ Minop talak arye, Saul akunum bikamik nang nirya ara, Saul wininmok ning eibuka kel bikikce, winibika ati, tonoknye birye, tonye biti asilanmek. Ara, “Se, nun kwit Saul awininmala ara, dipdelulume! Kish el mi Saul bira, yata deiyok ning ati, aning wininmal do? Tonda, Saul bira, sik nabi-nabi nang, sik weik yanganmaka ak, ton ansinibuka unmalce, nabinye akunum kipmal do? Allah yupu lak nyana deiyoknye, akunum kipmal do, kum do?” nyabuka asilanmek.

¹² Nyanmekba, sik amutuku ulamik nang arye, tonoknye birye, ton asipdeyuk. “Yata ning do, nirya ara, nabi-nabi nang winilamak touk, sik yuk nang arye, sik kanye aryuk, ‘Na ton wininune,’ tenebikirye, dipkoprob winipting do? Anggun ni koproba ara, talinye birye wininmalarye, nabi-nabi nang, sik weik ansinipting do? Atalak aryuk, amutuku nang arye, deiyok koubikce, domon yupu atonun ton nyanmek. Ara, ‘Saul el babye, nabinye dipkoprob ulul do?” nyabuka asinmek.

¹³ Saul el adiparyuk, mot senmokce, yupu weik nyanmoka ani, akunum tunim abukopura, el adiparyuk amutuku batakuka, bisik banmok. Bisik banmokce, Allah el arena ati, mesba memebuka deiamikce, si erelamik mutuku dup, koulukuka biyuk.

¹⁴ Saul el mam birye, Saul el melinanye ap, Saul ap ati dinmok ani, el mam birye, sik nang bitinye ati asipdeyuk. Elce, “Anggunda, dan mutuku binmarumce, asukum tamubuka yanmarum do?” nyabuka, asipdeyukura, Saul birye tamubuka nyabuk. “Nunda na ni, el keledai basam wangabuk ning ati, enmaname. Enmanam bukni, nunda pia kum eipmanume. Kum eipmanuma ati, ‘Anye melipsutu do?’ tenen, minopce Allah yupu lak nyalulnye, nabi Samuel, el dam binmanume,” nyabuk.

¹⁵ Saul birye nyabukba, el mam birye asipdeyuk, “Ati ara, Samuel elce nyapmau ning ara, yata yupu nyapmaku do?” nyabuka asipdeyuk.

¹⁶ El mam birye nyabukba, Saul birye tamubuka nyabuk, “Kume, Samuel birye nyapmanua ara, na ni el keledai basam nirya ara, ‘Ninye arye akunum eipmake,’ nyapdeipmanue,” Saul birye nyabuk. Nyabuk bukni, Saul birye, el mam kekenak, lak kum nyabuk ara, Samuel birye Saul biti, “Aminyan talak ara, anda akunum ninye deiyoknye, Raja kipnamlame,” nyabuka, lak nyapmok ning ara, laka ton kum nyabuk. Aning ara, duknubukce, talye mangkau kibuk.

¹⁷ Atalak ara, Samuel birye, Israel ninye ati, “Anggun nirya bulubuka, Misba mutuku yamunce, nun ni Allah, el si Yahweh dam yanululume,” nyabuk.

¹⁸ Nyabukba, akunum bulubuka yayikopura, Allah nyapdeipmok ning, Samuel birye Israel ninye ati nyabuk. “Anggun ni koproba Allah, el si Yahweh arye, keting tamun yupa weik deice arye, kalikuka meliamsukce, nyalamsuke. ‘Mesir mutuku nang arye, weik ikin pil dilamsikba, kanye ikin ulamsukbuk, akunum lyebuka dobuka yanamsise. Tonda yuk-yuk mutuku nang arye, ‘Israel nang obuka, sirya daktibye’ tenen, anggun nong deice ikin ning delilamsik bukni, aninye noutamak arye lyepromsise,’ nyabuka, Allah arye nyasulule,” Samuel birye nyabuk.

¹⁹ Nyabukabukce, ayupu ton dukdongobuka nyabuk. “Allah arye, weik meliamsuk bukni, wini talak ara, anggun Israel nang arye, ‘Nun ninye deiyoknye, Raja ton wipdeipsutuba, nun talipsutue’ tenen, moroplume. Anggun ni Allah arye, anggun kanye imun ning ap, ikin ning ap ulalum noutamak arye, lyepropsuk bukni, ‘Deiyoknye Raja arepsutume,’ nyabuka moropmaluma deice arye, anggun ni Allah, si akunum yanipmalume. Aning moropmaluma ati, anggun ap, anggun mapu ap nirya, anggun yala si ap, anggun bona ap aumunye touk, yuk-yuk kibuka, Allah Yahweh el dam yayululume,” Samuel birye nyabuk.

²⁰ Nyabukba, Israel ninye, sik yala yuk-yuk kibuka bulubuka yayikopura, Samuel birye Allah morobukba, Allah arye, laka kilin ning arebukba, Benyamin yala nang wipdeibuk.

²¹ Akunum winibukopura, Benyamin yala nang noutamak bukni, sik yala nirya bulupdeibukce, Allah morobukba, Allah arye laka kilin ning arebukba, Matri yala nang wipdeibuk. Aning atonun winipre banmoka ani, sirya talak ara, ayala noutamak bukni, ninye si Kish, el mi Saul biti, el si wipdeibuk. Atalak ara, Samuel birye, Kish el mi Saul biti, el si wipdeibuk bukni, ‘Saul el nong ara, dan unmal do?’ tenen, eplobik bukni, el nong ton kum eibik.

²² Kum eibika ati, tuba tonap, Yahweh ati, “Nai Allah, anye Saul bira, asukum yanmal do, kum do?” nyabuka, asibuka morobik. Morobikba, Yahweh arye, “Dipkoproba, asukum yanmal bukni, ‘Eipnicak’ tenen, anggun boyanmalum bon-bona deipmaluma noutamak duknubuka yanuka unmale,” nyabuk.

²³ Nyabukba, kekebikopura, adiparyuk Saul dugnupmokak, bikbik abuka, binuka eibikce, el inibuka boyayik. Boyayikopura, aninye urasinak tikukba, sik Israel ninye nirya, bumang nang ulamik bukni, elda cang weiknye anya arye, el kisok ara, sik nirya bisibuk.

²⁴ Samuel birye, Saul inibuka asukumuk tikeibukce, nyabuk. “Israel ninyeo, anggun ni koproba Allah, el si Yahweh arye, wipdeipmasilanye bira, eipmalum do? Israel ninye noutamak ara, el urasin atonye, tonok babye ton kum ulule. Pia telebnye bira, el uka,” nyabuk. Nyabukura, sik Israel ninye nirya arye, “Naie, ‘Elda keting tamun yupa weik pia kam unamle’ tenen, nun kanye deipnuyabe,” nyabuka, kanye deibikce, weik yupu deice arye nyabik.

²⁵ Ura, atalak ara, Samuel birye, Israel nang nirya kekenmekakuk, laka nyabuk. “Ninye deiyoknye, Raja unamle ning ara, ani. Elce winipnamle ning ara, ani. Elce kum winipnamle ning ara, ani. Anggunce elti, wininamlum ning ara ani,” nyabukabukce, ayupu nirya sekuka kintinibukce, Yahweh el dam deibuk. Winibukopura, Samuel birye, Israel nang nirya ati, “Telebe anggun asik koproba, yuk-yuk tamubuka dabilulume,” nyabukba, bindobik.

²⁶ Nyabukura, aninye nirya, akunum sik mutuku tamubuka, bindobikopura, Saul babye adiparyuk, el mutuku Gibea mutuku tamubuka biyuk. Ara, el melina ati, ilil tenena kum, mikip weik yin talen nang ap, neika Gibea mutuku tamubuka biyik. Aning ara, Allah Yahweh arye, sik talima noutam pil dopmok nanguk, Saul ap neika biyik.

²⁷ Bukni, amutuku unmek nang kan-kan ara, ninye yu nang arye ton, nyabik, “Kume anango, anye Saul bira, nun Israel yala ninye unyap mutuku noutam ara, nun mal olan nang ton yatingura, anye birye lyepsutu do, kum do? Anye bira, nun walwale,” nyabik. Nyabukabikce, sik aninye nirya ara, ninye deiyoknye, Raja Saul biti, malya kibuka nyanmek. Nyapmekce, yuk nang arye, Saul biti, teleb aren ning ton boyanuka arebik, bukni, sik amalye nyanmek nang arye, ninye deiyoknye, Raja Saul biti, el deken ning ton, pia kum arebik. Kum arebik bukni, Raja Saul birye, amalye yupu nyanmek nang ati, sik yupu kekebuka bikuk bukni, sikti, yupu ton kum nyabuk. Talye tunim abuka unmok.