1 Samuel 1 - Eipomek

Elkana ap, el kil Hana ap arye, Samuel deiprik ati yupu

¹ Efraim yalanye, el si Elkana, Efraim mutuku dam bukni, Ramataim mutuku ulamuk. Elkana el li koproba, Yorebeam el apu koproba Elihu, el apu Tohu. Tonda Tohu bira, el li si ara, Suf ulamuk.

² Elkana elda, kilapu bitinye domuk. Sik si ara, Hana ap, Penina ap ulamrik. Penina bira, mapu delilamuk bukni, Hana bira, mi ton kum deiamuk.

³ Atalak ara, aketing tamun, aketing tamun nirya, Elkana birye, ‘Na ni Allah el si Yahweh, aning-aning deice tam ululnye, el si erenamne’ tenen, Ramataim mutuku arye, Allah arena ati, el weilamuk kam ning tonok-tonok dobuka, Silo mutuku balamuk. Atalak ara, Allah Yahweh el si eren aik pum tam pil dona deiyok nang ara, Eli el mapu bitinye, Hofini ap, Pineas ap ulamdik.

⁴ Elkana birye, Allah arena ati, kam ning obuka arepnopura, ton tam ara, aning tup kalibuka bokna arye, el kil Penina ap, Penina el mapu bona ap ati, ton arelamuk.

⁵ Winilamuk bukni, Elkana birye Hana biti ara, kam ning obuka, tup kalimna weik ning ara bokuka, Hana arelamuk. Ara, bitinye kibuka, weika arye arelamuk. Bitinye arelamuk ning deiyok ara, Allah Yahweh arye Hanna biti, ‘Mi kum deipnamle’ tenen, you kil kibuka anya arye, Elkana birye bico tenepna arye, weika arye arelamuk. Awinilamuka deice arye, Elkana el kil Hana ati, ‘Bicoʼ tenen, kanye delilamuk.

⁶ Allah el si Yahweh arye, Hanna ati, mi kum meliamuka deice arye, mi kum deiamukce, Hana bira mi kum bopmanto ulamuka ati, ‘Hana bira, malye kanye bopturye, engenamle’ tenen, Penina birye Hana ati, “Anda talye kil uka,” nyabuka yep-yep alamuk.

⁷ Aning ati ara, aketing tamun, aketing tamun deice nirya, ‘Yahweh ati si erepnamap’ tenen, Allah el si eren aik dam, kam ning obuka arelbin talak ara, Penina birye Hana biti, “Anda mi ton, kum deipmanto okil ulyam ati, mi kum deiplume,” nyabuka, yep-yep alamuk ati, Hana bira, ikin kanye bobuka engelamukce, sik ap din neika kum dilamik. Hana bira, ikin kanye bolamuk arye, din mitik anun babye, kum dilamuk.

⁸ Winipna talak ara, el domuknye, Elkana birye Hanna ati nyalamuk. “Yata deiyok ati, Hana anda engenauk umince, din nun ap neika kum dinyap do? Tonda, yata deiyok ati, ikin kanye boplum do? Tonda, anda, ‘Mapu tagu barye (10) deiptinyeura, kanye telebe tenelyam do? Ara, mitik ikin bukni, nara weik mambule,’ kum tenemince do?” nyabuka asilelamuk.

⁹ Tonok sum ton, Silo mutuku noutamak arye, sik nirya din ap, mek ap, akunum dibuka, sirya dakik talak ara, Hana adiparyuk tikukabukce, Allah moronmokce, engenmok. Engebuka, Allah moronmok talak ara, Allah el aik pil dona deiyoknye, el si ara Eli, Allah Yahweh ati arelamik aik dam bukni, anyaik bublan dam tuba bukmokce, kekenmok.

¹⁰ Abukmokce, kekenmokba, Hana bira, pia ikin kanye bopmukce, mur-mur abuka, weika arye engenmokce, Allah el si Yahweh ati moronmok. Atalak ara, ayupu nyabuk.

¹¹ “Na ni Allah Yahweh, anda aning-aning deice tam umince, mikip weiknye ulyame. Ance na kanye imun unilye ning ara, elinilyame. Nara, an amu tamuk unirye, an yupu uk kekenune. Aning ati ara, Yahweh ance nati, luba kina kume. Ance na ikin unulul ning ati melipnimince, sal mi tonok arepniminba, ami ara el potong babye, kolona kum diparyuk, el nong nirya ara, anuk arepnamkine,” nyabuka moronmok.

¹² Hana birye Allah ati, pia moronmokbuk, Eli birye, Hana el si bam bol dam dinmokce, kekelenmok.

¹³ Hana birye, Allah moronmok talak ara, el si bam bol lulukunmok bukni, mur-mur abuka nyanmok ati ara, Eli birye, Hana nyanmok yupu kum kekepmanto ubuk. El yupu kum kekepmoka anya arye, Eli birye, Hana biti, ‘Akil ara, kanye wangan mek dipmalce, mor-mor abuka engenmal do?’ tenenmoke.

¹⁴ Utenenmoka anya arye, Eli birye Hana biti nyabuk. “Akilo, like yata barye arye, ninye kanye wangan mek tuba dipmalam do? Ninye kanye wangan anggur mek aupmakil ning ara, dikdonoklyame. Aning ara, dina meme,” nyabuka wenebuk.

¹⁵ Nyabuka wenebukopura, Hana birye tamubuka nyabuk. “Kume na nio, nara ninye kanye wangan mek aning-aning nirya, kum dinune. Nara, ikin kanye bopmana ati, ikin unilye ning ati engenmance, na ni Allah el si Yahweh ati, na talima pum tam unulul ning arye, elti, nyanmance, moronmane.

¹⁶ Ati ara, ance nati, ‘Akil ara, pia malye un kil,’ kum tenenamnilyame. Aning ara, kum wininun bukni, weik ikin kanye bopmana ati, na ikin unilya deice ati, Allah moronmane. Nara, an amu tam atonun kil ununa ati ara, telebuk tenenamnilyame,” Hana birye, Eli biti nyabuk.

¹⁷ Nyabuka moronmokba, Eli kekebukce, nyabuk. “Akilo, telebe. ‘Kanye deibuka, an aik koprop tamubuka binulyame’ tenen, Allah moropnukine. Tonda, ‘Israel ninye ati, kalikuka, pia melilul Allah arye, an morolyam yupu kekepkilirye, an tenepmalam touk eripnamkil’ tenen, moropnukine,” Eli birye nyabuk.

¹⁸ Nyabukba, Hana birye, tamubuka nyabuk. “Telebe na ni. ‘Nara, an amu tam pil don kil atonun unune. Teleb uptiniba, ance kanye deipnutum’ tenen, Allah moropnukine,” nyabuk. Nyabukce, anyaik batakuka bindobukce, din binuka dibukopura, el urasin teleb ubuk. Winibuk talak ara, malye kanye tuba kum bobuk.

¹⁹ Asum ara, sik nirya mapmeka ani, beren tam koproba arye, Elkana el bona nirya bukuka, Yahweh el si akunum erebikopura, tuba tamubuka, sik mutuku koproba, Ramataim mutuku biyik. Aminyan talak ara, Elkana ap, el kil Hana ap, asukumuk daulamdikce, el kil ap neika mapdikura, Allah arye mi arebukba, Hana birye Allah ati, morolamuk ning ara, akunum arebukura, aminyan talak sal mi deibuk.

²⁰ Ura, Hana mi bomuk ani, sal mi deibuk. Deibukura, ami el si ara, Samuel nyabuk. Samuel nyabuka deiyok ara, ani. Ara, sik Ibrani yupu deice arye, Samuel nyalamik ning deiyok ara, ‘Allah kekepmanile’ tenen, nyalamik. Ara, ‘Nara Allah ati, tuba pia morolamsa ati, Allah arye kekepnukce, arepnuke,’ tenebuka ati, ami si Samuel nyabuka sisibuk.

Hana birye, el mi Samuel bobuka, ‘Allah el piluk donamle’ tenen, arebuk yupu

²¹ Allah el si Yahweh, el si erena ap, arena ap ati, kam ning obuka, arin talak akunum kibukopura, Elkana ap, el bona nirya ap, adiparyuk Silo mutuku biyik. Winibik talak ara, Elkana birye, ‘Allah ati nyalilamsik yupu dipkoprop, adiparyuk winipnamne’ tenen, biyuk.

²² Elkana ap, el bona ap ara, nirya bobiyik bukni, atalak ara, Hana bira neika kum biyik. Hana birye, el akanye biti nyabuk. “Nara, ami moum dinilamniba, moum dilamlye ani, aminyan talak moum dakipniba, din sirika akunum dilyopura, ‘Samuel bira, Elia el dam ulirye, Allah el pil pia donamle’ tenen, ami bobuka, Silo mutuku bukni, nabi Eli el dam bobinuka arepnamne. Arepneba, Eli birye, ami kwangnapnamle. Winipniba, pia abinuka unamle,” nyabuk.

²³ Nyabukopura, Elkana birye, “Telebe, an tenepmalam sum akunum uplyopura, Allah ati nyalamlum atonun winipnalyame. Ami moum dilamlye ani, dakipminba, din sirika akunum dilyopura, ami bobuka, Allah ati arelyanalyame. Tonda, ‘Allah melipkiliba, ance elti, nyaplum yupu, dipkoprob winipnalam’ tenen, Allah moronamkine,” nyabuk. Nyabukce, Hana Ramataim mutuku ulamukce, el mi ati moum dinilamuk.

²⁴ Samuel akunum moum dakeibukopura, mitik talak aryuk, el lin birye ami ap, sapi basam keting tamun winilye ning ap, tonda yakong atonun ning, el si ara, gandum, ikin 22 liter ap, anggur duk mek tonok makau ap, (ara yo bol lin aling arye libuka bobiyuk ning), bobuka Yahweh el si eren aik, Silo mutuku bobiyuk.

²⁵ Bobiyukopura, asapi basam binuka obikce, ami dobukabukce, Eli dam bobiyuk.

²⁶ Hana birye, Eli biti nyabuk. “Na nio, anda na deiyoknye atonun ulyame. An arye nati tuba tenepnulum do? Dipkoprop, na anyaik noutamak yan tikuka, Allah el si Yahweh ati morolamsiba, elilamnulum kil ara, natia.

²⁷ Pia keting tamun weik noutamak arye, Allah ati morolamsa ani, wini talak ara, Allah morolamse touk, Allah el si Yahweh arye, ami akunum arepmanil atia.

²⁸ Ati ami ara, narye, Allah el si Yahweh ati arepne. Akunum arepmana anya arye, el kam unamle talak nirya ara, Allah Yahweh el piluk donamle,” nyabuk. Nyabukabukce, el mi Samuel arebukba, Samuel birye, Allah el si Yahweh ati, anyaik pumuk el si erelamukce, pil dobuka ulamukce, nepnin balamuk.