1 Peterus 5 - Eipomek

Allah yupu aik talina deiyok nang ati, nyabuk yupu

¹ Anggun kan-kan unyak ati, Allah yupu aik talina deiyok nang ati, ayupu ton nyapnusine. Ara, na babye Allah yupu aik talina deiyoknye birye, na nyapnusin yupu kekebuka, ‘Wininamlulum’ tenen, moropsine. Tonda, Kristus nong deice ikin ning deibikbuk donmoka ani, obikbuk dibuka ara, na asing arye akunum eipse. Tonda, Yesus tamubuka yanamle talak, Allah arye weik teleb ubuka mambul ning ap, dirina weik ap, upnamsil talak ara, na ap unamabe. Aning nirya wininye deice arye, na Peterus arye moropsine.

² Domba basam weina deiyok nang arye, sik domba basam ati bico tenebuka, teleb ubuka weilamak touk, anggun babye, Allah el mapu sik amutamak unyak ninye ati, bico tenebuka nimalye arye melinamlulume. Ara, sik amutamak unyak ninye ati, ‘Sik kanye malye ubicak’ tenen, melipmunce, ‘Kalikuka dilanamlulum’ tenen, nyapsine. Wininamluma ara, ‘Na lik,’ tenenun bukni, ‘Allah arye pia pi donilya ati, wininamne,’ tenena kume. Aning kum bukni, Allah arye, ‘Na mapu melina ati teniltona kum arye, kanye deibuka melinamak’ tenen, ‘Patalul ak tenesilye touk wininamlum’ tenen, nyapsine. Tonda, ‘Yo bok weik arepsiting ak, teleb ubuka utibye,’ tenena kum arye, kanye deibuka talye luba kibuka melilanamlulume.

³ Tonda, Allah arye, ‘Na mapu melinamak’ tenen, anggun amutamak deipsuk ninye ati, aning tenenamlulume. Ara, ‘Nun teleb-teleb ubuka diksukumuk winilamepyebuk, eipsikirye sik babye atonun diksukumuk unamak’ tenen, lagakilin nang atonun unamlulume. ‘Nada weik mambulnye’ tenen, kanye erebuka anggun amu tam unyak ninye ati, kum yaninamlulume.

⁴ Anyapmasin touk akunum winipmunyopura, nun Domba basam weina Deiyoknye atonunye, Yesus Kristus tamubuka yalyopura, elce anggunti, pia teleb mingne ning, pia teleb ulirye, min kum danmanto kum ning arepsiliba, dopropnamlume.

Sik wisi danana kum arye, kam nang atonun nang ati, nyabuk yupu

⁵ Asurat deice arye, “Yuk nang ati, nimalye arye sik amutamak unamlulume,” nyapmasin touk, anggun wisi danana kum arye, kam nang atonun nang ati, ayupu nyapsine. Ara, sik wisi nang amutamak umunce, sik yupu kekebuka nimalye arye unamlulume. Buku Amsal yupu noutamak sekeipsik yupu aupmala ati nyapsine. Ayupu ara ani. ‘Sik kanye erebuka, dildanyak ninye ara, Allah arye aninye ati bataklirye, sik yupu sekelule. Bukni, sik kanye darabuka, talima nimalye arye amutamak unyak ninye ati ara, bico tenepsilirye, talye luba kibuka melisulule.’ (Amsal 3:34) Ayupu tuba awamsuka ati, anggunce yuk ninye nirya ati, anggun bidamnye kanye darabuka, talima nimalye arye teleb ubuka unamlulume.

⁶ Aning ati ara, Allah el mikip pia weik ululnye, el amu tam bukuka, anggun kanye darabuka, talima nimalye aryuk unamlulume. Winibuka umunyopura, Allah arye tenepsuk talak akunum uplyopura, anggun dobuka ereipnamsile.

⁷ Allah arye anggun nirya ati, bico tenepsilirye, pia melisulula anya arye, anggunce, ‘Se, yata wiripnuyap do?’ tenen, imun kanye bobuka, teniltonauk usilye ning nirya ara, Allah el deiceuk delinamlulume.

⁸ Ara, yuk yupu ton nyapnusine. Anggunce anggun bidamnye ati, ‘Malye ubibyak’ tenen, kanye moupmunce kalikildanamlulume. Tonda, leibuka unamlulume. Isa Mutuku Dongonye ara, anggun oldan nang atonun usulule. Elda, singa do, bai kam do, atonun, ‘Yata ning obuka diptinye do?’ tenen, kalikinmalirye, obina yana kibuka kalikilsulule.

⁹ Winisulula ati, lik tenebuka bisipmunce, malye kinamlulume. Ara, anggun diba tenelulum touk, mutuku-mutuku nirya diba tenenyak ninye ara, anggun ikin usilye touk, aninye nirya babye, ikin ulule. Aning ara, anggun akunum kel kiyamluma ati, anggun akunum diba tenyamlum ning tunim abuka, talibuka umunyopura, Isa Mutuku Dongonye ati, lik tenebuka bisipmunce, malye kinamlulume.

¹⁰ Winibuka umunye talak noutamak arye, ikin ning ton upsilyopura, Allah elce anggunti, teleb kipdeipsilirye, ‘Darapdongobuka unamak’ tenen, mikip arepsilyopura, pil pia palibuka dona ati deiyok ning arenamsile. Allah arye, ‘Sik ap, Yesus Kristus ap, kanye dukdongobuka unyaka deice arye, pia kam unamake. Teleb arye dirina kan-kan ak, na ap dukdongobuka neika unamap’ tenen, yukupsuke.

¹¹ Pia minop talak nirya arye, mikip ulirye, aning-aning nirya talibuka, malye kibuka batakanamlanye bira, Allah el uka. Akunuma.

Surat sirya dakana ati, “Telebe,” nyabuk yupu

¹² Silas melipnuka deice arye, abumang surat ara, na Peterus arye sekeipsene. Na kwit Silas ara, diba tenebuknye anya arye, nati kum batakanululce, melinululba, nun ap, neikak neika pil donyame. Elda, na weit atonun unulule. Asurat sekeipsina deiyok ara, anggun talima barina ati sekeipsene. Tonda, Allah arye, ‘Na pil donamak’ tenen, talye arisilya pil dona deiyok ning ap, Allah el kanye aniryuk talye melisilye ning ap ara, ‘Dipkoprop ninguk, akunum laka nyapsile tenenamak’ tenen, asurat ara, sekeipsene. Anyapmasin yupu nirya ara, dipkoprop anya arye, ayupu talipmunce, tunim abuka unamlulume.

¹³ Allah arye anggunti, ‘Na mapu unamak’ tenen, wipsuk touk, Babilon mutuku wibuka deiamukbuk, diba tenenyak ninye arye, anggun yuk mutuku ululum nang ati, “Telebe,” nyasinyake. Aning atonun, na mi Markus arye anggunti, “Telebe,” nyapdeipsuke.

¹⁴ Anggunce yuk diba tenenyak ninye ati, pia dipkoprop bico tenebuka, taruk arepdamunce, kildanamlulume. Anggun ap, Yesus Kristus ap, talima dukdongobuka umunye ninye nirya ara, ‘Kanye deipdamunce neiktoto teleb ubuka unamak’ tenen, Allah morosunune. Telebe, na Peterus arye asurat sekeipsene. Asukum anyuk deipne.